Noqu iTukutuku mai vua na Kalou

Mai vei Don Osaheni Agbon-ogieva, Edo, Nigeria

A sega ni tu vei au e dua na ivakadinadina ni iVola i Momani me yacova ni a vosa vei au na Turaga mai na ivola i Ilamani.

Ni sureti au e dua na itokani ki Na Lotu i Jisu Karisito ni Yalododonu Edaidai ena 2020, au a vakadonuya ena lomalomarua. Taumada, au a sega ni vakila ni oya na vanua me’u tiko kina, ia au a mani tiko ga ena soqoni ni sakaramede. A qai yaco e muri me’u papitaiso.

Ia, au sega ni kila na vakasama me tiko e dua na ivakadinadina me vaka era dau tukuna na vo ni lewe ni Lotu. Keitou a dau wilika vata kei rau na sisita daukaulotu eso na tikina mai na ivolanikalou, ia au se bera vakadua ni dolava vakataki au na iVola i Momani. Dina ga ni ra sasaga vakaukauwa na lewe ni Lotu me ra kidavaki ka vakabulabulataki au, au a tekivu yaco bera mai ki lotu, levea na soqoni eso, ka lesu tale ki na dua na ituvaki vakavuravura.

Qai yaco mai ena dua na siga ni’u a vakila na tavi ni yaloqu ena dua na yalo lomaleqa. Au a vakila ni’u sa rui sega ni dei, vakavuravura, ka veisaqasaqa ki na veika ni Kalou. Au a kila ni’u a sega ni tiko ena sala dodonu. Ni’u tu ena ituvaki oqo, au a rai kivita yani na ivolanikalou ena noqu idavodavo.

Au a masuta na Kalou me tukuna mai vei au e dua na ka. Au a masu vakalailai ka wawa me’u rogoca e dua ga na ka. Au a gadreva na veivakacegui kei na veivakamatatataki.

Au a qai rogoca e dua na ka. Au sega ni kila se basika mai loma ni noqu vakasama se e daligaqu na rorogo, ia au a rogoca na vosa “Ilamani 3:27.” Au a kila ni ivola i Ilamani e tiko ena iVola i Momani, ka’u mani taura na ivolanikalou ka gole ki na ituvatuva ni lewenivola me’u raica kina na ivola oya.

Na ka au a wilika tarava a dua na itukutuku mai vua na Kalou kivei au vakatabakidua ena gauna oya ni noqu bula: “O koya eda sa rawa ni raica kina ni sa yalololoma na Turaga vei ira kece sa masuta na yacana tabu ena yalodra dina.”

Na tikina oqo a veisautaka na noqu nanuma me baleta na noqu ivalavala kei na iVola i Momani. Au a qai kila ni cala na noqu ivalavala kei na noqu sega ni yalodina kivua na Kalou ka’u gadreva me’u masuti Koya ka veivutuni. Au kila ni na sega ni cakitaka vei au na Kalou na Nona loloma veivueti kei na veivakalougatataki kevaka au yalodina tiko ena noqu kacivi Koya ka muri Koya.

Oqori na sala a lako mai kina na noqu ivakadinadina me baleta na iVola i Momani—e dua na ivola au a sega ni taleitaka me’u wilika. Au kila ni bula tiko na Kalou, ni vosa tiko o Koya vei keda nikua, ka sa dina na iVola i Momani.