“Meu Nuitaka Vakacava na Tamada Vakalomalagi Niu Vakila Niu Tucake Duadua Tu?,” Liaona, Julai 2024.
iTabagone Qase Cake
Meu Nuitaka Vakacava na Tamada Vakalomalagi Niu Vakila Niu Tucake Duadua Tu?
Au a tovolea tiko me’u vakabauta ia au sotava tikoga e vuqa sara na bolebole. Me’u na vakararavi tikoga vakacava vua na Turaga?
Droinitaka o Alyssa Petersen
Ratou a vakaveikilaitaki au vei ira na daukaulotu na tavalequ ni’u sa yabaki ciwa. Au a lewena Na Lotu i Jisu Karisito ni Yalododonu Edaidai ia o au duadua ga vei iratou na lewe ni noqu matavuvale voleka au vakayacora vakakina. Mai na gauna oya, au sa vulica me’u taleitaka vakalevu cake sara na kosipeli i Jisu Karisito. Ia, ena dua na gauna, a dredre sara kina vei au me’u nuitaki Tamada Vakalomalagi kei na Nona dina, ka’u saga dredre me’u toso tikoga ki liu ena vakabauta.
Na bula duidui mai na vuravura vaka tisaipeli i Jisu Karisito e rawa ni dredre ena vanua cava ga, ia na tubu cake e Hong Kong vaka dua na lewe ni Lotu e veibolei vakalevu cake sara mai na ka era na namaka beka eso.
Dua mada ga, e vuqa na tamata ena yasayasa oqo era sega ni taleitaka na Lotu ka ra nanuma ni semati tu ki na veika ca. E dua na vosa vaka-Jaina e liu me baleta na “Momani,” ni vakaibalebaletaki ki na Lotu, e oka kina e dua na rorogo e semata oqori ki na vosa vaka-Jaina me baleta na “tevoro.” Vei ira eso, oqo e vakavuna na cala ni kena vakamacalataki na yavunilewa ni Lotu.
Vakakina, baleta ni sa levu sara na lotu vakavanua sa tauyavutaki oti ka vica wale na noda lewe ni Lotu e Hong Kong, e rawa ni rawarawa kina me vakilai ni da galili se tu duadua voli. E vuqa na tamata era vakataroga na Lotu, ka sega ni kila vinaka tu na kena ivakavuvuli ka sega ni vinakata me ra rogoca na veika era via wasea na lewenilotu.
Au a vakila vakalevu na revurevu ni veivakataotaki oqo ni’u se itabagone, ia mai na veika sotavi oqori, au a vulica kina vakalevu na ibalebale ni nuitaka na Tamada Vakalomalagi kei Jisu Karisito.
A Yaga Li na Bulataki ni Kosipeli?
Ena koronivuli torocake, eratou a veitokani voli na noqu itubutubu kei na dua na noqu qasenivuli. Na qasenivuli oqo e a lotu Vakarisito ena dua tale na matalotu. Ena gauna oya, au a lewe duadua ga ni Lotu ena noqu kalasi, ka vuqa na lewe ni kalasi kei na qasenivuli era sa vakasamataka oti tu eso na ka me baleta na Lotu i Jisu Karisito kei ira na lewena.
Na qasenivuli duadua oqo a kaukauwa sara na nona vakanananu ca me baleta na noqu vakabauta, ka vakadredretaka kina na veika eso baleta ni o koya e dua na itokani ni matavuvale.
Dua, au dau sosovu vakalevu ena nona kalasi baleta ni’u dau yadra vakamataka me’u lako ki na semineri ena mataka lailai, ka vakavuna me kauwaitaka o koya ni na luluqa kina na noqu cakacaka ni vuli. A dau biuti au talega o koya ena vanua dredre ka bolei au ena vuqa na taro verevereya vakaivunau ka’u sega ni kila me’u sauma vakacava. A solia sara mada ga vei au o koya na ilesilesi ni vuli me’u wilika na ivola e saqata na Lotu! A saga vakaukauwa sara me vakauqeti au me’u gole tani mai na noqu vakabauta.
Oqo a dua na gauna dredre ni noqu vakabauta. Na cava beka, ni’u tovolea tiko me’u volekati Tamada Vakalomalagi kei Jisu Karisito, a vakavuna tiko kina na noqu yalodina na bolebole kei na dredre ena noqu bula? E sega beka ni dodonu me’u vakalougatataki ni’u maroroya tiko na ivakaro ka solibulataka na moce me’u gole kina ki na semineri?
Ia, a lutu sobu na noqu maka ni vuli, sa malumalumu mai na noqu vakabauta, ka sa vakaleqai na noqu veimaliwai kei ira na noqu qasenivuli, noqu matavuvale, kei na Tamada Vakalomalagi.
Ena dua na gauna lekaleka, au a tekivu vakataroga se sa yaga li na bulataki ni kosipeli. Au a tekivu levea na semineri ka vakila sara ni sa seyavu tiko na noqu vakabauta. A vaka me rawarawa cake me’u soro ga yani ki na veika e vakasaurarataki au tiko kina na vuravura e wavoliti tu au me’u cakava.
Digitaki ni Veivakabauti
Au a masu tikoga vua na Tamada Vakalomalagi me baleta na veidusimaki kei na kila ka. Dina ga ni’u a vakila na veilecayaki titobu kei na yalolailai me baleta na kequ ituvaki, a tomana tikoga na noqu vakabauta e dua na ka e yaloqu. Au a vosa vei ira na noqu itokani yalodina ka vakararavi vei ira na noqu icaba mai na lotu me baleta na veika au sotava tiko, ka’u a vakauqeti me’u vosa vei noqu qasenivuli ni semineri me baleta na noqu veisasaga dredre.
A sauma mai o koya ena yalololoma ka vakayaloqaqataki au me’u tomana tiko na noqu vuli ena semineri ena yalo vakanuinui. A yalataka vei au ni’u na raica ni tevuki mai na veivakalougatataki kevaka au taura matua na vakabauta ka nuitaka ni sa vakarautaka tu e vuqa na ka vei au na Turaga ka na vakatabuya na noqu bolebole (raica na 2 Nifai 2:1–2).
Koya gona, se cava ga na bolebole au sotava tiko, au a digitaka me’u nuitaka.
Ni oti vakalailai, au a vakila ni sa veisau mai na noqu itovo ni rai. Mai na noqu a dau vakanamata tu ki na dredre au sotava, au sa vakanamata ga ki na yalovakavinavinaka au vakila me baleta na kosipeli. Au a tekivu vakanamata ki na veivakalougatataki ni noqu matavuvale, na noqu ivakatakilakila vakalou, kei na dina tawamudu ni kosipeli. Ka yaco emuri, ni’u mai kila ni rau kila vinaka tu na Tamada Vakalomalagi kei Jisu Karisito na veika au sotava tiko ka dau tucake tu kei au ena veigauna oqori ni’u vakila ni’u tucake taudua tu.
Oqo a veisautaka na ka kecega.
Ni’u tomana tiko noqu vakararavi vei Rau, muria na ivakaro, veivutuni e veisiga, ka cakava na veika lalai e veisiga me’u sema vata kei Rau, au a vakila ni vakatitobutaki ka vaqaqacotaki na noqu yavu ni vakabauta.
A kaya wale tikoga oqo o Peresitedi Russell M. Nelson: “Mo ni karona na nomuni ivakadinadina kei Jisu Karisito kei na Nona kosipeli. Cakacakataka. Susuga me na tubu kina. Vakania ena dina. Kua ni vakaduka ena nodra vuku lasu na tagane kei na yalewa tawa vakabauta. Ni o tomana tiko mo vaqaqacotaka na nomu ivakadinadina kei Jisu Karisito me ka bibi duadua vei iko, o na qai sarava na cakamana ena yaco ki na nomu bula.”
Ia ni’u vakayacora vakakina, a yaco dina e dua na cakamana.
Na Cava na iBalebale ni Vakararavi Vua na Turaga
Ni oti vakalailai noqu levea tiko na veivosaki baleta na vakabauta vata kei noqu qasenivuli, ena dua na siga ni a torovi au mai ena vakatataro, au vakila ni’u sa vakarau tu me’u sauma ena noqu vakabauta vakavoui. Au a tarogi koya ena yalovinaka se sa bau sikova mada e dua na soqoni ni lotu se wilika e dua na iVola i Momani. Ni kaya o koya sega, au a vakauqeti me’u wasea na noqu ivakadinadina ni veidina rawarawa.
Au a tukuna vua ni o na sega ni kila rawa kevaka e dina e dua na ka ke o sega ni sotava rawa se vakasaqara na kena isau vakai iko. Au a vakamacalataka ni’u kila ni dina na kosipeli baleta ni’u a cakacakataka me baleta na isaunitaro oya ka vakila e lomaqu ni ra sa dina. Au a sureti koya me cakava vakakina, ka tekivu mai na gauna oya, sa dau veivakacegui vakalevu cake sara na neirau veimaliwai.
Na bolebole ni vakabauta oqo a vakarautaki au vakaidina sara vaka dua na itabagone me’u dua na tisaipeli i Karisito ena noqu veisiga ni mataka. Au sa raica e vuqa sara na veivakalougatataki kei na yalayala era yaco me vua ni’u tomana tikoga na noqu vakararavi vua na Turaga mai na nodra nanuma na tamata kecega. Me vaka a kaya o Nifai, “Oi kemuni na Turaga, au a sa dau vakararavi tiko vei kemuni, ka’u na dau vakararavi tiko ga vei kemuni me sega ni mudu. Au na sega ni vakararavi ki na liga ni tamata” (2 Nifai 4:34).
Ni sega ni yaco na veika me vaka na ituvatuva se eda sotava tiko na dredre eda sega ni namaka, e rawa ni rawarawa me da vakila ni vaka me sa vagolei keda cala na Tamada Vakalomalagi, biuti keda tani, se sega sara ga ni kauwaitaka.
Ia e sega ni dina oqori.
Na ka dina, e dau tu ga ena veigauna ni bolebole veilecayaki ka vakamosi yalo oqori au dau vakananuma kina na ibalebale ni noqu vakararavi vakataucoko vua na Turaga. E dodonu me’u na laiva na noqu bula vakatisaipeli kei na noqu vakabauta me vakaibalebale ka veisautaki-bula ka sega ni vaka-robotic ka vakaivakarau. E vakavulica talega o Peresitedi Nelson, “Na nomu vakabauta bulabula ena vukea mo vukica na ibolebole me ka bula ka madigi tawavakatauvatani rawa.”
Au rawa ni raica na kena sa vakalougatataki au na digitaka na vakabauti Jisu Karisito ena sala e levu cake mai na kena au nanuma ni rawa. E sega ni kena ibalebale oqo ni’u dau drotaka na rarawa, dredre, se veilecayaki, ia e kena ibalebale ni’u kila na vanua meu gole kina me baleta na vakacegu kei na tudei.
E vakananuma vei keda ena loloma o Peresitedi Nelson, “Mo kila: ke na ka kece kei na tamata yadua e vuravura o sa nuitaka ena luluqa, o Jisu Karisito kei na Nona Lotu ena sega vakadua ni biuti iko.”
Se cava ga o sotava tiko ena nomu bula, na veika e sega ni namaki, na veivakaogai mai na domo ni vuravura, leqa ni matavuvale, leqa ni vakasama, veilecayaki vakailavo, kavoro ni yalo, sega ni dodonu, se dua tale na bolebole, au na sureti iko mo tomana tikoga na nomu vakararavi vua na Turaga. Sa kila vinaka tu o Koya na nomuni ituvaki. E kilai iko o Koya. E tu Vua na veivakalougatataki veivakurabuitaki me baleti iko. Ena veigauna sara mada ga o sega ni vinakata kina mo vakararavi Vua, digitaka mo cakava ga. Sa dei tu ga Nona yalayala. Ena liutaki iko o Koya ki na reki, inuinui, kei na cakamana ena kena gauna.
E vakayacora vakakina vei au o Koya ni’u tomana tiko noqu vakararavi Vua.