“A Diva na Yaloqu Meu a Bau Tiko Talega Kina,” Liaona, Julai 2024.
Domodra na Yalododonu Edaidai
A Diva na Yaloqu Meu a Bau Tiko Talega Kina
E dua na italanoa taleitaki ena ivolanikalou a yaco mai me isau ni noqu diva tu me’u voleka yani vua na Tamaqu Vakalomalagi kei na Luvena.
Na iKarua ni Lako Mai, mai vei Harry Anderson
Au a lako mai ki na valetabu ena dua na siga kei na dua na taro e yaloqu: “Tamaqu Vakalomalagi, sa vakacava tiko beka na noqu toso ena kosipeli?”
Au a vakila wasoma na noqu malumalumu eso vakabibi ena macawa oya. Me vakataki Nifai, au a vakila ni’u sa vakaogai tu ena ivalavala ca ka sa vakaleqai au vakarawarawa. Ia, me vakataki Nifai talega, au a kilai Koya ka’u sa vakararavi vua. (Raica na 2 Nifai 4:18–19.) Au a nuitaka ni noqu tiko vata kei na Turaga ena Nona vale ena mataka oya ena vukea me vakavolekatataka na yawa ni vanua au vakila tiko.
Au a vakarorogo matua ena soqoni ni edaumeni ka vakavinavinakataka na kaukauwa kei na kila e solia vei au. Ia ni’u curu yani ki na rumu vakasilesitieli, a se bibi tikoga na yaloqu. Me’u na kila beka vakacava na vanua au tu kina vata kei na Turaga?
Au a dabe ka vakanananu vakatitobu me vica na miniti ka qai, ena yalo ni vakasuka, tekivu me’u tucake. Ia a dreti au sobu tale e dua na ka, ka vakadaberi au sara vakatitobu ki na idabedabe. “Au sega ni via biubiu,” au vakasamataka.
Au rai wavokita na rumu ka raica e dua na droini kilai levu i Jisu Karisito ka ra vakavolivoliti koya tu na agilosi, ka dodoka tu mai vei au na Ligana. A votu mai noqu vakasama na vosa ni dua na ivolanikalou taleitaki: “A diva na yaloqu me’u a bau tiko talega kina” (raica na Alama 36:22).
Au dau vakasamataka vakatitobu na bibi ni tikina oya ena italanoa kei Alama. E liu, ena vuku ni nona ivalavala ca, na vakanananu ni tucake tu ena mata ni Kalou a vakasinaiti Alama ena “rere e sega ni vakamacalataki rawa” (Alama 36:14). Ia ni sa vuki oti vei Karisito, a raica o koya na Kalou ni ra vakavolivoliti koya tu na agilosi, ka “a diva na [yalona me] … a bau tiko talega kina.” Na veibasai vakaivolanikalou oqo e dau tarai au sara ga ni sa totoka. Na sasaga lailai nei Alama me rai kivua na Turaga a vakilai vakalevu sara e yalona.
Au qai kila ni’u sega ni tu vakarau me’u biuta na rumu vakasilesitieli baleta, me vakataki Alama, a diva na yaloqu me’u tiko talega kina—ena valetabu ena siga oya ka qai kena itinitini vata kei na Tamada Vakalomalagi kei Jisu Karisito ena noqu itikotiko vakalomalagi. A vakayagataka na Yalo Tabu na noqu italanoa taleitaki ni ivolanikalou me tukuna vei au ni kila tu na Kalou na yaloqu. A vakananumi kina vei au ni dina ga ni tu noqu malumalumu, sa ciqoma na Turaga na noqu sasaga me’u voleka yani Vua. A kila tu o koya ni’u diva me’u tiko talega kina.