““Yalovinaka Vukei Koya,” Liaona, Jiulai 2024.
Domodra na Yalododonu Edaidai
“Yalovinaka Vukei Koya”
A vukei au na tuva kawa kei na cakacaka vakaveisosomitaki ni valetabu me’u ulabaleta rawa na yalo ni druka kei na galili.
iTaba ni Valetabu e Manila Filipaini mai vei Russell Sun De La Cruz
Dua na siga ni’u cakacaka tiko, au a rarawa ka galili. Au vakabauta ni’u a sega ni dina vei ira na noqu qase e liu ena vuku ni veicala e vuqa au a cakava. Au a vakatakekere vua na Tamaqu Vakalomalagi me vakaukauwataki au.
Ni oti e dua se rua na macawa, a lako mai vei au e dua na sisita ni oti na lotu ka taroga se o au beka o Jenny Casama. A vakatakilai koya vei au me o Michelle (Mich) Bautista, e dua vei ira na neimami daunivakasala ni valetabu kei na tuva kawa ena tabanalevu. A vakamacalataka ni a tadra o koya e tolu na marama ka ratou vakaisulu vulavula tu ka yacadratou vakavuvale na Casama eratou a mai kere veivuke vua. Eratou a vakatakekere vei Sisita Bautista, “Yalovinaka vukei koya.”
A kila sara o Sisita Mich ni o iratou na marama oqo a kerei koya tiko me vukea na wekadratou—o au—me’u vulica vakalevu cake me baleta na cakacaka ni valetabu kei na tuva kawa.
A kaya vei au o Sisita Mich, “Daru raica mada ke rawa ni daru kunei iratou na marama oqori ena nomu vunikau ni matavuvale.”
Ena mataveilawa ni FamilySearch, keirau a raica kina na ivolatukutuku me baleti buqu o Damasa Casama; na tacina o Emiliana Casama; kei buqu vakarua o Eugenia Casama. E sega ni vakatitiqataki, keirau a kila ni sai iratou na marama ena tadra. A yaco mai vei au e dua na yalo talei ni vakacegu, ka’u vakila na vuabale ni nodra loloma na noqu qase e liu ena gauna sara ga oya. Keirau a tagi baleta na marau keirau a vakila e lomai keirau. Au a vakila ni ra kauwaitaki au vakalevu, ka kena isau, au a vakila na loloma titobu ena vukudra.
Au qai kila kina na noqu itavi me’u vukei iratou kei ira na tubuqu tale eso me ra ciqoma na cakacaka vakalotu ni valetabu. Era sa wawa tu mai na noda qase e liu—eso ena dua na gauna balavu—me da vakayacora o keda e vuravura na veicakacaka tabu vakalotu oqo ena vukudra.
Emuri ena yabaki oya, au a papitaiso ena valetabu ena vukudratou na tolu na tubuqu oqo. Au vakadinadinataka na totoka ni cakacaka ni tuva kawa kei na kaukauwa e kauta mai kina noqu bula.
Me vaka a kaya o Peresitedi Russell M. Nelson: “E dina ni tu ena cakacaka ni valetabu kei na tuvakawa na kaukauwa me vakalougatataki ira era tiko ena taudaku ni ilati, sa tiko vakakina na kaukauwa tautauvata me vakalougatataki ira era bula tiko. E dau vakauqeta na veivakasavasavataki vei ira era vakaitavi kina. Era sa veivuke sara tiko ga me ra vakacerecerei na nodra matavuvale.”
Au kila ni dina na Lotu ka da na sega ni rawa ni vakavinakataki sara ke sega o ira na tubuda.