Ko e Muimui ʻia Kalaisí
ʻI heʻetau hoko ko e ākonga ʻa Kalaisí, ʻoku tau akoʻi mo fakamoʻoniʻi ʻa Sīsū Kalaisi, ko hotau Faʻifaʻitakiʻanga Haohaoá. Ko ia, tau muimui muʻa ʻiate Ia ʻaki ʻetau fakaʻehiʻehi mei he fakakikihí.
ʻI he taʻú ni, kuo ueʻi fakalaumālie ha laui miliona ʻi he palani ako ʻo e ongoongoleleí ʻa ia ʻoku ʻilo ʻaki ʻa e fakaafe ʻa e Fakamoʻuí ko e “Haʻu, ʻo muimui ʻiate aú.” Ko e Muimui ʻia Kalaisí ʻoku ʻikai ko ha ngāue noa pē pe fakataimi. Ko ha tukupā hokohoko ia mo ha tōʻonga moʻui ʻoku totonu ke ne tataki kitautolu ʻi he taimi kotoa pē pea ʻi he feituʻu kotoa pē. ʻOku tofa ʻe Heʻene ngaahi akonakí mo e sīpingá ʻa e halá maʻá e ākonga kotoa pē ʻa Sīsū Kalaisi. Pea kuo fakaafeʻi ʻa e tokotaha kotoa pē ki he hala ko ʻení, he ʻokú Ne fakaafeʻi ʻa e taha kotoa ke haʻu kiate Ia, “pe ko ha ʻuliʻuli pe hinehina, pe ko ha pōpula pe tauʻatāina, pe ko ha tangata pe fefine; … ʻoku tatau ʻa e kakai fulipē ʻi he ʻao ʻo e ʻOtuá.”
I.
Ko e fuofua sitepu ʻi he muimui ʻia Kalaisí ko e talangofua ki he meʻa ʻokú Ne ui ko e “fekau … ʻi he fonó ʻoku lahí”.
“Ke ke ‘ofa ki [he ʻEiki] ko ho ‘Otuá ‘aki ho laumālié kotoa, mo ho‘o mo‘uí kotoa, mo ho lotó kotoa.
“Ko e ʻuluaki pea ko e lahi ia ʻo e fekaú.
“Pea ko hono ua ‘oku tatau mo iá, ke ke ‘ofa ki ho kaungā‘apí ‘o hangē pē ko koé.
“Ko e fekaú ni ʻe ua ʻoku tautau ai ʻa e fonó kotoa mo e kau palōfitá.”
ʻOku ʻomi ʻe he ngaahi fekau ʻa e ʻOtuá ʻa e ivi tākiekina mo taʻeueʻia ʻi heʻetau moʻuí. ʻOku hangē ʻetau ngaahi aʻusia ʻi he moʻui fakamatelié ko e fakapuna lofa ha kiʻi tamasiʻi mo ʻene tamaí ʻi ha ʻaho havili. ʻI he puna māʻolunga ange ʻa e lofá, naʻe hanga ʻe he havilí ʻo ʻai ke mālohi ange hono fusi ʻe he lofá e foʻi afo naʻe pukepuke ʻe he kiʻi tamasiʻí. ʻI he ʻikai anga e kiʻi tamasiʻí ki he mālohi ʻo e havilí, naʻá ne fokotuʻu ange ke tuʻusi ʻa e afo ʻo e lofá ke puna māʻolunga ange. Naʻe faleʻi ʻe heʻene tamai fakapotopotó ke ʻoua, ʻo fakamatalaʻi ange ko e afó ʻokú ne pukepuke ʻa e lofá mei he havili ʻi he māmaní. Kapau te na tukuange ʻa e afó, he ʻikai māʻolunga ange ʻa e puna ʻa e lofá. ʻE puhi ia ʻe he ngaahi havili ko ʻení pea faifai pē ʻo tō ki he kelekelé.
ʻOku fakafofongaʻi ʻe he afo mahuʻinga ko iá ʻa e ngaahi fuakava ʻokú ne fakafehokotaki kitautolu ki he ʻOtuá, ki heʻetau Tamai Hēvaní, mo Hono ʻAlo, ko Sīsū Kalaisí. ʻI heʻetau tauhi ʻa e ngaahi fuakava ko iá ʻaki hono tauhi ʻEna ngaahi fekaú pea muimui ʻi Heʻena palani ʻo e huhuʻí, ʻoku fakaʻatā ʻe Heʻena ngaahi tāpuaki kuo talaʻofa maí ke tau tupulaki ki ha ngaahi māʻolunga fakasilesitiale.
ʻOku tuʻo lahi hono fakahaaʻi ʻi he Tohi ʻa Molomoná ko Sīsū Kalaisi ʻa e “maama ʻo e māmaní.” Lolotonga ʻEne hā ki he kakai Nīfaí, naʻe fakamatalaʻi ʻe he ʻEiki kuo toe tuʻú ʻa e akonaki ko iá ʻaki ʻEne folofola ange: “Kuó u fokotuʻu ha sīpinga kiate kimoutolu.” “Ko au ʻa e maama ke mou hiki haké—mou fai ʻa e meʻa kuo mou mamata naʻá ku faí.” Ko Ia hotau faʻifaʻitakiʻangá. ʻOku tau ako ʻEne folofolá mo e ngāué ʻaki hono ako ʻa e ngaahi folofolá mo muimui ʻi he ngaahi akonaki fakaepalōfitá, ʻo hangē ko e enginaki mai ʻa Palesiteni Lāsolo M. Nalesoni ke tau fakahokó. ʻI he ouau ʻo e sākalamēnití, ʻoku tau fuakava ʻi he ʻaho Sāpate takitaha te tau “manatu maʻu ai pē kiate ia, mo tauhi ʻene ngaahi fekaú.”
II.
ʻI he Tohi ʻa Molomoná, naʻe foaki mai ʻe he ʻEikí ʻa e ngaahi meʻa mahuʻinga ʻi he meʻa naʻá Ne ui ko e “tokāteline ʻo Kalaisí.” ʻOku kau ki ai ʻa e tui ki he ʻEiki ko Sīsū Kalaisí, fakatomalá, papitaisó, maʻu ʻa e meʻafoaki ʻo e Laumālie Māʻoniʻoní, kātaki ki he ngataʻangá, pea hoko ʻo hangē ko ha kiʻi tamasiʻí, ʻa ia ko hono ʻuhingá ke falala ki he ʻEikí pea tali ʻa e ngaahi meʻa kotoa ʻokú Ne finangalo ke tau faí.
ʻOku faʻahinga ʻe ua ʻa e ngaahi fekau ʻa e ʻEikí: tuʻuloa, ʻo hangē ko e tokāteline ʻo Kalaisí, pea mo fakataimi. Ko e ngaahi fekau fakataimí ʻa ē ʻoku mahuʻinga ki he ngaahi fiemaʻu ʻa e Siasi ʻo e ʻEikí pe ko e kau faivelengá ʻi he ngaahi tūkunga fakataimí, ka ʻe ʻikai toe fakaʻaongaʻi ʻi he hili ʻa e kakato ʻa e fiemaʻú. Ko ha sīpinga ʻo e ngaahi fekau fakataimí ʻa e ngaahi fakahinohino ʻa e ʻEikí ki he kau fuofua takimuʻa ʻo e Siasí ke hiki ʻa e Kāingalotú mei Niu ʻIoke ki ʻOhaiō, ki Mīsuli, pea ki ʻIlinoisi pea aʻu ki hono tataki ʻo e hiki ʻa e kau paioniá ki he ʻOtu Moʻunga ʻi he Fakahihifó. Neongo naʻe fakataimi pē, ka ʻi heʻene kei ʻaongá, naʻe fiemaʻu ke talangofua ki he ngaahi fekau ko ʻení.
Naʻe ʻi ai ha ngaahi fekau tuʻuloa ʻe niʻihi naʻe fuoloa hono foaki maí pea toki tauhi ki ai ʻa e tokolahi ʻo e kāingalotú. Hangē ko e malanga ʻiloa ʻa Palesiteni Lolenisou Sinou ʻi he fono ʻo e vahehongofulú ʻo fakamamafaʻi ai ha fekau naʻe ʻomi kimuʻa ka naʻe teʻeki tauhi ʻe he kāingalotu ʻo e Siasí. Naʻe fiemaʻu hano toe fakamamafaʻi ʻi he ngaahi tūkunga naʻe fehangahangai mo e Siasí mo hono kāingalotú ʻi he ʻaho ko iá. Kuo toe fiemaʻu foki ha ngaahi sīpinga kimuí ni mai ʻo e toe fakamamafaʻí koeʻuhí ko e ngaahi tūkunga lolotonga ʻoku fehangahangai pea mo e Kāingalotú pe Siasí. ʻOku kau heni ʻa e fanongonongo ki he fāmilí ʻi hono tuku mai ʻe Palesiteni Kōtoni B. Hingikelī ʻi he toʻu tangata kuohilí, mo e ui kimuí ni mai meia Palesiteni Lāsolo M. Nalesoni ke ʻiloa ʻa e Siasí ʻaki hono hingoa naʻe fakahaaʻi mai ʻakí, ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.
III.
ʻOku toe ʻi ai ha akonaki ʻa e Fakamoʻuí ʻoku ngali fiemaʻu hano toe fakamamafaʻi ʻi hotau ngaahi tūkunga ʻi he ʻaho ní.
Ko ha taimi ʻeni ʻo e ngaahi lea kakaha mo fakalavealoto ʻi he ngaahi fetuʻutaki mo e kakaí pea ʻi he taimi ʻe niʻihi ʻi hotau ngaahi fāmilí. ʻOku faʻa iku ʻetau ngaahi faikehekehe ʻoku hā mahino ʻi he ngaahi tūkunga ki he tuʻutuʻuni fakapuleʻangá ki ha ngaahi feʻitangaki—aʻu pē ki he tāufehiʻá—ʻi he ngaahi vā fetuʻutaki mo e kakaí mo e fakatāutahá. ʻOku faʻa fakafaingataʻaʻiaʻi ʻe he ʻātakai feʻitangaki pehení ʻa e tuʻunga malava ko ia ke faʻu ha lao kau ki he ngaahi meʻa mahuʻinga ʻa ia ʻoku vakai ʻa e tokolahi taha ʻo e kakaí ʻoku fiemaʻu fakavavevave ke fai ha faʻahinga ngāue ki ai maʻá e lelei fakalūkufua ʻo e kakaí.
Ko e hā ʻoku totonu ke akoʻi mo fai ʻe he kau muimui ʻa Kalaisí ʻi he taimi ko ʻeni ʻo e ngaahi fetuʻutaki ʻoku ʻikai leleí? Ko e hā ʻEne ngaahi akonakí mo e sīpingá?
ʻOku mahuʻinga ʻa e fakakau ʻi he ngaahi tefitoʻi moʻoni ʻuluaki naʻe akoʻi ʻe Sīsū ʻi Heʻene hā ki he kau Nīfaí ke fakaʻehiʻehi mei he fakakikihí. Neongo naʻá Ne akoʻi ʻeni koeʻuhí ko ha ngaahi fakakikihi ʻi he ngaahi tokāteline ʻo e tui fakalotú, ka ko e ngaahi ʻuhinga naʻá Ne ʻomaí ʻoku mahino ʻene kaunga ki he ngaahi fetuʻutaki mo e vā fetuʻutaki ʻi he tuʻunga fakapolitikalé, tuʻutuʻuni fakapuleʻangá, mo e ngaahi vā fetuʻutaki fakafāmilí. Naʻe akonaki ʻa Sīsū:
“Ko ia ia ʻokú ne maʻu ʻa e laumālie ʻo e fakakikihí ʻoku ʻikai ʻaʻaku ia, ka ʻoku ʻo e tēvoló ia, ʻa ia ko e tamai ʻa e fakakikihí pea ʻokú ne ueʻi hake ʻa e loto ʻo e kakaí ke fefakakikihiʻaki ʻi he ʻita, ʻiate kinautolu.
“Vakai, ʻoku ʻikai ko ʻeku tokāteliné ʻeni, ke ueʻi ʻa e loto ʻo e kakaí ke feʻiteʻitani ʻiate kinautolu; ka ko ʻeku tokāteliné ʻeni ke fakangata hono fai ʻo e ngaahi meʻa peheé.”
ʻI he toenga ʻo e ngāue fakafaifekau ʻa Sīsū ʻi he lotolotonga ʻo e kakai Nīfaí, naʻá Ne akoʻi ha ngaahi fekau kehe ʻoku fehokotaki mo ʻEne taʻofi ʻa e fakakikihí. ʻOku tau ʻilo mei he Tohi Tapú naʻá Ne akoʻi taha taha ʻa e ngaahi meʻá ni ʻi Heʻene Malanga maʻongoʻonga ʻi he Moʻungá, ʻo meimei ʻi he founga lea tatau naʻá Ne fakaʻaongaʻi kimui ki he kau Nīfaí. Te u lau atu ʻa e lea faka-Tohi Tapu angamaheni ko iá:
“ʻOfa ki homou ngaahi filí, tāpuakiʻi ʻa kinautolu ʻoku kapeʻi ʻa kimoutolú, failelei kiate kinautolu ʻoku fehiʻa kiate kimoutolú, pea hūfia ʻa kinautolu ʻoku faikovi mo fakatanga kiate kimoutolú.”
Ko e taha ʻeni ʻo e ngaahi fekau ʻiloa taha ʻa Kalaisí—makehe pea faingataʻa taha ke tauhí. Ka ʻi he taimi tatau ko e konga mahuʻinga taha ia ʻo ʻEne fakaafe ki he taha kotoa ke muimui ʻiate Iá. Hangē ko ia naʻe akoʻi ʻe Palesiteni Tēvita O. Makeí, “ʻOku ʻikai mo ha toe founga lelei ange ke fakahā ʻaki ʻa e ʻofa ki he ʻOtuá ka ko hono fakahaaʻi ko ia ha ʻofa taʻesiokita ki ho kāingá.”
Ko ha akonaki mahuʻinga ʻeni ʻe taha meiate Ia ko hotau faʻifaʻitakiʻangá: “ʻOku monūʻia ʻa e faʻa fakaleleí: ʻe ui ʻa kinautolu ko e fānau ʻa e ʻOtuá.”
Kau Faʻa Fakaleleí! ʻE liliu lahi ʻa e ngaahi vā fetuʻutaki fakatāutahá kapau ʻe fakaʻehiʻehi ʻa e kau muimui ʻo Kalaisí mei he ngaahi lea kakaha mo fakalavealotó ʻi heʻenau ngaahi fetuʻutaki kotoa pē.
ʻI he konifelenisi lahí ʻi he taʻu kuo ʻosí, naʻe tuku mai ai ʻe Palesiteni Lāsolo M. Nalesoni ʻa e ngaahi polé ni:
“Ko e taha ʻo e founga faingofua taha ke ʻilo ai ha tokotaha muimui moʻoni ʻo Sīsū Kalaisí ko e manavaʻofa ʻa e tokotaha ko iá ki he kakai kehé. …
“… Ko e kau ākonga moʻoni ʻa Sīsū Kalaisí ko e kau faʻa fakalelei.
“… Ko e taha ʻo e ngaahi founga lelei taha te tau lava ʻo fakahīkihikiʻi ai ʻa e Fakamoʻuí ko ʻetau hoko ko ha tokotaha faʻa fakalelei.”
Naʻá ne aofangatuku ʻene akonakí ʻo pehē: “Ko e fakakikihí ko ha meʻa ia ke fili ki ai. Ko e faʻa fakaleleí ko ha fili. ʻOkú ke maʻu hoʻo tauʻatāina ke fili ʻa e fakakikihí pe fakaleleí. ʻOku ou tapou atu ke ke fili ke hoko ko ha tokotaha faʻa fakalelei, ʻi he taimí ni pea maʻu ai pē.”
ʻOku totonu ke kamata ʻe he kau fakafepakí ʻenau alēleá ʻaki hono tomuʻa fakahaaʻi ʻa e ngaahi meʻa ʻoku nau tui tatau aí.
Ke muimui ʻi hotau Faʻifaʻitakiʻanga Haohaoá mo ʻEne palōfitá, ʻoku fiemaʻu ke tau akoako ʻa ia ʻoku ʻiloa ko e Lao Koulá: “Ko e meʻa kotoa pē ʻoku mou loto ke fai ʻe he kakaí kiate kimoutolú, ke mou fai ia kiate kinautolu: he ko e fonó ia pea mo e kau palōfitá.” ʻOku fiemaʻu ke tau ʻofa mo fai lelei ki he taha kotoa pē. ʻOku fiemaʻu ke tau fakaʻehiʻehi mei he fakakikihí pea hoko ko e kau faʻa fakalelei ʻi heʻetau ngaahi fetuʻutaki kotoa pē. ʻOku ʻikai ʻuhinga ʻeni ke uesia ai ʻetau ngaahi tefitoʻi moʻoní mo e ngaahi meʻa mahuʻingá, ka ke taʻofi ʻa hono fakaangaʻi ʻa e niʻihi kehé koeʻuhi ko ʻenau ngaahi tefitoʻi moʻoní. Ko e meʻa ia naʻe fai ʻe hotau Faʻifaʻitakiʻanga Haohaoá ʻi Heʻene ngāue fakafaifekaú. Ko e sīpinga ia naʻá Ne fokotuʻu maʻatautolu ʻi Heʻene fakaafeʻi kitautolu ke muimui ʻiate Iá.
ʻI he konifelenisi peheni ʻi he taʻu ʻe fā kuohilí, naʻe fakahoko ai ʻe Palesiteni Nalesoni ha tukupā fakaepalōfita ki hotau kuongá:
“ʻOkú ke loto-fiemālie ke tuku ke lāngilangiʻia ʻa e ʻOtuá ʻi hoʻo moʻuí? ʻOkú ke loto-fiemālie ke tuku ke hoko ʻa e ʻOtuá ko e ivi tākiekina mahuʻinga taha ʻi hoʻo moʻuí? Te ke tuku nai ʻEne folofolá, ʻEne ngaahi fekaú, mo ʻEne ngaahi fuakavá ke ne tākiekina e meʻa ʻokú ke fai ʻi he ʻaho kotoa pē? Te ke tuku nai Hono leʻó ke muʻomuʻa taha ʻi ha toe meʻa?”
ʻI heʻetau hoko ko e ākonga ʻa Kalaisí, ʻoku tau akoʻi mo fakamoʻoniʻi ʻa Sīsū Kalaisi, ko hotau Faʻifaʻitakiʻanga Haohaoá. Ko ia, tau muimui muʻa ʻiate Ia ʻaki ʻetau fakaʻehiʻehi mei he fakakikihí. ʻI heʻetau poupou ki he ngaahi tūkunga fakapolitikale ʻoku tau kau ki aí, tau fakafeʻungaʻi muʻa kitautolu maʻa ʻEne ngaahi tāpuakí ʻaki hono fakaʻaongaʻi ʻo e ngaahi lea mo e founga ʻo ha kakai faʻa fakalelei. ʻI hotau ngaahi fāmilí mo e ngaahi vā fetuʻutaki fakataautaha kehé, tau fakaʻehiʻehi muʻa mei hono ngāue ʻaki ʻa ia ʻoku kakahá mo tāufehiʻá. Tau feinga muʻa ke māʻoniʻoni, hangē ko hotau Fakamoʻuí, ʻa ia ko Hono huafa māʻoniʻoní ʻoku ou fakamoʻoniʻi mo kolea ai ʻEne tāpuakí ke tokoniʻi kitautolu ke hoko ko ha Kau Māʻoniʻoní. ʻI he huafa ʻo Sīsū Kalaisí, ʻēmeni.