Ko e Fiefia ‘o Hotau Huhuʻí
ʻE lava ke fakamoʻui kitautolu takitaha ʻe he ʻofa mo e mālohi ʻo Sīsū Kalaisí mei heʻetau ngaahi fehalaākí, vaivaí, mo e angahalá pea tokoniʻi kitautolu ke tau hoko ʻo lelei ange.
ʻI he taʻu nai ʻe 10 kuohilí, naʻe ueʻi au ke u tā valivali ha fakatātā ʻo e Fakamoʻuí. Neongo ko ha tokotaha tā valivali au, ka naʻe fakatupu lōmekina ʻeni. ʻE anga fēfē nai haʻaku tā valivali ha fakatātā ʻo Sīsū Kalaisi te ne fakahoʻata totonu Hono Laumālié? Te u kamatá ʻi fē? Pea ko e taimi fē ia ke fakahoko aí?
Naʻa mo ʻeku ngaahi fehuʻí, naʻá ku fakakaukau ke tā ia mo falala ʻe tokoniʻi au ʻe he ʻEikí. Ka naʻe pau ke hokohoko atu ʻeku ngāué pea tuku ʻa e meʻa kotoa pē kiate Ia. Naʻá ku lotu, fakalaulauloto, fekumi, mo tā fakatātā pea naʻe tāpuekina au ke maʻu ha tokoni. Pea naʻe kamata ke hoko ʻa e kanivasi hinehiná ko ha meʻa naʻe toe mahulu mo lelei ange.
Naʻe ʻikai ko ha ngāue faingofua eni. Taimi ʻe niʻihi naʻe ʻikai hā mai ia ʻo hangē ko e meʻa naʻá ku ʻamanaki atu ki aí. Taimi ʻe niʻihi naʻe ʻi ai ha ngaahi momeniti tā valivali lelei ʻaupito mo e ngaahi fakakaukau naʻe ueʻi fakalaumālie. Pea ʻi he taimi lahi, naʻe pau pē ke u toutou feinga.
ʻI heʻeku fakakaukau kuo faifai pea ʻosi ʻa e tā valivali loló pea mōmoá, naʻe kamata ke u vānisi ia ke maluʻi mei he ʻulí mo e efú. ʻI heʻeku fai iá, naʻá ku fakatokangaʻi ʻoku kamata ke liliu, palai, mo movete ʻa e laʻiʻulu ʻi he fakatātaá. Taimi siʻi kuó u fakatokangaʻi naʻe fuʻu vave ʻeku fakaʻaongaʻi ʻa e vānisí, pea naʻe kei viviku pē ʻa e konga ia ko ia ʻo e tā valivalí!
Naʻá ku tamateʻi ha konga ʻo ʻeku tā valivalí ʻaki ʻa e vānisí. Naʻe tō hifo hoku lotó. Naʻá ku ongoʻi ʻo hangē kuó u fakaʻauha ʻa e meʻa naʻe tokoniʻi au ʻe he ʻOtuá ke u ngaohí. Naʻá ku tangi mo ongoʻi loto-mamahi. ʻI he siva ʻa e ʻamanakí, naʻá ku fai e meʻa ʻe mei fai ʻe ha taha pē ʻi ha tūkunga peheni: naʻá ku telefoni ki heʻeku faʻeé. Naʻá ne pehē mai ʻi he fakakaukau lelei mo e fiemālie, “He ʻikai te ke toe maʻu ʻa e meʻa naʻá ke maʻú, ka ke fai pē ʻa e lelei taha te ke lavá ʻaki ʻa e meʻa ʻokú ke maʻú.”
Peá U Kai, tā fakatātaaʻi ʻe Kristin M. Yee
Ko ia naʻá ku lotua mo kole ha tokoni, peá u tā valivali ʻi he poó kakato ke fakaleleiʻi ʻa e fakatātaá. Pea ʻoku ou manatuʻi ʻeku mamata ki he tā valivalí ʻi he pongipongí—naʻe fakaʻofoʻofa ange ia ʻi he tuʻunga kimuʻá. Naʻe malava fēfē nai ia? Ko e meʻa naʻá ku pehē ko ha fehālaaki he ʻikai lava ʻo fakaleleiʻí, naʻe hoko ia ko ha faingamālie ke fakahaaʻi ai Hono toʻukupu ʻaloʻofá. Naʻe teʻeki ʻosi ʻEne ngāue ki he tā valivalí, pea teʻeki ʻosi ʻEne ngāue kiate aú. He toki fiefia mo e fiemālie ia naʻá ne fakafonu hoku lotó. Naʻá ku fakahīkihikiʻi ʻa e ʻEikí ʻi Heʻene ʻaloʻofá, he ko e mana ko ʻení naʻe ʻikai ngata pē ʻi heʻene fakahaofi ʻa e tā valivalí ka naʻá ne akoʻi lahi ange au fekauʻaki mo ʻEne ʻofá mo e mālohi ke fakahaofi kitautolu takitaha mei heʻetau ngaahi fehalaākí, vaivaí, mo e angahalá pea mo tokoni ke tau hoko ʻo toe lelei ange.
Hangē pē ko e tupulaki ʻo e lahi ʻo ʻeku houngaʻia ʻi he Fakamoʻuí ʻi Heʻene tokoniʻi au ʻi he ʻaloʻofa ke fakaleleiʻi ʻa e tā valivali naʻe “taʻe-malava ke fakaleleiʻí”, ʻoku pehē pē mo e fakautuutu ʻeku ʻofa mo e houngaʻia fakataautaha ki hoku Fakamoʻuí ʻi heʻeku feinga ke ngāue mo Ia ʻi hoku ngaahi vaivaí pea fakamolemoleʻi ʻeku ngaahi fehalaākí. Te u houngaʻia maʻu ai pē ki hoku Fakamoʻuí ʻi he lava ke u liliu mo fakamaʻa ʻeku moʻuí. ʻOkú Ne maʻu ʻeku ʻofá, pea ʻoku ou ʻamanaki ke fai kotoa ʻa ia ʻokú Ne finangalo ke u fakahoko mo aʻusiá.
ʻOku fakaʻatā kitautolu ʻe he fakatomalá ke tau ongoʻi ʻa e ʻofa ʻa e ʻOtuá pea ʻiloʻi mo ʻofa ʻiate Ia ʻi ha ngaahi founga naʻe ʻikai ke tau mei ʻilo ki ai. Naʻe folofola ʻa e Fakamoʻuí fekauʻaki mo e fefine naʻá ne tākai hono toʻukupu kelekelé ʻo pehē, “Ko ʻene angahalá, ʻa ia ʻoku lahí, kuo fakamolemoleʻi ia; pea ʻoku lahi ʻene ʻofá: ka ko ia ʻoku siʻi hono [fakamolemoleʻí], ʻoku siʻi ʻene ʻofá.” Naʻá ne ʻofa lahi ʻia Sīsū he kuó Ne fakamolemoleʻi lahi ia.
ʻOku ʻi ai ha fakafiemālie mo ha ʻamanaki lelei ʻi he ʻilo te tau lava ʻo toe feingá—hangē ko ia naʻe akoʻi ʻe ʻEletā Tēvita A. Petinaá, te tau lava ʻo maʻu maʻu pē ha fakamolemole ʻo ʻetau ngaahi angahalá ʻo fakafou ʻi he mālohi fakamāʻoniʻoniʻi ʻo e Laumālie Māʻoniʻoní ʻi heʻetau fakatomala moʻoni mo fakamātoató.
Ko e mālohi huhuʻi ʻo Sīsū Kalaisí ko e taha ia ʻo e ngaahi tāpuaki maʻongoʻonga taha kuo talaʻofa mai ʻo ʻetau ngaahi fuakavá. Fakakaukau ki he meʻá ni ʻi hoʻo kau ʻi he ngaahi ouau toputapú. Ka ne taʻeʻoua ia, he ʻikai ke tau lava ʻo foki ki ʻapi ki he ʻao ʻo ʻetau Tamai Hēvaní mo kinautolu ʻoku tau ʻofa aí.
ʻOku ou ʻilo ʻoku māfimafi hotau ʻEiki mo e Fakamoʻui ko Sīsū Kalaisí ke fakamoʻui. ʻI Heʻene hoko ko e ʻAlo ʻo e ʻOtuá ʻa ia naʻá Ne fai ʻa e fakalelei maʻá e ngaahi angahala ʻo e māmaní mo tuku hifo ʻEne moʻuí pea toe toʻo hake ia, ʻokú Ne maʻu ai ʻa e mālohi ʻo e huhuʻí mo e toetuʻú. Kuó Ne fakahoko ʻa e moʻui taʻe-faʻa-maté maʻá e tokotaha kotoa pē mo e moʻui taʻengatá maʻanautolu ʻoku fili Iá. ʻOku ou ʻilo ʻe lava ke tau fakatomala pea fakamaʻa ʻetau moʻuí mo huhuʻi kitautolu ʻo fakafou ʻi Heʻene feilaulau fakaleleí. Ko ha mana ia ʻa ʻEne ʻofa ʻiate koe mo au ʻi he founga ko ʻení.
Kuó Ne folofola, “He ʻikai koā te mou tafoki mai ʻeni kiate au, pea fakatomala mei hoʻomou ngaahi angahalá, ʻo liliu, koeʻuhi ke u fakamoʻui ʻa kimoutolu?” Te Ne lava ʻo fakamoʻui ʻa e “ngaahi potu lala” ʻo homou laumālié—ʻa e ngaahi feituʻu kuo ngaohi ʻo mōmoa, faingataʻa, pea lala ʻe he angahalá mo e mamahí—pea “ngaohi [hoʻomou] toafá ke hangē ko ʻĪtení.”
Hangē pē ko e ʻikai lava ke mahino kiate kitautolu ʻa e mamahi mo e loloto ʻo e faingataʻaʻia ʻa Kalaisi ʻi Ketisemani pea ʻi he kolosí, ʻoku pehē pē ʻa e ʻikai ke tau lava ʻo “mafakakaukaua ʻa e ngataʻanga pe mahino kiate kitautolu e loloto ʻo [ʻEne] fakamolemolé,” ʻaloʻofá, mo e ʻofa fakalangí.
Mahalo te ke ongoʻi ʻi he taimi ʻe niʻihi he ʻikai malava ke huhuʻi koe, pe mahalo ʻokú ke mavahe mei he ʻofa ʻa e ʻOtuá mo e mālohi fakalelei ʻo e Fakamoʻuí koeʻuhí ko e meʻa ʻokú ke fefaʻuhi mo iá pe koeʻuhí ko e meʻa kuó ke faí. Ka ʻoku ou fakamoʻoni ʻoku ʻikai ke ke mamaʻo mei he tokoni ʻa e ʻEikí. Ko e Fakamoʻuí, naʻe “hāʻele hifo ki lalo ʻi he meʻa kotoa pē” pea ʻokú Ne ʻi ha tuʻunga fakalangi ke hiki hake koe mo maʻu koe mei he vanu fakapoʻuli tahá pea ʻomi koe ki “heʻene maama lahí.” ʻI Heʻene ngaahi mamahí, kuó Ne fokotuʻu ai ha founga ke tau takitaha ikunaʻi ai hotau ngaahi vaivai mo e angahala fakatāutahá. “ʻOku ʻiate ia ʻa e māfimafi kotoa pē ke fakamoʻui ʻa e tangata fulipē ʻoku tui ki hono huafá ʻo fua ʻaki ʻa e fua ʻoku ngali mo e fakatomalá.”
Hangē pē ko e fiemaʻu ha ngāue mo ha tautapa ki he tokoni ʻa e langí ke fakaleleiʻi ʻa e tā valivalí, ʻoku fiemaʻu ha ngāue, loto-fakamātoato, mo ha loto-fakatōkilalo ke ʻomi ʻa e “fua ʻoku ngali mo e fakatomalá.” ʻOku kau ʻi he ngaahi fua ko ʻení ʻa hono fakaʻaongaʻi ʻetau tui mo e falala kia Sīsū Kalaisi mo ʻEne feilaulau fakaleleí, ʻo foaki ki he ʻOtuá ha loto-mafesifesi mo ha laumālie fakatomala, vete mo liʻaki ʻa e angahalá, fakafoki ʻo e meʻa kuo maumaú ki he lelei taha te tau lavá, pea faifeinga ke moʻui māʻoniʻoni.
Ke fakatomala mo liliu moʻoní, kuo pau ke tau ʻuluaki “[ʻiloʻi] ʻetau ngaahi angahalá.” He ʻikai pehē ʻe ha taha ʻoku fiemaʻu ke ne fakaʻaongaʻi ha faitoʻo tukukehe ka mahino kiate ia ʻokú ne puke. Mahalo ʻe ʻi ai ha ngaahi taimi he ʻikai ke tau loto-fiemālie ke sivisiviʻi ʻetau ngaahi fakakaukaú mo e angafaí pea sio ki he meʻa ʻoku fiemaʻu moʻoni ke fakamoʻui mo fakaleleiʻí.
ʻI he ngaahi tohi ʻa C. S. Luisí, ʻoku tohi ai ʻe ʻĀlani ʻa e ngaahi leá ni ki ha tangata kuó ne tō ʻi he ngaahi founga pē ʻaʻaná: “ʻOiauē, [faʻahinga ʻo e tangatá], ʻoku fēfē hoʻomou taʻofi fakapoto kimoutolu mei he meʻa kotoa pē ʻe ala lelei kiate kimoutolú!”
Ko e hā ha ngaahi meʻa ʻe lava ke ta taʻofi ai kitaua mei he ngaahi meʻa ko ia ʻe ala lelei kiate kitauá?
ʻOua muʻa naʻa tau taʻofi kitautolu mei he lelei ʻoku finangalo ʻa e ʻOtuá ke tāpuakiʻi ʻaki kitautolú. Mei he ʻofa mo e ʻaloʻofa ʻokú Ne finangalo ke tau ongoʻí. Mei he maama mo e ʻilo ʻokú Ne finangalo ke foaki maʻatautolú. Mei he fakamoʻui ʻokú Ne ʻafioʻi ʻoku tau mātuʻaki fiemaʻu vivilí. Mei he vā fetuʻutaki fakafuakava loloto ange ʻokú Ne fakataumuʻa maʻa Hono ngaahi fohá mo e ʻofefiné kotoa.
ʻOku ou lotua te tau liʻaki ha faʻahinga “mahafu [pē] ʻo e taú” kuo tau toʻo ʻi he ʻilo pe taʻeʻilo, ke taʻofi ʻaki kitautolu mei he ngaahi tāpuaki ʻo e ʻofa ʻa e ʻOtuá. Ko e ngaahi mahafu tau ʻo e hīkisiá, siokitá, ilifiá, tāufehiʻá, faihalá, fakafiefiemālié, fakamaau taʻemāʻoniʻoní, meheká—ha faʻahinga meʻa pē te ne taʻofi kitautolu mei he ʻofa ki he ʻOtuá ʻaki hotau lotó kotoa mo tauhi kotoa ʻetau ngaahi fuakava mo Iá.
ʻI he līʻoa ʻetau moʻuí ki he ʻOtuá mo tauhi ʻetau ngaahi fuakava mo Iá, ʻe lava ke foaki mai ʻe he ʻEikí ʻa e tokoni mo e mālohi ʻoku tau fiemaʻu ke fakatou fakatokangaʻi mo ikunaʻi hotau ngaahi vaivaí, kau ai ʻa e mahaki fakalaumālie kainikavea ʻo e hīkisiá. Kuo pehē ʻe hotau palōfitá:
“Ko e fakatomalá ko e hala ia ki he maʻá, pea ʻoku ʻomi ʻe he maʻá ʻa e mālohí.”
“Pea, te tau fiemaʻu lahi Hono mālohí ʻi he ngaahi ʻaho ka hoko maí.”
Hangē ko ʻeku tā valivalí, ʻoku teʻeki ʻosi ʻa e ngāue ʻa e ʻEikí kiate kitautolu ʻi he taimi ʻoku tau fai ai ha fehalaākí, pe te Ne liʻaki kitautolu ʻi he taimi ʻoku tau tūkia aí. ʻOku ʻikai ko ha kavenga kiate Ia ʻa ʻetau fiemaʻu ʻa e fakamoʻuí mo e tokoní, ka ko e ʻuhinga moʻoni ia naʻá Ne hāʻele mai aí. Naʻe folofola ʻa e Fakamoʻuí Tonu ʻo pehē:
“Vakai, kuó u haʻu ki he māmaní ke ʻomi ʻa e huhuʻí ki he māmaní ke fakamoʻui ʻa e māmaní mei he angahalá.”
“Vakai, ʻoku mafao atu hoku nima ʻo e ʻaloʻofá kiate kimoutolu, pea ko ia ia ʻe haʻú, te u maʻu ia; pea ʻoku monūʻia ʻa kinautolu ʻa ia ʻoku haʻu kiate aú.”
Ko ia mou haʻu—mou haʻu ʻa kimoutolu ʻoku ongosia, foʻi, mo mamahí; mou omi ʻo tuku hoʻomou ngaahi ngāué pea maʻu ha fiemālie ʻiate Ia ʻoku ʻofa lahi taha ʻiate kimoutolú. Toʻo kiate koe ʻEne haʻamongá, he ʻokú Ne angavaivai mo angamalū.
ʻOku ʻafioʻi koe ʻe heʻetau Tamai Hēvaní mo e Fakamoʻuí. ʻOkú Na ʻafioʻi ho lotó. ʻOkú Na tokanga ki he meʻa ʻokú ke tokanga ki aí, kau ai ʻa kinautolu ʻokú ke ʻofa aí.
ʻE lava ke huhuʻi ʻe he Fakamoʻuí ʻa e meʻa naʻe molé, kau ai ʻa e ngaahi vā fetuʻutaki kuo maumau mo motuhiá. Naʻá Ne tofa ha hala maʻá e kakai kotoa pē kuo hingá ke huhuʻi—ke fakamānava ʻa e moʻuí ki he meʻa ʻoku ngali mate mo siva ʻa e ʻamanakí.
Kapau ʻokú ke fefaʻuhi mo ha tūkunga ʻokú ke pehē kuo totonu ke ke ikunaʻi ʻi he taimí ni, ʻoua naʻá ke foʻi. Faʻa kātaki pē, tauhi hoʻo ngaahi fuakavá, faʻa fakatomala, fekumi ki he tokoni hoʻo kau takí ʻo ka fiemaʻu, pea ʻalu maʻu pē ki he fale ʻo e ʻEikí ʻi he lahi taha te ke lavá. Fakafanongo pea talangofua ki he ngaahi ueʻi ʻokú Ne ʻoatu kiate koé. He ʻikai te Ne liʻaki Hono vā fetuʻutaki fakafuakava mo koé.
Kuo ʻi ai ha ngaahi vā fetuʻutaki fihi mo faingataʻa ʻi heʻeku moʻuí kuó u fefaʻuhi mo ia mo feinga fakamātoato ke toe lelei ange. ʻI he taimi ʻe niʻihi, naʻá ku ongoʻi naʻe hangē naʻe lahi ange ʻeku tōnounoú. Naʻá ku fifili, “ʻIkai naʻá ku fakaleleiʻi ha ngaahi meʻa kimuʻa? Naʻe ʻikai nai ke u ikunaʻi moʻoni hoku vaivaí?” Kuó u ako ʻi he fakalau ʻa e taimí ʻoku ʻikai ke u fonu mele; ka, ʻoku faʻa ʻi ai ha ngāue lahi ange ke fai mo fiemaʻu ha faifakamoʻui lahi ange.
Naʻe akoʻi ʻe ʻEletā D. Toti Kulisitofasoni: “Ko e moʻoni ʻoku fiefia ʻa e ʻEikí ʻi he tokotaha ʻoku holi ke haʻu ki he fakamāú ʻokú ne moʻui taau, ʻokú ne ngāue faivelenga he ʻaho kotoa pē ke fetongi e vaivaí ʻaki ʻa e mālohí. Mahalo naʻa fiemaʻu ʻe he fakatomala mo e liliu moʻoní ha toutou feinga pe ngāue ki ai he ʻoku ʻi ai ʻa e meʻa ʻoku maʻa mo māʻoniʻoni ʻi he faʻahinga feinga pehení. ʻOku hoko fakanatula pē ʻa e fakamolemole fakalangí mo e fakamoʻuí ki ha taha pehē.”
Ko e ʻaho takitaha ko ha ʻaho foʻou ia ʻoku fonu ʻi he ʻamanaki leleí mo e ngaahi faingamālié koeʻuhí ko Sīsū Kalaisi. ʻE lava ke tau ʻiloʻi ʻi he ʻaho takitaha, ʻo hangē ko hono fakahaaʻi ʻe he Faʻē ko ʻIví, “ʻa e fiefia ʻo [hotau] huhuʻí,” ʻa e fiefia ʻo e fakamoʻuí, ʻa e fiefia ʻi hono ongoʻi ʻo e ʻofa taʻe-tūkua ʻa e ʻOtuá kiate koé.
‘Oku ou ʻilo ‘oku ‘afioʻi mo ‘ofaʻi kimoutolu heʻetau Tamai Hēvaní mo e Fakamoʻuí. Ko Sīsū Kalaisi ʻa e Fakamoʻui mo e Huhuʻi ʻo e faʻahinga kotoa ʻo e tangatá. ʻOkú Ne moʻui. Naʻe fakafou ʻi Heʻene feilaulau fakaleleí, ʻa hono motuhi ʻo taʻengata ʻa e ngaahi haʻi ʻo e angahalá mo e maté koeʻuhí ke tau tauʻatāina ke fili ki he fakamoʻuí, huhuʻí, mo e moʻui taʻengatá fakataha mo kinautolu ʻoku tau ʻofa aí. Pea ʻoku ou fakamoʻoni ki he ngaahi meʻá ni ʻi he huafa ʻo Sīsū Kalaisí, ʻēmeni.