“Na Dina e Rua e Vukei Au meu Kila Vakavinaka na Yalomalumalumu,” Liaona, Jiulai 2024.

iTabagone Qase Cake

Na Dina e Rua e Vukei Au meu Kila Vakavinaka na Yalomalumalumu

Mai vei David Adriano

Na yalomalumalumu e rawa ni vukea ruarua na dokadoka kei na vakilai ni tawayaga.

iVakatakilakila

cauravou itabagone qase cake ena dua na rumu ni kalasi ena lotu

Kedra itaba na lewenilotu e Paraguay mai vei Leslie Nilsson

Na ka dina: Au sa dua na luve ni Kalou O ya e dua na dina veivakurabuitaki ka vakalou.

E dua talega na ka dina bibi sara: Me vaka ni ra sa luve ni Kalou talega na tamata kecega e vuravura, era sa tamata vakasakiti ka vakalou talega.

Na dina ruarua oqo e rairai matata tu, ia a taura e dua na gauna me’u vakilai rau ka kila vinaka na kedrau ibalebale ena noqu bula. Ena so na gauna au dau cala ena noqu raica e dua na ituvaki ena dokadoka, noqu nanuma ni noqu sala sa sala dodonu se ni’u sa rawaka vakalevu cake mai vei ira na tani. Ena so tale na gauna au dau cakava na kena veibasai, ni’u vakila ni’u sega soti ni kilikili se yaga vakalevu cake mai vei ira tale eso era tu wavoliti au.

Na isaunitaro ki na dredre ruarua oqori e tautauvata:

Yalomalumalumu.

Au Sega Beka ni Rauta Vinaka?

E dua na ka au sotava ka vakayalomalumalumutaki au dina a yaco ena noqu kaulotu. Au vakabauta ni levu na daukaulotu era dau veimulomulo kaya na vakilai ni yalolailai ni ra tovolea tiko me ra kauti ira mai na tamata vei Jisu Karisito. Ena noqu kaulotu, au dau vakayagataki gauna vakalevu ena dua na siga ni’u tovolea tiko me’u kunea e dua me’u vakavulica ia au dau sega ni ciqomi wasoma. Au a sega ni vakila na rawaka. Au a sega ni vakila ni sa rauta vinaka na noqu sasaga. Kena itinitini, a tekivu me’u vakila ni’u sega ni veirauti.

E dina ni na rairai sega beka ni vaka na yalomalumalumu na veika au gadreva, ni’u vakamacalataka na veika au vakila vei noqu peresitedi ni kaulotu, a vukei au o koya me’u raica ni tiki ni noqu leqa oya noqu nanuma ni’u a vakuwai mai na veileqa era sotava tu na daukaulotu e vuravura taucoko. Ia e sega ni’u imatai ni daukaulotu me’u sega ni ciqomi, ka’u na sega dina ni kena iotioti.

Ia au a vakadeitaka ni noqu dredre a noqu cala ga, dina ga ni so vei ira na daukaulotu vinaka duadua ena itukutuku makawa—me vakataki iratou na Tinikarua na iApositolo taumada, o iratou na luvei Mosaia, kei Alama Lailai—era a sotava na tawa veiciqomi levu sara kei na veivakacacani mai na kena au bau sotava vakadua.

Me isosomi ni noqu lomaleqataki au, a tekivu me’u vakila ni’u duri tu vata kei Jisu Karisito ena noqu sasaga eso. Ia ni’u maduataka na noqu sasaga tawayaga, au nanuma sara na ka a vakavulica o Peresitedi Jeffrey R. Holland, Peresitedi Vakatawa ni Kuoramu ni iApositolo Le Tinikarua: “Na Veisorovaki [i Karisito] ena roqoti ira vakabibi cake sara na daukaulotu mai na roqoti ira na dauvakatataro. Ni o sotava na dredre, ni o sega ni ciqomi, … o sa tucake tu vata kei na bula vinaka duadua e se qai bau kila na vuravura oqo, o koya duadua ga na bula savasava ka uasivi sara e se qai bau bulataki vaka dua.”

Au se dau railesuva tikoga na veika oqo ni’u gadreva me’u nanuma me’u dau yalomalumalumu ka nuitaka na Turaga.

E Dua na Lesoni ni Yalomalumalumu

Au a vulica e levu na ka me baleta na kequ ivakatakilakila vaka dua na luve ni Kalou ni’u a se kaulotu voli. Ia ni’u sa lesu i vale, au qai kila ni se levu tu na ka me’u vulica me baleta na kena bibi me’u dau nanuma tiko ni ra sa luve ni Kalou talega na tamata tale eso.

Ni’u lesu ga i vale, au a biu sara ena dua na veikacivi dredre ka’u lesi me’u liutaka e dua na soqo bibi. Au a vakadrukai, ka’u sega ni rawa ni tauri ira vinaka na tamata era a dodonu me ra vukei au tiko. Au a vakauta e dua na imeli, ka via kaukauwa dina toka na kena vosa.

Au a dina ni sa ka bibi na veikacivi ka’u a gadreva vakalevu cake na veitokoni, ia au qai kila totolo ni rairai oqo e sega ni sala vinaka duadua me’u vakauqeti ira kina na tamata. Au a gadreva na yalomalumalumu; Au a gadreva me’u nanuma tiko ni ra vakaogai tu beka ena nodra lomaocaoca vakai ira.

Me vaka a vakavulica o Elder Steven E. Snow ni se lewe ni Vitusagavulu, “Kevaka me da yalo malumalumu, ena saumi mai na noda masu; eda na sotava na yalo vakacegu; eda na yalodina vakalevu cake ena qaravi ni noda itavi; ka, kevaka me da tomana noda vakabauta, eda na lesu rawa tale ki na iserau ni Tamada Vakalomalagi.”

E dina, au sa vakila vakalevu cake na reki ena noqu veikacivi kei na noqu bula ni’u vulica me’u yalomalumalumu cake.

Veiraurautaki e Rua na Dina

Vei au, na vulici ni yalomalumalumu dina sa baleta na kena veiraurautaki na dina e rua oqo:

Au sa dua na luve ni Kalou. Ka ra sa vakavolivoliti tu au e so tale na luve ni Kalou.

Ni’u vulica e levu cake na ka me baleta na yalomalumalumu, au sa qai kila ni dina na veika a vakavulica o Elder Quentin L. Cook ena Kuoramu ni iApositolo Le Tinikarua: “Na yalomalumalumu e sega ni so na rawaka vakatakilai levu se na ulabaleti ni so na bolebole vakaitamera. … Sa ikoya na rawati ni yalodei malumu ni sa rawa ni da vakararavi vua na Turaga ena veisiga kei na veiaua, qaravi Koya, ka rawata na Nona inaki.” Au sa vulica ni rawa ni’u rawata dina na inaki ni Turaga—ia ena gauna ga au solia kina Vua na lomaqu ka nuitaka ni kila o Koya na ka vinaka duadua.

Au kila ni da segata me da yalomalumalumu ka Vakarisito vakalevu cake, ena vakalougatataki keda na Tamada Vakalomalagi ena noda sasaga.

E vakaitikotiko o koya e vola na ivola e Utah, Amerika.