Na Cava Eda Rawa ni Masulaka?

Ena Alama 33 kei na 34, eda vakavulici kina ni rawa ni da masu ena dua ga na vanua, ena dua ga na gauna, me baleta e dua ga na ka. Oqo eso na ivakaraitaki ni masu yadudua ena veituvaki duidui.

Ni o wilika na veika sotavi oqo, vakasamataka eso na sala o sa masulaka kina “me baleti ira na [nomu] qele ni manumanu” ena “[nomu] loqi, kei na [nomu] tikina vuni, kei na [nomu] lekutu” (Alama 34:25, 26).

E dua na Yalododonu Edaidai o Alama Richards a lewena na timi ni Olimipiki ni 1912.

Masu ena Olimipiki

E dua na daunilade cecere, o Alma Richards a lewe ni timi ni Olimipiki ni 1912 ka ra qito mai Stockholm, Suwiteni. Ena gauna ni qito veisisivi oqo, era a lutu yadudua yani na daunilade tale eso me yacova ni sa vo ga o Alama kei na dua tale.

“Ni sa vakarau me lade o Alama, sa veiciciyaki na nona vakasama. A tu e kea o koya, ka matataka tiko na nona matanitu ena veisisivi qito levu duadua e vuravura. Ia a vakila o koya ni malumalumu, me vaka ga ni sa taqa tu e tabana na vuravura taucoko. A vakasamataki Utah, nona matavuvale, kei na nona tauni. A vakasamataki BYU kei ira na Yalododonu. Ni cuva sobu na uluna, a kerea lo vua na Kalou me solia vua na kaukauwa. ‘Kevaka e dodonu me’u qaqa,’ a masulaka o koya, ‘Au na cakava na noqu vinaka taucoko me’u ivakaraitaki vinaka ena veisiga kece ni noqu bula.’”

Ni taura na kaukauwa mai vua na Turaga, a ladeva rawa o Alama na kena e cecere i cake. Ni sega ni rawata o daunilade kadua, a qaqa kina o Alama ka rawata na metali koula.

e ladeva tiko na tagane e dua na lade cecere

Ni oti oya, a “vakalialiai koya e dua na itokani baleta na masu ni bera na lade oya. ‘Au diva mo kua ni dredre,’ a sauma vakamalua yani o Alama. ‘Au a masu vua na Turaga me solia vei au na kaukauwa me’u ladeva rawa kina, ka’u a qai rawata.’”

Masu tiko ena dua na Tutu ni Gaunisala

Ena 1898, rau a imatai ni rua na marama sega ni vakawati o Inez Knight kei Jennie Brimhall me rau sisita daukaulotu me baleta Na Lotu i Jisu Karisito ni Yalododonu Edaidai. Ni oti vakalailai nodrau yaco yani ki Igiladi, rau a laki vunau na marama oqo e Oldham, e dua na tauni ni buli iyaya lailai volekati Liverpool.

rua na sisita daukaulotu — Erau a masu o Inez Naiti kei Jennie Brimhall me rau vukei ena nodrau veiqaravi vakadaukaulotu e Igiladi.

Era a soqoni vata ena dua na bogi o rau na sisita, nodrau peresitedi ni kaulotu, kei na so tale na daukaulotu. “Era bulia e dua na iwirini ena dua na tutu osooso ni gaunisala, cabora e dua na masu, ka laga serenilotu me yacova ni ra sa vakavolivoliti ira mai e dua na ilawalawa levu.” A mana sara na nodra sasaga ka kacivaka kina na peresitedi ni kaulotu “ni na vakayacori e dua na soqoni digitaki ena siga ka tarava, ka sureti ira kece me ra lako mai ka rogoca na vunau mai vei ira na ‘marama Momani dina.’”

Masulaki ni Veilakoyaki

A vodo tekisi motopai o Sahr mai Bo, Sierra Leone, ki na dua na taudaku ni koro vakavalagi me kauta na wainimate gadrevi vakalevu vei rau na nona itubutubu sa qase. A mani tiko tale vakalailai me vukei rau na nona itubutubu me vakavinakataka na nodrau delavuvu, ka a vakacacani ena dua na cagilaba. Ena gauna qai caka oti kina, sa yakavi bogi sara.

Ena vuku ni bera ni auwa oya, sa na sega ni rawa ni lako mai e dua na tekisi. A yaco me lomaleqa o Sahr. Ni sega na tekisi, ena sotava o koya e dua na taubale ka sega walega ni balavu ia e rawa talega ni rerevaki. Na moce ena nodrau vale na nona itubutubu e sega ni ganita baleta nona cakacaka e tekivu totolo ena mataka tarava. Me kena ikuri, a sega ni vinakata me biuta duadua tu na nona matavuvale gone ena bogi.

Na masulaki ni dua na tekisi motopai e vaka me duatani toka, ia a kerea na Kalou o Sahr me vukei koya me lako i vale. Ni oti ga e vica na miniti, a basika mai e dua na tekisi, ka se qai vakasobura oti ga e dua ena vanua vakanomodi oya. A vodo yani ena vakavinavinaka o Sahr, ka vakila ni a vakalougatataki me rawa ni tiko e vale ni vo levu na gauna me maroroya kina na nona cakacaka ka taqomaka nona matavuvale.

Masulaki ni Veisau ni iTuvatuva

A nanamaki tiko o Brother Miguel Troncoso mai Santa Cruz, Argentina, me rogoci Elder Carlos H. Amado ena Vitusagavulu me vosa ena nona iteki. Ia a vakarautaki o Elder Amado me vosa ena dua na yakavi ni Tusiti, ka me vakavulica e dua na kalasi ena bogi o ya o Baraca Troncoso, e dua na qasenivuli ni koronivuli torocake. Ni vakadeitaka me ratou tiko ena soqoni, eratou a masulaka vaka matavuvale na veivuke.

E tukuna vaqo o Baraca Troncoso me baleta na veika a sotava:

“Na siga ni bera na koniferedi, au a vakauqeti me’u kerei qasenivuli liu me’u suka totolo ni se vo e 20 na miniti. … Ni bera ni’u kaya e dua na ka, a tarogii au o koya ke’u rawa ni veisautaka na noqu kalasi ni Tusiti me tekivu totolo ena rua na auwa mai liu. …

“Sa dua dina na veivakalougatataki oqo vei keitou. Keitou a yaco yani ki na soqoni ni se vo levu na gauna ka vakila na Yalotabu e matana e dua na tisaipeli ni Turaga. … Me kena ikuri, keitou a rawata e dua na ivakadinadina vakamatavuvale ni sa kila tu na Tamada Vakalomalagi na noda gagadre ka dau rogoca na noda masu.”