ʻE Tataki Kitautolu ʻe he Folofola ‘a Kalaisí mo e Laumālie Māʻoniʻoní ki he Moʻoní
ʻE tokoni hono ʻiloʻi ʻo e palani fakaofó ni ke tau ʻiloʻi ko e fānau kitautolu ʻa e ʻOtuá pea te tau lava ʻo hoko ʻo tatau mo Iá.
Ko e ʻOtuá ʻa ʻetau Tamai ʻi Hēvaní. Ko ʻEne fānau fakalaumālie kitautolu, pea naʻe ngaohi kitautolu ʻi Hono ʻīmisí. Ko ia ai, ʻi heʻetau hoko takitaha ko e fānau ʻa e ʻOtuá, ʻoku ʻi ai ha tuʻunga malava fakalangi ke tau hoko ʻo tatau mo Iá.
Naʻa tau nofo mo Ia ko e ngaahi laumālie kimuʻa pea tau toki ōmai ki māmaní. ʻOku ʻofa ʻa e Tamai Hēvaní ʻiate kitautolu, ʻi Heʻene hoko ko ʻetau mātuʻa fakalangí, mo fiemaʻu ʻa e lelei tahá maʻatautolu, pea kuo teuteu ha palani ke tau maʻu ai ʻa ʻEne ngaahi tāpuaki maʻongoʻonga tahá, ʻa ia ko e moʻui taʻe-faʻa-maté mo e moʻui taʻengatá. Fakatatau mo e palaní, ʻe foaki kiate kitautolu ko e fānau fakalaumālie, ʻa e tauʻatāina ke fili ʻa ʻEne palaní. ‘I heʻetau omi ki māmaní, te tau mavahe ai mei he ʻao ʻo e ʻOtuá, ngalo ʻetau moʻui ʻi he maama fakalaumālié, maʻu ʻa e sino ʻo e kakano mo e hui, maʻu haʻatau taukei, mo fakatupulaki ʻa e tuí. ʻI hotau sino ʻo e kakano mo e huí, ko e tangata fakakakanó, te tau moʻulaloa leva ki he ʻahiʻahí, hoko ʻo taʻemaʻa mo mamaʻo mei he ʻOtuá, pea ʻikai ke tau lava ʻo foki ki Hono ʻafioʻanga māʻoniʻoní. Kae tuʻunga ʻi he ʻofa taʻe-fakangatangata ʻa e Tamai Hēvaní kiate kitautolú, naʻá Ne fekau mai Hono ʻAlo ko Sīsū Kalaisí, ke hoko ko hotau Fakamoʻui. Naʻe hanga ʻe Sīsū Kalaisi ʻi Heʻene feilaulaú, ʻa e Fakaleleí, ʻo ʻai ke lava ʻo huhuʻi kitautolu mei heʻetau ngaahi angahalá pea toetuʻu mo maʻu ʻa e moʻui taʻengatá.
ʻOku ou mātuʻaki houngaʻia ʻi he ngaahi moʻoni nāunauʻiá ni—ʻa ē ʻoku tau ui ko e palani ʻo e fakamoʻui ʻa e Tamaí, ko ʻEne palani ʻaloʻofá, pe ko ʻEne palani lahi ʻo e fiefiá. Kuo tokoniʻi au ʻe he ngaahi moʻoni mahuʻingá ni ke u ʻiloʻi hoku tuʻunga moʻoní pea mo e ngaahi tāpuaki maʻongoʻonga ʻo e hakeakiʻí mo e moʻui taʻengatá kuo teuteu ʻe he ʻOtuá maʻatautolú. Naʻe akoʻi mai ʻe he palōfita ko Nīfaí ʻa e foungá: “Ko ia, … keinanga ʻi he ngaahi folofola ʻa Kalaisí; he vakai, ʻe fakahā kiate kimoutolu ʻe he ngaahi folofola ʻa Kalaisí ʻa e ngaahi meʻa kotoa pē ʻoku totonu ke mou faí.” Naʻá ne toe pehē, “Kapau te mou hū ʻi he halá, pea maʻu ʻa e Laumālie Māʻoniʻoní, te ne fakahā kiate kimoutolu ʻa e meʻa kotoa pē ʻoku totonu ke mou faí.” ʻOku ou fie vahevahe ʻi he ʻahó ni ʻa e founga kuo tokoniʻi ai au ʻe he ngaahi folofola ʻa Kalaisí mo e Laumālie Māʻoniʻoní, ke u ʻilo ʻa e ngaahi moʻoni fakanonga mahuʻingá ni ʻi hoku ngaahi taʻu ʻi he toʻu tupú.
ʻE Fakahā Kiate Kimoutolu ʻe he Ngaahi Folofola ʻa Kalaisí ʻa e Ngaahi Meʻa Kotoa pē ʻOku Totonu Ke Mou Faí
Hangē ko e fakamahino ʻe Nīfai ʻi he ʻuluaki veesi ʻo e tohi 1 Nīfaí, naʻe “fanauʻi [foki] au ʻi ha ongomātuʻa lelei.” Naʻá ku tupu hake ʻi Nakano, ʻi Siapani, ʻi ha ʻapi naʻe poupouʻi mālohi ai ʻa e faitotonú, faivelengá, mo e loto-fakatōkilaló, pea mo muimui pau ki he ngaahi ʻulungaanga fakafonua motuʻá. Ko ʻeku tamaí ko ha tangata lotu moʻoni ia. Naʻá ku mamata ki heʻene lotu ʻi muʻa ʻi he ʻesi feilaulau Sinitoó mo Putá ʻi he pongipongi mo e pō kotoa pē. Neongo naʻe ʻikai ke u ʻilo ʻa e taha naʻe lotu ki aí mo ia naʻá ne lotuá, ka naʻá ku tui ki ha faʻahinga mālohi pulipulia pe ko ha ʻOtua ʻe “māfimafi ke fakamoʻui” pe tokoni mai kapau te mau lotu fakamātoato.
Naʻá ku foua ha ngaahi faingataʻa lahi, ʻo hangē ko e toʻu tupu tokolahi kehé. Naʻá ku fekuki, mo fakakaukau naʻe taʻetotonu ʻa e moʻuí pea lahi mo e ngaahi fetōʻakí. Naʻá ku ongoʻi hē, ʻo ʻikai ha taumuʻa ʻi heʻeku moʻuí. Naʻe ngali fuonounou ʻa e moʻuí koeʻuhí he ʻe ngata ʻi he taimi te u mate aí. Naʻe fihituʻu ʻa e moʻuí ʻi hono taʻe-ʻiloʻi ʻa e palani ʻo e fakamoʻuí.
ʻIkai fuoloa mei ai, kuó u kamata ako ʻa e lea faka-Pilitāniá ʻi he ako lotolotó, pea maʻu ʻe he fānau kotoa ʻi homau ʻapiakó ha tatau ʻo e Fuakava Foʻoú. Neongo naʻe toki kamata pē ʻemau ako ʻa e lea faka-Pilitāniá, ka naʻe talamai ʻe heʻemau faiakó ʻoku totonu ke mau ako ʻa e lea faka-Pilitāniá ʻaki hano lau ia. Naʻá ku fakaava ia peá u vakaiʻi hono kanotohí. Naʻe fuʻu faingataʻa ʻa e ngaahi lea ʻi he Fuakava Foʻoú kiate au. Naʻe faingataʻa tatau pē mo e ngaahi foʻi leá ʻi he lea faka-Siapaní. Neongo ia, naʻe tohoakiʻi au ki ha lisi ʻo ha ngaahi fakamatala mo e fehuʻi ʻo e laumālié naʻe fakakau kimuʻa siʻi pē ʻi he fakamatala fakatohitapu ʻi he Tohi Tapu ʻa Kitioné—ko ha ngaahi fehuʻi fekauʻaki mo e ongoʻi tuenoá, loto-siʻí, puputuʻú, fehangahangai mo e ngaahi faingataʻa ʻo e moʻuí, mo e alā meʻa peheé. Naʻe hoko ʻi he meʻa takitaha ʻo e lisí ha fakamatala fakafekauʻaki ki ha ngaahi veesi mo e ngaahi peesi ʻi he Fuakava Foʻoú. Naʻe tohoakiʻi moʻoni au ki he kupuʻi lea “ʻI he taimi ʻokú ke ongosia aí.” Naʻe taki au ʻe he fakamatala fekauʻakí ke u fakaava ʻa e Mātiu 11:28–30, ʻa ia naʻe folofola ai ʻa Sīsū ki Heʻene kau ākongá:
“Haʻu kiate au ʻa kimoutolu kotoa pē ʻoku feinga mo mafasiá, pea te u foaki ʻa e fiemālié kiate kimoutolu.
“Toʻo ʻeku haʻamongá kiate kimoutolu, pea mou ako ʻiate au; he ʻoku ou angavaivai mo angamalū: pea te mou ʻilo ai ʻa e fiemālié ki homou laumālié.
“He ʻoku faingofua pē ʻeku haʻamongá, pea ʻoku maʻamaʻa ʻeku kavengá.”
Ko e fuofua taimi ʻeni ʻoku ou manatuʻi naʻá ku lau ai ʻa e ngaahi folofola ʻa Sīsū Kalaisí. Neongo naʻe ʻikai mahino kotoa ʻa e lea naʻá Ne folofola ʻakí, ka naʻe fakafiemālieʻi au ʻe Heʻene folofolá, hiki hake hoku laumālié, mo ʻomi kiate au ha ʻamanaki lelei. Ko e lahi ange ʻeku lau ʻEne folofolá, ko e lahi ange ia ʻeku ongoʻi ʻoku totonu ke u ʻahiʻahiʻi ʻa e lelei ʻo ʻEne folofolá. Naʻe teʻeki ke u teitei ongoʻi ha meʻa hangē ko ia naʻá ku ongoʻi ʻi he ʻaho ko iá. Naʻá ku ongoʻi naʻe ʻofaʻi au. Naʻá ku ongoʻi ko Sīsū Kalaisí ko ha tokotaha naʻá ku ʻiloʻi.
ʻI he hoko atu ʻo ʻeku akó, naʻá ku ongoʻi hangē naʻá Ne folofola fakahangatonu mai kiate aú ʻi he taimi naʻá Ne folofola ai: “ʻOku monūʻia ʻa kinautolu ʻoku fiekaia mo fieinua ki he māʻoniʻoní: he te nau fonu ai.”
Naʻe fakafonu ʻe Heʻene folofolá hoku lotó, neongo naʻe ʻikai ke u lava ʻo fakamatalaʻi lelei ʻa ʻeku ongo ʻi he taimi ko iá. Neongo naʻe moʻui ʻa Sīsū Kalaisi ʻi ha laui senituli kimuʻa ʻi ha fonua ʻoku ʻikai ke u maheni mo ia, ka naʻá ku fakakaukau te u lava ʻo falala ki Heʻene folofolá ʻaki hoku lotó kotoa. Naʻá ku fakaʻamu ʻe ʻi ai ha ʻaho ʻi he kahaʻú, te u ala ako lahi ange fekauʻaki mo Sīsū Kalaisi.
ʻE Fakahā Atu ʻe he Laumālie Māʻoniʻoní ʻa e Meʻa Kotoa ʻOku Totonu ke Mou Faí
Naʻe hoko ʻa e ʻaho ko iá ʻi ha ngaahi taʻu siʻi pē mei ai. Naʻá ku fetaulaki ai mo ha ongo faifekau kei talavou ngāue faivelenga ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Pea ʻikai fuoloa kuó u feʻiloaki mo ha kiʻi kulupu angaʻofa mo fiefia ʻo e Kāingalotú, naʻa nau feinga ke muimui kia Sīsū Kalaisi. Neongo naʻe kiʻi fuoloa peá u toki falala kakato kiate kinautolú, ka naʻe fakaʻau ʻo u fakatokangaʻi ʻi he ongoongolelei kuo fakafoki maí ʻa e meʻa naʻá ku fakaʻamua ʻi he taimi naʻá ku ako ai ʻa e Fuakava Foʻoú—ʻa e folofola ʻa Sīsū Kalaisí pea mo e ʻamanaki lelei mo e nonga ʻoku maʻu mei aí.
Ko ha aʻusia mātuʻaki toputapu ʻa e taimi naʻe akoʻi ai au ʻe he ongo faifekaú ke u lotú. Naʻá ku ako ʻoku totonu ke tau ui ʻa e ʻOtuá ʻaki Hono huafá. ʻI he taimi ʻoku tau lotu aí, ʻoku totonu ke tau lea ʻaki hotau lotó, fakahaaʻi ʻetau houngaʻiá, pea vahevahe ʻetau ngaahi ʻamanakí mo e fakaʻamú. Ko ʻene ʻosi pē ʻetau lea ʻaki ʻa e ngaahi meʻa kotoa ʻoku tau fie lea ʻakí, ʻoku tau fakaʻosi leva ʻetau lotú ʻaki ʻetau pehē, “ʻI he huafa ʻo Sīsū Kalaisi, ʻēmeni.” ʻOku tau fai ʻeni he naʻe fekauʻi kitautolu ʻe Sīsū ke tau lotu ʻi Hono huafá. Naʻe tokoni mai ʻa e lotu ki he Tamai Hēvaní ke u ʻilo pe ko hai Ia pea mo hoku vā fetuʻutaki mo Iá—ko Hono foha ʻofeina fakalaumālie au. Naʻá ku ako, koeʻuhí ʻoku ʻafioʻi mo ʻofa ʻa e Tamai Hēvaní ʻiate au, te Ne folofola fakafoʻituitui mo makehe mai kiate au, pea ʻi ha ngaahi founga ʻe mahino kiate au ʻi he Laumālie Māʻoniʻoní.
Naʻe ʻi ai ha taimi naʻe ʻikai ke u lava moʻoni ai ʻo fakatokangaʻi ʻa e Laumālie Māʻoniʻoní. Naʻe ʻikai mahino kiate au, ʻi heʻeku fakakaukau tokua ko e meʻa pē ke u faí ko e muimui ʻi he ngaahi sitepu ʻo e lotú pea ʻe hoko ha meʻa fakaofo. Lolotonga ha lēsoni ʻi ha ʻaho ʻe taha mo e ongo faifekaú, naʻá ku kiʻi mavahe ʻo mālōlō taimi nounou. Naʻá ku kei puputuʻu pe ko e hā ʻa e meʻa totonu ke u fai ʻi heʻeku moʻuí kapau naʻe moʻoni moʻoni ʻa e ongoongolelei ʻo Sīsū Kalaisí.
ʻI he ʻamanaki ke u foki ki he loki naʻe tatali ai ʻa e ongo faifekaú, naʻá ku ongoʻi ha leʻo ʻo ha taha ʻo e ongo faifekaú. Naʻá ku fanongo ki hoku hingoá. Pea ʻikai ke u fakaava ʻa e matapaá, ka u fakafanongo ki he leʻo ʻi he tafaʻaki ʻe taha ʻo e matapaá. Naʻá ku moʻutāfuʻua. Naʻá na lotu pē ki he Tamai Hēvaní. Naʻe kole ʻa e taha naʻe lotú ki he ʻOtuá ke Ne fanongoa muʻa ʻeku lotú. Neongo naʻe ʻikai lelei ʻene lea faka-Siapaní, ka naʻe fakamolū hoku lotó ʻe heʻene lotu fakamātoató. Naʻá ku fifili pe ko e hā ʻokú na tokanga lahi pehē ai kiate aú. Peá u toki ʻiloʻi ko ʻena hūfia aú ko e hoʻata ia ʻo e ʻofa ʻa e Tamai Hēvaní mo e Fakamoʻuí kiate aú. Naʻe ʻomi ʻe he ʻofa ko iá ha ʻamanaki, pea ʻi he hili iá, naʻá ku kole ki he ʻOtuá ʻi he tui mo e loto-moʻoni. ʻI heʻeku fakahoko iá, naʻá ku maʻu ha ongoʻi fiefia mo e nonga ko e fānau moʻoni au ʻa e ʻOtuá, pea ʻoku ʻi ai hoku tuʻunga malava mo ha ikuʻanga fakalangi. Naʻe tōkakano ʻa e palani ʻo e fakamoʻuí ki hoku lotó.
Kuo pehē ʻe Palesiteni Lāsolo M. Nalesoni, “ʻOku liliu ʻe he anga hoʻo fakakaukau ki hoʻo tuʻunga totonú, ʻa e meimei fili kotoa pē te ke fakahokó.” ʻOku hoko moʻoni ia ʻiate au. Naʻe hanga ʻe he fili ke muimui ki he Fakamoʻui ko Sīsū Kalaisí pea papitaiso mo maʻu ʻa e meʻafoaki ʻo e Laumālie Māʻoniʻoní, ʻo tāpuekina ʻeku moʻuí ʻo mahulu atu ʻi he meʻa naʻá ku mafakakaukauá. ʻI heʻetau hū ki he fuakava ʻo e papitaisó mo e ʻOtuá, ʻoku tau palōmesi ai ʻoku tau loto-fiemālie ke toʻo kiate kitautolu ʻa e huafa ʻo Sīsū Kalaisí, tauhi ʻa e ngaahi fekau ʻa e ʻOtuá, mo tauhi kiate Ia ʻi he toenga ʻo ʻetau moʻuí. ʻOku palōmesi mai leva ʻa ʻetau Tamai Hēvaní, te tau lava ke maʻu maʻu ai pē Hono Laumālié ʻiate kitautolu—ʻa e fakahinohino taʻetuku mei he Laumālie Māʻoniʻoní.
ʻOku ou fakaafeʻi kimoutolu ke mou tui ki he pōpoaki naʻe akoʻi mai ʻe Nīfaí—ʻe hanga ʻe he folofola ʻa Kalaisí mo e Laumālie Māʻoniʻoní ʻo fakahā kiate kimoutolu “ʻa e meʻa kotoa ʻoku totonu ke [mou] faí.” ʻA e Meʻa kotoa! Ko ha meʻaʻofa fakaʻofoʻofa ʻeni mei he ʻOtuá.
Ngaahi tokoua mo e tuofāfine, ʻoku ou houngaʻia ʻi he palani ʻo e fakamoʻui ʻa ʻetau Tamai Hēvaní. Koeʻuhí ko ʻEne ʻofa ʻiate kitautolú, naʻá Ne teuteu ai ʻa e hala ke foki ai ki Hono ʻaó ʻo fou ʻi Hono ʻAlo pē Taha naʻe Fakatupu ko Sīsū Kalaisí. ʻE tokoni hono ʻiloʻi ʻo e palani fakaofó ni ke tau ʻiloʻi ko e fānau kitautolu ʻa e ʻOtuá pea te tau lava ʻo hoko ʻo tatau mo Iá. ʻOku ou houngaʻia ʻi he foʻi moʻoni mahuʻingá ni. ʻOku ou fakamoʻoni atu ʻe tataki kitautolu ʻe he folofola ʻa Sīsū Kalaisí mo e Laumālie Māʻoniʻoní ke tau maʻu ʻa e moʻui taʻengatá. ʻOku ou ʻiloʻi ʻoku moʻoni ʻa e ngaahi meʻá ni. ʻI he huafa toputapu ʻo Sīsū Kalaisí, ʻēmeni.