“Kakua ni Calata mo dua na Daukaulotu Qase,” Liaona, Jiulai 2024.
Qase Mai ena Yalodina
Kakua ni Calata mo dua na Daukaulotu Qase
Na noda veiyalayalati e sureti keda me da veiqaravi vakaikeda, tu vaka ivakadinadina ni Kalou, ka vakacegui ira era gadreva tu na veivakacegui. Na veiqaravi vakadaukaulotu qase e dua na sala me vakayacori kina na veisureti oqo, ka vakalougatataka na noda bula vakai keda kei ira eda qarava.
E 34,000 na daukaulotu qase era veiqaravi tudei tiko se ena tabana ni kaulotu veiqaravi ena gauna oqo ka, me vakataki ira na nodra itokani gone, era kune reki vakalevu tiko ena ilakolako oqori. O ira na sega ni vakawati kei na veiwatini e rawa ni ra veiqaravi vakadaukaulotu qase ena vuqa na ilesilesi.
Ka sa bibi sara na gagadre eso. Ena koniferedi raraba ni Okotova 2023, a vakayaloqaqataki ira kina na lewenilotu qase cake o Elder Ronald A. Rasband ena Kuoramu ni iApositolo Le Tinikarua me ra vakasamataka me ra daukaulotu qase. A taroga o koya: “‘Na cava o sa cakava tiko ena ituvaki oqo ni nomu bula?’ E vuqa sara na sala e rawa ni ra cakava kina na daukaulotu qase na veika e sega tale ni dua e rawata. O sa dua na kaukauwa vakasakiti ni vinaka, vakabulabulataki ena Lotu, ka tu vakarau me vakayaloqaqataka ka vueti ira na luve ni Kalou.”
Ni vakamacalataka tiko na sala era kacivi kina na daukaulotu qase, a kaya kina o Peresitedi Russell M. Nelson: “Na madigi vei ira na daukaulotu qase cake e duidui ka rabailevu. Na nodra veikacivi me ra veiqaravi dau vakayacori ni oti na kena vakasamataki ena masumasu na nodra ituvaki vaka cakacaka, na vosa era kila, kei na nodra rawaka yadua. Mai na veika kece me vakadonui kina na veiqaravi, na gagadre me veiqaravi e rairai na kena e bibi duadua.” A vakamacalataka talega o koya ni nodra cau na daukaulotu qase me “tawa sosomitaki rawa.”
“Eso na daukaulotu qase era cakacaka ena valenivolavola ni kaulotu se ena BYU–Pathway se na sasaga eso ni veivuke raraba ka tiko kina e dua na ituvatuva matata-vinaka,” a kaya e dua na daukaulotu qase. “Keirau a veiqaravi ena vica na mataqali tabana ni kaulotu oqori. Keirau a veilecayaki vakalailai ni keirau kacivi ki na dua na VLV (veiqaravi vei ira na lewenilotu kei na veiliutaki) ena tabana ni kaulotu. Ni keirau tekivu, keirau a taleitaka dina na yalorawarawa kei na veivakasama e solia vei keirau me keirau sikovi ira na lewenilotu ka vaqaqacotaka na veitabana vakaitaukei.”
A kaya e dua na sisita qase veiqaravi tiko ena dua na vale ni vulagi, “Ni a takali na watiqu, au a sega ni kila na ka me’u cakava me baleta na noqu gauna. Ia oqo sa tu na veika me’u cakava, na vanua me’u lako kina, na tamata me’u lai raici ira. Era tu na tamata era vakararavi tiko vei au.”
“E sega ni gadrevi mo lomaleqa kevaka mada ga o a sega ni veiqaravi ni o se gone,” a kaya e dua na sisita ni sa lesu ki vale mai na nona kaulotu qase. “Sa dua na itavi vou vei keimami kece. Keimami a vulica vata kece me dau vakararavi vua na Turaga vakakina vakai keimami ka kunea ni ‘dau rawa na veika lelevu mai na veika lalai ka rawarawa’ [Alama 37:6].”
Veivakalougatataki vei ira na Daukaulotu
E duidui na tabana ni kaulotu qase me vakataki ira ga na daukaulotu qase. Era tu na kena veimataqali—yadua vata na kena bolebole, reki, kei na kena yaga ki na tamata yadua. Ia e vica toka na veika kilai levu me baleta na mataqali tabana ni kaulotu qase cava ga: vakaibalebale na vulici ni ivolanikalou, masu wasoma vagumatua, dauveiqaravi, tomana tiko na veidusimaki ni Yalo Tabu, kei na dua na madigi duatani me vakayaco veisau.
“Au se sega vakadua ni vakila ni’u volekata na Turaga mai na gauna keirau veiqaravi tiko vakadaukaulotu qase,” a kaya e dua na daukaulotu qase. “Au kila ni so na ka au sega ni lewa rawa, vakabibi na lesu tale i vale vei ira na gone kei na makubui keirau. Au a biuta ga na veika oqori ena liga ni Turaga. Ka vakalougatataka o Koya na neirau matavuvale. Keirau a sega vakadua ni voleka sara vei ira na makubui keirau me vaka na veisiko e veimacawa ena Zoom. Keitou a veivosakitaka na veika eratou a sega beka ni taleitaka tu e liu. Dina ni sega beka ni yaco ki na tamata kece, ena neirau kisi, a lesu tale mai ki lotu e dua na luvei keirau tagane ni keirau veiqaravi tiko, ka vakawati tale e dua tale na luvei keirau tagane ka qai vauci e muri ena valetabu.”
E dua tale na daukaulotu qase a kaya, “A yaco me vakaibalebale vakalevu cake na neirau vulica na ivolanikalou baleta ni keirau vakasaqara tiko na sala me bulataki kina na ivolanikalou, ka sega ni wilika walega. Au a sega walega ni lakova tiko me baleta na kena ‘yawa vakamaile,’ me vaka au a dau cakava ena so na gauna e liu. Ena neirau veiqaravi, a vaka me’u dau lesuva tikoga e dua na ivolanikalou keirau a wilika ena siga oya se ena macawa oya, au a mani tekivu namaka me’u vakayagataka na ivolanikalou vovou au se qai wilika oti ga ena veisiga yadua. Au a gumatua ena noqu vulica na ivolanikalou, ni’u namaka me’u na lesuva e dua na ka au a wilika ena siga oya.”
“Na kaulotu sa solia vei au e dua na lisi vou ni bula,” a kaya e dua na sisita qase. “A solia vei au e dua na inaki vakaibalebale cake, e dua na maqusa vou ni bula, kei na dua na ka me caka ena taudaku ni qito golf se memei vei ira na makubuqu.”
“Na veiqaravi e dua na gaunisala ki yasana ruarua,” a kaya e dua tale na daukaulotu qase. “Ni keirau vakasamataka—ena qaciqacia vakalailai—na levu ni ka keirau a cakava tiko vei ira na tani, keirau a sega soti ni rawaka sara. Ia ni keirau sa qai kila na levu ni ka keirau vulica ka tubu cake tiko kina, sega walega ni keirau a veisau ia a vaka me ra taleitaka cake na tani na veika keirau tukuna ka cakava tiko. Keirau a viritaka yani na keirau madrai e dela ni wai, ka vaka me sa lai vakabatataki lesu mai.”
Veiwekani Kaukauwa Cake
Ni ra veiqaravi vakadaukaulotu qase na tamata, era na taracake na veiwekani titobu ni bula taucoko. E vuqa era tubu voleka vei ira na tamata era qarava. Era bucina talega na veiwekani kaukauwa kei ira na daukaulotu tale eso kei ira na iliuliu vakaitaukei. “Keirau a bulia na veitokani vata kei ira na daukaulotu gone, na veiwatini tale eso, kei ira na tamata keirau na sega vakadua ni sotava ke keirau a tiko ga e vale,” a kaya e dua na daukaulotu qase. “Keimami se dau veitaratara tikoga kei ira yadua. Ena dua na gauna au a nanuma ni na tautauvata tu ga ena veisiga, na lako ki na kaulotu a solia vei keirau e dua na itekitekivu vou kei ira na itokani vou me keimami wasea vata na ilakolako oqo.”
Na tabana ni kaulotu qase e rawa ni vukei ira na veiwatini me vaqaqacotaka talega na nodra bula vakawati. Ni ra sa vakacegu na tamata se vakalailaitaka na nodra cakacaka, me ra vakasamataka tale e dua na inaki raraba me vaka ni ra sa na sega beka ni susugi ira tale tiko na gone ena nodra itikotiko. E rawa talega ni na matau beka me ra tikoga ena nodra dui vanua ena nodra ituvatuva ga. Na qase cake tiko se vakacegu ena cakacaka e rawa ni veisautaka oya. Na tekivu vou tale, wasei vata ni veika sotavi, se veiqaravi tiko mai vale se veiqaravi tudei ena dua na kaulotu qase, e rawa ni veivuke me tauyavutaka e dua na inaki vou vei rau e dua na veiwatini ka vaqaqacotaka na nodrau bula rawati rau vakai rau.
“E dua na ivosavosa makawa e tukuna tiko ni vakacegu ena cakacaka ‘o rawata kina e veimama na ilavo ka vakaruataka na watimu me vaka e liu,’” a veiwalitaka e dua na sisita. “Na veiqaravi vakaulotu ena dua na vanua yawa mai vale a vakatarai keirau me veivosakitaka na veisau oqo ena sala eso keirau a sega beka ni rawata ni bera na neirau kaulotu. Ni vakacegu oti na cakacaka na watiqu, keirau a dau yalokatakata ni keirau dau veisaqasaqa. Ia oqo, mai na neirau dau dui gole tani ka veigaluvi tu, keirau sa sega ni vinakata me vakaleqa na cakacaka ni Turaga, ka keirau sa dau veitalanoataka na veika e dau vakaleqai keirau.”
“Keirau tekivu veivosaki kei na watiqu ena veibogi me baleta na loloma cecere keirau dau sotava ena veisiga yadua ni keirau kaulotu tiko,” a kaya e dua na daukaulotu qase. “A sega walega ni vukei keirau me vakanamata vakalevu cake ena veika a yaco ka vakalailai vei keirau, ia a solia talega vei keirau na madigi me raica na vinaka e vakavolivoliti keirau tu ena gauna mada ga a sega ni lako vinaka kina eso na ka ena siga oya.”
“Ka baleta ni oqori na iotioti ni ka keirau dau cakava e veibogi yadua,” a kuria o watina, “keirau dau lai moce ka sega soti ni lomaocaoca ka lomavakacegu vakalevu cake mai na veika keirau a sotava ena vica vata na yabaki. A vukei au sara mada ga me’u moce vakavinaka!”
Veivakalougatataki vei Ira Era Qarava
Na bula e tiko na kena toso cake kei na lutu sobu—na kena veisiga vinaka kei na veisiga ca. Sa vakakina na veitabana ni kaulotu. Ia na veiqaravi vua na Turaga e levu na kena isau matau, sega ni qai oti ga na kaulotu ia ena gauna talega ni kaulotu. Me vaka a kaya na tavalena o Moatekai vei Esiteri, “Ko cei e kila de ko sa yaco beka mo ranadi ena vuku ni gauna oqo? (Esiteri 2:25; vakaikuritaki). Ni railesuva na nodra veiqaravi, e vuqa vei ira na daukaulotu qase era vakila ni ra a lesi ki na dua na itavi se dua na vanua ka ganiti ira vakatabakidua me ra vakatawana kina e dua na gagadre.
Au a sotava na vinaka kaukauwa e rawa ni cakava e dua na veiwatini daukaulotu qase ni’u a vakaitikotiko e Louisiana, Amerika. Ni oti ga noqu kacivi me’u laki veiqaravi ena matabose e cake ni iTeki na New Orleans Louisiana, au a lesi me’u tokona na Tabana e Port Sulphur. A vica walega na veitacini matabete bulabula ena tabana oya. E vuqa na itutu ni veivakavulici kei na veiliutaki era a taura tu na marama ka ra sega ni lewenilotu na watidra. Ena so na gauna, era dau lesi na daukaulotu qase se iliuliu ni iteki ki na tabana, ia a yalani ga na nodra rawaka ena nodra yacovi ira yani na matavuvale lewenilotu vakatikina oqo.
A qai lesi mai e dua na veiwatini qase mai Wyoming, Amerika, me tokona na tabana oya. Erau a dauteitei tu me vuqa na yabaki ka rau a cakacaka tu ena dua na iqaqi ni jisi volekata na nodrau itikotiko. Ena vuku ni nodrau ituvaki qori kei na veika erau sotava ena nodrau bula, erau a veimaliwai vakarawarawa sara kei ira e vuqa na tamata e Port Sulphur ka ra cakacaka tu ena tabana ni waiwai. Erau a vakayagataka na veiwatini qase oqo e levu sara na gauna me tarai cake kina na veimaliwai kei na veiqaravi vei ira na matavuvale lewenilotu vakatikina ena tabana oya. Ena vuku ni nodrau veiqaravi kei na loloma, ena nodrau gauna e Port Sulphur a vaqaqacotaki vakalevu sara ka vakalougatataki na tabana oya mai na nodrau veiqaravi yalodina. E vica na turaga mai na matavuvale lewenilotu vakatikina oqo era a lewena na Lotu, ka vaqaqacotaka kina ni kuoramu ni italatala qase kei na tabana.
Era dau vakalougatataka na bula na daukaulotu qase—na nodra vakai ira ka vakakina o ira na tani’. Kakua ni calata na vei madigi totoka mo veiqaravi ka tubu kina!