ʻE Toe Hāʻele Mai ʻa e ʻEiki ko Sīsū Kalaisí
Ko e taimi ʻeni kiate koe mo au ke ta teuteu ki he Hāʻele ʻAnga Ua Mai ʻa hotau ʻEikí mo e Fakamoʻui ko Sīsū Kalaisí.
Siʻoku kāinga ʻofeina, ʻoku ou fakafetaʻi kuo tāpuekina au ʻe he ʻEikí ke u lea atu kiate kimoutolu.
Kuo folofola mai ʻa e ʻEikí kiate kitautolu ʻi he konifelenisi ko ʻení ʻo fakafou mai ʻi Heʻene kau tamaioʻeikí. ʻOku ou tapou atu ke mou ako ʻenau ngaahi pōpoakí. Fakaʻaongaʻi ia ko ha sivi taupotu ʻo e meʻa ʻoku moʻoní mo ia ʻoku ʻikaí ʻi he lolotonga ʻo e māhina ʻe ono ka hokó.
Kuo mei lava ha taʻu ʻe nima ʻa hono fakatolonga mo e fakaleleiʻi ʻo e Temipale Sōlekí mo e ngaahi feituʻu takai ʻi he Temipale Sikueá. Ko e fakafuofua lolotongá ʻe ʻosi ʻa e ngāué ni ʻi he fakaʻosinga ʻo e 2026. ʻOku tau houngaʻia ʻiate kinautolu kotoa ʻoku ngāue ʻi he ngāue kāfakafá ni.
Lolotonga ʻa e māhina ʻe ono kuohilí, naʻa tau fakatapui pe toe fakatapui ai ha temipale ʻe hiva ʻi ha fonua ʻe nima. Mei he taimí ni ki he fakaʻosinga ʻo e taʻú, te tau fakatapui ai ha nima kehe.
ʻOku mau fiefia ʻi he ʻahó ni ke fanongonongo atu ha ngaahi palani ke langa ha toe temipale ʻe 17. Kātaki ʻo fakafanongo ʻi he ʻaʻapa ʻi heʻeku fakahā atu ʻa e ngaahi feituʻú.
-
Juchitán de Zaragoza, Mexico
-
Santa Ana, El Salvador
-
Medellín, Colombia
-
Santiago, Dominican Republic
-
Puerto Montt, Chile
-
Dublin, Ireland
-
Milan, Italy
-
Abuja, Nigeria
-
Kampala, Uganda
-
Maputo, Mozambique
-
Coeur d’Alene, Idaho
-
Queen Creek, Arizona
-
El Paso, Texas
-
Huntsville, Alabama
-
Milwaukee, Wisconsin
-
Summit, New Jersey
-
Price, Utah
Siʻoku kāinga ʻofeina, ʻoku mou fakatokangaʻi nai ʻa e meʻa ʻoku hoko ʻi hotau ʻaó? ʻOku ou lotua he ʻikai ke tau taʻe-fakatokangaʻi ʻa e maʻongoʻonga ʻo e momeniti ko ʻení! ʻOku fakavaveʻi moʻoni ʻe he ʻEikí ʻEne ngāué.
Ko e hā ʻoku tau langa vave pehē ai ʻa e ngaahi temipalé? Ko e hā hono ʻuhingá? Koeʻuhí he kuo fakahinohinoʻi kitautolu ʻe he ʻEikí ke tau fai ia. ʻOku tokoni ʻa e ngaahi tāpuaki ʻo e temipalé ke tānaki ʻa ʻIsileli ʻi he ongo tafaʻaki fakatouʻosi ʻo e veilí. ʻOku toe tokoni foki ʻa e ngaahi tāpuakí ni ke teuteu ha kakai te nau tokoni ʻo teuteu ʻa māmani ki he Hāʻele ʻAnga Ua Mai ʻa e ʻEikí!
Hangē ko e kikiteʻi ʻe he palōfita ko ʻĪsaiá, mo fakamanatua ʻe he ʻanitema ʻa Haniteli ko e Mīsaiá, ʻi he liuaki mai ʻa Sīsū Kalaisí, “ʻe fakahā ʻa e nāunau ʻo e ʻEikí, pea ʻe mamata ki ai ʻa e kakai kotoa.”
ʻI he ʻaho ko iá “ʻe ʻi hono umá ʻa e pulé: pea ʻe ui ʻa hono huafá ko Fakaofo, ko Akonaki, ko e ʻOtua Māfimafi, ko e Tamai Taʻengata, ko e ʻEiki ʻo e Melinó.”
ʻE pule ʻa Sīsū Kalaisi ki Selusalema motuʻa mo Selusalema Foʻou fakatouʻosi, ʻa ia ʻe “langa ʻi he konitinēniti ʻAmeliká.” Te Ne puleʻi mei he ongo senitā ko ʻení ʻa e ngaahi meʻa ʻo Hono Siasí.
ʻE ui ʻa e ʻEikí ʻi he ʻaho ko iá ko e “Tuʻi ʻo e Ngaahi Tuʻi, mo e ʻEiki ʻo e Ngaahi ʻEiki.” Ko kinautolu ʻoku ʻiate Iá, ʻe “ui, mo fili, mo angatonu.”
Kāinga, ko e taimi ʻeni kiate koe mo au ke ta teuteu ki he Hāʻele ʻAnga Ua Mai ʻa hotau ʻEikí mo e Fakamoʻui ko Sīsū Kalaisí. Ko e taimi ʻeni ke tau ʻai ai hotau tuʻunga fakaākongá ke mahuʻinga taha kiate kitautolú. Te ta lava fēfē ʻo fakahoko ʻeni ʻi ha māmani fonu ʻi he fakafihí?
ʻE lava ʻo tokoni mai ʻa e toutou moihū ʻi he temipalé. ʻI he fale ʻo e ʻEikí, ʻoku tau tokanga pē kia Sīsū Kalaisi. ʻOku tau ako ʻiate Ia. ʻOku tau fuakava ke muimui kiate Ia. ʻOku tau ʻiloʻi ai Ia. Pea ʻi heʻetau tauhi ʻetau ngaahi fuakava fakatemipalé, ʻoku tau maʻu ai ha faingamālie lahi ange ki he mālohi fakaivia ʻo e ʻEikí. ʻOku tau maʻu ʻi he temipalé ha maluʻi mei he ngaahi fakatanga ʻo e māmaní. ʻOku tau aʻusia lahi ange ʻa e ʻofa haoahoa ʻa Sīsū Kalaisi mo ʻetau Tamai Hēvaní! ʻOku tau ongoʻi ha nonga mo ha fakamahino fakalaumālie, ʻo kehe ia mei he taʻe-manonga ʻo e māmaní.
Ko ʻeku palōmesi ʻeni kiate koé: Ko e taha kotoa pē ʻoku kumi fakamātoato kia Sīsū Kalaisí, te ne maʻu Ia ʻi he temipalé. Te ke ongoʻi ʻEne ʻaloʻofá. Te ke maʻu ʻa e tali ki hoʻo ngaahi fehuʻi fihi tahá. ʻE mahino lelei ange kiate koe ʻa e fiefia ʻi Heʻene ongoongoleleí.
Kuó u ako ko e fehuʻi mahuʻinga taha ʻeni kuo pau ke tau takitaha talí: Ko hai pe ko e hā ʻa e meʻa te u foaki ki ai ʻeku moʻuí?
Ko ʻeku fili ko ia ke muimui ʻia Sīsū Kalaisí ko e fili mahuʻinga taha ia kuó u faí. Naʻá ku maʻu ha fakamoʻoni ki he fakalangi ʻo e ʻOtua ko e Tamaí mo Hono ʻAlo ko Sīsū Kalaisí, ʻi he lolotonga ʻeku ako fakafaitoʻó. Talu mei ai kuo hoko hotau Fakamoʻuí ko e maka naʻá ku langa ai ʻeku moʻuí. Kuo fakahoko ʻe he fili ko iá ʻa e faikehekehé! Kuo ʻai ʻe he fili ko iá ke faingofua ange ha ngaahi fili lahi kehe. Kuo ʻomai ʻe he fili ko iá kiate au ha taumuʻa mo ha fakahinohino. Kuó ne toe tokoniʻi foki au ke u matuʻuaki ʻa e ngaahi matangi ʻo e moʻuí. Tuku ke u vahevahe atu ha sīpinga ʻe ua:
ʻUluakí, ko e taimi naʻe siʻi mālōlō fakafokifā ai hoku uaifi ko Tenisoló, naʻe ʻikai ke u lava ʻo fetuʻutaki mo ha taha ʻo ʻema fānaú. Naʻá ku ʻi ai, toko taha, loto-mamahi, mo fakaʻānaua ki ha tokoni. Meʻamālié, he naʻe akoʻi au ʻe he ʻEikí ʻi Hono Laumālié, ʻa e ʻuhinga kuo ʻave ai ʻa Tenisolo ki ʻapí. Naʻe fakafiemālieʻi au ʻi he mahino ko iá. ʻI he fakalau atu ʻa e taimí, naʻá ku malava lelei ange ke fekuki mo ʻeku mamahí. Naʻá ku mali kimui ange mo hoku uaifi ʻofeina ko Uenitií. Naʻá ne hoko ko e konga mahuʻinga ʻo ʻeku sīpinga hono uá.
Naʻá ma ʻi ha fonua mamaʻo mo Uenitī ʻi ha fatongia, pea ʻai ʻe ha kau kaihaʻa fakamālohi ha meʻafana ki hoku ʻulú pea kamosi. Ka naʻe ʻikai ke pā ʻa e meʻafaná. Naʻe fakamanamanaʻi ʻema moʻuí fakatouʻosi ʻi he aʻusiá ni. Ka naʻá ku ongoʻi mo Uenitī ha nonga taʻe-veiveiua. Ko ha nonga ia “naʻe mahulu hake ʻi he mahino kotoa pē.”
Kāinga, ʻe fakafiemālieʻi mo kimoutolu foki ʻe he ʻEikí! Te Ne fakamālohia koe. Te Ne tāpuakiʻi koe ʻaki ha nonga, pea aʻu ki he taimi ʻe taulōfuʻu ai e faingataʻá.
Fakamolemole ʻo fanongo ki he talaʻofa ko ʻeni ʻa Sīsū Kalaisi kiate koé: “Te u ʻi homou nima toʻomataʻú pea ʻi homou toʻohemá, pea ʻe ʻi homou lotó ʻa hoku Laumālié, pea ʻe takatakai ʻa kimoutolu ʻe heʻeku kau ʻāngeló, ke poupouʻi hake ʻa kimoutolu.”
ʻOku ʻikai ha fakangatangata ia ʻi he ivi ʻo e Fakamoʻuí ke tokoniʻi koé. Ko Siʻene mamahi taʻe-mafakakaukaua ʻi Ketisemani mo Kalevalé, maʻau! Ko Siʻene Fakalelei taʻe-fakangatangatá, maʻau!
ʻOku ou kole atu ke tuku haʻo taimi ʻi he uike takitaha—ʻi he toenga ʻo hoʻo moʻuí—ke fakalahi hoʻo mahino ki he Fakalelei ʻa Sīsū Kalaisí. ʻOku uhu hoku mafú maʻanautolu ʻoku moʻua ʻi he faiangahalá pea ʻikai ke nau ʻilo ʻa e founga ke hao aí. ʻOku ou tēngihia kinautolu ʻoku siʻi fefaʻuhi fakalaumālie pe fuesia toko taha ha kavenga mafasia koeʻuhí ko e ʻikai mahino kiate kinautolu ʻa e meʻa naʻe fai ʻe Sīsū Kalaisi maʻanautolú.
Naʻe toʻo ʻe Sīsū Kalaisi kiate Ia ʻa hoʻo ngaahi angahalá, hoʻo ngaahi mamahí, hoʻo loto- mamahí, mo ho ngaahi vaivaí. ʻOku ʻikai ko ha meʻa pau ke ke fuesia toko taha pē kinautolu! Te Ne fakamolemoleʻi koe ʻi haʻo fakatomala. Te Ne tāpuakiʻi koe ʻaki ʻa e meʻa ʻokú ke fiemaʻú. Te Ne fakamoʻui ho laumālie kuo kafó. Ka ke umataha mo Ia, ʻe ongo maʻamaʻa ange hoʻo kavengá. Kapau te ke fakahoko mo tauhi e ngaahi fuakava ke muimui ʻia Sīsū Kalaisí, te ke fakatokangaʻi ʻoku fakataimi pē ʻa e ngaahi momeniti fakamamahi ʻo hoʻo moʻuí. Ko ho ngaahi mamahí ʻe “[folo] atu ia ʻi he fiefia ʻia Kalaisí.”
ʻOku ʻikai ke fuʻu vave pe fuʻu tōmui ke ke hoko ko ha ākonga līʻoa ʻa Sīsū Kalaisi. Pea te ke toki aʻusia kakato ai ʻa e ngaahi tāpuaki ʻo ʻEne Fakaleleí. Te ke toe lelei ange foki ʻi he tokoni ke tānaki ʻa ʻIsilelí.
Siʻoku ngaahi tokoua mo e tuofāfine ʻofeina, ʻe toe hāʻele mai ʻa Sīsū Kalaisi ki he māmaní ko e Mīsaia ʻo e nofotuʻí. Ko ia ʻoku ou kole atu ʻi he ʻahó ni ke mou toe fakatapui hoʻomou moʻuí kia Sīsū Kalaisi. ʻOku ou kole atu ke mou tokoni ʻo tānaki ʻa ʻIsileli kuo fakamoveveteʻí pea mo teuteu ʻa e māmaní ki he Hāʻele ʻAnga Ua Mai ʻa e ʻEikí. ʻOku ou kole atu ke mou lea ʻia Kalaisi, fakamoʻoni kia Kalaisi, tui kia Kalaisi, mo fiefia ʻia Kalaisi!
Haʻu kia Kalaisi pea “ʻoatu [ho] laumālié kotoa” kiate Ia. Ko e fakapulipuli ʻeni ki he moʻui fiefiá!
Siʻoku ngaahi tokoua mo e tuofāfine ʻofeina, ko e lelei tahá ʻoku teʻeki ai hoko mai, koeʻuhí he ʻe toe hāʻele mai ʻa e Fakamoʻuí! Ko e lelei tahá ʻoku teʻeki ai hoko mai koeʻuhí he ʻoku fakavaveʻi ʻe he ʻEikí ʻa ʻEne ngāué. Ko e lelei tahá ʻoku teʻeki ai hoko mai ʻi haʻatau liliu kakato hotau lotó mo ʻetau moʻuí kia Sīsū Kalaisí.
ʻOku ou fakamoʻoni ʻi he loto-fakatōkilalo ko Sīsū Kalaisí ko e ʻAlo ia ʻo e ʻOtuá. Ko ʻEne ākonga au. ʻOku ou lāngilangiʻia ke hoko ko ʻEne tamaioʻeiki. ʻI Heʻene Hāʻele ʻAnga Ua Maí, “e fakahā ʻa e nāunau ʻo [e ʻEikí], pea ʻe mamata ki ai ʻa e kakai kotoa pē.” ʻE fakafonu ʻaki ʻa e ʻaho ko iá ʻa e fiefia ʻi he kau angatonú!
ʻI he mālohi ʻo e ngaahi kī toputapu ʻo e lakanga fakataulaʻeiki ʻoku ou maʻú, ʻoku ou fakahā atu ʻa e moʻoni ko ʻení kiate kimoutolu pea mo māmani kātoa! ʻI he huafa ʻo Sīsū Kalaisí, ʻēmeni.