Digital Lamang
Pagkab-ot sa Gahom sa Dios pinaagi sa mga Pakigsaad
Ang gahom sa Dios mopadako sa atong espirituwal nga mga gasa ug mga talento, kini mohatag kanato og kalig-on lapas pa sa atong kaugalingon aron sa pagpas-an sa bug-at nga mga palas-anon sa mortalidad, ug kini mohatag kanato og kalinaw ug gahom nga atong gikinahanglan.
Ang atong propeta, si Presidente Russell M. Nelson, nagbalik-balik og pamulong kabahin sa gahom sa pagkapari nga anaa sa kalalakin-an ug kababayen-an pinaagi sa pakigsaad nga relasyon ngadto sa Dios. Miingon siya:
“Ang matag babaye ug matag lalaki kinsa … mohimo … sa mga ordinansa sa pagkapari [ug kinsa mohimo ug motuman niadto nga mga pakigsaad sa Dios], direktang makaangkon sa gahom sa Dios. …
“Ang kalangitan abli ngadto sa mga babaye kinsa natugahan sa gahom sa Dios nga gikan sa ilang mga pakigsaad sa pagkapari sama ngadto sa mga lalaki kinsa naghupot sa pagkapari.”
Isip anak nga mga babaye sa Dios, kita mahimong matugahan uban sa gahom sa pagkapari––ang gahom sa Dios nga magamit nato samtang kita naghimo ug nagsunod sa mga pakigsaad sa pagkapari. Kini adunay sama ka importante nga mga pagpasabot. Isip natugahan nga mga babaye, kita adunay katungod sa paggamit sa walay pagpugong sa gahom sa Manluluwas sa pagtabang sa atong mga kaugalingon, atong mga pamilya, ug sa uban.
Nadawat ko ang akong kaugalingong pagtuga sa dihang ako 20, apan sulod sa mga dekada wala ako makasabot sa langitnong gahom nga akong naangkon pinaagi sa mga pakigsaad nga akong nahimo uban sa akong Amahan sa Langit ug ni Jesukristo. Hinuon, samtang akong gihinumdoman, akong nailhan ang dugang nga kalig-on ug kapasidad nga ako gihatagan sa paghupay sa daghang nagkalain-laing mga hagit diha sa nagkadaiyang mga kahimtang sa akong kinabuhi. Pagkadako sa panalangin nga kita nagpuyo sa usa ka panahon nga adunay dugang pa nga pagsabot sa nagtubo nga gahom, kalinaw, ug kalig-on nga mahimong maato pinaagi sa pakigsaad nga relasyon ngadto sa Dios.
Sama sa gitudlo sa atong propeta, kon kita mosulod og usa ka pakigsaad nga relasyon ngadto sa Dios, ang atong relasyon uban Kaniya mahimong mas suod kaysa wala pa ang pakigsaad, ug dili gayod Niya talikdan kana nga relasyon. Siya dili gayod kapoyon sa Iyang mga paningkamot sa pagtabang kanato, ug kita dili gayod makapahubas sa Iyang pagkamapailobon ngari kanato. Kita sa hingpit nga kalipay nahiusa sa pagkabugkos pinaagi sa walay kataposang pakigsaad nga atong gipili nga mosulod uban Kaniya.
Kini nga kahibalo kinahanglang mohatag kanato og dakong kalinaw ug kasegurohan samtang kita nagsinati sa mga kalisod ug mga kaguol niini nga kinabuhi. Ang gahom sa Dios mopadako sa atong espirituwal nga mga gasa ug mga talento, mohatag kanato og kalig-on lapas pa sa kaugalingon natong pagpas-an sa bug-at nga mga palas-anon sa mortalidad, ug mohatag kanato og kalinaw ug gahom nga atong gikinahanglan samtang kita nag-atubang sa pisikal, emosyonal, ug espirituwal nga mga kalisod nga makapatay-og sa atong mga kinabuhi.