Māʻoniʻoni ki he ʻEikí ʻi he Moʻui Fakaʻahó
ʻOku hanga ʻe he māʻoniʻoni ki he ʻEikí ʻo ʻai ke toputapu ʻa e moʻui fakaʻahó. ʻOkú ne tohoakiʻi kitautolu ke tau vāofi ange mo fiefia ange mo e ʻEikí pea mo e niʻihi kehé.
Naʻe kau ʻi heʻemau fakataha fakafāmili kimuí ni ʻa e fāmili Kongó ha fakaʻaliʻali talēniti fakalata, mo ha feʻauhi tūkuhua ʻa e tamaí.
Ka ko e feʻauhi ko ʻení naʻe kehe ia mei he angamahení. ʻI he timi ʻe tahá naʻe ʻi ai ʻa Kulenipā (ko au) mo e ongo mokopuna ʻe toko ua, taʻu 12 mo e 11. ʻI he timi ʻe tahá ko ha polokalama fakakomipiuta (AI) naʻe faʻu ʻe ha kāsini ke ne tala ha ngaahi tūkuhua ʻa e tamaí ʻi he sīpinga ʻa Kēliti W. Kongó. Ko Kui Tangata Kēliti Kongo mo Kēliti Kongo AI.
Ne u kamataʻi ʻe au mo e ongo mokopuná.
ʻOkú ke ui ʻa e tainasoa ʻoku fepaki ʻi heʻene kaá ko e hā? Ko e Tainasoa Maumau.
Naʻe fakahinohinoʻi ʻa Kēliti Kongo AI—ke fakakaukau ʻo hangē ko Kēliti W. Kongó. Lea hangē ko iá.
AI Kēliti Kongo—“Ko ha tūkuhua ʻeni ʻa e tamaí ʻo hangē pē ʻoku lea ʻaki ia ʻe Kēliti W. Kongó ʻo fakaʻaongaʻi ʻene founga lea loto-māfaná, faʻa fakakaukaú mo langaki moʻuí: Ko e hā naʻe ʻai ai ʻe he fuʻu ʻakau loto-fakatōkilaló ʻa e kakaí ke nau malimalí? Koeʻuhí he naʻe aka ia ʻi he ʻofá pea mafao atu ʻa e ngaahi vaʻá ʻi he angaʻofa. Hangē ko e fuʻu ʻakau ko iá, te tau lava mo kitautolu ʻo maʻu ʻa e mālohi ʻi hotau ngaahi aká pea fiefia ʻi hono fakaaʻu ʻo e angaʻofá ki he niʻihi kehé.”
Ko e hā hoʻomou fakakaukaú? Ko e ʻuhinga ia ʻoku ui ai ko e tūkuhua ʻa e tamaí.
ʻOku ʻākilotoa kitautolu ʻe ha ngaahi faingamālie ke kakata, fiefia, mo vakai ʻaki ha fakakaukau ʻo e houngaʻiá. Ko ‘etau ongoongoleleí ko ha ongoongolelei ia ʻo e fiefia mo e māʻoniʻoni ʻi he moʻui fakaʻahó. ʻOku hanga ʻe he māʻoniʻoní ʻo vaheʻi ha meʻa ki ha taumuʻa toputapu. Ka ʻoku fakaafeʻi foki kitautolu ʻe he māʻoniʻoní ke tau fefiofi ʻa e moʻui fakaʻahó mo e meʻa toputapú—ke fiefia ʻi he ngaahi tāpuaki fakaʻahó ʻi he uhouhonga ʻo e mafasia mo e pole ʻo e māmani ko ʻení. Ke ʻaʻeva mo e ʻEikí, kuo pau ke tau hoko ʻo māʻoniʻoni, he ʻokú Ne māʻoniʻoni, pea ʻoku fakaafeʻi kitautolu ʻe he ʻEikí ke tau ʻaʻeva mo Ia, ke tokoniʻi kitautolu ke tau māʻoniʻoni.
ʻOku tau takitaha moʻona pē ʻene aʻusia. ʻI heʻeku feʻiloaki mo Sisitā Kongo mo kimoutolú—ko e kāingalotu ʻo e Siasí mo e ngaahi kaungāmeʻa ʻi he ngaahi feituʻu mo e tūkunga kehekehé—ʻoku fakalotoa kimaua ʻe hoʻomou ngaahi talanoa ʻo e māʻoniʻoni ki he ʻEikí ʻi he moʻui fakaʻahó. ʻOku mou moʻui ʻaki ha ngaahi tefitoʻi moʻoni ʻe fitu: feohi mo e ʻOtuá, faaitaha mo manavaʻofa mo e niʻihi kehé, tukupā mo fuakava mo e ʻOtuá, fāmilí mo e ngaahi kaungāmeʻá—fakatefito ʻia Sīsū Kalaisi.
ʻOku fakamamafaʻi ʻe ha ngaahi fakamoʻoni lahi ange ʻa e moʻoniʻi meʻa mataʻāʻā ko ʻení: ʻoku angamaheni ke fiefia, moʻui lelei, pea fiemālie ange ʻa e kakai tui fakalotú ʻi he niʻihi ʻoku ʻikai haʻanau tukupā pe fehokotaki fakalaumālié. Fiefia mo e fiemālie ʻi he moʻuí, moʻui lelei fakaeʻatamai mo fakatuʻasino, ʻuhinga mo e taumuʻa, ʻulungaanga mo e angamaʻa, ngaahi fetuʻutaki vāofi fakasōsiale, naʻa mo e fiemālie fakapaʻanga mo e fiemālie ʻi he meʻa ʻoku maʻú—ʻi he meʻa takitaha, ʻoku tupulaki ai ʻa kinautolu ʻoku tui fakalotú.
ʻOku nau moʻui lelei fakatuʻasino mo fakaeʻatamai ange mo fiemālie ange ʻi he moʻuí ʻi he toʻu mo e kakai kotoa pē.
ʻOku hoko ʻa e meʻa ʻoku ui ʻe he kau fakatotoló ko e “tokoni ʻa e tui fakalotú ke fakaivia ʻa e fiemālie fakasōsialé” ke ʻomi ai ha mahino, taumuʻa mo ha ueʻi fakalaumālie ʻi he lotolotonga ʻo e ngaahi meʻa taʻeʻamanekina ʻi he moʻuí. ʻOku hanga ʻe he ʻapi ʻoku fakatefito ʻi he tuí mo e ngāue fakataha ʻa e Kāingalotú ʻo fakafepakiʻi ʻa e fakamakehekehé mo e kakai ʻoku liʻekiná. Ko e māʻoniʻoni ki he ʻEikí ʻoku lea ʻikai ki he anga taʻe-fakaʻapaʻapá, ʻikai ki hono manukia ʻo e niʻihi kehé, ʻikai ki hono tuku atu ha faʻahinga fakamatala ʻi he mītia fakasōsialé ʻoku fakatupunga ai ha loto-ʻita mo ha ʻā vahevahe ke maʻu mei ai ha paʻanga. Ko e māʻoniʻoni ki he ʻEikí ʻoku lea ʻio ki he toputapú mo e ʻapasiá, ʻio ki he hoko ko hotau tuʻunga tauʻatāina, fiefia, moʻoni mo lelei tahá ʻi heʻetau muimui kiate Ia ʻi he tuí.
ʻOku fōtunga fēfē nai ʻa e māʻoniʻoni ki he ʻEikí ʻi he moʻui fakaʻahó?
Ko e māʻoniʻoni ki he ʻEikí ʻi he moʻui fakaʻahó ko ha ongomātuʻa kei talavou tui faivelenga ia, kuo lava ha taʻu ʻe taha ʻo ʻena nofo-malí, ʻokú na fevahevaheʻaki moʻoni mo tauʻatāina ʻa e ngaahi fuavaka ʻo e ongoongoleleí, feilaulau mo fetokoniʻaki ʻi he toenga ʻena moʻuí.
ʻOkú ne kamata ʻaki ʻene pehē, “ʻI he ako māʻolungá, naʻá ku ʻi ha tuʻunga fakamamahi ai. Naʻá ku ongoʻi hangē ʻoku ʻikai tokoni mai ʻa e ʻOtuá. ʻI ha pō ʻe taha, ne hū mai ai ha tohi mei hoku kaungāmeʻá ʻoku pehē mai, ‘Kuó ke ʻosi lau tuʻo taha nai ʻa e ʻAlamā 36?’
Naʻá ne pehē, “ʻI he kamata ke u lau iá, naʻe ʻākilotoa au ʻe ha nonga mo e ʻofa. Naʻá ku ongoʻi hangē ʻoku fāʻofua mai ha taha kiate aú. Ko e taimi naʻá ku lau ai ʻa e ʻAlamā 36:12, naʻá ku ʻiloʻi naʻe ʻafio mai ʻa e Tamai Hēvaní pea naʻá Ne ʻafioʻi pau e ongo naʻá ku maʻú.”
ʻOkú ne hoko atu ʻo pehē, “Kimuʻa peá ma malí, naʻá ku tala totonu pē ki hoku kaumeʻá naʻe ʻikai ke u maʻu ha fakamoʻoni mālohi ki he vahehongofulú. Ko e hā e ʻuhinga ne finangalo ai e ʻOtuá ke tau foaki ha paʻanga hili ko iá ʻoku maʻu ʻe he niʻihi kehé ha meʻa lahi ange ke foaki? Naʻe tokoni hoku kaumeʻá ke fakamatalaʻi ʻoku ʻikai ko e paʻangá ʻoku mahuʻingá ka ko e talangofua ki ha fekau naʻe ʻomi kiate kitautolu. Naʻá ne fakatukupaaʻi au ke u kamata totongi vahehongofulu.
Naʻá ne pehē, “Naʻá ku mamata moʻoni ki he tupulaki ʻeku fakamoʻoní. Naʻe ʻi ai e taimi ne ʻikai ke feʻunga ai e paʻangá mo e ngaahi fiemaʻú, ka naʻá ma mātā ha ngaahi tāpuaki lahi pea naʻe feʻunga ʻānoa pē ʻema paʻanga hū maí.”
ʻIkai ke ngata aí, naʻá ne pehē foki “ko au pē naʻá ku kau ki he Siasí peá u ʻosi mali ʻi heʻemau kalasi ako nēsí. Naʻe lahi e ngaahi taimi naʻá ku mavahe ai mei he kalasí ʻoku ou ʻita pe tangi he naʻá ku ongoʻi naʻe fakamavahevaheʻi au ʻe hoku kaungāakó pea naʻa nau lea kovi fekauʻaki mo ʻeku tuí, ko ʻeku tui kāmení, pe ko ʻeku mali kei siʻí.”
Ka naʻá ne hoko atu ʻo pehē, “ʻI he semesitā ko ʻeni ne toki ʻosí, naʻá ku ako ai e founga ke u lea ʻaki e meʻa ʻoku ou tui ki aí pea hoko ko ha faʻifaʻitakiʻanga lelei ʻo e ongoongoleleí. Naʻe tupulaki ʻeku ʻiló mo ʻeku fakamoʻoní he naʻe siviʻi au ʻi heʻeku malava ke tuʻu toko tahá mo e loto-toʻa ʻi he meʻa ʻoku ou tui ki aí.”
Naʻe tānaki mai ʻe he husepāniti kei talavoú ʻo pehē, “Kimuʻa peá u ʻalu ʻo ngāue fakafaifekaú naʻe ʻomi haʻaku ngaahi faingamālie ke u ʻalu ai ʻo vaʻinga peisipolo ʻi he ʻunivēsití. Naʻá ku fai ha fili faingataʻa, ʻo liʻaki e ngaahi faingamālie ko iá ka u ʻalu ʻo ngāue maʻá e ʻEikí. He ʻikai te u teitei fetongi e taʻu ʻe ua ko iá ʻaki ha faʻahinga meʻa.
Naʻá ne pehē, “ʻI heʻeku foki mai ki ʻapí, naʻá ku ʻamanaki te u foua ha liliu faingataʻa, ka naʻá ku mālohi ange, veʻe vave ange, peá u moʻui lelei ange. Naʻe mālohi ʻeku tolo pulú ʻo laka ange ia ʻi he taimi naʻá ku mavahe aí. Ne ʻomi mo ha ngaahi faingamālie lahi ange ke u vaʻinga ai, ʻo kau ai e ʻapiako naʻá ku fakaʻānaua ke u ako aí. Pea hiliō aí,” naʻá ne pehē, “naʻá ku falala ki he ʻEikí ʻo lahi ange ia ʻi ha toe taimi kimuʻa.”
ʻOkú ne fakaʻosi ʻaki ʻene pehē, “ʻI heʻeku kei ngāue fakafaifekaú naʻá ku akoʻi ai ʻoku talaʻofa mai ʻe he Tamai Hēvaní ha mālohi ʻi heʻetau lotú, ka ʻoku faʻa ngalo ia ʻiate au he taimi ʻe niʻihi.”
ʻOku mahu mo pito ʻa e ngaahi tāpuakí ʻi heʻetau fakahaaʻi ʻa e māʻoniʻoni ki he ʻEikí ʻo fakafou ʻi he ngāue fakafaifekaú. ‘Oku ‘ikai ke faʻa faingofua maʻu pē ʻa e paʻangá, taimí mo e ngaahi tūkunga kehé. Ka ko e taimi ʻoku fakatapui ai ʻe he kau faifekau ʻo e toʻu mo e puipuituʻa kotoa pē ʻa e māʻoniʻoni ki he ʻEikí, ʻe lava leva ke ola lelei ʻa e ngaahi meʻá ʻi he taimi mo e founga ʻa e ʻEikí.
ʻOku vahevahe ʻe ha faifekau matuʻotuʻa haʻane aʻusia ʻi he taʻu ʻe 48 kuohilí, “Naʻe loto ʻeku tamaí ke u ʻalu ʻo ako he ʻunivēsití, kae ʻikai ke u ʻalu ʻo ngāue fakafaifekau. Hili pē ha taimi nounou mei ai, naʻá ne mālōlō ʻi hono taʻu 47 koeʻuhí ko ha mahaki mafu. Naʻá ku ongoʻi halaia. Te u lava fēfē ke fakaleleiʻi hoku vā mo ʻeku tamaí?
ʻOkú ne pehē, “Hili ʻeku fakakaukau kimui ange ke u ngāue fakafaifekaú, naʻá ku sio ki heʻeku tamaí ʻi ha misi. ʻI he loto-nonga mo e fiemālie, naʻá ne fiefia ʻi heʻeku teu ke ngāué.”
ʻOku hoko atu ʻa e faifekau matuʻotuʻa ko ʻení ʻo pehē, “Hangē ko ia ʻoku akoʻi ʻi he Tokāteline mo e Ngaahi Fuakava vahe 138 ʻoku ou tui ʻe lava ʻeku tamaí ʻo ngāue fakafaifekau ʻi he maama tataliʻanga ʻo e ngaahi laumālié. ʻOku ou fakakaukauloto ʻoku tokoni ʻeku tamaí ke toe maʻu ʻemau kui tangata uá, ʻa ia naʻe mavahe mei Siamane ʻi hono taʻu 17 pea ʻikai toe felōngoaki mo e fāmilí.”
ʻOku tānaki mai hono uaifí ʻo pehē, “ʻI he kotoa e kau tautehina ʻe toko nima ʻi he fāmili hoku husepānití, ko e toko fā ko ia naʻa nau ngāue fakafaifekaú ko kinautolu ia ʻoku ʻi ai haʻanau mataʻitohi mei he ʻunivēsití.”
Ko e māʻoniʻoni ki he ʻEikí ʻi he moʻui fakaʻahó ʻoku tatau ia mo ha talavou ne toki ʻosi mei he ngāue fakafaifekaú, ʻa ia naʻá ne ako ke tuku ke lāngilangiʻia ʻa e ʻOtuá ʻi heʻene moʻuí. Ko e taimi naʻe kole ange ai ki he faifekau ko ʻení ke ne tāpuakiʻi ha taha naʻe puke lahi, naʻá ne pehē, “ʻOku ou maʻu ʻa e tuí; te u tāpuakiʻi ia ke ne moʻui.” ʻOku pehē ʻe he faifekaú, “Ka, naʻá ku ako ʻi he momeniti ko iá ke ʻoua ʻe lotua ʻa e meʻa naʻá ku fiemaʻú ka ko e meʻa naʻe ʻafioʻi ʻe he ʻEikí naʻe fiemaʻu ʻe he tokotaha ko iá. Naʻá ku tāpuakiʻi ʻa e tangatá ke ne maʻu ha nonga mo e fiemālie. Naʻá ne mālōlō kimui ange ʻi he nonga.”
Ko e māʻoniʻoni ki he ʻEikí ʻi he moʻui fakaʻahó ʻoku ongo ia ʻo hangē ha kiʻi ngāue ʻoku ope atu ki he tafaʻaki ʻe taha ʻo e veilí ke fehokotaki, fakafiemālie, mo fakaivia. ʻOku pehē ʻe ha pule ʻi ha ʻunivēsiti ʻiloa ʻokú ne ongoʻi hono lotua ia ʻe ha niʻihi fakafoʻituitui ʻokú ne ʻiloʻi pē kinautolu ʻaki honau tuʻunga fakasōsialé. Naʻe līʻoa ʻe he niʻihi fakafoʻituitui ko iá ʻenau moʻuí ki he ʻunivēsití pea hokohoko atu ʻenau tokanga ki hono misioná mo e tamaiki akó.
ʻOku fakahoko ʻe ha fefine hono lelei tahá he ʻaho takitaha, hili ia ha mavahe hono husepāniti taʻe-faitotonú kae liʻaki ia mo e fānaú. ʻOku ou tanganeʻia moʻoni ʻiate ia mo e niʻihi kehe ʻoku tatau mo iá. ʻI ha ʻaho ʻe taha lolotonga ʻene pelu foó, naʻe hili hono nimá ʻi ha fokotuʻunga kāmeni, naʻá ne māpuhoi mo pehē, “Ko e hā hono ʻaongá?” Naʻá ne ongoʻi ha fakapapauʻi ange ʻe ha leʻo ongoʻingofua ʻo pehē, “Ko hoʻo fuakavá mo au.”
Naʻe taʻu ʻe 50 ʻa e fakaʻānaua ʻe ha fefine ʻe taha ha vā fetuʻutaki mo ʻene tamaí. ʻOkú ne pehē, “ʻI heʻeku tupu haké, naʻe feohi maʻu pē hoku ngaahi tuongaʻané mo ʻeku tamaí, kae ʻikai ko au—ko e ʻofefine pē ʻe toko tahá. Ko e meʻa pē naʻá ku fiemaʻú ke u ʻlelei feʻunga’ ke laukau ʻaki au heʻeku tamaí.
“Pea naʻe mālōlō ʻeku faʻeé! Ko ia pē naʻá ku faʻa fetuʻutaki ai ki heʻeku tamaí.
Naʻe pehē ʻe he fefiné, “ʻI ha ʻaho ʻe taha naʻá ku ongona ai ha leʻo ne pehē mai, ʻFakaafeʻi hoʻo tamaí ke mo ō ki he temipalé.’ Naʻe hoko ia ko e kamataʻanga ʻo ha ʻekitivitī tuʻo ua he māhina mo ʻeku tamaí ki he fale ʻo e ʻEikí. Naʻá ku talaange ki heʻeku tamaí ʻoku ou ʻofa ʻiate ia. Naʻá ne talamai ʻokú ne ʻofa foki ʻiate au.
“Kuo hoko hono fakaʻaongaʻi homa taimí ʻi he fale ʻo e ʻEikí ke fakaleleiʻi ai homa vaá. Naʻe ʻikai lava ʻeku faʻeé ʻo tokoniʻi kimaua ʻi māmani. Naʻá ne toki ʻalu ki he tafaʻaki ʻe taha ʻo e veilí ʻo tokoni mei ai ke fakaleleiʻi e meʻa ne maumaú. Naʻe fakakakato ʻe he temipalé ʻemau feinga ke fakalelei ko ha fāmili taʻengatá.”
ʻOku pehē ʻe he tamaí, “Naʻe hoko e fakatapui ʻo e temipalé ko ha aʻusia fakalaumālie maʻongoʻonga ia kiate au mo hoku ʻofefine pē ʻe toko tahá. ʻI he taimi ní ʻokú ma ʻalu fakataha ki ai ʻo ongoʻi hono fakamālohia ʻema ʻofá.”
Ko e māʻoniʻoni ki he ʻEikí ʻi he moʻui fakaʻahó ʻoku kau ai ʻa e ngaahi momeniti ongoʻingofua ʻi he taimi ʻoku mālōlō ai ha taha ʻokú te ʻofa aí. ʻI he konga kimuʻa ʻo e taʻu ní, naʻe mālōlō ai siʻeku faʻē fita ko Siini Kongó ʻi ha ngaahi ʻaho siʻi pē kimuʻa pea hokosia hono taʻu 98.
Kapau te ke fehuʻi ki heʻeku faʻeé, “Te ke fie kai he ʻaisikilimi sokoleti nati masimēloú, sinisā sokoleti huʻakaú, pe situloapelí?” ʻE pehē mai ʻe he Fineʻeikí, “ʻIo kātaki, ʻe lava pē ke u ʻahiʻahiʻi kotoa kinautolu?” Ko hai ia ʻe lava ʻo tali ʻikai ki heʻete faʻeé, tautautefito ki heʻene saiʻia ʻi he ngaahi aʻusia kotoa pē ʻo e moʻuí?
Naʻe tuʻo taha ʻeku ʻeke ange kia Mami pe ko e hā e ngaahi fili naʻá ne tākiekina lahi taha ʻene moʻuí.
Naʻá ne pehē mai, “Ko hono papitaiso au ke hoko ko ha mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní pea mo e hiki mai mei Hauaiʻi ki fonua lahi, ʻo u fetaulaki ai mo hoʻo tamaí.”
Naʻe papitaiso ʻeku faʻeé ʻi hono taʻu 15, ko e mēmipa pē ia ʻe toko taha ʻi hono fāmili tokolahí ke kau mai ki hotau Siasí, naʻá ne maʻu ha tui ki he fuakavá mo falala ki he ʻEikí ʻo tāpuekina ai ʻene moʻuí mo e toʻu tangata kotoa homau fāmilí. ʻOku ou ʻofa ki heʻeku faʻeé, ʻo hangē pē ko hoʻomou ʻofa ki he kau mēmipa ʻo homou fāmilí. Ka ʻoku ou ʻiloʻi ʻoku ʻikai ke mole ʻaupito ʻeku faʻeé. ʻOku ʻikai pē ke ne ʻi heni he taimí ni. ʻOku ou fakaʻapaʻapa kiate ia mo e tokotaha kotoa pē kuo mālōlō ko ha kau faʻifaʻitakiʻanga loto-toʻa ʻo e māʻoniʻoni fakaʻaho ki he ʻEikí.
ʻIo, ʻoku kau ʻi he māʻoniʻoni ki he ʻEikí ʻi he moʻui fakaʻahó ʻa e haʻu maʻu pē ki he ʻEikí ʻi Hono fale māʻoniʻoní. ʻOku moʻoni ʻeni ʻo tatau ai pē pe ko e mēmipa pe kaungāmeʻa kitautolu ʻo e Siasí.
Naʻe omi ha kaungāmeʻa ʻe toko tolu ki he ʻoupeni hausi ʻo e Temipale Bangkok Thailand.
Naʻe pehē ʻe he tokotaha, “Ko ha feituʻu ʻeni ʻo e fakamoʻui fakamātoato.”
Naʻe pehē ʻe ha taha ʻi he faiʻanga papitaisó, “Ko e taimi ʻoku ou ʻi heni aí, ʻoku ou loto ke fakamaʻa au ke ʻoua naʻá ku toe faiangahala.”
Naʻe pehē ʻe he fika tolú, “ʻOkú ke lava ʻo ongoʻi ʻa e mālohi fakalaumālié?”
ʻOku fakaʻaongaʻi ʻe heʻetau ngaahi temipalé ha foʻi lea toputapu ʻe hongofulu ke fakaafeʻi mo talaki ʻo pehē:
“Māʻoniʻoni ki he ʻEikí.
ʻOku hanga ʻe he māʻoniʻoni ki he ʻEikí ʻo ʻai ke toputapu ʻa e moʻui fakaʻahó. ʻOkú ne tohoakiʻi kitautolu ke tau vāofi ange pea fiefia ange mo e ʻEikí pea mo e niʻihi kehé pea ʻokú ne teuteuʻi kitautolu ke tau nofo mo e ʻOtua ko ʻetau Tamaí, Sīsū Kalaisi, pea mo hotau ngaahi ʻofaʻangá.
Mahalo te ke fifili pe ʻoku ʻofa nai hoʻo Tamai Hēvaní ʻiate koe, ʻo hangē ko ia naʻe ongoʻi ʻe hoku kaungāmeʻá. Ko e tali leʻolahi mo pau ki aí, ko e ʻio! Te tau lava ʻo ongoʻi ʻEne ʻofá ʻi heʻetau ʻai ʻa e māʻoniʻoni ki he ʻEikí ke ʻotautolu ia ʻi he ʻaho takitaha, ke fakafiefia pea taʻengata. ʻOfa ke tau fakahoko ia, pea ʻoku ou fai ʻeni ʻi he huafa toputapu ʻo Sīsū Kalaisí, ʻēmeni.