Ko Hono Tanu ‘Etau Meʻatau ʻo e Angatuʻú
Fakatauange te tau tanu—ke loloto ʻaupito—ha faʻahinga tafaʻaki pē ʻo e angatuʻu ki he ʻOtuá mei heʻetau moʻuí, ʻo fetongi ʻaki ia ha loto-vilitaki mo ha ʻatamai vilitaki.
ʻOku lekooti ʻi he Tohi ʻa Molomoná naʻe fakafuofua ki he taʻu ʻe 90 kimuʻa pea ʻaloʻi ʻa Kalaisí, naʻe kamata ai ʻe he ngaahi foha ʻo e Tuʻi ko Mōsaiá ha ngāue fakafaifekau taʻu ʻe 14 ki he kakai Leimaná. Kuo hoko ʻa e ngaahi feinga ʻi ha laui toʻu tangata lahi ke fakatupulaki ha tui ʻa e kakai Leimaná ki he tokāteline ʻo Kalaisí ko ha koto-kulanoa pē. Ka ʻi he taimi ko ʻení, naʻe ului ha kau Leimana ʻe laui afe pea naʻa nau hoko ko ha kau ākonga ʻa Sīsū Kalaisi tuʻunga ʻi he ngaahi tokoni fakaofo ʻa e Laumālie Māʻoniʻoní.
ʻOku tau laukonga ʻo pehē, “Pea hangē ʻoku moʻui ʻa e ʻEikí, ʻoku pehē ko kinautolu kotoa ʻa ia naʻe tuí, pe ko kinautolu kotoa naʻe fakamahino ki ai ʻa e ʻilo ki he moʻoní, ʻi he malanga ʻa ʻĀmoni mo hono kāingá, ʻo fakatatau ki he laumālie ʻo e fakahaá mo e kikité, pea mo e mālohi ʻo e ʻOtuá ʻo fakahoko ai ha ngaahi mana ʻiate kinautolú—ʻio, ʻoku ou pehē kiate kimoutolu, hangē ʻoku moʻui ʻa e ʻEikí, ko e tokolahi ʻo e kau Leimana naʻe tui ki heʻenau malangá, pea nau ului ki he ʻEikí, naʻe ʻikai ke nau toe hē.”
ʻOku fakamatalaʻi ʻi he veesi hono hokó ʻa e kī ki he ului tuʻuloa ʻa e kakai ko ʻení: “He naʻa nau hoko ko ha kakai māʻoniʻoni; naʻa nau tuku hifo ʻa e ngaahi mahafu naʻa nau angatuʻu ʻakí, ʻo ʻikai te nau toe tauʻi ʻa e ʻOtuá, pe ko ha taha ʻo honau kāingá.”
Ko e fakamatala ko ‘eni ki he “ngaahi mahafu naʻa nau angatuʻu ʻakí” naʻe fakaʻuhinga ia ʻi hono tuʻunga moʻoni mo e fakataipé fakatouʻosi. Naʻe ʻuhinga ia ki he heletaá mo e ngaahi meʻatau kehé, kae pehē foki ki heʻenau talangataʻa ki he ʻOtuá mo ʻEne ngaahi fekaú.
Naʻe fakamatalaʻi ia ʻe he tuʻi ʻo e kakai Leimana naʻe uluí ʻi he founga ko ʻení: “Pea ko ʻeni vakai, ʻe hoku kāinga, … ko e meʻa pē ia te tau lava ʻo faí … ke fakatomala mei heʻetau ngaahi angahalá kotoa mo e ngaahi fakapō lahi naʻa tau faí, pea kole ki he ʻOtuá ke toʻo atu ia mei hotau lotó, he ko hono kotoa ia ʻo e meʻa te tau ala fai ke fakatomala ʻo feʻunga ʻi he ʻao ʻo e ʻOtuá koeʻuhi ke ne toʻo atu ʻa hotau ʻulí.”
Fakatokangaʻi ʻa e ngaahi lea ʻa e tuʻí—naʻe ʻikai ngata pē ʻi he hoko ʻenau fakatomala fakamātoató ke fakamolemoleʻi ai ʻenau ngaahi angahalá, ka naʻe toʻo foki ʻe he ʻOtuá ʻa e ʻuli ʻo e ngaahi angahala ko iá pea naʻa mo e holi ke faiangahalá mei honau lotó. Hangē ko ia ʻoku mou meaʻí, naʻa nau tanu ʻenau ʻū heletaá ke ʻoua naʻa fakafaingamālieʻi ai haʻanau toe foki ki honau tuʻunga motuʻa ʻo e angatuʻu ki he ʻOtuá. Pea ʻi heʻenau tanu ʻenau ngaahi meʻatau fakatuʻasinó, naʻa nau tanu foki ai mo ʻenau holi ke faiangahalá tuʻunga ʻi he liliu honau lotó.
Mahalo te tau fehuʻi pē kiate kitautolu pe ko e hā ha meʻa te tau lava ʻo fai ke muimui ai ki he sīpinga ko ʻení, ke “tuku hifo ʻa e ngaahi mahafu naʻa [tau] angatuʻu ʻakí” ʻo tatau ai pē pe ko e hā kinautolu pea hoko ʻo “ului [ki] he ʻEikí” koeʻuhí ke toʻo mei hotau lotó ʻa e ʻuli ʻo e angahalá pea mo e holi ke faiangahalá pea he ʻikai ke tau toe hē.
Ko e angatuʻú ʻe lava ke fai ʻi he fakahāhā pe fakapulipuli. Ko ha sīpinga lelei ʻo e angatuʻu ʻi he ʻiloʻilopaú ko Lusifā, ʻa ia naʻá ne fakafepaki ki he palani ʻa e Tamaí ki he huhuʻí ʻi he maama fakalaumālié peá ne uki mo ha niʻihi kehe ke nau fakafepaki foki mo kinautolu, “pea ʻi he ʻaho ko iá, naʻe muimui kiate ia ʻa e tokolahi.” ʻOku ʻikai faingataʻa ke ʻiloʻi ʻa e ola ʻo e hokohoko atu ʻene angatuʻú ʻi hotau kuongá.
‘Oku ‘omi ‘e he foʻi toko tolu taʻe-māʻoniʻoni ʻi he Tohi ʻa Molomoná naʻa nau fakafepakiʻi ʻa Kalaisí—Seialemi, Nēhoa, mo Kolihola—ha sīpinga angamaheni ʻo e angatuʻu fakahāhā ki he ʻOtuá. Ko e tefitoʻi fakakaukau ʻa Nēhoa mo Koliholá naʻe ʻikai ha angahala; ko ia ai, ʻoku ʻikai ha fiemaʻu ia ke fakatomala, pea ʻoku ʻikai ha Fakamoʻui. “ʻOku tuʻumālie ʻa e tangata taki taha ʻo fakatatau ki hono ʻatamaí, pea … ikuna ʻe he tangata taki taha ʻo fakatatau ki hono iví; pea ʻilonga ha meʻa ʻoku fai ʻe ha tangata ʻoku ʻikai ko e hia ia.” ʻOku fakasītuʻaʻi ʻe he kau fakafepaki kia Kalaisí ʻa e mafai fakalotú, ʻo nau fakamatalaʻi ʻa e ngaahi ouaú mo e ngaahi fuakavá ko ha ngaahi tōʻonga ia “kuo fokotuʻu ʻe he kau taulaʻeiki ʻi muʻá, ke nau maʻu ʻa e mālohi mo e mafai kiate kinautolu.”
Ko ha sīpinga ʻi he kuongá ni ʻo ha angatuʻu ʻi he ʻiloʻilopau naʻe fakafiefia hono ikuʻangá ko e talanoa kia Uiliami W. Felipisí. Naʻe kau ʻa Felipisi ki he Siasí ʻi he 1831 pea naʻe fokotuʻu ia ko e tokotaha faipaaki ʻa e Siasí. Naʻá ne ʻētita ha ngaahi pulusinga ʻi he fuofua kamata ʻa e Siasí, faʻu ha ngaahi himi kehekehe, mo ngāue ko ha tangata tohi kia Siosefa Sāmita. Kae pangó he naʻá ne fakafepaki ki he Siasí pea mo e Palōfitá, ʻo aʻu ki ha tuʻunga naʻá ne fai ai ha fakamoʻoni loi fekauʻaki mo Siosefa Sāmita ʻi ha fakamaauʻanga ʻi Mīsuli, ʻa ia naʻe iku ki hono tuku pilīsone ʻo e Palōfitá ʻi ai.
Naʻe tohi ʻa Felipisi kimui ange ʻo kole fakamolemole kia Siosefa. “ʻOku ou ʻilo hoku tūkungá, ʻokú ke meaʻi ia, pea ʻoku ʻafioʻi ia ʻe he ʻOtuá, pea ʻoku ou loto ke fakahaofi au kapau ʻoku fie tokonia au ʻe hoku ngaahi kaungāmeʻá.”
Naʻe tali mai ʻe he Palōfitá ʻo pehē: “ʻOku moʻoni pē ne mau faingataʻaʻia lahi tupu mei hoʻo meʻa naʻe faí. … Neongo ia, kuo ʻosi inu ʻa e ipú, kuo fakahoko mo e finangalo ʻo e Tamaí, pea ʻoku mau kei moʻui pē. … Foki mai, tokoua ʻofeina, ko e taú ē kuo tolona, he ko e kaungāmeʻa ʻi he kamataʻangá, kuo toe kaungāmeʻa pē ʻi he ikuʻangá.”
ʻI he loto-fakatomala moʻoni, naʻe tanu ai ʻe Uiliami Felipisi ʻene “ngaahi mahafu naʻá ne angatuʻu ʻakí,” pea naʻe fakafoki ia ki he Siasí, ʻo ʻikai ke ne toe hē.
Mahalo ko e founga kākā ange ʻo e angatuʻu ki he ʻOtuá ko e tuʻunga fakapulipulí—ʻa e taʻetokanga ki Hono finangaló ʻi heʻetau moʻuí. Ko e niʻihi tokolahi he ʻikai ke nau teitei fakakaukau ke angatuʻu fakahāhaá te nau kei malava pē ke fakafepakiʻi ʻa e finangalo mo e folofola ʻa e ʻOtuá ʻaki ʻenau tulifua ʻenau taumuʻa pē ʻanautolú kae ʻikai te nau tokanga ki ha fakahinohino fakalangi. ʻOku ou manatu ai ki he foʻi hiva ʻiloa ʻi he ngaahi taʻu lahi ʻi he kuohilí naʻe faʻu ʻe he tokotaha hiva ko Falangikē Sinātilā (Frank Sinatra) mo e fakalea “Naʻá ku fai ia ʻi he founga pē ʻaʻaku.” Ko e moʻoni ʻoku lahi ha ngaahi faingamālie ʻi he moʻuí ki he fiemaʻu fakatāutahá mo e fili fakafoʻituituí, ka ko e taimi ʻoku fekauʻaki ai mo e ngaahi meʻa ki he fakamoʻuí mo e moʻui taʻengatá, ʻoku totonu leva ke hoko ʻetau kaveingá ko e “Naʻá ku fai ia ʻi he founga ʻa e ʻOtuá,” he ko hono moʻoní ʻoku ʻikai pē ha toe founga.
Hangē ko ʻení, fakakaukau ki he sīpinga ʻa e Fakamoʻuí fekauʻaki mo e papitaisó. Naʻá Ne fakahoko ʻa e papitaisó ko hano fakahaaʻi ʻo e līʻoa ki he Tamaí pea mo ha sīpinga kiate kitautolu:
“ʻOkú ne fakahā ki he fānau ʻa e tangatá, ʻokú ne fakavaivaiʻi ia ʻo fakatatau ki he kakanó ʻi he ʻao ʻo e Tamaí, pea ʻokú ne fakahā ki he Tamaí te ne talangofua kiate ia ʻi he tauhi ʻene ngaahi fekaú. …
“Pea naʻá ne folofola ki he fānau ʻa e tangatá: Mou muimui ʻiate au. Ko ia, ʻe hoku kāinga ʻofeina, te tau lava koā ke muimui ʻia Sīsū ʻo kapau ʻoku ʻikai te tau loto ke tauhi ʻa e ngaahi fekau ʻa e Tamaí?”
ʻOku ʻikai ha “founga pē ʻaʻaku” kapau ʻoku tau fiemaʻu ke muimui ki he sīpinga ʻa Kalaisí. Ko e feinga ko ia ke kumi ha founga kehe ki hēvaní ʻoku tatau ia mo e ngāue taʻeʻaonga ʻi he Taua ʻo Pēpelí kae ʻikai sio kia Kalaisi mo ʻEne fakamoʻuí.
Ko e ʻū heletā mo e ngaahi meʻatau kehe naʻe tanu ʻe he kau Leimana naʻe uluí, ko e ngaahi meʻatau ia naʻa nau angatuʻu ʻakí koeʻuhí ko e founga naʻa nau fakaʻaongaʻi ai iá. Ko e faʻahinga meʻatau tatau pē ko iá naʻe ngāue ʻaki ʻi he nima ʻo honau ngaahi fohá ke maluʻi ʻa e fāmilí mo e tauʻatāiná, naʻe ʻikai ko ha toe meʻatau ia ke angatuʻu ʻaki ki he ʻOtuá. Ko e meʻa tatau pē ki he ngaahi meʻatau ʻi he nima ʻo e kau Nīfaí: “Naʻe ʻikai te nau taú ke fokotuʻu ha taha ko ha tuʻi, pe maʻu ha mālohi ka naʻa nau taú koeʻuhi ko honau ngaahi ʻapí mo ʻenau tauʻatāiná, mo honau ngaahi uaifí mo ʻenau fānaú, pea mo ʻenau ngaahi meʻa kotoa pē, ʻio, koeʻuhi ko e ngaahi ouau ʻo ʻenau lotú mo honau siasí.”
ʻI he founga tatau pē ko ʻení, ʻoku ʻi ai ha ngaahi meʻa ʻi heʻetau moʻuí ʻe lava pē ke ʻikai kau ki ha tafaʻaki pe ʻoku lelei fakanatula pē ia ka ʻi hono fakaʻaongaʻi ʻi he founga halá ʻe hoko leva ia ko ha “ngaahi mahafu ke angatuʻu ʻaki.” Hangē ko ʻení, ʻe lava ke hoko ʻetau leá ko ha fakamaama pe ko ha tukuhifo. Hangē ko e lea ʻa Sēmisí:
“Ka [ʻoku hangē] ʻoku ʻikai faʻa fakalalata ʻe ha tangata ʻa e ʻeleló; ko e kovi taʻe faʻa taʻofia ia, ʻoku pito ʻi he kona fakamate.
“Ko ia ʻoku tau fakafetaʻi ʻaki ki he ʻOtua ko e Tamaí; pea ko ia ʻoku kape ʻaki ʻa e kakaí, ʻa ia naʻe ngaohi ʻi he tatau ʻo e ʻOtuá.
“ʻOku mei he ngutu pē taha ʻa e tāpuaki mo e kapekape. ʻE hoku kāinga, ʻe ʻikai siʻi lelei ke pehē ʻa e ngaahi meʻá ni.”
ʻOku lahi ha ngaahi fetuʻutaki ʻi he ʻahó ni ʻi he tokolahí mo fakataautaha ʻoku palakū pea tāufehiʻa. ʻOku lahi ha ngaahi fetalanoaʻaki ʻoku taʻefeʻunga mo lea kapekape, naʻa mo e toʻu tupú. Ko e faʻahinga lea ko ʻení ko e “mahafu ia ʻo e angatuʻu” ki he ʻOtuá, “ʻoku pito ʻi he kona fakamate.”
Fakakaukau ki ha sīpinga ʻe taha ʻo ha meʻa ʻoku mahuʻinga mo lelei ka ʻe lava ke hoko ko ha angatuʻu ki he ngaahi fakahinohino fakalangí—ko e ngāue maʻuʻanga moʻui ʻa ha taha. ʻE lava ke maʻu ʻe ha taha ha fiemālie moʻoni ʻi ha taukei pe ngāue, pea kuo ʻaonga kiate kitautolu kotoa ʻa e meʻa kuo aʻusia mo faʻu ʻe he kakai mateaki mo talēnitiʻia ʻi he ngaahi malaʻe kehekehé.
Ka, ʻoku malava pē ke hoko ʻa e mateakiʻi ʻo e ngāue maʻuʻanga moʻuí ko e tumutumu ia ʻo e meʻa ʻoku fakatefito ai ʻa e moʻui ʻa ha taha. Pea hoko leva ʻa e ngaahi meʻa kehe kotoa pē ʻo fika ua atu ia, kau ai ʻa e kaunga ʻa e Fakamoʻuí ki he taimi mo e talēniti ʻo ha taha. Ki he houʻeiki tangatá mo fafine foki, ko e fakaʻehiʻehi ko ia mei he ngaahi faingamālie fakalao ‘o e malí, ʻikai lava ke pīkitai mo hiki hake ʻa e hoa malí, ʻikai lava ke lehilehiʻi ʻa e fānaú, pe naʻa mo e fakaʻehiʻehi ʻi he ʻiloʻilopau mei he tāpuaki mo e fatongia ʻo e tauhi fānaú koeʻuhí pē kae lava ʻo fakalakalaka ʻi he ngāue maʻuʻanga moʻuí, ʻe lava ke ne liliu ʻa e lavameʻa ʻoku taau ke fakahīkihikiʻí ki ha founga ʻo e angatuʻú.
Ko ha sīpinga ʻe taha ʻoku fekauʻaki ia mo hotau tuʻunga fakatuʻasinó. ʻOku fakamanatu mai ʻe Paula ʻoku totonu ke tau fakalāngilangiʻi ʻa e ʻOtuá ʻi he sino mo e laumālie fakatouʻosi, pea ko e sino ko ʻení ko e temipale ia ʻo e Laumālie Māʻoniʻoní, “ʻa ia ʻoku mou maʻu mei he ʻOtuá, pea ʻoku ʻikai ʻamoutolu ʻa kimoutolu.” Ko ia ai, ʻoku totonu ke tau tokanga ke fakaʻaongaʻi ha taimi ke tokangaekina ai hotau sinó ki he lelei taha te tau lavá. Ko ha niʻihi ʻo kitautolu te tau aʻu ki he tumutumu ʻo e ivi malava kuo tau toki mātā ai ʻi he ngaahi lavameʻa ʻo e kau sipoti ʻOlimipikí, pea ʻoku aʻusia ʻe ha niʻihi ʻo kitautolu ʻa e ngaahi nānunga ʻo e taʻu motuʻá, pe ko e meʻa naʻe ui ʻe Palesiteni M. Lāsolo Pālati “ko e homohomo ʻa e meʻa-fakamaʻú.”
Ka neongo ia, ʻoku ou tui ʻoku fakahōifua ki hotau Fakatupú ʻa e taimi ʻoku tau fai ai hotau lelei tahá ke tokangaekina ʻEne meʻaʻofa fakaʻofoʻofa ʻo ha sino fakamatelié. Ko hono maumauʻi pe ʻuliʻi ko ia ha sino ʻo ha taha, pe ngaohikovia ia, pe tōnounou ke fai ʻa e meʻa ʻe malavá ke tulifua ai ha tōʻonga moʻui leleí, ko ha fakaʻilonga ia ʻo e angatuʻú. ʻI he taimi tatau, ʻoku lava ke hoko ʻa e pōlepolé mo e tokanga lahi ki he sino leleí, fōtungá, pe teuteú ko ha founga ia ʻo e angatuʻú ʻi ha tūkunga ʻe taha, ʻo tataki ai ha taha ke ne ʻotua ʻaki ʻa e meʻaʻofa ʻa e ʻOtuá kae ʻikai ko e ʻOtuá.
ʻI hono fakaʻosí, ʻoku ʻuhinga ʻa e tanu ʻa e ngaahi mahafu ʻoku tau angatuʻu ʻaki ki he ʻOtuá ke talangofua ki he ngaahi fakahinohino ʻa e Laumālie Māʻoniʻoní, ʻo liʻaki ʻa e tangata fakakakanó kae hoko “ko ha tangata māʻoniʻoni ʻi he fakalelei ʻa Kalaisi ko e ʻEikí.” ʻOku ʻuhinga ia ke fakamuʻomuʻa ʻa e fekau ʻuluakí ʻi heʻetau moʻuí. ʻOku ʻuhinga ia ke tuku ke ikuna ʻa e ʻOtuá. Kapau ʻoku hoko ʻetau ʻofa ki he ʻOtuá mo ʻetau loto-fakapapau ke ngāue Maʻana ʻaki hotau iví, ʻatamaí mo e mālohí kotoa ko e makatuʻunga ia ʻo ʻetau fakamāuʻi ʻa e meʻa kotoa pē mo fai mei ai ʻetau ngaahi fakakaukau kotoa pē, tā kuo tau tanu ʻetau ngaahi mahafu ʻo e angatuʻú. ʻI he ʻaloʻofa ʻa Kalaisí, ʻe fakamolemoleʻi ʻe he ʻOtuá ʻetau ngaahi angahala mo e angatuʻu ʻo e kuohilí pea toʻo ʻa e ʻuli ʻo e ngaahi angahala mo e angatuʻu ko iá mei hotau laumālié. ʻI he fakalau ʻa e taimí, te Ne toʻo ha faʻahinga holi pē ki he koví ʻo hangē ko ia naʻá Ne fai ki he kau Leimana ko ia ʻi he kuohilí naʻa nau uluí. ʻI he hili iá, he ʻikai leva “ke [tau] toe hē” mo kitautolu.
ʻOku fakatau ʻa hono tanu ʻo e ngaahi mahafu ʻoku tau angatuʻu ʻakí ki ha fiefia makehe. ʻE ʻomi fakataha kitautolu mo kinautolu kotoa pē kuo nau ului ki he ʻEikí ke “[tau] hiva ʻaki ʻa e [hiva ʻo e] ʻaloʻofa huhuʻí.” Kuo fakapapauʻi mai ʻe heʻetau Tamai Hēvaní pea mo Hono ʻAló, ko hotau Huhuʻí, ʻa ʻEna līʻoa taʻetūkua ki heʻetau fiefia taupotu tahá ʻo fakafou ʻi he ʻofa mo e feilaulau lahi fau. ʻOku tau aʻusia ʻEna ʻofá fakaʻaho. Ko e moʻoni te tau lava ʻo fakafetongi ʻaki pē ʻetau ʻofá mo e moʻui mateakí. Fakatauange te tau tanu—ke loloto ʻaupito—ha faʻahinga tafaʻaki pē ʻo e angatuʻu ki he ʻOtuá mei heʻetau moʻuí, pea fetongi ʻaki ia ha loto-vilitaki mo ha ʻatamai vilitaki, pea hanganaki fiefia atu ki he ʻaho ʻe “toe fokotuʻu ʻe he ʻEikí ʻa Saioné. ʻI he huafa ʻo Sīsū Kalaisí, ʻēmeni.