Ngaahi Ongoongo ʻo e Siasí

Fakafiefiaʻi ʻe Palesiteni Nalesoni ʻa e Hoko hono Taʻu 100

Naʻe kau fakataha ʻa e kau taki ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní mo e fāmilí mo e ngaahi kaungāmeʻá ʻi he ʻaho 9 ʻo Sepitema 2024, ke fakalāngilangiʻi ʻa e palōfita mo e Palesiteni ʻo e Siasí ko Lāsolo M. Nalesoní ʻi he hokosia hono taʻu 100.

Naʻe fakahoko ʻa e polokalamá ʻi Sōleki Siti pea naʻe fakamafola ia ʻi he funga ʻo e māmaní. Naʻe kau ai ha hiva, ngaahi lea fakaʻapaʻapa ʻi ha vitiō mei ha kau taki fakalotu kehekehe, ngaahi lea mei he kau taki ʻo e Siasí mo e kau mēmipa ʻo e fāmili ʻo Palesiteni Nalesoní, mo ha ngaahi vitiō mei he kāingalotu ʻo e Siasí ʻoku nau vahevahe ʻa e founga naʻa nau ngāue fakaetauhi ai ki he toko tahá.

Naʻe fakamālō ʻa Palesiteni Nalesoni ki he fāmilí, ngaahi kaungāmeʻá, mo e Kāingalotu ʻo e Siasí ʻi heʻenau angaʻofá mo e poupoú. Naʻá ne vahevahe ʻene houngaʻia ʻi he ngaahi pōpoaki taʻefaʻalaua ki hono ʻahó pea mo e tali fakaemāmani lahi ki heʻene fakaafe “99+1”, ʻa ia naʻá ne tapou ai ki he kakaí “ke nau ala atu ʻo tokoniʻi ʻa e ʻtoko taha’ ʻi heʻetau moʻuí ʻa ia ʻoku nau ongoʻi hē pe tuenoá” (Facebook, June 1, 2024, facebook.com/russell.m.nelson).

Naʻe fakamamafaʻi ʻe he palōfitá ʻa e mahuʻinga ʻo e tuí, ko ha fakakaukau taʻengata ki he moʻuí, pea mo e feilaulau fakalelei ʻa Sīsū Kalaisí. Naʻe pehē ʻe Palesiteni Nalesoni, “Siʻoku kāinga ʻofeina, ʻoku ʻikai tatau ʻa e mahuʻinga ʻo e lōloa hoʻo moʻuí mo e faʻahinga moʻui ʻokú ke maʻú. Kiate kitautolu takitaha, naʻa mo ha tangata taʻu 100, ʻoku vave pē ʻa e moʻuí. Ko ʻeku lotú ia ke mou tuku ke lāngilangiʻia ʻa e ʻOtuá ʻi hoʻomou moʻuí. Fakahoko ha ngaahi fuakava mo Ia. Nofo ʻi he hala ʻo e fuakavá. Teuteu ke toe foki ʻo nofo fakataha mo Ia.”

Naʻe vahevahe ʻe Palesiteni Tāleni H. ʻOakesi mo Henelī B. ʻAealingi, ko e ongo tokoni ʻo Palesiteni Nalesoni ʻi he Kau Palesitenisī ʻUluakí, ʻa ʻena ngaahi fakakaukau mei heʻena ngāue fakataha ʻi ha taʻu ʻe ono mo e konga mo e palōfitá. Naʻá na fakamamafaʻi ʻa e māfana, fakaʻapaʻapa ki he niʻihi kehé, mo e ʻulungaanga faka-Kalaisi ʻa Palesiteni Nalesoní.

Naʻe pehē ʻe Palesiteni ʻOakesi, “Ko e kau fakataha mo Palesiteni Nalesoni ʻi ha loki pe ʻi ha fakataha pe ʻi ha fepōtalanoaʻaki, ʻokú ne ʻomi ai ʻa e faingamālie ke te aʻusia ʻa e meʻa te te aʻusia mo e Fakamoʻuí. Ko e fakafofonga ia ʻo e Fakamoʻuí. Pea ko ia hotau faʻifaʻitakiʻangá.”