Itukutuku ni Veiliutaki ni Iwasewase

Na noda kilai keda ena vaqaqacotaki kina na noda bula

Mai vei Elder Jared V. Ormsby

iWasewase 70

Ni keirau se lalai kei taciqu gone o Luke, keirau dau marautaka na gauna e suka mai kina na cakacaka o tamai keirau. Keirau na wawa tiko ena neirau isulu ni moce ka cici sobu vakatotolo ena ikabakaba me tavaki koya ena qarati. O tamai keirau edau vinakata me keirau kila na nona marau ni raici keirau. Ena dau vakatokai keirau me nona “tagane nuitaki”. E dau tarogi keirau me baleta na neirau siga ka vakakina na ituvaki kei tinai keirau.

Ena so na gauna e sega ni dau yaco mai ivale o tamai keirau me yacova ni sa vakadavori keirau oti o tinai keirau vinaka ena idavodavo. Ena gauna vaka oqori o koya ena sikovi keirau yani ena neirau rumu. Keirau na dau kerei koya me talanoataka edua na italanoa ni moce vei keirau. Keirau dau taleitaka na nona italanoa kece ni moce. Era italanoa kecega me baleti keirau, o “Jared kei Luke”. Ka bibi duadua, na italanoa ena dau tautauvata tu ga na kena itinitini. O Jared kei Luke erau na tubu cake me “tagane vinaka” ka na “veiqaravi vakadaukaulotu”.

Na veitalanoa oqo e vakayaco ka vakalevu vei keirau ena neirau tubu cake tiko vaka gonetagane. Mai na italanoa eso oqo, ena vaqaqacotaka o tamai keirau ni neirau i vakatakilakila e yavutaki ena kosipeli i Jisu Karisito, keirau tagane vinaka ka itovo vinaka, ka keirau na rawata na cava ga keirau nanuma me rawata. Ni keitou gade vakavuvale, erau dau vakabibitaka na neirau itubutubu ni keirau luve ni Kalou ka keirau na rawa ni rawata na cava ga keirau vakanamata kina ena neirau bula.

Au vakadeitaka ni italanoa eso oqo a vukea me tara cake na neirau nuitaki keirau ka vaqaqacotaka na lomai keirau. Ena nodrau vakavulica na neirau itubutubu na neirau ituvaki vakalou, erau vakarautaki keirau tiko me tamata rawaka ka vorata rawa na dredre kei na bolebole ni bula.

Eda sa luve ni Kalou kece. Ni matata vei keda na noda ivakatakilakila vakalou, ena vukei keda meda rawata na bolebole eso ka cakava na veidigidigi vinaka. E vukei keda meda “vakasama vakasilesitieli”. baleta nida kila se ocei o keda, kei na vuna tale ga eda tiko kina eke kei na inaki ni veika dredre.

O Peresitedi Russell M. Nelson a vakavulica ni tolu na dina rawarawa ena vukei keda me vakavakarau kina bula tawamudu:

iMatai, mo kila na dina se o cei o iko.
iKarua, mo kila na dina me baleta na veika erau sa vakarautaka tu vei iko na Tamada Vakalomalagi kei na Luvena.
Ka iKatolu, mo kila na dina e semati ki na nomu saumaki.

Me vaka a kaya o Peresitedi Nelson “. . . na sala o nanuma kina se o cei dina o iko ena vakayaco ka kina veidigidigi kece ona cakava”. E tukuna o Peresitedi Nelson e tolu na ivakatakilakila bibi: imatai, eda sa luve ni Kalou, ikarua, eda lewe ni Lotu, eda sa luve ni veiyalayalati, ka ikatolu, eda sa tisaipeli i Karisito. Na tolu na ivakatakilakila oqo e vakatarai keda meda bulabula vakayalo ka sega ni “gogo vakayalo”.

Niu se loya gone, au dau kilai au tu meu dua na “loya”. Ia, na loya e noqu cakacaka, ka sega nio au dina. Au kunea ni kevaka au kilai au meu dua na “tisaipeli i Karisito”, au na sega ni wasea na noqu bula vakalotu, cakacaka, itikotiko, se veimaliwai ia au na cakava na noqu digidigi kece ni yavutaki ena noqu icavacava vakalou. Au vakabauta niu sa tagane vakawati, tama, itokani, ka loya vinaka cake ena vuku ni ka oqo.

Ena vica na yabaki sa oti, niu se Peresitedi ni iTeki gone, edua vei iratou na neitou bisopi a vakacacani na nona vale mai Christchurch ena uneune kei na malumu ni qele ka veitokiyaki ena vica vata na gauna. Au taroga na turaga vinaka oqo se lako curuma vakacava na vakacaca oqo. Ena gauna oya, vakananuma vei au niratou kila kei na nona vuvale niratou luve ni Kalou, ka ratou nuidei ni Kalou ena veivakarautaki ka veimaroroi vei iratou.

Nodra vakatavulici na luveda me baleta na kedra ivakatakilakila dina ena vukea na nodra vakarautaki ki na tawamudu. Na Vosa Vakaibalebale 22:6 e tukuna: “Vakavulica na gone ena sala e dodonu me lako kina: ia ni sa qase mai ena sega ni lako tani maikina.”

Nida vakatavulica vei ira na gone na ituvatuva nei Tamada Vakalomalagi vata kei na nodra ivakatakilakila kei na ilesilesi vakalou, eda vakaraitaka tiko nira lomani, e tiko na kedra yaga, kei na nodra ilesilesi vakalou sai koya mera vakataka na Tamada mai Lomalagi. Nida bula me vaka na veidina oqori eda vakaraitaka tiko vei ira na luveda, itabagone, kei na itabagone qase cake nira rawa ni rawata na bolebole ni bula ka rawaka ka marau nira bulataka na kosipeli i Jisu Karisito.

O Momani a vakaraitaka, “Raica, ko i au e dua na tisaipeli i Jisu Karisito na Luve ni Kalou. Sa kacivi au ko Koya meu vunautaka na nona vosa ena kedra maliwa na nona tamata, mera rawata kina na bula tawavakaiyalayala.” Ena itukutuku oqo e wasea vakaukauwa kina o Momani na nona ivakatakilakila, ivakadinadina, kei na nona inaki. Nira vakamareqeta na vosa i Momani o ira na noda itabagone ena yabaki oqo, era na sega walega ni duavata kei na Tamada Vakalomalagi kei Jisu Karisito ena nodrau cakacaka vakalou ia era na vakavakarau vakavinaka cake kina dredre kei na bolebole ni bula vakayago.

Se da gone se qase, meda na dau nanuma tiko ga na ivakasala bibi nei Elder Dieter F. Uchtdorf:

“. . . na noda icavacava e sega ni vakatau kina iwliwili ni gauna eda bale kina ia ena iwiliwili ga ni gauna eda tucake kina, taviraka laivi na duka, ka toso yani i liu.”