“Ko Hoku Ngaahi Kaumeʻa ʻA Kimoutolu”
Ko e folofola ʻa e Fakamoʻuí “ko hoku ngaahi kaumeʻa ʻa kimoutolú” ko ha pōpoaki mahino ʻaupito ia ke fakatupulaki ha ngaahi vā fetuʻutaki fakaʻeiʻeiki mo māʻoniʻoni ange mo e fānau kotoa ʻa e ʻOtuá.
ʻI ha māmani ʻoku fonu ʻi he fakakikihí mo e ʻā vahevahé, ʻa ia kuo fetongi ʻa e lea fakamatāpulé ʻaki ʻa e loto-fakamāú mo e manukí, pea ʻoku fakafaʻahinga ʻa e ngaahi vā fakakaumeʻá, kuo fakaʻau ke u ʻiloʻi ʻoku ʻi ai ha faʻifaʻitakiʻanga mahino, faingofua, mo fakalangi te tau lava ʻo hanga ki ai ke maʻu e fāitahá, ʻofá, mo e kau maí. Ko e faʻifaʻitakiʻanga ko iá ko Sīsū Kalaisi. ʻOku ou fakamoʻoni ko Ia ʻa e tokotaha maʻongoʻonga ʻokú Ne fai ʻa e fakatahatahaʻí.
Ko Hono Ngaahi Kaumeʻa Kitautolu
ʻI Tīsema 1832, ʻi he “hā mai ʻa e ngaahi faingataʻaʻia ʻi he ngaahi puleʻangá” ʻo fakaʻau ke “toe mahino ange” ʻi ha toe taimi talu mei hono fokotuʻu ʻo e Siasí, naʻe fakataha mai ʻa e kau taki ʻo e Siasí ki Ketilani, ʻOhaiō, ki ha konifelenisi. Naʻa nau lotu “mavahevahe ʻiate kinautolu pē pea lotu fakataha ki he ʻEikí ke fakahā hono finangaló kiate [kinautolu].” Ke fakahoungaʻi e ngaahi lotu ʻa e kau mēmipa tui faivelenga ko ʻení lolotonga e ngaahi taimi faingataʻá, naʻe fakafiemālieʻi kinautolu ʻe he ʻEikí, ʻo Ne folofola ai ki he Kāingalotú ʻaki ha foʻi lea mālohi ʻe fā: “ko hoku ngaahi kaumeʻa.”
Kuo ui ʻe Sīsū Kalaisi ʻa Hono kau muimui tui faivelengá ko Hono ngaahi kaumeʻa. ʻOku tuʻo hongofulu mā fā ʻa hono fakaʻaongaʻi ʻe he Fakamoʻuí ʻa e foʻi lea ko e kaumeʻá ʻi he Tokāteline mo e Ngaahi Fuakavá ke fakamatalaʻi ʻaki ha vā ʻoku toputapu mo fakangalongataʻa. ʻOku ʻikai ke u talanoa fekauʻaki mo e foʻi lea kaumeʻá ʻo hangē ko ia ko e fakaʻuhinga ʻa e māmaní—ʻo makatuʻunga ʻi he kau muimui ʻi he mītia fakasōsialé pe ngaahi “likes.” ʻOku ʻikai ke lava ia ʻo fakaʻilongaʻi ʻaki ha hashtag pe ko ha mataʻifika ʻi he Instagram pe X.
Te u tala moʻoni pē, ʻoku ou manatuʻi ʻi heʻeku kei talavoú ʻeku fanongoa e ngaahi kupuʻi lea fakamamahi ko e “ʻE lava ke ta kaungāmeʻa pē?” pe “Ta feʻunga pē he feohi fakakaungāmeʻá.” ʻOku ʻikai ha feituʻu ʻi he tohi folofola māʻoniʻoní te tau fanongo ai ki Haʻane folofola, “Ko hoku ngaahi kaungāmeʻa pē kimoutolu.” Ka naʻá Ne akoʻi ʻo pehē, “ʻoku ʻikai ha tangata ʻe lahi hake ʻene ʻofá ʻi he meʻá ni, ke ne foaki ʻene moʻuí koeʻuhí ko hono kāingá.” Pea “ko kimoutolu ia ʻa e faʻahinga kuo foaki kiate au ʻe heʻeku Tamaí; ko hoku ngaahi kaumeʻa ʻa kimoutolu.”
‘Oku mahino ‘a e ongó: ʻoku ʻafioʻi fakafoʻituitui mo tokangaekina kitautolu ʻe he Fakamoʻuí. Ko e tokangaekina ko ‘ení ʻoku ʻikai ko ha meʻanoa ia pe taʻe-mahuʻinga. Ka ʻoku hakeakiʻi ia, langaki moʻui, mo taʻengata. ʻOku mahino kiate au ko e folofola ʻa e Fakamoʻuí “ko hoku ngaahi kaumeʻa ʻa kimoutolú” ko ha pōpoaki mahino ʻaupito ia ke fakatupulaki ha ngaahi vā fetuʻutaki fakaʻeiʻeiki mo māʻoniʻoni ange ʻi he fānau kotoa ʻa e ʻOtuá “koeʻuhí ke tau taha pē.” ʻOku tau fai ʻeni ʻi heʻetau faifeinga ke ngāue fakataha ʻo fekumi ki ha ngaahi faingamālie ke uouangataha ai mo ongoʻi ʻe he tokotaha kotoa ʻoku nau kau mai.
ʻOku Tau Taha ʻIate Ia
Naʻe fakaʻofoʻofa hono fakahaaʻi eni ʻe he Fakamoʻuí ʻi Heʻene fakaafe ke “haʻu, ʻo muimui ʻiate aú.” Naʻá Ne fakaʻaongaʻi ʻa e ngaahi meʻafoaki mo e ʻulungaanga fakafoʻituitui ʻa ha kulupu kehekehe ʻo e kau muimuí ke ui kinautolu ko ʻEne Kau ʻAposetolo. Naʻá Ne ui ha kau toutai, kau sēlote, ongo tautehina ne ʻilo ʻaki hona ʻulungānga mālohi hangē ha maná (thunder), pea aʻu ki ha taha tānaki tukuhau. Naʻe hoko ʻenau tui ki he Fakamoʻuí mo e loto-holi ke ʻunu ke ofi ange kiate Iá ke nau faaitaha ai. Naʻa nau fekumi ki ha tokoni fakalangi meiate Ia, ongoʻi e tākiekina ʻa e ʻOtuá ʻiate Ia, pea “[naʻa nau] liʻaki leva [honau] kupengá, ʻo muimui ʻiate Ia.”
Kuó u mamata foki ki he founga ʻoku hanga ai ʻe he fakatupulaki ha ngaahi vā fetuʻutaki ʻoku fakaʻeiʻeiki mo māʻoniʻoni angé ʻo fakatahatahaʻi mai kitautolu ke tau tahá. Naʻá ku monūʻia mo hoku uaifi ko Senifaá ke ohi hake ʻema fānau ʻe toko nimá ʻi Niu ʻIoke Siti. ʻI he kolo femoʻuekina ko iá, naʻa mau fakatupulaki ai ha ngaahi vā fetuʻutaki mahuʻinga mo toputapu mo e ngaahi kaungāʻapí, kaungāmeʻa he akó, kaungāngāué, kau taki lotú, mo e Kāingalotú.
ʻI Mē 2020, lolotonga e fefaʻuhi ʻa e māmaní mo e mafola fakaemāmani lahi ʻo ha mahaki fakaʻauhá, naʻe fakataha fakatuʻupakē ʻi he ʻinitanetí ʻa e kau mēmipa ʻo e Komisoni ʻo e Kau Taki Fakalotu ʻa Niu ʻIoke Sití. Naʻe ʻikai ha ʻasenita ki ai. Naʻe ʻikai ha kau fakaafe makehe. Ko ha kole pē ke mau ngāue fakataha ke aleaʻi e ngaahi pole ne mau fehangahangai kotoa mo ia ʻi heʻemau hoko ko e kau taki lotú. Naʻe toki lipooti ʻe he Ngaahi Senitā ki he Puleʻi ʻo e Mahakí ko homau koló ko e uhouhonga ia ʻo e mahaki fakaʻauha KŌVITI-19 ʻi he ʻIunaiteti Siteití. Naʻe ʻuhinga ʻeni he ʻikai ke toe ʻi ai ha fakatahaʻanga. He ʻikai ha toe fakatahataha mai.
Ki he kau taki fakalotu ko ʻení, ko hono taʻofi ko ia ʻo e tokangaekina fakatāutahá, fakatahataha ʻa e haʻofangá, pea mo e lotu he uike kotoá, ko ha meʻa fakamamahi moʻoni. Naʻe fevahevaheʻaki, fefakafiemālieʻaki, mo fepoupouaki ʻemau kiʻi kulupu tokosiʻí—ʻa ia ne kau ai ha katinali, faifekau, lāpai, taki faka-Mosilemi, pātele, setuata, mo ha taulaʻeiki. Naʻa mau fakatokangaʻi ʻa e meʻa ne mau faitatau aí kae ʻikai tokanga taha ki homau ngaahi faikehekehé. Naʻa mau talanoa fekauʻaki mo e ngaahi meʻa ʻe malavá pea mo e faingamālie ke malava ha meʻá. Naʻa mau fepoupouaki mo tali e ngaahi fehuʻi fekauʻaki mo e tuí pea mo e kahaʻú. Hili iá naʻa mau lotu leva. Ne mau lotu fakamātoato ʻaupito.
ʻI ha kolo lahi ʻoku mahu ʻi he ngaahi anga fakafonua faingataʻa mo kehekehé, naʻa mau mamata ki he mōlia atu homau ngaahi faikehekehé ʻi heʻemau ngāue fakataha ko ha ngaahi kaungāmeʻa ne taha ʻi he meʻa naʻa mau koleá, taha ʻi heʻemau taumuʻá, mo taha ʻi he meʻa ne mau lotuá.
Naʻe ʻikai ke mau toe sio ki homau ngaahi faikehekehé ka naʻa mau hanga fakataha ki he langí ke maʻu ha tokoni. Naʻa mau mātuku mei he fakataha kotoa pē ʻoku mau faaitaha ange mo mateuteu ke ngāue. Naʻe akoʻi mai ʻe he ola ʻo e fengāueʻaki ko iá pea mo e tokoni naʻe fai ki he laui afe ʻi Niu ʻIoké, ʻi ha māmani ʻoku lahi ai e tokanga ki he ngaahi faikehekehé, vāmamaʻó, mo e fakamavahevahé, ʻoku lahi ange maʻu pē ʻa e meʻa ʻokú ne fakatahatahaʻi kitautolú ʻi he meʻa ʻokú ne vaetuʻua kitautolú. Naʻe tautapa e Fakamoʻuí ʻo pehē, “Ke mou taha pē; pea kapau ʻoku ʻikai te mou taha, ʻoku ʻikai ʻaʻaku ʻa kimoutolu.”
ʻE kāinga, kuo pau ke tau taʻofi ʻa e kumi ha ngaahi ʻuhinga ke tau māvahevahe aí kae fekumi ki ha ngaahi faingamālie ke tau “taha” ai. Kuó Ne tāpuekina kitautolu ʻaki ha ngaahi meʻafoaki mo e ʻulungaanga makehe ʻoku fakalotolahiʻi ai ke tau feakoʻaki mo tupulaki fakataautaha. Naʻá ku faʻa talaange maʻu pē ki heʻeku fānau ako ʻunivēsití kapau te u fai e meʻa ʻoku mou faí pea mou fai e meʻa ʻoku ou faí, he ʻikai ke tau toe fekāmaaki. Ka koeʻuhí ʻoku ʻikai ke mou fai e meʻa ʻoku ou faí pea ʻoku ʻikai ke u fai e meʻa ʻoku mou faí, ʻe fiemaʻu leva ke tau fetokoniʻaki. Pea ʻoku hanga leva ʻe he fiemaʻu ko iá ʻo fakatahatahaʻi mai kitautolu. Ko e palani ʻa e filí ke ikuna ʻi hono fakamavahevaheʻi kitautolú, koeʻuhí ke fakaʻauha ai ʻa e vā fakakaungāmeʻá, ngaahi fāmilí, mo e tuí. Ko e Fakamoʻuí ʻokú Ne fakatahatahaʻi kitautolú.
Ko Ia ʻoku ʻAʻana Kitautolú
Ko e taha ʻo e ngaahi tāpuaki kuo talaʻofa mai ʻo e “hoko ʻo tahá” ko ha ongoʻi mālohi ʻo hono fakakau kitá. Naʻe akoʻi ʻe ʻEletā Kuenitini L. Kuki “ko e uho ʻo e kau moʻoní ko e fakataha mai kia Kalaisi.”
ʻI ha ʻaʻahi kimuí ni mo hoku fāmilí ki he fonua ʻi ʻAfilika Hihifo ko Kaná, naʻe toʻoa au ʻe ha ʻulungaanga fakalotofonua. ʻI heʻemau tūʻuta ki ha falelotu pe ki ha ʻapi, naʻe talitali ʻaki kimautolu e fakalea “ʻoku talitali lelei kimoutolu.” ʻI he taimi ʻoku maau ai e meʻakaí, ʻe fakalea mai e tokotaha ʻokú ne talitali kimautolú, “ʻOku fakaafeʻi kimoutolu.” Naʻe fakahoko e fanga kiʻi talitali faingofua ko ʻení ʻaki ha taumuʻa mo e loto-moʻoni. ʻOku talitali lelei kimoutolu. ʻOku fakaafeʻi kimoutolu.
ʻOku tau fokotuʻu e fakalea ʻoku meimei tatau ʻi he matapā ʻo hotau ngaahi ʻapisiasí. Ka ʻoku ʻikai feʻunga pē e fakaʻaliʻali ʻo e fakalea, ʻOku Talitali Fiefia Kimoutolú. ʻOku tau talitali loto-māfana nai e tokotaha kotoa pē ʻoku hū mai he matapaá? ʻE kāinga, ʻoku ʻikai feʻunga ke tau tangutu pē ʻi he seá ʻi falelotu. Kuo pau ke tau talangofua ki he fekau ʻa e Fakamoʻuí ke fakatupulaki ha ngaahi vā fetuʻutaki fakaʻeiʻeiki mo māʻoniʻoni ange mo e fānau kotoa ʻa e ʻOtuá. Kuo pau ke tau moʻui ʻaki ʻetau tuí! Naʻe faʻa fakamanatu mai heʻeku tamaí ko e tangutu ko ia ʻi he sea he falelotú he Sāpaté ʻoku ʻikai ʻuhinga ia ko ha Kalisitiane lelei kita, ʻo hangē pē ko e ʻikai ʻuhinga ʻe te mohe ʻi ha fale-tauʻanga meʻalelé peá te hoko leva kita ko ha kā.
Kuo pau ke tau moʻui ʻi ha founga ʻoku ʻikai ke sio mai ai e kakaí kiate kitautolu ka ʻoku nau mamata kiate Ia ʻiate kitautolu. ʻOku ʻikai ke toki hoko pē ʻeni ʻi he Sāpaté . ʻOku hoko ia ʻi he falekoloá, pausá, ko e fakatahaʻanga fakaakó, ko e fakatahataha mo e ngaahi kaungāʻapí—ʻi he feituʻu kotoa pē ʻoku ngāue mo nofo ai e kau mēmipa hotau fāmilí kuo papitaiso pe ʻikai papitaisó.
ʻOku ou moihū ʻi he Sāpaté ko ha fakamanatu ʻoku tau fiemaʻu e niʻihi kehé pea ʻoku tau fiemaʻu fakataha Ia. ʻOku hoko ʻetau ngaahi meʻafoaki mo e talēniti makehe ʻokú ne fakafaikehekeheʻi kitautolu ʻi ha māmani fakakakanó ke ne fakatahatahaʻi kitautolu ʻi ha potu toputapu. Kuo fekauʻi kitautolu ʻe he Fakamoʻuí ke tau fetokoniʻaki, fepoupouaki, mo fefakamaamaʻaki. Ko e meʻa ʻeni naʻá Ne faí ʻi he taimi naʻá Ne fakamoʻui ai ʻa e fefine ne ʻau totó, fakamoʻui e tangata kilia naʻe tautapa ki Heʻene ʻaloʻofá, faleʻi ʻa e talavou koloaʻia naʻe fehuʻi pe ko e hā mo ha toe meʻa te ne faí, ʻofa kia Nikotīmasi ʻa ia naʻá ne maʻu ʻa e ʻiló ka naʻe vaivai ʻene tuí, pea ʻafio mo e fefine ʻi he veʻe vaitupú ʻa ia naʻe ʻikai ke muimui ki he ʻulungaanga angamaheni ʻo e kuonga ko iá ka naʻá Ne fakahā kiate ia Hono misiona faka-mīsaiá. Te u pehē ko e lotú ʻeni—ko ha feituʻu ʻo e fakatahaʻanga mo e fakaakeake, fakaleleiʻi, mo e liliu foʻou. Hangē ko e akonaki ʻa Palesiteni Lāsolo M. Nalesoní: “Ko e kupenga ʻo e ongoongoleleí ko e lahi taha ia ʻi māmaní. Kuo fakaafeʻi kitautolu kotoa ʻe he ʻOtuá ke haʻu kiate Ia. … ʻOku ʻi ai ha potu ki he taha kotoa pē.”
Mahalo ʻe maʻu ʻe ha niʻihi ha ngaahi aʻusia te ne ʻai koe ke ke ongoʻi ʻoku ʻikai ke ke kau mai. ʻOku tatau pē ʻa e pōpoaki ʻa e Fakamoʻuí kiate koe mo aú: “Haʻu kiate au ʻa kimoutolu kotoa pē ʻoku feinga mo mafasiá, pea te u foaki ʻa e fiemālié kiate kimoutolu.” Ko e ongoongolelei ʻo Sīsū Kalaisí ko e feituʻu lelei taha ia maʻatautolú. Ko e haʻu ko ia ki he lotú ʻokú ne ʻomi ha ʻamanaki lelei ki ha kahaʻu fakafiefia ange, ko e palōmesi ʻoku ʻikai ke ke tuenoa, pea mo ha fāmili ʻoku nau fiemaʻu kitautolu ʻo tatau pē mo ʻetau fiemaʻu kinautolú. ʻOku fakapapauʻi mai ʻe ʻEletā D. Toti Kulisitofasoni “ko e hoko ko ia ʻo taha mo e Tamaí, ʻAló mo e Laumālie Māʻoniʻoní ko e taupotu taha ia ʻo e kau maí.” Ki ha taha pē kuo mavahe [mei he Siasí] pea ʻokú ne fekumi ki ha faingamālie ke foki mai ai, ʻoku ou ʻoatu ha moʻoni taʻengata mo ha fakaafe. ʻOkú ke kau mai. Foki mai. Kuo taimi ke ke foki mai.
ʻI ha māmani fakakikihi mo māvahevahe, ʻoku ou fakamoʻoni ko e Fakamoʻui ko Sīsū Kalaisí ko e tuʻukimuʻa ia ʻi he fakatahatahaʻí. ʻOku ou fakaafeʻi kitautolu kotoa ke tau taau mo e fakaafe ʻa e Fakamoʻuí ke tau “taha pē” pea fakahā loto-toʻa, ʻo hangē ko ia naʻá Ne faí, “Ko hoku ngaahi kaumeʻa ʻa kimoutolu.” ʻI he huafa toputapu ʻo Sīsū Kalaisí, ʻēmeni.