Mai na Butobuto ki na Bula Marau

Mai vei Helen Hughes, Durham, Igiladi

Ni’u a tokaruataka ena noqu vakasama na vosa ni cakacaka vakalotu ni valetabu, a yaco e dua na ka veivakurabuitaki.

Ena 1988, au a lako vata kei ira eso tale na qasenivuli ni Peritania me laki veivakavulici ena dua na koronivuli mai Sudan. Era a marautaki sara na gone, ka keimami veisau vakatotolo ki na dredre ni bula ena dua na matanitu sa vakatorocaketaki tiko. Ia, o koya e vakacakacakataki keimami a dua na iliuliu dau veivakasaurarataki ka dau vakacacana e dua ga e kila ni saqati koya tiko. A cati au o koya mai na siga au a saqati koya kina me baleta e dua e a vakacacana o koya.

E kacivi au okoya ena nona valenivolavola. E sivia e veimama na auwa na nona vosataki au ena veimataqali veivakacacani kei na veivakarerei kecega. Au a biubiu mai na rumu ena dua na ituvaki ni kidroa. Au sega ni nanuma rawa na noqu lako curuma vakacava na vo ni siga ni vuli oya. Ena yakavi taucoko au a sega ni kauta tani rawa mai noqu vakasama na nona veivosa rerevaki.

Ena gauna ni moce, au a dabe ena noqu idavodavo ka wilika na ivolanikalou. Au a qai tekiduru ka masu vagumatua me’u vakacegui, ia au a sega ni vakila rawa e dua. Au a mai davo yani ia au sega ni rawa ni moce. E vakarua tale na noqu duri cake, wiliwili, tekiduru, ka masu, ia a sega ni yaga.

“Ia, sa vinaka,” au vakasamataka, “Na Tamada Vakalomalagi e sega ni dau sauma na noda masu ena ivakarau kei na gauna eda vinakata kina.” Au mai vakasuka yani ki na dua na bogi ni rarawa, kei na tawa moce rawa.

Ia ni’u davo sobu tale, au vakasamataka sara, “E dua tale na ka au rawa ni cakava.” Au a tekivu tokaruataka ena noqu vakasama na vosa ni cakacaka vakalotu ni valetabu. Ni’u vakayacora oqo, a yaco e dua na cakamana veivakurabuitaki. A seavu tani vei au na rarawa kei na butobuto kece, ka drodro mai na vakacegu kei na reki totoka duadua ka vakasinaiti au vakataucoko sara.

Au a tacake ka masu, ka vakavinavinaka vua na Tamada Vakalomalagi. Au a qai davo tale ka moce. Ena siga ka tarava, ka dodonu me sinai tu ena rere kei na rarawa, e a qai siga marautaki duadua au a se bau vakayagataka vata kei na dua na kalasi ni gonelalai.

Au qai kila ni a vinakata na Turaga me’u vakasamataka vakatitobu na cakacaka vakalotu ni valetabu. Kivei ira na Yalododonu era takosova na veibuca ni oti na nodra ciqoma na nodra veivakalougatataki ena Valetabu e Nauvoo, e kaya kina o Peresitedi Brigham Young (1801–1877), “Me kama e lomamuni na bukawaqa ni veiyalayalati ko ni a cakava ena Vale ni Turaga, me vaka na yameyame ni bukawaqa sa sega ni bokoci rawa.” Ni sa kama na noda veiyalayalati ni valetabu e yaloda kei na noda vakasama, eda na kunea talega na kaukauwa, tiko sautu, kei na vakacegu.