Noda Tabana
Vakalougatataki ena nodra iTukutuku na Apositolo ni Gauna Oqo
“Io, eda gadreva vakaidina na koniferedi raraba!” na ivakadinadina nei Elder Robert D Hales ena 2013. “Ena vuku ni koniferedi, sa vaqaqacotaki na noda vakabauta ka vakatitobutaki na noda ivakadinadina.” Ena vosa vata oqori, a yalataka kina o Elder Hales:
“. . . kevaka ona vakarorogo, ona vakila na Yalo ni na tovure mai e lomamu. Na Turaga ena tukuna vei iko na ka e vinakata o Koya mo cakava ena nomu bula.”
Ena koniferedi ena rawa meda ciqoma kina na vosa ni Turaga ka sa baleti keda sara ga.”
Ena ilavelave vakatabakidua oqo, e vica vei ira na lewe ni mataveiliutaki ni noda iSoqosoqo ni Veivukei mai na veiyasa ni Pasifika era na vakadinadinataka kina na veivakasalataki yadua era ciqoma mai vua na Yalo Tabu mai na nodra vosa na noda Apositolo ni gauna oqo. Na vei sisita yadua ena wasea edua na itukutuku mai na Koniferedi Raraba ka veilauti vakalevu vua, kei na veisau sa vakayacora ki na nona bula.
Sisita Shireen A’Costa
Tabanalevu na Suva 1st Ward, iTeki na Suva Fiji Stake
Ena Sepiteba ni yabaki sa oti, au a gole ki vanua tani ena ilakolako vakacakacaka au nanuma meu cegu vakalailai mai na cakacaka me vica na macawa ni se rawa. Ena veimacawa yadua ni noqu tiko tani, au tukuna tiko ga vei au niu na qai sauma noqui katini niu lesu tale. Niu lesu mai i vale ni oti e vica namacawa, au qai kila ni sa oti e tolu na vula mai na iotioti ni gauna au a solia kina na noqu i katini. Ena imatai ni noqu Sigatabu ena lotu au solia na noqu ikatini me baleta ga na imatai ni vula au tiko tani kina, ka qai veiba na lomaqu. Na gauna ni soqo sa voleka tiko mai. A gadrevi dina beka vei au meu solia?
Meu vakaceguya na noqu vakasama, au tukutuku vei noqu bisopi ka wasea na noqu lomalomarua ka nuitaka ni na duavata kei au ka tukuna mai na veika au vinakata meu rogoca. A taroga, “O vinakata mo lako i valetabu se sega?” Mai na veika au nanuma rawa, na ivakaro oqo e gadrevi taumada.
Au kila e lomaqu ni vakatovolei tiko na noqu vakabauta au sa vakuwai au tiko mai na veivakalougatataki ka yalataka tu na Turaga vei ira era sauma ena yalodina na nodra ikatini: “Ena dolava o Koya na katuba ni lomalagi ka sovaraka vei kemudou na ka ni veivakalougatataki, me na sautu dina sara.”
Ena nona vosa, iKatini: Dolava na Katuba ni Lomalagi, a wasea kina o Elder Neil L. Andersen:
“Na katuba ni lomalagi e dolavi ena vuqa na sala. Eso e vakayago, ia e levu era vakayalo. Eso e rawarawa ka rawarawa vakakina na kena vakawaletaki. Vakararavi kina nona gauna na Kalou; na veivakalougatataki ena dau yaco ga mai.”
Niu dawai, tina nidua na goneyalewa totoka, itubutubu dua, ka imatai ni daunivakasala ena iSoqosoqo ni Veivukei ena neitou tabanalevu, au vakararavi vakalevu kina veivakalougatataki yalataki bibi oqo.
Na reki au vakila, na vakacegu ka luvuci au ena sega beka ni yaco keu sega beka ni tamata dina ka yalodina ni cakava na veika dodonu. Au kila vakaidina ni veiyalayala oqo era dina ka ke mani vakacava na veibolebole kece au curuma mai, e vakalougatataki vakalevu na noqu bula.
Sisita Marlène Aroita
Tabanalevu na Toahotu Ward, iTeki na Tahiti Taravao Stake
Na itukutuku ni koniferedi raraba kece sa dau vakania vakaidina na yaloqu . . . e veigauna kecega.
Ena koniferedi raraba ni Okotova 2023, baleta niu a lako curuma tiko edua na gauna dredre vakayalo, na itukutuku nei Elder Alan T. Philipps ena nona vosa, na Kalou e Kilai Iko ka Lomani Iko, e solia vakalevu vei au na vakacegui. E vukei au meu nanuma niu luvena talei na Tamaqu Tawamudu kei na noqu iVakabula ko Jisu Karisito. A sauma o Koya na ivoli ni yaloqu. Ena Nona solibula, au rawa ni veivutuni ena veigauna kece au caka cala kina au sasaga meu yaco meu tamata vinaka sara.
Keu sega mada ga ni nuitaki au vakai au, ni tiko e yasaqu na Turaga, ena tiko vei au na kaukauwa meu vosota na veituvaki kece. E vinaka meda tagi, meda cegu, meda lutu . . . baleta ena dua na siga vinaka ni mataka, siga ni reki, loloma kei na vakabauta. Au marau niu kila ni Kalou e lomani keda vakayadua ka vakarautaka kina o Koya na veika kecega me baleta na noda marau. O Peresitedi Russell M. Nelson kei ira kece na iliuliu ni Lotu era sa iyaya ena liga i Tamada Vakalomalgi mera dusimaki keda ena gauna ni noda rarawa.
Ena rua na yabaki sa oti oqo, na itukutuku ni koniferedi raraba era a vaka edua na ivurevure ni bula . . . isau ni noqu masu. Era sa vukei au meu lako curuma rawa na veika rarawa ena yalo e dauvosota niu tomana tiko na noqu ilakolako ena salatu ni veiyalayalati. Au tovolea tiko ena noqu igu meu muria na ivakasala nei Peresitedi Nelson meu yalo loloma cake ka dau vakasama vakasilesitieli. Era vinaka cake tiko mai na veika eso; ka mamada mai na icolacola. Ke sega na Nodrau loloma, ena sega ni rawa vei au meu tomana tiko ga na ilakolako. Au kila ni lomani keda na Kalou, ka ilumu talei ni lomaqu kei na yaloqu.
Sisita Emma Alofipo Tanuvasa
Tabanalevu na Massey Park Ward, iTeki na Auckland Papatoetoe Stake
Na vosa nei Peresitedi Russell M. Nelson ena koniferedi raraba ni (Okotova ni 2016) ka kena ulutaga na Reki kei na Bulabula vakayalo e vakayaco ka vakalevu sara kina noqu bula. A vakavulica ni dua na ivakavuvuli kina bulabula vakayalo, vakabibi ena gauna ni noda leqa, sai koya ni “Sucu na tamata, me rawata na marau.”
Ena Okosita ni 2014, erau takali kina na noqu itubutubu totoka o Kalisi kei Fa’amanatu Alofipo ena macawa vata tiko ga ena vuku ni tauvimate. O rau na noqu itubutubu erau saumaki ruarua mai ki Na Lotu i Jisu Karisito ni Yalododonu Edaidai, nirau saumaki mai, erau vosota me yacova na ivakataotioti vaka tisaipeli dina i Jisu Karisito. O koya gona meu na kunea vakacava na reki ena nodrau yali ruarua na noqu itubutubu dina ga ni so na gauna edau bibi na noqu rarawa?
O Peresitedi Nelson a vakananuma vei au ni:
“E rawa nida tekivu ena noda ‘vakaraici Jisu o koya sa vakatekivuna ka na sauma tale ga na noda vakabauta,’ ‘ena noda nanuma kecega.’ Eda rawa ni vakavinavinaka ena vukuna ena noda masu kei na maroroi ni veiyalayalati eda sa cakava vata kei Koya kei na Tamada Vakalomalagi. Ni yaco me ka dina cake tikoga vei keda na noda iVakabula ka da kerea me solia mai vei keda na Nona reki, na noda reki ena tubu cake.”
Au kila ni dina oqo ka vakadinadinataka ni reki dina e vu mai vei Jisu Karisito kei na Nona Veisorovaki tawayalani. E yaco mai niu maroroya na noqu veiyalayalati, ka vauci au vua na noqu iVakabula ka vakatarai au meu rawata na Nona kaukauwa cecere me vorata kina na veivakatovolei cava ga se veika rarawa. Na reki ena yaco nida vauci vaka dua na vuvale tawamudu ena valetabu savasava – vei rau noqu itubutubu, na watiqu o Alofa kei luvei keirau yalewa o Ane.
Na reki ena yaco mai vei keda mai vei ira na baraca kei na sisita dauveiqaravi era laveti keda cake ena gauna e gadrevi kina.
O Peresitedi Nelson a vakadinadinataka ni: “Reki e iloloma vei ira na yalodina. Sai koya na iloloma ka yaco mai ena kena nakiti me tovolei me bulataki na bula dodonu, me vaka a vakavulica o Jisu Karisito.”