“A Vakaraitaka Vei Au na Kalou ni Tiko na Noqu iNaki,” Liaona, Julai 2024.
iYaloyalo ni Vakabauta
A Vakaraitaka Vei Au na Kalou ni Tiko na Noqu iNaki
Au a lutu mai na dua na vunikau, ia a vakabulai au na Turaga me rawa ni’u vukica na noqu bula ka vukei ira na tamata era vakaleqai tu na yagodra me vakataki au.
iTaba mai vei Christine Hair
Au a tiko ena dua na koniferedi vakalotu vata kei ganequ ni qai kerei au me’u kabata e dua na vuniniu ka kauta mai eso na bu me baleta na koniferedi. Ni’u betia tiko na bu ena vusona, au a matabuto vakasauri ka qai lutu sobu. Au a tavulaki vakaukauwa e dakuqu ka sega ni qai vakila rawa na yavaqu.
Au a kau ki valenibula, ka ra vakasotara vata tale na vuniwai na sui e dakuqu. Me tolu na vula, au a davo vakatadraicake toka e valenibula, ka sega ni rawa mada ga ni’u dabe cake. E a dua dina na gauna ni lomaleqa ka veivakayalolailaitaki. Au davo tu ga e kea ka vakataroga tu se cava ena yaco vei au kei na cava me’u na cakava tarava.
Veivakasalataki kei na Turaga
Ni oti e tolu na vula, a tukuni vei au me laki sele na dakuqu e Niu Siladi. Na veisele oya a qai rawa kina ni’u qai dabe mai na davo tu ga. Ni’u tiko voli e valenibula mai Niu Siladi, au a sotava e dua na goneyalewa ka cakacaka tiko e kea. A tarogi au o koya, “Au kilai iko beka? O rairai matau.”
Keirau a tekivu veitalanoa sara. A wasea o koya na kosipeli i Jisu Karisito ka solia vei au e dua na iVola i Momani. Taumada, au a sega ni wilika. Au biuta tu ga ena yasa ni noqu idavodavo ka sega ni tara. Dua na siga, au a tiko duadua ka sega ni dua na ka taleitaki me saravi ena retio iyaloyalo. Au a qai raica na iVola i Momani ena noqu teveli. Au dolava sara ka tekivu wilika ka wilika.
Ni’u wilika tiko, au a vakila ni tiko e dua na ka duidui me baleta na iVola i Momani ka dodonu me tiko kina na kosipeli dina i Jisu Karisito. Na goneyalewa ena valenibula a makataka tu e vica na tikina, e dua vei ira o ya na Alama 37:37: “Mo vakarorogotaka vua na Turaga na ka kecega ko kitaka, ia ena dusimaki iko ena veika vinaka ko koya.”
A rikavi au mai na veimalanivosa oqori ka vakavuna me’u vakasamataka. Me’u kila kevaka e Lotu dina Na Lotu i Jisu Karisito ni Yalododonu Edaidai, au a kila ni dodonu me’u vakarorogotaka vua na Turaga. Au a vinakata talega me’u laki raica vakataki au na lotu oqo.
Sa Savai Tani na Noqu Yalolailai
Ni’u yaco i vale mai Niu Siladi, au a sureti rau na daukaulotu me rau vakavulici au. Ni’u vulica tiko, au a rawata e dua na ivakadinadina ni oqo na Lotu i Karisito. Au vakavinavinaka vei rau na daukaulotu erau a vakavulici au. Ena noqu papitaiso, a tu vei rau na kaukauwa me rau kauti au ki wai—e dua e tauri au tu e ligana ni papitaisotaki au o koya kadua.
Ena noqu papitaiso, na yalo kece ni lomaocaoca kei na yalolailai au a colata tu sa savai tani. Au a kila ni tiko e dua na noqu inaki ni bula ka lomani au tu na Kalou.
Ni bera ni’u papitaiso, au a madualaka voli me baleta na noqu wilijea. Ia ni’u sa papitaiso oti, au a tekivu lako mai ki na tabanalevu ena vei Sigatabu ka dau vakaitavi ena itaviqaravi ni itabagone qase cake. Au a gole sara ki na danisi ni iteki, ka danisi ena noqu wilijea ki na veisere kece. Au a lewena talega e dua na mataveilawa ni kai Samoa ka mavoa nodra suitu.
Au sa qai kila ni’u sa vakabulai mai na kena vakilai ni’u gadreva me’u vuni. Mai na Lotu, au a yalodei kina me’u lako maliwai ira tale na tamata.
A vukei au talega na Turaga me’u toso ka tubu ni’u a vakauqeti me’u tiko ena dua na parokaramu yabaki tolu ena Koronivuli na Cambodian School of Prosthetics and Orthotics (CSPO). Au a sega ni vakadeitaka ni’u rawa ni curu ki na parokaramu baleta ni sega ni dua ena wilijea e se bau curu kina. Ia, na veika e yaco a vakatara vei au me’u laki tiko ena CSPO e Cambodia. Au a taurivola e kea vaka imatai ni gonevuli ka vakaleqai tu ena itukutuku makawa ni parokaramu.
Ni bera ni papitaiso, a madualaka o Posenai ni dabe tiko ena dua na wilijea. Ia ni oti nona papitaiso, a kaya, “Au sa yalodei sara me’u lako maliwai ira tale na tamata.”
Ni’u lesu tale ki Samoa, au a vosa ena dua na lotu ni TQC me baleta na bulabula ni yago. Ni oti na koniferedi, a lako mai vei au e dua na marama me keirau lululu ka tukuna ni taleitaka na noqu vosa. A se qai lesu walega mai ena kaulotu o Lagimanofia. Mai na gauna au sotavi koya kina, au a vakila ni sai koya ena vakataucokotaki au. Au a masulaka tiko me’u raica e dua e rawa ni noqu itokani ka na lomani au ka ciqomi au.
Ni keirau tekivu veigadivi kei Lagimanofia, a qaravi au ka ciqomi au o koya, ka ratou veitokoni na nona matavuvale. Keirau a vakamau, ka veisau tawamudu na neirau bula ni keirau a vakubeci Posenai Jr. A vakarautaki keirau na Kalou me vakubeci koya. Na nona mai tiko ena neirau bula sa vakamarautaki keirau sara vakalevu.
E Rawa Beka Ni’u Veiqaravi?
Ena lotu, au a kacivi me’u vunivola ni tabanalevu ka qai laki daunivakasala ena matabisopi. Au sega ni vakabauta ni rawa ni veiqaravi e dua ena wilijea. Na noqu vakacalaka a vakavuna me’u vakila ni’u tawayaga, ia na cakacaka ena Lotu au vakila kina ni’u yaga ka vukei au me’u kila ni’u rawa ni cau. Au taleitaka na madigi me’u toro voleka yani vei Jisu Karisito ni’u veiqaravi tiko.
Ni’u dua na daunivakasala ena matabisopi, au a vinakata me’u dusimaki me rawa ni’u vinaka cake ena noqu veikacivi. Oqori a vakavuna me’u vakavakarau vakalevu cake ki na vei Sigatabu yadua. Au a vakaitovotaki au me’u dau wilika na noqu ivolanikalou, ka tu na noqu madigi me’u dau wasea na noqu ivakadinadina. Na noqu veiliutaki ena lotu a vukei au sara mada ga me’u dua na iliuliu ni cakacaka. Au a taracake na yalo ni rawa ni’u veiliutaki ka vosa doudou, ka rawa kina vei au me’u veiliutaki ena veiyasana tale eso.
Oqo au sa cakacaka tiko vaka principal ena Tabacakacaka ni Prosthetics kei na Orthotics ena Valenibula e Tupua Tamasese Meaole, na valenibula levu e Samoa. Na noqu tabacakacaka e dau vukei ira e rauta ni 500 na tamata ena dua na yabaki ena iyaya veivuke ni taubale kei na wilijea. Na Lotu, ena veiqaravi ni Minisitiri ni Bula e Samoa, e dau vukea na kena vakarautaki na wilijea kei na iyaya veiganiti kaya eso (raica na philanthropies.ChurchofJesusChrist.org/humanitarian-services). Na iyaya ni veivuke oqo ena vukei ira na tamata me ra lesu tale ki cakacaka ka bula rawati ira. Era solia talega vei ira na tamata na inuinui kei na sala lesu ki na dua na bula era nanuma ni ra sa vakayalia.
“Na cakacaka ena Lotu au vakila kina ni’u yaga ka kila ni’u rawa ni cau,” e kaya o Posenai. “Au taleitaka na madigi me’u toro voleka yani vei Jisu Karisito ni’u veiqaravi tiko.”
Vakararavi vua na Turaga
Kevaka me’u na vakasalataki ira eso era vakaleqai tu na yagodra, au na kaya, “Kakua ni laiva me tarovi iko na nomu vakaleqai tu vakayago mai na veika o vakabauta. Sovaraka na yalomu ki na veika o via rawata ka cakacaka vakaukauwa kina. Ni o vakasaqara na veivuke ni Turaga, ena vakalougatataki iko o Koya [raica na 2 Nifai 32:9].”
Ena vakabauta oqori, au toso tikoga kina, ka vakavuna me o cei o au nikua. Au vakabauta ni’u a biu eke ka’u a vakabulai ena dua na inaki. Au a lutu mai na vuniniu oya, ia a vakabulai au na Turaga me rawa ni’u vukica na noqu bula ka cakava na cakacaka oqo me vukei ira kece na tamata oqo. Sa vakatavulica vei au na Turaga ni rawa ni’u vukei ira e vuqa na tamata—sega ni veitalia ga na noqu vakaleqai tu ia ena vuku ni ka oqo.