‘Oku ‘Ofa ‘a e ‘Otuá ‘i Heʻene Fānaú Kotoa
ʻOku ui maʻu pē kitautolu ʻe Sīsū Kalaisi, pea ʻokú Ne fakaʻaongaʻi kitautolu, ko ʻEne kau tamaioʻeiki angamaheni, ke tokoni ke ʻomi ʻEne fānaú kiate Ia.
Ko e hā ʻoku finangalo ʻetau Tamai Hēvaní ke ke faí? ʻOku mahino nai kiate koe, ʻi he taimi naʻá ke ʻi he maama fakalaumālie aí, naʻe teuteuʻi koe ʻe he Tamai Hēvaní ki hoʻo moʻui ʻi he māmaní? Naʻe akoʻi ʻe Palesiteni Nalesoni ʻi heʻene lea ki he toʻu tupú ʻo pehē, “Kuo fakatatali ʻe heʻetau Tamai Hēvaní ʻa ʻEne ngaahi laumālie fakaʻeiʻeiki tahá—pea mahalo … ko ʻEne timi lelei tahá—ki he kuonga fakaʻosi ko ení.” Koeʻuhí kuo fakatatali kitautolu ki he ngaahi ʻaho kimui ní, ʻoku mahuʻinga ke tau ako ke hoko ko ha kau ākonga ʻa Sīsū Kalaisi.
Ko e ʻEiki ko Sīsū Kalaisí ʻa e Tauhi Sipi Leleí, pea ʻokú Ne ʻafioʻi ʻEne tākangá, pea ʻoku ʻiloʻi ʻe he tākangá ʻa hono Tauhí koeʻuhí “ʻokú ne ui ʻa e sipi ʻaʻaná ʻi honau hingoá.” ʻOkú Ne ui maʻu pē kiate kitautolu, pea ʻokú Ne fakaʻaongaʻi kitautolu, ko ʻEne kau tamaioʻeiki angamaheni, ke tokoni ke ʻomi ʻEne fānaú kiate Ia.
ʻI he kuohilí, naʻá ku ʻaʻahi mo ha palesiteni fakasiteiki ki he kāingalotu ʻo e Siasí ʻi ha feituʻu fakalotofonua. ʻI he ʻosi ʻemau ngaahi ʻaʻahi naʻe fakataimi-tēpileʻí, naʻe kole mai ʻe he palesiteni fakasiteikí pe ʻe lava ke ma ō ʻo vakaiʻi ha toe fāmili ʻe taha. Naʻá ne ongoʻi ʻoku totonu ke ma talanoa mo kinautolu.
Naʻá ma tukituki ʻi he matapaá, pea fakaava hake ia ʻe ha fefine. Naʻá ne sio mai kiate au, ka naʻe ʻikai ke ne ʻiloʻi pe ko hai au, ko ia naʻe ʻikai ke ne fuʻu fiefia fēfē. Naʻá ku tuhu ki he palesiteni fakasiteikí, ʻa ia naʻá ne ui ʻaki ia hono hingoá. ʻI heʻene fanongo pē mo mamata kiate iá, naʻá ne fiefia. ʻI heʻena tuʻu ʻi he matapaá, naʻá na fāʻofua mo tangi fakataha. Ko e ongo ia naʻe hokohoko atu ʻaki ʻemau ʻaʻahí. Naʻe ʻikai ke ma ʻiloʻi naʻe faitoʻo kimo ʻa e siʻi fineʻofá ni ʻi he ʻaho kimuʻá. Naʻá ne ongoʻi fuʻu vaivai ke tokangaʻi hono foha lahí. Ko ia naʻá ku tokoni ki he palesiteni fakasiteikí ʻi hono teuteuʻi hono fohá, peá ma fakaheka ia ki hono saliote teketeké. Naʻá ma fafanga ia ʻaki ha meʻakai naʻe ʻomi kimuʻa ʻe ha fineʻofa fakaʻofoʻofa ʻe taha mei he uōtí, pea naʻá ma tokoni ʻi ha ngaahi ngāue kehe. Kimuʻa peá ma mavahe mei hona ʻapí, naʻá ma tāpuakiʻi kinaua.
Ko e meʻa pē naʻá ku fakakaukau ki ai lolotonga ʻa e ʻaʻahi ko ʻení, ko ha fakapapau ʻoku ʻofa lahi ʻa Sīsū Kalaisi ʻiate kinaua. ʻOku mahino kiate Ia pea ʻokú Ne ʻafioʻi fakataautaha ʻa e mamahi ʻo hona tūkunga makehé. Ko e meimei kotoa ʻo e ʻaʻahí naʻe fakahoko ʻi he fakalongolongo pē. Naʻe ʻikai ke ma fakahoko ha malanga pe vahevahe ʻema potufolofola manakó, ka naʻe tāpuekina lahi kimautolu ʻe he ʻEikí ʻaki Hono Laumālié.
Ko e taha ʻo e ngaahi ʻuhinga maʻongoʻonga taha naʻe fekauʻi mai ai koe ʻe he Tamai Hēvaní ʻi he taimi ko ʻení koeʻuhí ke ke lava ʻo ʻiloʻi ho tuʻunga malava kakató. ʻOku akoʻi kitautolu ʻe he Malanga ʻAki ʻEku Ongoongoleleí ʻi heʻetau hoko ko e kau ākonga ʻa Kalaisí, ʻoku totonu ke tau fakaʻehiʻehi mei hono fakafehoanaki kitautolu ki he niʻihi kehé. ʻOku makehe, fakataautaha, mo fakanatula hoʻo ngaahi malava fakalaumālié, pea ʻoku finangalo hoʻo Tamai Hēvaní ke tokoniʻi koe ke ke fakatupulaki kinautolu. ʻE ʻi ai maʻu pē ha taha te ke lava ʻo tokoniʻi ke ne ongoʻi ʻa e ʻofa ʻa hoʻo Tamai Hēvaní. ʻOku fakalangi ho ivi malavá. Neongo ʻoku mahuʻinga moʻoni ke teuteuʻi koe ke ke lavameʻa ʻi he māmani feʻauʻauhi ko ʻení, ka ko e taha ho ngaahi misiona mahuʻinga ʻi he kotoa hoʻo moʻuí ko hoʻo hoko ko ha ākonga ʻa Sīsū Kalaisi pea muimui ki he ngaahi ueʻi ʻa e Laumālié. ʻI hoʻo fai ʻení, ʻe tāpuakiʻi ʻe he ʻOtuá hoʻo moʻuí; te Ne tāpuakiʻi ho fāmili lolotongá pe ko ho fāmili ʻi he kahaʻú; pea te Ne tāpuekina ʻa e moʻui ʻo ʻEne fānau ʻokú ke feohi mo iá.
ʻOku tau moʻui ʻi ha kuonga ʻo e faingamālie lahi. Neongo ʻoku tau fehangahangai mo ha ngaahi faingataʻa lahi, ka ʻoku ou ʻilo ʻoku hoko ia ke fakaʻatā kitautolu ke tau tokoniʻi ʻa e niʻihi kehé ke nau ongoʻi ʻa e ʻofa ʻa ʻetau Tamai Hēvaní. Naʻe akoʻi ʻe Palesiteni Nalesoni, “ʻI he ngaahi ʻaho ka hoko maí, te tau mamata ai ʻi he ngaahi fōtunga maʻongoʻonga taha ʻo e mālohi ʻo e Fakamoʻuí kuo faifai angé pea mātā ia ʻe māmani.” ʻOku tau maʻu ʻa e faingamālie ke tokangaʻi ʻa e kakai ʻoku nau fiemaʻu ha nima fie tokoní, ha talitali lelei, ha ongoʻi fiemālie, pe ko haʻatau nofo pē mo kinautolu ʻi he fakalongolongo. Kapau te tau lava ʻo tokoni ke fakamaʻamaʻa ʻenau ngaahi kavengá, neongo kapau ko ha kiʻi taimi siʻi pē, te tau lava leva ʻo mamata ki he ngaahi fakahā maʻongoʻonga ʻo e mālohi ʻo e Fakamoʻuí ʻi heʻenau moʻuí.
ʻI heʻetau hoko ko e kau ākonga ʻa Sīsū Kalaisí, ʻe lava ʻe he Kāingalotú ʻo fai ha liliu ʻoku leleí ʻi he māmaní. Te tau lava ʻo ʻoange ha ongoʻi fiefia ʻoku hoʻata atu mei hotau fofongá—ko ha fiefia ʻoku tau vahevahe ʻi he ngaahi lea ʻo e ʻofá mo e tōʻonga angaʻofá. Tau hoko muʻa ko ha kaungāʻapi lelei, kau pule ngāue lelei, kau ngāue lelei. Tau feinga muʻa ke tau hoko ko ha kau Kalisitiane lelei ʻi he taimi kotoa pē.
Kuo fakafoki mai ʻe he ʻEikí ʻEne ongoongoleleí mo e ngaahi ouau ʻoku fiemaʻú kae lava ke maʻu ʻe he fānau ʻa e Tamai Hēvaní ʻa e ngaahi talaʻofa kotoa pē ʻokú ne haʻi kitautolu kiate Iá. ʻI heʻetau tokoniʻi hotau kāingá ʻi honau ngaahi faingataʻaʻia fakaʻahó, tau manatuʻi muʻa ke tokoniʻi kinautolu ke nau fakahoko mo tauhi ʻa e ngaahi palōmesi toputapu ko ʻení mo ʻenau Tamai Hēvaní koeʻuhí ke Ne lava ʻo talaʻofa kiate kinautolu ʻa e ngaahi tāpuaki fungani taha ʻo e moʻuí ni pea mo ʻitānití. ʻOku lava ke fakahoko ʻa e ngaahi talaʻofa ko ʻení ʻi hono Fakafoki Mai ʻo e ongoongolelei ʻo Sīsū Kalaisí mo ʻEne ngaahi kī ʻo e lakanga fakataulaʻeikí.
ʻI hono fakalea ʻe tahá, te tau lava ʻo tokoniʻi ʻa e niʻihi kehé ke nau nofo maʻu ʻi he hala ʻo e fuakavá. ʻOku ʻi ai hatau niʻihi ʻoku mavahe mei he halá ʻi ha ngaahi taimi, pea kuo pau ke tau manatuʻi ʻoku tau maʻu maʻu pē ʻa e faingamālie ke foki ki heʻetau Tamai Hēvaní. Neongo kapau ʻoku ʻikai ko e haohaoa tahá hotau halá, ka ʻoku fakamanatu mai maʻu pē ʻe he Fakamoʻuí, “ʻI [heʻetau] faʻa fakatomala mo kole ha fakamolemole, ʻi he loto-moʻoní, [ʻe] fakamolemoleʻi ʻa [kitautolu].”
Ko e taha ʻo e ngaahi ngāue olopoto ʻa e filí ʻi he ʻaho ní ko hono ʻai ke tau fakakaukau mo tui ʻoku ʻikai ha founga ke tau liliu ai pe ʻikai ke tau toe maʻu ha ʻamanaki lelei. ʻOku ngaohi ʻe he fakakaukau fakatupu ʻauha ko ʻení ha tokolahi ʻo kitautolu ke tuku ai ʻetau feingá. Pea ko e taimi ʻeni ʻe lava ke ʻoange ai ʻe heʻetau ʻofá, ngaahi lea fakalotolahí mo e poupoú, hotau taimí, mo ʻetau tokoní ki ha taha, ha ʻamanaki lelei ʻoku feʻungá ke ne toe feinga pē.
Mahalo pē ʻokú ke fakakaukau, “Sai, ka ko hai ʻoku ngāue fakaetauhi mai kiate aú?” ʻI heʻetau ō ʻo tāpuekina ʻa e moʻui ʻa hotau kāingá, te tau tānaki ai ha ngaahi fakamoʻoni te ne fakafonu ʻetau moʻuí ʻaki ʻa e tui ki he ʻEiki ko Sīsū Kalaisí. ʻE hanga ʻe he ngaahi fakamoʻoni ko ʻení ʻo toe fakafoʻou kitautolu ke tau toe feinga pē. ʻE fakaake mo tokoniʻi kitautolu ʻe he Laumālie Māʻoniʻoní ʻaki ha ngaahi fakamoʻoni foʻou ke hokohoko atu ʻi hotau ngaahi faingataʻaʻiá mo e ngaahi ʻahiʻahi fakatāutahá. ʻI he taimi pē ʻoku tau feinga ai ke faitāpuekina ʻa e moʻui ʻa e niʻihi kehé, ʻoku ʻaloʻofa lahi ange ʻa e ʻEikí kiate kitautolu; ʻokú Ne fakamālohia mo tokoniʻi kitautolu ʻi heʻetau moʻuí.
Kātaki ʻo manatuʻi ko e ʻEiki ko Sīsū Kalaisí ʻa ho Fakamoʻuí pea ʻokú Ne ʻafioʻi fakataautaha koe. ʻOkú Ne ʻafioʻi ʻa e meʻa ʻoku fiemaʻu ke fakahoko ʻaki ʻa e uiuiʻí pea tukuange ha ngaahi meʻa kae tokoni ki he fānau ʻa e ʻOtuá. ʻOkú Ne maʻu ʻa e mālohi ke tāpuakiʻi koe ʻi he meʻa kotoa pē, kapau te ke tui kiate Ia pea ʻikai veiveiua.
Siʻoku kāinga ʻofeina, ʻi he ʻaho ko ia naʻe fakakaukau ai ha taki lakanga fakataulaʻeiki ke ma ʻaʻahi ki ha faʻē mo ha foha naʻe ʻikai kau ʻi heʻemau ʻasenitá, ʻoku ou fakahā atu naʻe ʻafioʻi ʻe he ʻOtuá naʻá na fiemaʻu kimaua. Pea ʻi hono aofangatukú, ko au ia naʻe faitokoniá. ʻI he ʻaho ko iá, naʻá ku maʻu ai ha taha ʻo e ngaahi lēsoni maʻongoʻonga taha ʻo e ʻofa ʻa e Fakamoʻuí kiate kitautolú.
ʻOku ou fakamoʻoni ko Sīsū Kalaisi ʻa e Fakamoʻui ʻo e māmaní, ʻokú Ne moʻui, naʻá Ne moʻui pea pekia maʻa koe mo au, pea naʻá Ne toetuʻu maʻa koe mo au koeʻuhí ke tau lava ʻo ʻamanaki lelei ki he fakataha fakasilesitiale ʻoku fonu ʻi he fiefiá fakataha mo kinautolu kuo ʻosi ʻi he tafaʻaki ʻe taha ʻo e veilí. ʻOku ou ʻilo ʻokú Ne ʻafioʻi lelei koe pea mo au. ʻOkú Ne ʻafioʻi hotau ngaahi taimi faingataʻaʻiá takitaha, pea ʻokú Ne maʻu ʻa e mālohi ke tokoniʻi kitautolu ʻi he ngaahi momeniti ko ia ʻoku tau ongoʻi tuʻu laveangofua taha aí. ʻOku ou ʻilo naʻe hā ʻa e ʻEiki ko Sīsū Kalaisí mo ʻetau Tamai Hēvaní kia Siosefa Sāmita ke fakafoki mai ʻa e ongoongoleleí ʻi he ngaahi ʻaho ko ʻení. ʻOku ou ʻilo ko hotau palōfita ʻofeina ko Palesiteni Lāsolo M. Nalesoní, ko ha palōfita ia ʻa e ʻEikí, pea ʻoku ou fakamoʻoni ki he ngaahi meʻá ni ʻi he huafa ʻo Sīsū Kalaisí, ʻēmeni.