ʻOku ʻAonga ʻa e Moʻui Fakamatelié!
Neongo ʻa e ngaahi pole ʻoku tau fehangahangai kotoa mo iá, kuo fokotuʻutuʻu ʻe heʻetau Tamai Hēvani ʻofá ha palani ʻo e fiefiá ʻa ia ʻoku ʻikai fakataumuʻa ia ke tau taʻelava ʻo aʻusia.
Naʻe vahe au ʻi ha ngaahi taʻu lahi ke u faiako fakaʻapi ki ha fefine matuʻotuʻa ange ʻi hoku uōtí. Naʻe ʻikai ke faingofua ʻene moʻuí. Naʻe lahi haʻane ngaahi palopalema fakaemoʻui lelei kehekehe peá ne foua ʻa e langa mamahí ʻi he kotoa ʻo ʻene moʻuí, tupu mei ha meʻa naʻe hoko ʻi he malaʻe vaʻingá ʻi heʻene kei siʻí. Naʻá ne vete mali ʻi hono taʻu 32 mo ha fānau iiki ʻe toko fā ke tauhi mo tokangaʻi, pea toe mali ʻi hono taʻu 50. Naʻe mālōlō hono husepāniti hono uá ʻi hono taʻu 66, pea naʻe hoko atu ʻa e moʻui ʻa e fefine ko ʻení ʻi ha toe taʻu ʻe 26, ko ha uitou.
Neongo ʻa e ngaahi pole ʻi he kotoa ʻo ʻene moʻuí, ka naʻá ne tauhi faivelenga ʻene ngaahi fuakavá ʻo aʻu ki he ngataʻangá. Naʻe manako ʻaupito ʻa e fefine ko ʻení ki he tohi hohokó, ʻalu ki he temipalé, peá ne tānaki mo tohi ʻa e ngaahi hisitōlia fakafāmilí. Neongo naʻá ne foua ha ngaahi ʻahiʻahi faingataʻa, pea pau pē naʻá ne ongoʻi loto-mamahi mo tuenoa ʻi ha ngaahi taimi, ka naʻá ne maʻu ha fofonga fiefia pea angaʻofa mo angalelei.
Hili ha māhina ʻe hiva mei heʻene mālōloó, naʻe maʻu ʻe ha taha ʻo hono ngaahi fohá ha aʻusia fakaʻofoʻofa ʻi he temipalé. Naʻá ne ʻiloʻi ʻi he mālohi ʻo e Laumālie Māʻoniʻoní, naʻe ʻi ai ha pōpoaki ʻene faʻeé maʻana. Naʻá ne fetuʻutaki mo ia, kae ʻikai ʻi ha vīsone pe lea ʻaki ha ngaahi lea. Naʻe ongo mai ʻa e pōpoaki mahino ko ʻení ki he fakakaukau ʻa e fohá mei heʻene faʻeé: “ʻOku ou fiemaʻu ke ke ʻiloʻi ʻoku ʻaonga ʻa e moʻui fakamatelié, pea ʻoku ou fiemaʻu ke ke ʻiloʻi ʻoku mahino kiate au ʻi he taimí ni ʻa e ʻuhinga naʻe hoko ai ʻa e meʻa kotoa pē [ʻi heʻeku moʻuí] ʻi he founga naʻe hoko aí—pea ʻoku ou tali lelei ʻa e meʻa kotoa pē.”
ʻOku toe fakaofo ange ʻa e pōpoaki ko ʻení ʻi heʻete fakakaukau atu ki he tūkunga naʻe ʻi aí mo e ngaahi faingataʻa naʻe kātekina mo ikunaʻi ʻe he fefine ko ʻení.
ʻE kāinga, ʻoku ʻaonga ʻa e moʻui fakamatelié! ʻOku fokotuʻutuʻu ia ke ʻaonga! Neongo ʻa e ngaahi polé, mamahí, mo e ngaahi faingataʻa ʻoku tau fehangahangai kotoa mo iá, kuo fokotuʻutuʻu ʻe heʻetau Tamai Hēvani ʻofa, poto mo haohaoá ha palani ʻo e fiefiá ʻa ia ʻoku ʻikai fakataumuʻa ia ke tau taʻelava ʻo aʻusia. ʻOku ʻomi ʻe Heʻene palaní ha founga ke tau ikunaʻi ʻetau ngaahi tōnounou fakamatelié. Kuo folofola ʻa e ʻEikí, “Ko ʻeku ngāué ʻeni mo hoku nāunaú—ke fakahoko ʻa e moʻui taʻe-faʻa-mate mo e moʻui taʻengata ʻa e tangatá.”
Ka neongo ia, ke ʻaonga kiate kitautolu ʻa e “ngāue mo [e] … nāunau,” ʻo e ʻEikí, naʻa mo e “moʻui-taʻe-faʻa-maté mo e moʻui taʻengatá,” kuo pau ke tau mateuteu ke fakahinohinoʻi mo akoʻi kitautolu, pea ke tau foua ʻa e afi ʻo ia ʻoku fakamaʻa ukameá—ʻo aʻu ʻi he taimi ʻe niʻihi ki he taupotu taha ʻo hotau ngataʻangá. Ke fakaʻehiʻehi ʻaupito mei he ngaahi palopalemá, ngaahi polé, mo e ngaahi faingataʻa ʻo e māmani ko ʻení, ʻe hangē ia ha feinga ke fakaʻehiʻehi mei ha founga ngāue ʻoku mātuʻaki fiemaʻu kae lava ke ʻaonga ʻa e moʻui fakamatelié.
Pea ko ia ai, ʻoku ʻikai totonu ke tau ofo ʻi he taimi ʻoku hoko mai ai ʻa e ngaahi taimi faingataʻá. Te tau fehangahangai mo ha ngaahi tūkunga ʻe ʻahiʻahiʻi ai kitautolu mo ha kakai ʻoku nau ngaohi kitautolu ke tau fakaʻaongaʻi ʻa e ʻofa faka-Kalaisi moʻoní mo e faʻa kātakí. Ka ʻe fiemaʻu ke tau matuʻuaki ʻa hotau ngaahi faingataʻaʻiá pea manatua, ʻo hangē ko e folofola ʻa e ʻEikí:
“Pea ko ia ia ʻokú ne tuku hifo ʻene moʻuí koeʻuhi ko ʻeku ngāué, mo hoku hingoá, te ne toe maʻu ia, ʻio ʻa e moʻui taʻengatá.
“Ko ia, ʻoua te mou manavahē ki homou ngaahi filí, [pe ko homou ngaahi palopalemá, ngaahi polé, pe ko e ngaahi ʻahiʻahi ʻo e moʻuí ni] he kuó u tuʻutuʻuni … , ʻoku folofola ʻe he ʻEikí, te u siviʻi ʻa kimoutolu ʻi he ngaahi meʻa kotoa pē, pe te mou nofo maʻu ʻi heʻeku fuakavá … koeʻuhí ke ʻilo ai ʻoku mou taau.”
Ko e taimi ʻoku tau ongoʻi hohaʻa pe tailiili ai ki heʻetau ngaahi palopalemá pe ongoʻi hangē ʻoku taulōfuʻu ange ʻetau faingataʻaʻiá ʻi he niʻihi kehé, te tau lava ʻo manatuʻi ʻa e meʻa naʻe folofola ʻaki ʻe he ʻEikí ki he fānau ʻo ʻIsilelí:
“Pea te ke manatu ki he [ngaahi] hala kotoa pē ʻa ia naʻe tataki ai koe ʻe [he ʻEikí] ko ho ʻOtua ʻi he taʻu ʻe fāngofulú ni ʻi he toafá, ke fakaangavaivaiʻi koe, ke ʻahiʻahiʻi koe, pea ke ʻilo ʻa ia kotoa pē naʻe ʻi ho lotó, pe te ke tauhi ki heʻene ngaahi fekaú, pe ʻikai.”
Hangē ko hono akoʻi ʻe Līhai hono foha ko Sēkopé:
“[Te] ke fepaki mo e ngaahi faingataʻaʻiá mo e mamahi lahi. … Ka neongo iá, … [ʻe] fakatapui [ʻe he ʻOtuá] ʻa hoʻo ngaahi faingataʻaʻiá ke hoko ko ha tāpuaki kiate koe. … Ko ia, ʻoku ou ʻilo kuo huhuʻi koe, koeʻuhi ko e māʻoniʻoni ʻa ho Huhuʻí.”
Koeʻuhi ko e moʻuí ni ko ha siviʻiʻanga ia ʻo e tangatá pea “[ʻi he taulōfuʻu mai e ngaahi ʻao fakapoʻuli faingataʻá ke fakaʻauha ʻetau melinó],” ʻoku ʻaonga ke tau manatuʻi ʻa e faleʻi mo e talaʻofa ko ʻeni ʻoku maʻu ʻi he Mōsaia 23 fekauʻaki mo e ngaahi pole ʻo e moʻuí: “Ka neongo iá—ko ia ia ʻoku falala ki he [ʻEikí], ʻe hiki hake ia ʻi he ʻaho fakaʻosí.”
Naʻá ku aʻusia fakataautaha ʻi heʻeku kei toʻu tupú ha mamahi lahi fakaeloto mo ha ongoʻi mā, tupu mei ha tōʻonga taʻemāʻoniʻoni ʻa ha taha kehe, ʻa ia naʻá ne uesia hoku mahuʻinga fakatāutahá mo ʻeku ongo ki heʻeku tuʻunga taau ʻi he ʻao ʻo e ʻEikí ʻi ha ngaahi taʻu lahi. Ka neongo iá, ʻoku ou fakamoʻoni fakataautaha atu ʻe lava ke fakamālohia mo poupouʻi hake kitautolu ʻe he ʻEikí ʻi ha faʻahinga faingataʻa pē ʻoku fiemaʻu ke tau aʻusia lolotonga ʻa e fonongaʻanga fakamamahi ʻo e māmani ko ʻení.
ʻOku tau maheni mo e aʻusia ʻa Paulá:
“Pea telia naʻá ku fielahi fau au ʻi hono lahi ʻo e ngaahi meʻa naʻe fakahā [kiate aú], naʻe tuku kiate au ʻa e tolounua ʻi he kakanó, ko e meʻa fekau ʻa Sētané, ke tukiʻi au, telia naʻá ku fie lahi fau.
“Pea ʻi he meʻá ni, naʻe liunga tolu ʻeku kole lahi ki he ʻEikí, koeʻuhi ke mahuʻi ia ʻiate au.
“Pea pehē mai ʻe ia kiate au, Ko ʻeku tokoní ʻe lahi maʻau: he kuo fakakakato ʻeku mālohí ʻi hoʻo vaivaí. Ko ia te u fiefia lahi mo polepole ai muʻa ʻi heʻeku ngaahi vaivaí, koeʻuhi ke nofoʻia au ʻe he mālohi ʻo Kalaisí.”
ʻOku ʻikai ke tau ʻilo pe ko e hā ʻa e “tolounua ʻi he kakano” ʻa Paulá. Naʻá ne fili ke ʻoua te ne fakamatalaʻi pe ko ha vaivai fakakakano, fakaʻatamai, pe fakaeongo, pe ko ha ʻahiʻahi ia. Ka ʻoku ʻikai fiemaʻu ia ke tau ʻiloʻi ʻa e fakaikiiki ko iá kae toki mahino naʻá ne faingataʻaʻia peá ne tangi ki he ʻEikí ki ha tokoni, pea ko hono ikuʻangá, ko e mālohi mo e ivi ʻo e ʻEikí naʻe tokoniʻi ia ʻi he meʻa naʻá ne fouá.
Hangē ko ia naʻe hoko kia Paulá, naʻe makatuʻunga ʻi he tokoni ʻa e ʻEikí ʻa e faifai ʻo fakamālohia fakaeongo mo fakalaumālie aú, pea iku ai ʻo u fakatokangaʻi hili ha ngaahi taʻu lahi, naʻe ʻi ai maʻu pē hoku mahuʻinga pea naʻá ku taau mo e ngaahi tāpuaki ʻo e ongoongoleleí. Naʻe tokoniʻi au ʻe he Fakamoʻuí ke u ikunaʻi ʻeku ngaahi ongoʻi taʻetāú pea ke u fakamolemoleʻi moʻoni ʻa e tokotaha naʻe faihala kiate aú. Naʻe faifai pea mahino kiate au ko e Fakalelei ʻa e Fakamoʻuí ko ha meʻaʻofa fakataautaha ia maʻaku pea ʻoku ʻofa haohaoa ʻa e Tamai Hēvaní mo Hono ʻAló ʻiate au. Koeʻuhi ko e Fakalelei ʻa e Fakamoʻuí, ʻoku ʻaonga ʻa e moʻui fakamatelié.
Lolotonga hono tāpuekina au ke faifai peá u fakatokangaʻi hono fakahaofi mo poupouʻi au ʻe he Fakamoʻuí ʻi he ngaahi aʻusia ko iá, naʻe mahino lelei kiate au ko e tūkunga fakamamahi ʻi heʻeku taʻu hongofulu tupú ko haʻaku fononga mo e aʻusia fakataautaha ia ʻaʻaku, he ʻikai lava ke ngāueʻaki ʻa e fakaleleiʻiʻanga ko iá mo hono olá kiate kinautolu kuo nau faingataʻaʻia mo hokohoko atu ʻenau faingataʻaʻiá tupu mei he tōʻonga taʻemāʻoniʻoni ʻa e niʻihi kehé.
ʻOku ou fakatokangaʻi ko e ngaahi aʻusia ʻo e moʻuí—ʻa e lelei mo e kovi—ʻe lava ke ne akoʻi mai kiate kitautolu ha ngaahi lēsoni mahuʻinga. Kuó u ʻiloʻi ʻi he taimí ni mo fakamoʻoniʻi, ʻoku ʻaonga ʻa e moʻui fakamatelié! ʻOku ou ʻamanaki ʻi hono kānokato ʻo ʻeku ngaahi aʻusia ʻi heʻeku moʻuí—ʻa e lelei mo e kovi—ʻe iku ia ke u maʻu ai ha loto-ʻofa ki siʻi kau mamahi taʻehalaia tupu mei he ngaahi tōʻonga ʻa e niʻihi kehé mo ha loto-mahino ke ʻofeina kinautolu kuo ngaohikoviá.
ʻOku ou fakaʻamu moʻoni ʻi hono kānokato ʻo ʻeku ngaahi aʻusia ʻi heʻeku moʻuí—ʻa e lelei mo e kovi—ʻe iku ia ke u angaʻofa ange ai ki he niʻihi kehé, fai ki he niʻihi kehé ʻa e meʻa naʻe mei fai ʻe he Fakamoʻuí, maʻu ha mahino lahi ange ki he tokotaha faiangahalá, pea ke u angatotonu kakato. ʻI heʻetau falala ki he ʻaloʻofa ʻa e Fakamoʻuí mo tauhi ʻetau ngaahi fuakavá, ʻe lava ke tau ngāue ko ha ngaahi sīpinga ʻo e ola tuʻuloa mo taukakapa ʻo e Fakalelei ʻa e Fakamoʻuí.
Te u vahevahe ha sīpinga fakaʻosi ʻoku ʻaonga ʻa e moʻui fakamatelié.
Faʻē ʻaki ʻa ʻEletā Heilisí, ko Loisi Venitenipoki, pea mo ʻene faʻeé, ko Kelea Venitenipoki
Naʻe ʻikai faingofua ʻa e fononga ʻa ʻeku faʻeé ʻi he moʻui fakamatelié. Naʻe ʻikai ke ne maʻu ha ngaahi fakalangilangi pe fakahīkihiki fakaemāmani pea naʻe ʻikai maʻu hano ngaahi faingamālie fakaako makehe mei he ako māʻolungá. Naʻá ne fokoutua ʻi he polioó ʻi heʻene kei siʻí, ʻo iku ai ki ha felangaaki mo ha taʻefiemālie ʻi hono vaʻe toʻohemá ʻi he kotoa ʻo ʻene moʻuí. ʻI heʻene hoko ko ha tokotaha lahí, naʻá ne aʻusia ha ngaahi tūkunga faingataʻa lahi fakatuʻasino mo fakapaʻanga, ka naʻá ne tauhi faivelenga ʻene ngaahi fuakavá mo ʻofa ki he ʻEikí.
ʻI he taʻu 55 ʻeku faʻeé, naʻe mālōlō hoku tuofefine lahi naʻe hoko haké, ʻo ʻikai ha faʻē ʻa siʻono ʻofefine māhina valú, ka ko hoku fakafotú. ʻI ha ngaahi ʻuhinga kehekehe, naʻe iku tauhi ai ʻe heʻeku faʻeé ʻa hoku fakafotú ʻi he taʻu ʻe 17 hono hokó, ʻi ha ngaahi taimi naʻe faʻa mātuʻaki faingataʻa. Ka neongo ʻa e ngaahi aʻusia ko ʻení, naʻá ne tokoniʻi fiefia mo loto-fiemālie ʻa hono fāmilí, ngaahi kaungāʻapí, mo e kau mēmipa ʻo e uōtí pea hoko ko ha tokotaha ngāue ouau ʻi he temipalé ʻi ha ngaahi taʻu lahi. Lolotonga ʻa e ngaahi taʻu fakaʻosi ʻo e moʻui ʻa ʻeku faʻeé, naʻá ne fokoutua ʻi ha faʻahinga mahaki ko e mole ʻa e manatú, ʻo faʻa puputuʻu ʻi he taimi lahi, pea tuku ai ia ʻi ha fale tauhi ʻo e kau toulekeleká. Ko e fakamamahí, he naʻá ne toko taha pē ʻi he taimi naʻá ne mālōlō fakafokifā aí.
Hili ha ngaahi māhina mei heʻene mālōloó, naʻe ʻi ai haʻaku misi naʻe ʻikai pē ke toe ngalo ʻiate au. ʻI heʻeku misí, naʻá ku tangutu ʻi hoku ʻōfisí ʻi he ʻŌfisi Pule ʻa e Siasí. Naʻe hū mai ʻa e fineʻeikí ki he ʻōfisí. Naʻá ku ʻiloʻi ko ʻene haʻu mei he maama tataliʻanga ʻo e ngaahi laumālié. Te u manatuʻi maʻu pē ʻa e ngaahi ongo naʻá ku maʻú. Naʻe ʻikai ke ne lea, ka naʻe hā mai ha fakaʻofoʻofa fakalaumālie meiate ia naʻe teʻeki ke u aʻusia kimuʻa ʻa ia ʻoku faingataʻa ke u fakamatalaʻi.
Naʻe fakaʻofoʻofa ʻaupito hono fofongá mo ʻene ʻasí! ʻOku ou manatuʻi ʻeku pehē ange kiate ia, “Faʻē, ʻokú ke fakaʻofoʻofa ʻaupito!,” ʻo ʻuhinga ki hono mālohi mo e fakaʻofoʻofa fakalaumālié. Naʻá ne fakatokangaʻi mai au—ka naʻe ʻikai ke ne lea. Naʻá ku ongoʻi ʻene ʻofa kiate aú, pea naʻá ku ʻiloʻi ʻokú ne fiefia mo fakamoʻui ia mei he ngaahi hohaʻa mo e pole fakaemāmaní, pea ʻokú ne tatali loto-vēkeveke ki ha “toetuʻu nāunauʻia.” ʻOku ou ʻiloʻi naʻe ʻaonga ʻa e moʻui fakamatelié ki he Fineʻeikí—pea ʻe ʻaonga pehē foki kiate kitautolu.
Ko e ngāue mo e nāunau ʻo e ʻOtuá ke fakahoko ʻa e moʻui taʻe-faʻa-mate mo e moʻui taʻengata ʻa e tangatá. Ko e ngaahi aʻusia ʻo e moʻui fakamatelié ko ha konga ia ʻo e fonongá ʻokú ne fakaʻatā ke tau tupulaki mo fakalakalaka ki he moʻui taʻe-faʻa-maté mo e moʻui taʻengatá. Naʻe ʻikai ʻomi kitautolu ki he māmaní ke tau tō ka ke tau fakalakalaka ʻi he palani ʻa e ʻOtuá maʻatautolú.
Hangē ko ia naʻe akoʻi ʻe he Tuʻi ko Penisimaní, “Pea ko e tahá, ʻoku ou loto ke mou fakakaukau ki he tuʻunga monūʻia mo fakafiefia ʻo kinautolu ʻoku tauhi ʻa e ngaahi fekau ʻa e ʻOtuá. He vakai, ʻoku nau monūʻia ʻi he meʻa kotoa pē, ʻa e meʻa fakamāmaní mo e fakalaumālié fakatouʻosi; pea kapau te nau kātaki ʻi he tui faivelenga ʻo aʻu ki he ngataʻangá ʻe maʻu hake ʻa kinautolu ki he langí koeʻuhi ke nau nofo mo e ʻOtuá ʻi he tuʻunga fiefia ʻoku ʻikai hano ngataʻanga.” ʻI hono fakalea ʻe tahá, ʻoku ʻaonga ʻa e moʻui fakamatelié!
ʻOku ou fakamoʻoni, ʻi heʻetau maʻu ʻa e ngaahi ouau ʻo e ongoongoleleí, fakahoko ha ngaahi fuakava mo e ʻOtuá pea tauhi leva ʻa e ngaahi fuakava ko iá, fakatomala, tokoni ki he niʻihi kehé, pea kātaki ki he ngataʻangá, te tau lava foki ʻo maʻu ʻa e fakapapau mo e falala kakato ki he ʻEikí, ʻoku ʻaonga ʻa e moʻui fakamatelié! ʻOku ou fakamoʻoni kia Sīsū Kalaisi pea ʻoku malava ʻa hotau kahaʻu nāunauʻia mo ʻetau Tamai Hēvaní, ʻi he ʻaloʻofa mo e Fakalelei ʻa e Fakamoʻuí. ʻI he huafa ʻo Sīsū Kalaisí, ʻēmeni.