ʻI Mui ʻi he Ngaahi ʻAta ʻo e Konifelenisi Lahí: Ko Hono Fokotuʻutuʻu ʻo e Senitā Konifelenisí

ʻI heʻetau sioloto atu ki he konifelenisi lahí, mahalo ʻoku tau fakakaukauloto atu ki he tuʻunga malangá mo e nofoʻanga ʻo e kau taki ʻo e Siasí ʻi muʻa ʻi he ʻū paipa ʻōkaní. Ka ʻoku ʻikai ʻasi pehē ʻa e funga siteisi ia ʻo e Senitā Konifelenisí ʻi he taʻú kakato.

ʻOku fakahoko ʻi he Senitā Konifelenisí ha ngaahi polokalama lahi ʻoku fiemaʻu ki ai ha fokotuʻutuʻu kehekehe, pea ʻoku fiemaʻu ha ngaahi houa lahi ke teuteuʻi ai ʻa e funga siteisí (ʻa ia ʻoku ui totonu ko e “rostrum”) ki he konifelenisi lahí. ʻOku ʻi ai ha timi ʻo ha kakai ʻe toko 10 ʻoku nau fakaʻaongaʻi ha uike ʻe tolu nai ke teuteuʻi ai ʻa e siteisí, feituʻu talitaliʻangá, mo e ngaahi fale kehe ʻo e Senitā Konifelenisí ke maau ke fiefia ai ʻa e kau ʻaʻahí ʻi he konifelenisi lahí.

Ko ha ngaahi moʻoniʻi meʻa mālie ʻeni:

• ʻOku faʻu ʻe ha ngaahi kongokonga lalahi ʻe 18 ʻa e funga siteisí, ʻa ia ʻoku toni ʻe 1.5–4 ʻa e konga takitaha.

• ʻOku ʻunuki ʻa e ngaahi faʻunga mamafa ko iá ʻe ha ʻū pilo ʻoku fakafonu ʻaki ʻa e ʻea ʻokú ne tekeʻi ʻi he falikí, ʻo meimei ke fakafaingofuaʻi ai hono ʻunuakiʻi holo ʻo e ʻū faʻungá.

• ʻOku toe tānaki atu foki mo ha fanga kiʻi kongokonga iiki ʻe 500 nai, hangē ko e ʻū ʻā mo e ʻū pēnolo.

• ʻOku fakaava ha fuʻu matapā fute ʻe 80 (24 m) ke lava ʻo ʻatā ʻa hono ʻunuki ke fokotuʻu ʻa e ʻū kongokonga lalahi tahá.

• ʻOku teuteuʻi foki ʻe he timi ʻoku nau fokotuʻú ha ngaahi fale maʻá e kau leʻó, kau faifekaú, mo e niʻihi ʻoku nau fakahoko ʻa e polokalamá—ʻa ia ko ha ngaahi ngāue fakakātoa ʻe 600 tupu.

Kuo tokoni ʻa Sioeli Laiti, ko e supavaisa ʻo e timí, ʻi ha konifelenisi lahi ʻe 50. ʻOkú ne ui ʻene timí ko e “kau helo ʻoku taʻeʻiloá” ʻa ia ʻoku nau fai ha ngāue fakaofo. ʻOkú ne pehē, “ʻOku ʻikai loko lahi ha fakalāngilangi ʻi hono fokotuʻutuʻu ha sea pe tēpile pe fokotuʻutuʻu ʻa e falé ke māú.” Naʻá ne pehē, ka kapau naʻe ʻikai kinautolu he ʻikai tatau ʻa e konifelenisí.

ʻOku pehē ʻe he taki ʻo e siteisí ko Pelenitoni ʻUlai ʻoku fiemaʻu ha “kakai kehekehe tokolahi mei he ngaahi taukei kehekehe mo e puipuituʻa kehekehe” ke fakahoko ʻaki ʻenau ngāué—“ke fakamafola ʻa e ʻofa ʻa e ʻEikí mo e ngaahi folofola ʻokú Ne finangalo ke vahevahe mo e taha kotoa pē.”

ʻOku pehē ʻe Pelenitoni ʻoku nau fiemaʻu ʻa e tokotaha kotoa pē ʻoku nau maʻu ʻa e ngaahi taukei kehekehe ko iá ke nau “fakatahataha mai ki ha ngāue pē ʻe taha.” Koeʻuhí ʻoku fakatefito ʻa e ngāue ko iá ʻia Sīsū Kalaisi, ʻoku ongoʻi ʻe he timi siteisí ʻokú Ne ʻi ai pea ʻoku nau mātā ʻEne ngaahi maná.

ʻOku pehe ʻe Lōpeti Simisoni, ko ha taki mo ia ʻe taha ki he siteisí: “ʻOku ou … ongoʻi hangē ʻoku hū mai ʻa e Laumālie ʻo e ʻEikí ki heʻemau ngaahi fakatahá pea ʻoku ʻi ai ke tokoniʻi kimautolu … ke fakakakato [ʻa e ngāué]. … ʻOku mau fifili ʻi he taimi ʻe niʻihi pe te mau lavaʻi fēfē kotoa ia. Ka ʻoku mau lotu ʻo kolea ʻa e tokoni ʻa ʻetau Tamai Hēvaní.”

Pea hangē ko e tānaki ʻa Sioelí: “ʻI he kātaki, ʻi he vilitaki, ʻi he hokohoko atu ʻa e ngāue mālohí, ʻoku fokotuʻutuʻu kotoa [ʻa e siteisí], ʻo maau ki he pongipongi ʻo e konifelenisi lahí.” ʻOku pehē ʻe Sioeli ʻoku “ueʻi fakalaumālie” ia koeʻuhí he ʻoku fakafou mai ʻa e ngaahi maná ʻia Sīsū Kalaisi.