“Na Cakacaka Cecere ni Turaga kei na Noda Madigi Cecere,” Liaona, Julai 2024.
Na Cakacaka Cecere ni Turaga kei na Noda Madigi Cecere
Nida loloma, veiwasei, ka veisureti, eda sa cakacaka vata tiko kei na Turaga me vukea na yalo talei yadua me lako mai Vua.
O ira kece na parofita ena iotioti ni itabagauna cecere oqo era sa vakavulica vei ira na lewe ni Lotu i Jisu Karisito ni Yalododonu Edaidai mera wasea na kosipeli vakalesuimai i Jisu Karisito. Ena noqu bula, e vica na ivakaraitaki e votu mai ena noqu vakasama:
A kaya o Peresitedi David O. McKay (1873–1970), na parofita ni noqu gauna ni itabagone, “Na lewenilotu yadua e daukaulotu.”
A vakavulica o Peresitedi Spencer W. Kimball (1895–1985), “Na siga ni kena kau yani na kosipeli kina veivanua tale eso kei ira na tamata sa tu oqo ena gauna oqo,” ka “meda vakabalavutaka na noda ikalawa” ena wasei ni kosipeli vei ira na tani.
A kaya o Peresitedi Gordon B. Hinckley (1910–2008): “Sa cecere na noda cakacaka, sa vakaitamera na noda itavi me da veivuke ena nodra kunei o ira mera vakavulici. Sa vakataqara vei keda na Turaga e dua na ilesilesi meda vakavulica na kosipeli vei ira na tamata kecega. Oqo ena taura na [noda] sasaga vinaka duadua.”
Ka sa vakatavulica o Peresitedi Russell M. Nelson: “Na cakacaka ni kaulotu sa dua na tiki bibi ni nodra vakasoqoni vata na Isireli. Na vakasoqoni vata oya e cakacaka bibi duadua ka yaco tiko e vuravura nikua. E sega tale ni dua na ka e vakatauvatani rawa kei na kena vakaitamera. E sega tale ni dua na ka e vakatauvatani kaya na kena bibi. O ira na daukaulotu ni Turaga—ira Nona tisaipeli—era sa vakaitavi ena bolebole levu duadua, na inaki cecere duadua, na cakacaka levu duadua e vuravura nikua.”
Au mai kila oqo vakai au ni’u se daukaulotu gone ena Tabana ni Kaulotu e Peritania. Au sa vakadeitaka vakalevu cake sara nikua. Niu dua na iApositolo ni Turaga o Jisu Karisito, au vakadinadinataka ni sa tu na madigi ena veivanua kacega mera vukei kina na tani mera lako mai vei Karisito ena noda vakaraitaka na noda loloma, wasea noda vakabauta, ka sureti ira mera tomani keda me vakila na reki ni kosipeli i Jisu Karisito.
E Toso i Liu na Cakacaka
A ka dokai vei au meu vakaitavi ena Tabacakacaka ni Kaulotu ni Lotu ena gauna a vakatakilai kina na imatai ni kena tabaki na Vunautaka na Noqu Kosipeli ena 2004, ka vakakina na gauna a tavoci kina na ikarua ni kena itabaki ena 2023. Au vakabauta ni Vunautaka na Noqu Kosipeli e sa vakalougatataka na cakacaka ni kaulotu ena dua na sala bibi sara.
Na Vunautaka na Noqu Kosipeli vou e oka kina na veika kece eda vulica mai na 2004, na veidusimaki veivakauqeti mai vei ira yadua na lewe ni Mataveiliutaki Taumada kei na Kuoramu ni iApositolo Le Tinikarua, kei na veisau eso e vakayacori ena wasei ni kosipeli ena dua na yabaki vakalivaliva. Eso vei ira na veisau oqo e sa yaco kina na rawaka levu.
Eda sa raica ni kena wasei na kosipeli ena sala rawarawa, matau, ka vakaivakarau ena ivakavuvuli ni “loloma, veiwasei, veisureti” sa vakalougatataka vakalevu na matanitu. A wasea vakaoqo o Jisu Karisito na kosipeli ena Nona bula voli e vuravura. A wasea na Nona bula kei na Nona loloma ka sureti ira na tamata kece ga mera lako mai Vua (raica na Maciu 11:28). Na loloma, veiwasei, kei na veisureti me vaka a cakava o Koya sa dua na veivakalougatataki ka itavi bibi vei ira yadua na lewe ni Lotu.
Tekivu ena Loloma
Ena Were o Kecisemani kei na kauveilatai, a taura kina kivei Koya o Jisu Karisito na ivalavala ca ni vuravura ka sotava na rarawa kecega kei “na mosi kei na veivakararawataki kei na veivakatovolei kecega” (Alama 7:11). Oqo “sa vakavuna [Vua], … ko koya sa kaukauwa sara, me sautaninini ena vuku ni mosi, sa titiri kina na dra mai na qara kecega ni yago[na]” (Vunau kei na Veiyalayalati 19:18). Mai na Nona Veisorovaki kei na Tucaketale, sa rawata kina o Jisu Karisito na veivakabulai kei na bula vakacerecerei me baleti keda kece.
Na vuki vua na iVakabula ka vakasamataka vakatitobu na veika kece sa cakava o Koya ena vukuda ena vakasinaita na yaloda ena loloma ki Vua. Sa qai vagolea na yaloda vei ira na tani ka vakaroti keda me da lomani ira (raica na Joni 13:34–35) ka wasea vei ira na Nona kosipeli (raica na Maciu 28:19; Marika 16:15). Kevaka era vakila o ira era tu wavoliti keda nida lomani ira ka kauwaitaki ira dina, era na rawa ni dolava na yalodra kina noda itukutuku, me vaka ga a dolava na yalona o Tui Lamonai me ciqoma na kosipeli ena vuku ni loloma kei na veiqaravi nei Amoni (raica na Alama 17–19).
Nida wasea na kosipeli, meda tekivu ena loloma. Nida dolele yani vei ira na tani ena loloma—ka nanuma tiko ni ra sa tacida ka ganeda ka ra sa luvena lomani na Tamada Vakalomalagi—ena tadola vei keda na madigi me da wasea na veika eda kila ni dina.
Meda Gumatua ena Cakacaka ka Veiwasei
E sega tale ni dua a yalodina cake me wasea na kosipeli me vakataki Peresitedi M. Russell Ballard (1928–2023). Ena iotioti ni nona vosa ni koniferedi raraba, a vakadinadinataka kina, “E dua na gauna lagilagi ka talei duadua vua e dua ga ena vuravura qo me rawa ni kila—ni Tamada Vakalomalagi kei na Turaga o Jisu Karisito e rau a vakatakilai Rau mai ena ivakataotioti ni gauna oqo ka a susugi cake o Josefa me vakalesui mai vua na taucoko ni kosipeli tawamudu i Jisu Karisito.”
Ena nona bula taucoko, kei na vuqa na veiyasai vuravura, a maqusa voli o Peresitedi Ballard ena wasei ni itukutuku vakamareqeti oqo vei ira kecega na tamata. A vakayaloqaqataki keda o koya meda vakayacora vakakina. A vakavulica o koya me da wasea na kosipeli “ena noda veiwekani vinaka kei na veikauwaitaki kei na vakaraitaki ni loloma.” Nida vakayacora vakakina, sa rawa nida “vakacilava na kosipeli ena noda bula, ka … vakacilava yani kivei ira na tani na veivakalougatataki sa vakarautaka tu na kosipeli.” Eda rawa talega ni “wasea na ivakadinadina ni veika [eda] kila ka vakabauta kei na veika [eda] vakila.” A vakavulica o Peresitedi Ballard, “Na ivakadinadina savasava … e rawa ni kau yani ena kaukauwa ni Yalo Tabu kina yalodra eso tale era sa vakarau tu me ra ciqoma.”
Na wasei ni kosipeli vakalesui mai i Jisu Karisito e a gagadre cecere duadua ni yaloi Peresitedi Ballard. E rawa nida gumatua—me vakataki koya—ena wasei ni kosipeli ena vosa kei na cakacaka. Eda sega ni kila o cei e vaqara tiko na rarama ni kosipeli ia e sega ni kila na vanua me kunea kina (raica na Vunau kei na Veiyalayalati 123:12).
Veisureti mai Vuni Yaloda
Ena noda vukei ira na tani mera lako mai vei Karisito, eda sureti ira mera vakila na reki e kauta mai na iVakabula kei na Nona kosipeli. E rawa nida cakava oqo ena noda sureti ira me ra lako mai kina dua na itaviqaravi, mera wilika na iVola i Momani, se mera sota vata kei ira na daukaulotu. E rawa talega nida veisureti mai vu ni yaloda mera tomani keda ena soqoni ni sakaramede.
Eda dau tiko ena soqoni ni sakaramede ena veimacawa me da “sokalou vua na Kalou ka vakaivotavota ena sakaramede meda nanumi Jisu Karisito kei na Nona Veisorovaki.” Oqo e dua na gauna talei vei ira na tamata mera vakila na Yalotabu, toro voleka vua na iVakabula, ka vaqaqacotaka na nodra vakabauti Koya.
Nida vaqara na sala meda loloma, wasea, ka sureta, na noda ituvatuva kei na sasaga e dodonu me oka kina na nodra vukei na tamata mera tiko ena soqoni ni sakaramede. Kevaka era na ciqoma na noda veisureti ka tiko ena soqoni ni sakaramede, era na rawa cake ni tomana tiko na nodra sala kina papitaiso kei na saumaki mai. Au vakabauta mai vu ni yaloqu taucoko ni na yaco mai na rawaka cecere nida sureti ira na tani ka vukei ira mera kila na veivakalougatataki e rawa nira ciqoma mai na nodra tiko ena soqoni ni sakaramede.
Ena Dusimaki Keda na Turaga
Eda sega ni kila na rawaka kei na bolebole cava soti ena yaco vei keda ena noda loloma, veiwasei, ka veisureti. O ratou na luvei Mosaia “sa qai lako … mai na dua na koro levu kina dua tale na koro levu, mai na dua na vale ni sokalou kina dua tale, … ena kedra maliwa na Leimanaiti, me vunautaki ka vakavulici na vosa ni Kalou vei ira; ka sa yaco me ratou rawata sara vakavinaka.” Mai na nodratou sasaga, “sa yaco mera kila na Turaga e udolu na tamata,” ka vuqa era “saumaki … [ka] sega ni lutu tani tale” (Alama 23:4–6).
E dina ni na sega ni dau yaco oqo vei keda, sa yalataka tu na Turaga ni na cakacaka vata kei keda baleta ni sa ka talei Vua na yalo yadua. Nida vakararavi vua na Turaga ka vakaitavi ena Nona veiqaravi, ena tuberi keda o Koya ena ivakarau meda wasea kina na Nona kosipeli vei ira na tani ena noda lomani ira, wasea na noda bula kei na noda ivakadinadina, ka sureti ira mera tomani keda ena muri Koya.
“Sa na vuabale sara na [noda] marau” (Vunau kei na Veiyalayalati 18:15) ni da taura na madigi eso era tu wavoliti keda me vukea na Turaga o Jisu Karisito ena Nona cakacaka cecere me kauta mai na yalo ki Vua.