Ko Hono Akoʻi, Ako, mo Fakaʻaongaʻi e Ngaahi Pōpoaki mei he Konifelenisi Lahí

ʻOku fakahoko ʻe he ngaahi kōlomu ʻo e kaumātuʻá mo e Fineʻofá ha fatongia mahuʻinga ʻi he ngāue ʻo e fakamoʻuí mo e hakeakiʻí. ʻI heʻenau ngaahi fakataha ʻi he Sāpaté, ʻoku nau aleaʻi ʻa e founga ke fakaʻaongaʻi ai e ngaahi akonaki ʻi he ngaahi pōpoaki ʻo e konifelenisi lahi fakamuimuitahá ʻi honau ngaahi fatongia ʻi he ngāué ni. ʻOku fili ʻe he kau palesitenisī ʻo e kōlomu ʻo e kaumātuʻá mo e Fineʻofá ha pōpoaki konifelenisi ke nau ako mei ai ʻi he fakatahaʻanga ʻo e Sāpate takitaha, ʻo fakatatau mo e ngaahi fiemaʻu ʻa e kāingalotú mo e fakahinohino mei he Laumālié. ʻE lava foki he taimi ʻe niʻihi ke fokotuʻu ange ʻe he pīsopé pe palesiteni fakasiteikí ha pōpoaki. ʻI hono fakakātoá, ʻoku totonu ke fili ʻe he kau takí ha ngaahi pōpoaki mei he mēmipa ʻo e Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá. Ka neongo ia, ʻe lava ke aleaʻi ha faʻahinga pōpoaki pē mei he konifelenisi lahi fakamuimuitahá.

ʻE tokanga taha e kau faiakó ki he founga ke tokoniʻi ai e kāingalotú ke fakaʻaongaʻi ʻi heʻenau moʻuí ʻa e ngaahi akonaki ʻi he ngaahi pōpoaki ʻo e konifelenisi lahí. ʻOku kumi ʻe he kau takí mo e kau faiakó ha ngaahi founga ke poupouʻi e kāingalotú ke nau tomuʻa ako e pōpoaki kuo filí kimuʻa ʻi he ngaahi fakatahaʻangá.

Ke maʻu ha fakamatala lahi ange fekauʻaki mo e ngaahi fakatahaʻanga ʻa e kōlomu kaumātuʻá mo e Fineʻofá, vakai ki he Tohi Tuʻutuʻuni Fakakātoá: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, 8.2.1.2, 9.2.1.2, ChurchofJesusChrist.org.

Teuteu ke Akoʻí

ʻE lava ke tokoni ʻa e ngaahi fehuʻi ko ʻení ki he kau faiakó ʻi heʻenau palani ko ia ke ngāue ʻaki ha pōpoaki konifelenisi lahi ke akoʻí. ʻE fealēleaʻaki e kau faiakó mo e kau palesitenisī ʻo e kōlomu ʻo e kaumātuʻá pe Fineʻofá ʻo ka fie maʻu, ʻi heʻenau fakalaulauloto ki he ngaahi fehuʻi ko ʻení.

Ko e hā naʻe fili ai ʻe he kau palesitenisī ʻo e kōlomu kaumātuʻá pe Fineʻofá ʻa e pōpoaki ko ʻení ke aleaʻí? Ko e hā ʻoku nau ʻamanaki ʻe ʻilo mo fakahoko ʻe he kāingalotú hili ʻenau aleaʻi e pōpoaki ko ʻení?
Ko e hā ʻoku loto ʻa e tokotaha leá ke mahino ki he kāingalotú? Ko e hā ha ngaahi tefitoʻi moʻoni ʻo e ongoongoleleí ʻokú ne akoʻi mai? ʻOku kaunga fēfē nai ʻa e ngaahi tefitoʻi moʻoni ko ʻení ki heʻeku kōlomu kaumātuʻá pe Fineʻofá?
Ko e hā ha ngaahi potufolofola naʻe fakaʻaongaʻi ʻe he tokotaha leá ke poupouʻi ʻaki ʻene pōpoakí? ʻOku ʻi ai nai ha ngaahi potufolofola kehe ʻe lava ke lau ʻe he kāingalotú te ne fakaloloto e meʻa ʻoku mahino kiate kitautolú? (Te ke ala maʻu ha ngaahi potufolofola ʻe niʻihi ʻi he ngaahi fakamatala ʻi he konga kimui ʻo e pōpoakí pe ʻi he Fakahinohino ki he Ngaahi Folofolá [scriptures.ChurchofJesusChrist.org].)
Ko e hā ha ngaahi fehuʻi te u lava ʻo fakahoko ʻe tokoni ki he kāingalotú ke nau fakalaulaulotoa mo fakaʻaongaʻi e ngaahi akonaki ʻi he pōpoakí? Ko e hā ha ngaahi fehuʻi ʻe tokoni kiate kinautolu ke nau ʻiloʻi ʻa e mahuʻinga ʻo e ngaahi akonakí ni ʻi heʻenau moʻuí, ʻi honau ngaahi fāmilí, pea ʻi he ngāue ʻa e ʻEikí?
Ko e hā te u lava ʻo fakahoko ke fakaafeʻi ai e Laumālié ki heʻemau fakatahá? Ko e hā te u lava ʻo fakaʻaongaʻi ke fakatupulaki ai ʻa e fealeaʻakí, kau ai ha ngaahi talanoa, talanoa fakatātā, hivá, pe ko e tā valivalí? Ko e hā naʻe fai ʻe he tokotaha leá ke tokoni ke mahino ki he kāingalotú ʻene pōpoakí?
Naʻe fai ʻe he tokotaha leá ha ngaahi fakaafe? Te u lava fēfē ʻo tokoniʻi e kau mēmipá ke nau ongoʻi ʻa e holi ke fakahoko ʻa e ngaahi fakaafe ko iá?

Ngaahi Fakakaukau ki he ʻEkitivitií

ʻOku lahi ha ngaahi founga kehekehe ʻe lava ke tokoniʻi ai ʻe he kau faiakó e kāingalotú, ke nau ako mo fakaʻaongaʻi e ngaahi pōpoaki ʻo e konifelenisi lahí. Ko ha ngaahi sīpinga ʻeni ʻe niʻihi; ʻe lava ke maʻu ʻe he kau faiakó ha ngaahi fakakaukau kehe ʻe ngāue lelei ange ʻi heʻenau kōlomu kaumātuʻá pe Fineʻofá.

Fakaʻaongaʻi ʻe ngaahi moʻoní ʻi heʻetau moʻuí Fakaafeʻi e kau mēmipá ke nau toe vakaiʻi e pōpoaki ʻo e konifelenisí ʻo kumi ha ngaahi moʻoni ʻe lava ʻo tokoni ke nau ikunaʻi ai e ngāue kuo tuku ange ʻe he ʻOtuá kiate kinautolu ko e fakafoʻituitui pe ko ha kōlomu kaumātuʻa pe Fineʻofa. Hangē ko ʻení, ko e hā ʻoku tau ako ʻe lava ʻo tokoni kiate kitautolu ko e kau ngāue fakaetauhi? ko e mātuʻa? ko e kau mēmipa ngāue fakafaifekau? ʻOku tākiekina fēfē ʻe he pōpoaki ko ʻení ʻetau ngaahi fakakaukaú, ongó, mo ʻetau ngaahi ngāué?
Aleaʻi fakakulupu. Vahevahe ‘a e kau mēmipá ki ha ngaahi kulupu iiki, pea vahe ki he kulupu takitaha ha konga ʻo e pōpoaki konifelenisí ke nau lau pea aleaʻi. Hili iá pea kole ki he kulupu takitaha ke vahevahe ha moʻoni ne nau maʻu pea mo e founga ʻe ʻaonga ai kiate kinautolú. Pe te ke lava ʻo faʻu ha ngaahi kulupu ʻo ha kau mēmipa ne nau ako ha ngaahi konga kehekehe ʻo e pōpoakí pea tuku ke nau fevahevaheʻaki e meʻa ne nau maʻú.
Kumi e ngaahi tali ki he ngaahi fehuʻí. Fakaafeʻi ʻa e kau mēmipá ke nau tali e ngaahi fehuʻi fekauʻaki mo e pōpoaki ʻo e konifelenisí ʻo hangē ko ʻení: Ko e hā ha ngaahi moʻoni ʻo e ongoongoleleí ne tau maʻu ʻi he pōpoaki ko ʻení? Te tau fakaʻaongaʻi fēfē nai ʻa e ngaahi moʻoni ko ʻení? Ko e hā ha ngaahi fakaafe mo ha ngaahi tāpuaki kuo talaʻofa mai? Ko e hā ʻoku akoʻi mai ʻe he pōpoaki ko ʻení fekauʻaki mo e ngāue ʻoku finangalo ʻa e ʻOtuá ke tau fakahokó? Pe faʻu haʻo ngaahi fehuʻi pē ʻaʻau ʻokú ne poupouʻi e kāingalotú ke nau fakakaukau lahi ange ki he pōpoakí pe fakaʻaongaʻi e ngaahi moʻoni ʻokú ne akoʻí. Tuku ki he kāingalotú ke nau fili ha taha ʻo e ngaahi fehuʻi ko ʻení pea kumi e ngaahi talí ʻi he pōpoakí.
Vahevahe ha ngaahi fakamatala mei he pōpoakí. Fakaafeʻi e kau mēmipá ke vahevahe ha ngaahi fakamatala mei he pōpoaki ʻo e konifelenisí ʻa ia ʻokú ne ueʻi kinautolu ke nau fakahoko honau ngaahi fatongia ʻi he ngāue ʻo e fakamoʻuí mo e hākeakiʻí. Poupouʻi kinautolu ke nau fakakaukau ki he founga te nau lava ai ʻo vahevahe e ngaahi fakamatala ko ʻení ke tāpuekina ai ha taha, kau ai ʻakinautolu ʻoku nau ʻofa aí mo e niʻihi ʻoku nau ngāue fakaetauhi ki aí.
Vahevahe ha lēsoni fakataumuʻa. Fakaafeʻi ha kau mēmipa kimuʻa ʻi he kalasí, ke ʻomi ha meʻa mei ʻapi te nau lava ʻo fakaʻaongaʻi ke akoʻi ʻaki ʻa e pōpoaki ʻo e konifelenisí. Kole ki he kāingalotú lolotonga e kalasí ke fakamatalaʻi e founga ʻoku fekauʻaki ai e ngaahi meʻa ko iá mo e pōpoakí pea mo e fekauʻaki ʻa e pōpoakí mo ʻenau moʻuí.
Teuteuʻi ha lēsoni ke akoʻi ʻi ʻapi. Kole ki he kau mēmipá ke nau ngāue tautau-tokoua ke palani ha lēsoni efiafi fakafāmili ʻi ʻapi ʻo fakatefito ʻi he pōpoaki konifelenisí. Te nau lava ʻo tali ha ngaahi fehuʻi hangē ko ʻení: Te tau lava fēfē ʻo ʻai e pōpoakí ke fekauʻaki mo hotau ngaahi fāmilí? Te tau lava fēfē ʻo vahevahe ʻa e pōpoaki ko ʻení pea mo e kakai ʻoku tau ngāue fakaetauhi ki aí?
Vahevahe e ngaahi aʻusiá. Lau fakataha ha ngaahi fakamatala mei he pōpoaki konifelenisí. Kole ki he kau mēmipá ke nau vahevahe ha ngaahi sīpinga mei he folofolá mo ʻenau moʻuí, ʻokú ne fakahaaʻi mo fakamamafaʻi ai ʻa e tokāteline naʻe akoʻi ʻi he ngaahi fakamatala ko ʻení.
Kumi ha kupuʻi lea. Fakaafeʻi e kāingalotú ke nau fekumi ʻi he pōpoaki konifelenisí ki ha ngaahi kupuʻi lea ʻoku ʻuhingamālie kiate kinautolu. Kole ange ke nau vahevahe ʻa e ngaahi kupuʻi leá pea mo e meʻa ʻoku nau ako mei aí. Kole ange ke nau vahevahe e founga ʻoku tokoniʻi ai kinautolu ʻe he ngaahi akonaki ko ʻení ke nau fakahoko e ngāue ʻa e ʻEikí.

Ke maʻu ha ngaahi fakakaukau lahi ange ki he founga hono ako mo akoʻi e ngaahi pōpoaki ʻo e konifelenisi lahí, vakai ki he “Ideas for Learning and Teaching from General Conference.” (Lomiʻi ʻi he “Ideas for Study” ʻi lalo ʻi he “General Conference” ʻi he Gospel Library.)