Tauhi ʻa e Aká, pea ʻe Tupu ʻa e Ngaahi Vaʻá
ʻE maʻu ivi ʻa e ngaahi vaʻa hoʻo fakamoʻoní mei hoʻo tui kuo fakamālohia ki he Tamai Hēvaní mo Hono ʻAlo ʻOfaʻangá.
Ko ha Falelotu Motuʻa ʻi Suikau
Ko e taʻu 2024 ko ha makamaile ia kiate au. ʻOku fakaʻilongaʻi ai ʻa e taʻu 75 talu mei hono papitaiso mo hilifakinima au ko ha mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ʻi Suikau, Siamane.
Ko ha koloa mahuʻinga kiate au ʻeku mēmipa ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Ke lau fakataha mo e kakai fuakava ʻo e ʻOtuá, mo kimoutolu, kāinga, ko e taha ia ʻo e lāngilangi maʻongoʻonga taha ʻi heʻeku moʻuí.
Ko e taimi ʻoku ou fakakaukau ai ki heʻeku fononga fakataautaha ʻi he tuʻunga fakaākongá, ʻoku foki maʻu pē ʻeku fakakaukaú ki ha fale motuʻa ʻi Suikau, ʻa ia ʻoku ou maʻu ai ha ngaahi manatu melie fakangalongataʻa ki heʻeku faʻa maʻu houalotu sākalamēniti ʻi he Siasi ʻo Sīsū Kalaisí ʻi heʻeku kei siʻí. Ko e feituʻu ia naʻe kamata mei ai hono tanumaki ʻo ʻeku fakamoʻoní.
Naʻe ʻi ai ha ʻōkani-pamu motuʻa ʻi he falelotu ko ʻení. Naʻe vahe ʻi he Sāpate kotoa ha kiʻi talavou ke ne pamu ki ʻolunga mo lalo ʻa e ī ʻokú ne ʻai ʻa e ʻōkaní ke ngāué. Naʻá ku faʻa maʻu ʻi he taimi ʻe niʻihi ʻa e faingamālie lelei ke tokoni ʻi he ngāue mahuʻinga ko ʻení.
ʻI he hivaʻi ʻe he fakatahaʻangá ʻetau ngaahi himi manakoá, naʻá ku pamu ʻaki hoku iví kotoa ke ʻoua naʻa mate ʻa e ʻōkaní. Naʻá ku sio mei he tangutuʻanga ʻo e taha pamu ií ki ha ongo matapā sioʻata fakalanulanu fakaʻofoʻofa, ko e matapā ʻe taha naʻe ʻi ai ʻa e fakatātā ʻo e Fakamoʻui ko Sīsū Kalaisí pea ko e taha ko Siosefa Sāmita ʻi he Vao ʻAkau Tapú.
ʻOku ou kei lava pē ʻo manatuʻi ʻa e ongoʻi toputapu naʻá ku maʻu ʻi heʻeku vakai ki he ongo matapā sioʻata naʻe maama ʻi he laʻaá ʻi he lolotonga ʻeku fanongo ki he ngaahi fakamoʻoni ʻa e Kāingalotú mo ʻenau hivaʻi ʻa e ngaahi himi ʻo Saioné.
Naʻe fakamoʻoniʻi ʻe he Laumālie ʻo e ʻOtuá ki hoku ʻatamaí mo hoku lotó, ʻi he feituʻu māʻoniʻoni ko iá, naʻe moʻoni: ko Sīsū Kalaisi ʻa e Fakamoʻui ʻo e māmaní. Ko Hono Siasí ‘eni. Naʻe mamata ʻa e Palōfita ko Siosefa Sāmitá ki he ʻOtua ko e Tamaí mo Sīsū Kalaisi mo fanongo ki Hona leʻó.
Lolotonga haʻaku ʻi ʻIulope ʻi he konga kimuʻa ʻo e taʻu ní, ʻi ha fatongia, naʻá ku maʻu ha faingamālie ke foki ki Suikau. Ko e fakamamahí, he ʻoku ʻikai ke toe ʻi ai ʻa e falelotu motuʻa ʻofeiná ni. Naʻe holoki ia ʻi ha ngaahi taʻu lahi kimuʻa ke ʻatā ki ha fuʻu fale nofoʻanga.
Ko e Hā ʻOku Taʻengatá, pea Ko e Hā ʻOku ʻIkaí?
Te u tala atu pē ʻoku fakamamahi ke ʻiloʻi ko e fale ʻofeina ko ʻeni mei heʻeku kei siʻí kuo hoko pē ia ko ha manatu melie ʻi he taimí ni. Naʻe hoko ia ko ha fale toputapu kiate au. Ka ko ha fale pē ia.
ʻI he tafaʻaki ʻe tahá, kuo teʻeki ai mole ʻa e fakamoʻoni fakalaumālie naʻá ku maʻu mei he Laumālie Māʻoniʻoní ʻi he ngaahi taʻu lahi ko iá. Ko hono moʻoní, kuó ne fakaʻau ʻo mālohi ange. Kuo hoko ʻa e ngaahi meʻa naʻá ku ako ʻi heʻeku tupu haké fekauʻaki mo e ngaahi tefitoʻi moʻoni mahuʻinga ʻo e ongoongolelei ʻo Sīsū Kalaisí ko hoku fakavaʻe mālohi ʻi heʻeku moʻuí. ʻOku ou kei puke pē ʻa e fehokotaki fakafuakava naʻá ku fai mo ʻeku Tamai Hēvaní mo Hono ʻAlo ʻOfeiná—ka kuo fuoloa ʻa e holoki ʻa e falelotu Suikaú pea pulia mo e ongo matapā sioʻata fakalanulanú.
Naʻe folofola ʻa Sīsū, “ʻE mole ʻa e langí mo māmani, kae ʻikai mole ʻeku leá.”
“ʻE mole ʻa e ngaahi moʻungá pea hiki mo e ngaahi tafungofungá, ka ko ʻeku ʻofá ʻe ʻikai mole meiate koe, pea ʻe ʻikai hiki ʻa e fuakava ʻo ʻeku melinó, ʻoku pehē ʻe [he ʻEikí].”
Ko e taha ʻo e ngaahi meʻa mahuʻinga taha ʻe lava ke tau ako ʻi he moʻui ní ko e faikehekehe ‘o e meʻa ʻoku taʻengatá mo ia ʻoku ʻikaí. Ko ʻene mahino pē ia kiate kitautolú, ʻe liliu ʻa e meʻa kotoa—ʻa hotau ngaahi vā fetuʻutakí, ko e ngaahi fili ʻoku tau faí, ko e anga ʻo ʻetau feohi mo e kakaí.
Ko e kī ki he fakatupulaki ʻo ʻetau fakamoʻoni kia Sīsū Kalaisi mo Hono Siasí ke ʻiloʻi ʻa e meʻa ʻoku taʻengatá mo ia ʻoku ʻikaí.
ʻOua ʻe Fetoʻoaki ʻa e Ngaahi Vaʻá ko ha Ngaahi Aka
Ko e ongoongolelei ʻo Sīsū Kalaisi kuo fakafoki maí, ʻi he akoʻi ʻe he Palōfita ko Siosefa Sāmitá, ʻokú ne “tali kotoa, fakataha mo e meʻa kotoa pē ʻo e moʻoní.” Ka ʻoku ʻikai ʻuhinga ia ʻoku mahuʻinga tatau ʻa e moʻoni kotoa. Ko e ngaahi moʻoni ʻe niʻihi ko e uho, ʻoku mahuʻinga, ʻi he aka ʻo ʻetau tuí. Ko e ngaahi meʻa kehé ko e tānaki pe ngaahi vaʻa pē ia—ʻoku nau mahuʻinga, ka ʻi he taimi pē ʻoku nau fehokotaki ai mo e ngaahi meʻa mahuʻingá.
Naʻe pehē foki ʻe he Palōfita ko Siosefá, “Ko e ngaahi tefito‘i mo‘oni mahu‘inga ‘o ‘etau tui fakalotú ko e fakamo‘oni ko ia ‘a e kau ‘Aposetoló mo e kau Palōfitá ‘o fekau‘aki mo Sīsū Kalaisí, na‘e pekia, pea telio, pea toe tu‘u ‘i he ‘aho hono tolú, ‘o hā‘ele hake ki he langí; pea ko hono toenga ‘o e ngaahi me‘a kehe kotoa pē fekau‘aki mo ‘etau tui fakalotú ko ha ngaahi tānaki atu pē ki ai.”
Ko hono fakalea ʻe tahá, ko Sīsū Kalaisi mo ʻEne feilaulau fakaleleí ko e aka ia ʻo ʻetau fakamoʻoní. Ko e toenga kotoa ʻo e ngaahi meʻa kehé ko e ngaahi vaʻa.
ʻOku ʻikai ʻuhinga ʻeni ia ke pehē ʻoku ʻikai mahuʻinga ʻa e ngaahi vaʻá. ʻOku fiemaʻu ʻe he fuʻu ʻakaú ha ngaahi vaʻa. Kae hangē ko e folofola ʻa e Fakamoʻuí ki Heʻene kau ākongá, “ʻOku ʻikai faʻa fua ʻa e vaʻá ʻiate ia pē, ʻo kapau ʻe ʻikai nofo ʻi he vainé.” Ka ʻikai ha fehokotaki mo e Fakamoʻuí, ki he ivi ʻoku maʻu ʻi he aká, ʻe mae ʻa e vaʻá pea mate.
ʻI he taimi ʻoku tau fakatupulaki ai ʻetau fakamoʻoni kia Sīsū Kalaisí, ʻoku ou fifili pe ʻoku tau faʻa fetoʻoaki ʻi he taimi ʻe niʻihi ʻa e ngaahi vaʻá ko ha ngaahi aka. Ko e fehālaaki ʻeni naʻe fakatokangaʻi ʻe Sīsū ʻi he kau Fālesi ʻi Hono kuongá. Naʻa nau fuʻu tokanga ki he fanga kiʻi meʻa iiki ʻo e fonó ʻo nau iku tukunoaʻi ai ʻa e meʻa naʻe ui ʻe he Fakamoʻuí ko e “ngaahi meʻa mamafa ʻo e fonó”—ʻa e ngaahi tefitoʻi moʻoni mahuʻinga hangē ko e “faitotonú mo e loto-ʻofá mo e tuí.”
Kapau ʻokú ke fie tauhi ha fuʻu ʻakau, ʻoku ʻikai ke ke afuhi pē ʻa e vaí ʻi he ngaahi vaʻá. ʻOkú ke fuʻifuʻi ʻa e aká. Ko e meʻa tatau pē, kapau ʻokú ke fiemaʻu ʻa e ngaahi vaʻa hoʻo fakamoʻoní ke tupu mo fua, tauhi ʻa e aká. Kapau ʻokú ke veiveiua ʻi ha tokāteline pau pe angafai pe ʻelemēniti ʻi he hisitōlia ʻo e Siasí, fekumi ki ha mahino ʻaki hoʻo tui kia Sīsū Kalaisí. Feinga ke mahino kiate koe ʻEne feilaulau maʻaú, ʻEne ʻofa kiate koé, Hono finangalo kiate koé. Muimui kiate Ia ʻi he loto-fakatōkilalo. ʻE maʻu ivi ʻa e ngaahi vaʻa hoʻo fakamoʻoní mei hoʻo tui mālohi ki he Tamai Hēvaní mo Hono ʻAlo ʻOfaʻangá.
Hangē ko ʻení, kapau ʻokú ke fiemaʻu ha fakamoʻoni mālohi ange ki he Tohi ʻa Molomoná, tokanga taha ki heʻene fakamoʻoni kia Sīsū Kalaisí. Fakatokangaʻi ʻa e founga fakamoʻoni ʻa e Tohi ʻa Molomoná kiate Iá, mo e founga ʻo ʻene fakaafeʻi mo ueʻi koe ke ke haʻu kiate Iá.
Kapau ʻokú ke kumia ha aʻusia mahuʻingamālie ʻi he ngaahi fakatahaʻanga ʻa e Siasí pe ʻi he temipalé, feinga ke ke kumi ʻa e Fakamoʻuí ʻi he ngaahi ouau toputapu ʻoku tau maʻu ʻi aí. Kumi ʻa e ʻEikí ʻi Hono fale māʻoniʻoní.
Kapau ʻe faifai ange peá ke ongoʻi kuo ʻosi ho iví pe lōmekina ʻi ho ngaahi fatongia ʻi he Siasí, feinga ke toe nofotaha hoʻo ngāué ʻia Sīsū Kalaisi. ʻAi ho uiuiʻi ʻi he Siasí ke hoko ko hano fakahaaʻi hoʻo ʻofa kiate Iá.
Tauhi ʻa e ngaahi aká, pea ʻe tupu ʻa e ngaahi vaʻá. Pea ʻi hono taimi totonú, te nau fua.
Aka mo Langa Hake ʻIate Ia
Ko e tui mālohi kia Sīsū Kalaisí ʻoku ʻikai hoko pē ʻi ha pō ʻe taha. ʻIkai, ʻi he maama fakamatelié ni, ko e talatalá mo e talatalaʻāmoa ʻo e veiveiuá ʻoku tupu fakafokifaá. Ko e fuʻu ʻakau moʻui lelei, mo fua lahi ʻo e tuí ʻoku fiemaʻu ki ai ʻa e ngāue fakamātoató. Pea ko ha konga mahuʻinga ʻo e ngāue ko iá ke fakapapauʻi ʻoku tau tuʻu maʻu ʻia Kalaisi.
Hangē ko ʻení: ʻI he kamatá, ʻe ala tataki kitautolu ki he ongoongolelei ʻa Sīsū Kalaisí mo e Siasí koeʻuhi ko ʻetau saiʻia ʻi he anga fakamaheni ʻa e kāingalotú pe ʻi he pīsope angaʻofá pe ko e ʻasi maʻa ʻa e falelotú. ʻOku mahuʻinga moʻoni ʻa e ngaahi tūkunga ko ʻení ki he tupulaki ʻa e Siasí.
Ka neongo iá, kapau ʻe ʻikai ke loloto ange ai ʻa e aka ʻo ʻetau fakamoʻoní, ko e hā ʻe hoko ʻi ha taimi te tau hiki ai ki ha uooti foʻou ʻoku nau lotu ʻi ha fale ʻoku ʻikai fakaʻofoʻofa, mo ha kāingalotu ʻoku ʻikai fuʻu anga fakakaumeʻa, pea lea ʻaki ʻe he pīsopé ha meʻa ʻo tau ʻita ai?
Ko ha fakatātā ʻe taha: ʻIkai ʻapē ʻoku ngali ʻuhinga lelei ke ʻamanaki kapau ʻoku tau tauhi ʻa e ngaahi fekaú mo sila ʻi he temipalé, ʻe tāpuekina kitautolu ʻaki ha fāmili tokolahi, mo fiefia mo ha fānau poto mo talangofua, ʻa ia ʻoku nau mālohi kotoa ʻi he Siasí, ngāue fakafaifekau, hiva ʻi he kuaea ʻa e uōtí, mo loto-fiemālie ke nau tokoni ki hono fakamaʻa ʻa e ʻapi siasí ʻi he pongipongi Tokonaki kotoa pē?
ʻOku ou ʻamanaki pē te tau mamata ki heni ʻi heʻetau moʻuí. Ka ʻe fēfē kapau he ʻikai hoko ia? Te tau kei nofo maʻu nai ʻi he Fakamoʻuí ʻo tatau ai pē pe ko e hā ʻa e ngaahi tūkungá—ʻo falala kiate Ia mo ʻEne taimí?
Kuo pau ke tau fehuʻi kiate kitautolu: ʻOku makatuʻunga nai ʻeku fakamoʻoní ʻi he meʻa ʻoku ou ʻamanaki ke hoko ʻi heʻeku moʻuí? ʻOku fakafalala nai ia ki he ngaahi tōʻonga pe ʻulungaanga ʻo e niʻihi kehé? Pe ʻoku makatuʻunga mālohi nai ia ʻia Sīsū Kalaisi, ʻo “aka mo langa hake ʻiate ia,” tatau ai pē pe ko e hā ʻa e ngaahi tūkunga feliliuaki ʻo e moʻuí?
Ngaahi Tukufakaholó, ʻUlungāngá, mo e Tuí
ʻOku fakamatala ʻa e Tohi ʻa Molomoná ki ha kakai “naʻa nau faipau ʻi he tauhi ʻo e ngaahi ouau ʻa e ʻOtuá.” Ka naʻe haʻu ha tangata taʻetui ko Kolihola, ʻo ne manukiʻi ʻa e ongoongolelei ʻa e Fakamoʻuí, ʻo ui ia ʻoku “fakasesele” mo e “talatukufakaholo fakasesele ʻa ʻenau ngaahi tamaí.” Naʻe tohoakiʻi “atu [ʻe Kolihola] ʻa e loto ʻo e tokolahi, ʻo fakatupu ʻa ʻenau hiki hake honau ʻulú ke māʻolunga ʻi heʻenau faiangahalá.” Ka naʻe ʻi ai ʻa e niʻihi kehe naʻe ʻikai ke ne lava ʻo kākaaʻi koeʻuhí, he ko e ongoongolelei ʻo Sīsū Kalaisí kiate kinautolu naʻe ʻikai ko ha tukufakaholo pē.
ʻOku mālohi ʻa e tuí ʻi he taimi ʻoku loloto ai hono aká ʻi he aʻusia fakafoʻituituí, tukupā fakataautaha kia Sīsū Kalaisí, tauʻatāina mei heʻetau ngaahi tukufakaholó pe ko e hā ʻa e lau mo e meʻa ʻe ala fakahoko ʻe he niʻihi kehé.
ʻE siviʻi mo ʻahiʻahiʻi ʻa ʻetau fakamoʻoní. ʻOku ʻikai ko ha tui ʻa e tuí kapau ʻe ʻikai pē ke ʻahiʻahiʻi ia. ʻOku ʻikai mālohi ʻa e tuí kapau ʻe ʻikai pē ke fakafepakiʻi ia. Ko ia, ʻoua naʻa mole hoʻo ʻamanakí kapau ʻoku ʻahiʻahiʻi hoʻo tuí pe ʻi ai ha ngaahi fehuʻi ʻoku teʻeki ai tali.
ʻOku totonu ke ʻoua naʻa tau ʻamanaki ʻe mahino ʻa e meʻa kotoa kimuʻa pea tau toki ngāue. ʻOku ʻikai ko e tuí ia. Hangē ko e akoʻi ʻe ʻAlamaá, “ʻOku ʻikai ko e tuí ʻa e maʻu ha ʻilo haohaoa ki he ngaahi meʻá.” Kapau te tau tatali kae ʻoua kuo tali kotoa ʻetau ngaahi fehuʻí pea tau toki ngāue, ʻoku tau fakangatangata lahi ʻa e lelei te tau lava ʻo fakahokó, mo tau fakangatangata ʻa e mālohi ʻo ʻetau tuí.
ʻOku fakaʻofoʻofa ʻa e tuí koeʻuhí he ʻoku vilitaki ia ʻo aʻu pē ki he taimi ʻoku ʻikai hoko mai ai ʻa e ngaahi tāpuakí ʻo hangē ko ʻetau ʻamanakí. ʻOku ʻikai ke tau lava ʻo ʻilo ʻa e kahaʻú, ʻoku ʻikai ke tau ʻilo ʻa e kotoa ʻo e ngaahi talí, ka te tau lava ʻo falala kia Sīsū Kalaisi ʻi heʻetau kei fakalakalaka pē ki muʻá he ko hotau Fakamoʻuí mo e Huhuʻí Ia.
ʻOku kātekina ʻe he tuí ʻa e ngaahi faingataʻa mo e taʻepau ʻo e moʻuí he ʻoku tuʻu maʻu ia ʻia Kalaisi mo ʻEne tokāteliné. ʻOku faʻu fakataha ʻe Sīsū Kalaisi mo ʻetau Tamai Hēvaní ʻa ia naʻá Ne fekauʻi mai Iá, ʻa e taumuʻa taʻe-liua mo falalaʻanga haohaoa pē taha ʻo ʻetau fakafalalá.
Ko e fakamoʻoní ʻoku ʻikai ko ha faʻahinga meʻa ia ʻokú ke langa fakaʻangataha pē, pea ʻe tuʻu ia ʻo taʻengata. ʻOku hangē ange ia ko ha fuʻu ʻakau ʻokú ke tauhi maʻu pē. Ko e tō ko ia ʻo e folofola ʻa e ʻOtuá ʻi ho lotó ko e ʻuluaki sitepú pē ia. Ko e kamata huli pē ʻetau fakamoʻoní, ko e toki kamata leva ia ʻa e ngāue moʻoní. Ko e taimi ia te mou “tauhi fakalelei [ai] ia koeʻuhí ke tupu hono aká, koeʻuhí ke tupu hake ia ʻo fua ʻaki ha fuá.” ʻOku fiemaʻu ʻa e “faivelenga lahi” mo e “kātaki ʻi hono tauhi ʻo e folofolá.” Ka ko e ngaahi talaʻofa ʻa e ʻEikí ʻoku pau: “Te mou toki utu ʻa e ngaahi totongi ʻo hoʻomou tuí, mo hoʻomou faivelengá, mo e faʻa kātakí, mo e kātaki fuoloá, ʻi hoʻomou tatali ke fua ʻaki ʻe he fuʻu ʻakaú ha fua moʻomoutolu.”
Siʻoku ngaahi tokoua mo e tuofāfine ʻofeina, siʻoku ngaahi kaungāmeʻa, ʻoku ʻi ai haku konga ʻoku ʻofa ki he falelotu motuʻa ʻi Suikaú mo hono ngaahi matapā sioʻata fakalanulanú. Ka ʻi he taʻu ʻe 75 kuohilí, kuo taki au ʻe Sīsū Kalaisi ʻi ha fononga ʻi he moʻuí ʻoku fakafiefia ange ʻi ha meʻa naʻá ku mei lava ʻo mafakakaukauá. Kuó ne fakafiemālieʻi au ʻi hoku ngaahi mamahí, tokoni ke u ʻilo hoku ngaahi vaivaí, fakamoʻui hoku ngaahi kafo fakalaumālié, mo tauhi au ʻi heʻeku tui ʻoku tupulekiná.
Ko ʻeku fakaʻānaua moʻoni mo e tāpuaki ke tau tauhi maʻu pē ʻa e aka ʻo ʻetau tui ki he Fakamoʻuí, ki Heʻene tokāteliné, pea ʻi Hono Siasí. Ko ʻeku fakamoʻoní ʻeni ʻi he huafa toputapu ʻo hotau Fakamoʻuí, ko hotau Huhuʻi, ko hotau ʻEikí—ʻi he huafa ʻo Sīsū Kalaisí, ʻēmeni.