ʻOku Mahinongofua e Tokāteline ʻa Sīsū Kalaisí
ʻOku ou fakamoʻoni ki he ngāue toputapu ʻo hono akoʻi e tokāteline mahinongofua ʻa Sīsū Kalaisí ki he fānau ʻa e Tamai Hēvaní.
Ko kitautolú kotoa ʻoku ʻi ai hatau fāmili ʻoku tau ʻofa ai, ʻa ia ʻoku lolotonga fakataueleʻi mo ʻahiʻahiʻi ʻe he ngaahi mālohi ngali taʻe-tūkua ʻo Sētané, ko e tokotaha fakaʻauhá, ʻa ia te ne fakamamahiʻi e kotoa e fānau ʻa e ʻOtuá. Ko hatau tokolahi, kuo taʻe-mamohe ʻi he poʻulí. Kuo tau feinga ke maluʻi siʻi kakai ʻi he tuʻunga fakatuʻutāmakí ʻaki e mālohi kotoa pē ki he leleí. Kuo tau hūfia kinautolu. Kuo tau ʻofeina kinautolu. Kuo tau tā ʻa e sīpinga lelei taha ʻoku tau lavá.
Naʻe fehangahangai e palōfita poto mei he kuonga muʻá ko ʻAlamaá, mo ha ngaahi faingataʻa tatau. Naʻe toutou ʻohofi e kakai naʻá ne tataki mo ʻofa aí ʻe ha fili anga fītaʻa, ka naʻa nau kei feinga pē ke ohi hake ha fānau angatonu ʻi ha māmani fonu angahalaʻia. Naʻe ongoʻi ʻe ʻAlamā ko e utaʻanga pē ki he ikuná ko ha mālohi ʻoku ʻikai ke tau faʻa tokangaʻi he taimi ʻe niʻihi pea faʻa siʻi ʻetau fakaʻaongaʻí. Naʻá ne tautapa ai ki he tokoni ʻa e ʻOtuá.
Naʻe ʻiloʻi ʻe ʻAlamā naʻe fiemaʻu ʻa e fakatomalá ʻe kinautolu naʻá ne tatakí, mo hono ngaahi filí, kae tokoni ʻa e ʻOtuá. Ko ia, naʻá ne fili leva ha founga kehe ki he taú.
ʻOku fakamatalaʻi pehé ni ia ʻe he Tohi ʻa Molomoná: “Pea ko ʻeni, koeʻuhi kuo hoko hono malanga ʻaki ʻo e folofolá ko ha fuʻu meʻa ke takiakiʻi ai ʻa e kakaí ke fai ʻa ia ʻoku totonú—ʻio, naʻe mālohi lahi ange ʻene ngāue ʻi he fakakaukau ʻa e kakaí ʻi he heletā, pe ko ha toe meʻa kehe, ʻa ia kuo hoko kiate kinautolu—ko ia naʻe fakakaukau ai ʻa ʻAlamā ʻoku ʻaonga ke nau ʻahiʻahiʻi ʻa e ivi ʻo e folofola ʻa e ʻOtuá.”
Ko e folofola ʻa e ʻOtuá ko e tokāteline ia naʻe akoʻi ʻe Sīsū Kalaisi mo ʻEne kau palōfitá. Naʻe ʻiloʻi ʻe ʻAlamā ʻoku ʻi ai ha ngaahi mālohi lahi ʻi he ngaahi lea ʻo e tokāteliné.
Naʻe fakahā ʻe he ʻEikí ʻi he vahe 18 ʻo e Tokāteline mo e Ngaahi Fuakavá, ʻa e makatuʻunga ʻo ʻEne tokāteliné:
“He vakai, ʻoku fekau ki he kakai kotoa pē ʻi he feituʻu kotoa pē ke nau fakatomala. …
He vakai, naʻe kātakiʻi ʻe he ʻEikí ko [homou] Huhuʻí ʻa e mate ʻi he kakanó; ko ia, naʻá ne kātakiʻi ai ʻa e mamahi ʻa e kakai kotoa pē, koeʻuhí ke lava ʻa e kakai kotoa pē ʻo fakatomala pea haʻu kiate ia.
Pea kuó ne toe tuʻu hake mei he maté, koeʻuhí ke ne lava ʻo ʻomi ʻa e kakai kotoa pē kiate ia, tuʻunga ʻi he fakatomalá.”
“Pea te [mou] fakatōmapeʻe hifo ʻo hū ki he Tamaí ʻi hoku hingoá.
… Kuo pau ke mou fakatomala ʻo papitaiso, ʻi he huafa ʻo Sīsū Kalaisí.”
“Kole ki he Tamaí ʻi hoku hingoá ʻi he tui, ʻo tui te [mou] maʻu, pea te [mou] maʻu ʻa e Laumālie Māʻoniʻoní.”
“Pea ko ʻeni, ʻo ka hili … [hoʻomou] maʻu ʻení, kuo pau ke [mou] tauhi ʻeku ngaahi fekaú ʻi he meʻa kotoa pē.”
“Toʻo kiate [kimoutolu] ʻa e huafa ʻo Kalaisí, pea lea ʻaki ʻa e moʻoní ʻi he fakamātoato.
Pea ʻilonga ʻa kinautolu kotoa pē ʻe fakatomala mo papitaiso ʻi hoku hingoá, ʻa ia ko Sīsū Kalaisí, pea kātaki ki he ngataʻangá, ʻe fakamoʻui ʻa kinautolu.”
ʻI he ngaahi potufolofola ko iá, ʻoku ʻomi ai ʻe he Fakamoʻuí kiate kitautolu ʻa e sīpinga haohaoa ʻo e founga ʻoku totonu ke tau akoʻi ʻaki ʻEne tokāteliné. Ko e tokāteline ko ʻení ʻa e tui ki he ʻEiki ko Sīsū Kalaisí, fakatomalá, papitaisó, maʻu e meʻafoaki ʻo e Laumālie Māʻoniʻoní, mo e kātaki ki he ngataʻangá, ʻokú ne tāpuekina e fānau kotoa ʻa e ʻOtuá.
ʻI heʻetau akoʻi e ngaahi tefitoʻi moʻoni ko ʻení ki he niʻihi ʻoku tau ʻofa aí, ʻe tokoni e Laumālie Māʻoniʻoní ke tau ʻilo e moʻoní. Koeʻuhí ko ʻetau fiemaʻu e ngaahi ueʻi ʻa e Laumālie Māʻoniʻoní, kuo pau ke tau fakaʻehiʻehi mei he fakamahamahaló pe fakaʻuhinga fakataautaha ʻoku ope atu mei hono akoʻi ʻo e tokāteline moʻoní.
ʻE ala faingataʻa ke fai ia ʻi he taimi ʻokú ke ʻofa ai ʻi he taha ʻokú ke feinga ke tokoniʻí. Mahalo te ne tukunoaʻi ʻa e tokāteline kuo akoʻi angé. Mahalo ʻe fakataueleʻi kitautolu ke tau ʻahiʻahiʻi ha meʻa foʻou pe fakamānako. Ka ʻe toki fakahā pē ʻe he Laumālie Māʻoniʻoní ʻa e laumālie ʻo e moʻoní ʻi heʻetau fakaalaala mo tokanga ke ʻoua naʻa tau fakalaka ʻi he akoʻi e tokāteline moʻoní. Ko e taha ʻo e ngaahi founga pau taha ke tau fakaʻehiʻehi ai mei he ofi ki he tokāteline halá, ko haʻatau fili ke faiako pē ʻi ha founga faingofua. ʻOku ʻi ai ha malu he founga faingofua ko iá, pea siʻi ai ha toe meʻa hala.
Ko hono akoʻi ʻi he founga faingofuá ʻoku tau lava ai ke vahevahe kei taimi ʻa e tokāteline fakahaofí, kae kei hao ʻa e fānaú mei he ngaahi ʻahiʻahi ʻa e tēvoló te nau fepaki mo ia ʻamuí, kimuʻa ʻaupito ia pea kāsia e ngaahi moʻoni ʻoku fiemaʻu ke nau ʻiló ʻe he vātau ʻa e mītia fakasōsialé, anga fakatamaikí, mo ʻenau ngaahi fefaʻuhi fakafoʻituituí. ʻOku totonu ke tau puke ʻa e faingamālie kotoa ke vahevahe e ngaahi akonaki ʻa Sīsū Kalaisí mo e fānaú. ʻOku pelepelengesi e ngaahi momeniti akoʻi ko ʻení mo siʻi ange ʻi hono fakafehoanaki atu ki he feinga taʻetūkua ʻa e ʻū mālohi fakafepakí. Ko e houa kotoa pē ʻoku fakaʻaongaʻi ke fakatōkakano ai ki he moʻui ʻa ha fānau ʻa e tokāteliné, ʻoku taʻe-faʻalaua e ngaahi houa fakafepakí, fonu ʻi he ngaahi pōpoaki mo e ngaahi ʻīmisi te nau poleʻi pe siʻaki ai e ngaahi moʻoni fakamoʻui ko ʻení.
ʻE ala fifili hamou niʻihi naʻa lelei ange ke mou ofi pē ki hoʻomou fānaú ʻi haʻamou feohi fiefia, pe te mou fehuʻia pe kuo kamata ongoʻi mafasia nai ʻa e fānaú ʻi hoʻomou ngaahi akonakí. Ka ʻoku totonu ke tau fakakaukau,“ʻI he siʻi fau ʻa e taimí mo e faingamālié, ko e hā ha pōpoaki ʻo e tokāteliné te u lava ʻo vahevahe ke ne fakaivia kinautolu ʻi hono poleʻi hangatonu ʻo ʻenau tuí?” Mahalo ko e ngaahi pōpoaki te ke vahevahe he ʻaho ní, ko ia pē te nau manatuʻí, pea ʻoku fakangatangata pē hotau taimí.
Kuó u tanganeʻia maʻu pē ʻi he līʻoa ʻa Mele Pōmeli ko ʻeku kuifefine hono uá, ki hono vahevahe e tokāteline ʻa Sīsū Kalaisí. Naʻe akoʻi hono fāmilí ʻe he kau faifekaú ʻi Suisalani ʻi hono taʻu 24.
Hili hono papitaiso iá, naʻe loto ʻa Mele ke kau fakataha mo e Kāingalotu ʻi ʻAmeliká, ko ia ai naʻá ne folau mai mei Suisalani ki Pealini ʻo fakangāueʻi ai ʻe ha fefine ke ne lalanga e tupenu ki he vala ʻo e fāmilí. Naʻe nofo ʻa Mele ʻi he loki ʻo e kaunanga tauhi ʻapí peá ne fokotuʻu ʻene mīsini lalangá ʻi he lotofale ʻo e ʻapí.
Naʻe taʻefakalao he taimi ko iá ke akoʻi e tokāteline ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻi Pealini. Ka naʻe ʻilo ʻe Mele he ʻikai ke ne kei lava ʻo taʻofi ʻene vahevahe ʻa e meʻa kuó ne akó. Naʻe faʻa haʻo takai e fefine ʻo e ʻapí mo hono ngaahi kaungāmeʻá ʻi he mīsini lalangá ke fanongo ki he faiako ʻa Melé. Naʻá ne fakamatala ki he hā ʻa e Tamai Hēvaní mo Sīsū Kalaisi kia Siosefa Sāmitá, ko e ʻaʻahi kiate ia ʻa e kau ʻāngeló, pea mo e Tohi ʻa Molomoná. Naʻá ne akoʻi e tokāteline ʻo e Toetuʻú ʻi heʻene manatuʻi e talanoa kia ʻAlamaá. Naʻá ne fakamoʻoniʻi ʻe lava ke toe fakatahaʻi ʻa e ngaahi fāmilí ʻi he puleʻanga fakasilesitialé.
Taimi nounou kuo fakatupu ʻe he vēkeveke ʻa Mele ke vahevahe ʻa e tokāteline ʻo e ongoongolelei kuo fakafoki maí ha palopalema. ʻIkai fuoloa kuo ʻave ʻe he kau polisí ʻa Mele ʻo tuku pōpula. ʻI heʻenau lele he halá, naʻá ne ʻeke ki he polisí ʻa e hingoa ʻo e fakamaau te ne fakamaauʻi ia he pongipongi hono hokó. Naʻá ne fakaʻekeʻeke foki fekauʻaki mo hono fāmilí pea ko ha tamai mo ha husepāniti lelei nai ia. Naʻe fakamatalaʻi ʻe he polisí ʻa e fakamāú ko ha tangata anga fakalusa.
Naʻe kole ʻe Mele ʻi he pilīsoné ha peni vahevahe mo ha ʻū laʻipepa. Naʻá ne faitohi leva he pō ko iá ki he fakamāú, ʻo fakamoʻoni ki he Toetuʻu ʻa Sīsū Kalaisí, hangē ko hono fakamatalaʻi ʻi he Tohi ʻa Molomoná, naʻá ne fakamatala ki he maama tataliʻanga ʻo e ngaahi laumālié, pea fakamatalaʻi mo e fakatomalá. Naʻá ne fokotuʻu ange ʻe fiemaʻu ʻe he fakamāú ha taimi ke fakakaukauʻi ʻene moʻuí kimuʻa ʻi he fakamaau fakaʻosí. Naʻá ne tohi ʻokú ne ʻiloʻi ʻoku lahi ha meʻa ke fakatomala ai (ʻa e fakamāú) ko ha konga lahi ʻe fakatupu loto-mamahi lahi ki hono fāmilí pea mo ia pē. ʻI he fakaʻosi ʻene tohí ʻi he pongipongi haké, naʻá ne kole ki he polisí ke ne ʻave muʻa ki he fakamāú, pea naʻe loto-lelei ki ai e polisí.
Naʻe ui kimui ʻe he fakamāú ʻa e polisí ki hono ʻōfisí. Naʻe hoko e tohi ne fai ʻe Melé ko ha fakamoʻoni taʻe-toe-fehuʻia naʻá ne akoʻi e tokāteline ʻo e ongoongolelei kuo fakafoki maí, pea ʻi heʻene fai iá, naʻe maumauʻi ai e laó. Neongo iá, ne ʻikai fuoloa kuo foki mai e polisí ki he pilīsone naʻe ʻi ai ʻa Melé. Naʻá ne fakahoko ange kuo tāmateʻi e ngaahi tukuakiʻi kotoa pē pea ʻatā ke ʻalu. Naʻe fakatupu ʻe heʻene akoʻi e tokāteline ʻo e ongoongolelei ʻo Sīsū Kalaisi kuo fakafoki maí ke fakahū pilīsone ai. Pea hanga ʻe heʻene malangaʻi e tokāteline ʻo e fakatomalá ki he fakamāú, ʻo tukuange ia mei pilīsone.
Naʻe ʻikai tuku e faiako ʻa Mele Pōmelí ʻi hono tukuange iá. Naʻe tukuʻau mai he lekooti ʻo ʻene ngaahi leá ʻa e tokāteline moʻoní, ʻi he ngaahi toʻu tangata teʻeki fanauʻí. Naʻe hoko ʻene tui ʻe lava ha tokotaha ului foʻou ʻo akoʻi e tokāteline ʻa Sīsū Kalaisí, ke fakapapauʻi ai ʻe fakamālohia hono hakó ʻi honau ngaahi faingataʻaʻiá.
ʻI heʻetau fai hotau lelei tahá ke akoʻi ʻa e niʻihi ʻoku tau ʻofa aí fekauʻaki mo e tokāteline ʻa Sīsū Kalaisí, ʻe kei ʻi ai pē ha niʻihi he ʻikai ke nau tali. ʻE ala hū mai ʻa e veiveiuá ki hoʻo fakakaukaú. Mahalo pē te ke fehuʻia pe ʻoku feʻunga nai hoʻo ʻilo ki he tokāteline ʻa e Fakamoʻuí ke ke akoʻi lelei ia. Pea kapau kuó ke ʻosi feinga ke akoʻi ia, mahalo te ke fifili pe ko e hā ʻoku ʻikai ke hāsino ai ha ngaahi ola leleí. ʻOua naʻá ke fakavaivai ki he ngaahi veiveiua ko iá. Kolea e tokoni ʻa e ʻOtuá.
“ʻIo, pea tangi ki he ʻOtuá ke maʻu ho tauhi kotoa pē; … tuku ke fai ki he ʻEikí ʻa e ʻofa ʻa ho lotó ʻo taʻengata.”
“Pea ko ʻeni ko hoku lotó ke mou loto-fakatōkilalo, mo anganofo mo angavaivai; pea akoʻingofua; pea mohu ʻi he kātaki mo e faʻa kātaki fuoloa; pea anga-fakapotopoto ʻi he meʻa kotoa pē; pea faivelenga maʻu ai pē ʻi he tauhi ʻo e ngaahi fekau ʻa e ʻOtuá; pea kole ʻa e meʻa kotoa pē ʻoku ʻaonga ke mou maʻú, ko e meʻa fakalaumālie mo e meʻa fakatuʻasino fakatouʻosi; pea fakafetaʻi maʻu ai pē ki he ʻOtuá koeʻuhi ko e meʻa kotoa pē ʻoku mou maʻú.”
Kapau te ke lotu, kapau te ke fakataufolofola ki he ʻOtuá, pea kapau te ke kolea ʻEne tokoní maʻa ha taha ʻokú ke ʻofa ai, pea kapau te ke fakafetaʻi kiate Ia ʻo ʻikai ngata pē koeʻuhí ko ʻEne tokoní ka ko e faʻa kātaki mo e angavaivai ʻoku maʻu ko ē ʻi he ʻikai maʻu ʻa e meʻa kotoa ʻokú ke fiemaʻú ʻi he taimi pē ko iá pe mahalo he ʻikai teitei maʻú, ʻoku ou palōmesi atu te ke ofi ange kiate Ia. Te ke faivelenga mo kātaki fuoloa. Pea te ke lava leva ʻo ʻiloʻi kuó ke fai ʻa e meʻa kotoa ʻokú ke lavá ke tokoniʻi kinautolu ʻokú ke ʻofa aí mo e niʻihi ʻokú ke lotua ke fakahaofi ʻi he feinga ʻa Sētane ke fakaheeʻi kinautolú.
“Ka ko kinautolu ʻoku tatali ki [he ʻEikí] ʻe fakafoʻou honau mālohí; te nau puna hake ʻaki ʻa e kapakau ʻo hangē ko e fanga ʻīkalé; te nau lele kae ʻikai vaivai; pea te nau ʻeveʻeva kae ʻikai pongia.”
Te ke lava ʻo maʻu e ʻamanaki leleí ʻi he lekooti fakafolofola kau ki he ngaahi fāmilí. ʻOku tau lau fekauʻaki mo e niʻihi naʻa nau fakasītuʻaʻi ʻa e meʻa ne akoʻi kiate kinautolú pe naʻa nau fāinga mo e ʻOtuá ke maʻu ha fakamolemolé, hangē ko ʻAlamā ko e Siʻí, ko e ngaahi foha ʻo Mōsaiá, mo ʻĪnosí. ʻI he ngaahi momeniti ʻo ʻenau faingataʻaʻiá, naʻa nau manatuʻi e ngaahi lea ʻa ʻenau mātuʻá, ʻa e ngaahi lea ʻo e tokāteline ʻa Sisū Kalaisí. Naʻe fakahaofi kinautolu ʻi heʻenau manatú. ʻE manatua hoʻo akoʻi ʻa e tokāteline toputapu ko iá.
ʻOku ou fakamoʻoni ki he ngāue toputapu ʻo hono akoʻi ki he fānau ʻa e Tamai Hēvaní ʻa e tokāteline mahinongofua ʻa Sīsū Kalaisí, ʻa ia ʻokú ne fakamaʻa fakalaumālie kitautolu pea iku tali ki he ʻao ʻo e ʻOtuá, ke tau nofo mo Ia mo Hono ʻAló ʻi he nāunau ʻo taʻengata ʻi he ngaahi fāmilí. ʻI he huafa ʻo Sīsū Kalaisí, ʻēmeni.