Na Cava O na Solia Tani Mo Kila na Kalou?

Na bulataki ni kosipeli e dau gadrevi wasoma kina na solibula. Sa kerei keda tiko na Tamada Vakalomalagi me da solia tani na noda gagadre vakayago eso me da ciqoma e dua na ka e cecere cake: na kilai ni Kalou kei na veivakalougatataki sega ni vakatauvatani rawa e solia tu o Koya.

A vakaraitaka na tamai Tui Lamonai na lomasoli oqo me solibula ena nona a masu, “Kevaka sa dua tiko na Kalou, ka sai kemuni na Kalou, mo ni vakatakilai kemuni mada vei au, ka’u na veivutunitaka na noqu ivalavala ca kecega me’u kilai kemuni, ka me’u vakaduri cake mai na mate, ka vakabulai ena siga mai muri” (Alama 22:18; vakabibitaki).

A vakavulica o Peresitedi Russell M. Nelson ni vakamalumalumutaki vuravura kei na tubu voleka vua na Tamada Vakalomalagi kei Jisu Karisito e oka kina na “tarovi iko mai na dua na ka ena vakaseva tani na Yalo” kei na “lomasoli [mo] ‘biuta tani’ na ivalavala ca [o] dau taleitaka.”

Veivakalougatataki

Me ikuri ni veivakalougatataki a vakasaqara o tamai Tui Lamonai, oya na tucaketale kei na veivakabulai, sa vola kina o Peresitedi Nelson eso tale na veivakalougatataki e lako mai na noda sasaga me da vakataki Jisu Karisito vakalevu cake ka tiko ga ena salatu ni veiyalayalati. Oqo e oka kina na:

Veisau ni yalo kei na ituvaki
Loloma Cecere
Yalomalumalumu
Daulomasoli
Yalovinaka
Bula vakaivakarau
Tiko sautu
Yalonuidei
Reki
Vakacegu
Kaukauwa vakayalo
iVakatakila ni tamata yadua
Vakalevutaki ni vakabauta
Veiqaravi ni Agilosi
Cakamana

Kevaka e dredre na nomu solibulataka eso na ivalavala ca, kakua ni soro. E vakananuma vei keda o Peresitedi Nelson ni “vakamalumalumutaki ni vuravura e sega ni kena ibalebale ni da sa uasivi sara ena bula oqo, se era na yali vakasauri na nomu leqa kece—baleta ni na sega ni vakakina. Ka sega talega ni kena ibalebale ni o na sega ni caka cala tiko. Ia na vakamalumalutaki vuravura e kena ibalebale ni na rawa ni vakalevutaki nomu rawa ni vorata na ivalavala ca.”

Ni da saga me da biuta tani na noda ivalavala ca me vakataki tamai Tui Lamonai, eda na kunea ni noda kila na Kalou e sa dau yaga sara ena solibula. Ni da cakava vakakina, na noda bula yadua ena yaco me dua na ka cecere cake mai na kena eda rawa ni cakava vakaikeda.