Fakafenāpasi Hotau Lotó mo Hono Finangaló
Ko e muimui ko ia ki he finangalo ʻo e ʻEikí ʻi heʻetau moʻuí te tau lava ai ʻo maʻu ʻa e mataʻitofe mahuʻinga fau ʻi he māmaní—ʻa e puleʻanga ʻo e langí.
ʻI ha tūkunga ʻe taha, naʻe folofola ai ʻa Sīsū fekauʻaki mo ha tangata fakatau naʻá ne fekumi ki ha “mataʻitofe lelei.” Lolotonga ʻa e fekumi ʻa e tangata fakataú, naʻá ne maʻu ha mataʻitofe naʻe “mahuʻinga lahi.” Ka neongo iá, ke maʻu ʻa e mataʻitofe fisifisimuʻá, naʻe pau ke fakatau atu ʻe he tangatá ni ʻene koloá kotoa, ʻa ia naʻá ne fakahoko fiefia ʻi he taimi pē ko iá.
Naʻe akoʻi lelei ʻe he Fakamoʻuí ʻi he talanoa fakatātā nounou mo fakatupu fakakaukaú ni, ʻoku fakatatau ʻa e puleʻanga ʻo e langí ki ha mataʻitofe mahuʻinga fau, ko e koloa fisifisimuʻa taha moʻoni ia ʻoku totonu ke tau holi ki aí, ʻo laka ange ʻi ha toe meʻa. ʻOku fakamahino mai ʻi hono fakatau atu ʻe he tangata fakataú ʻi he taimi pē ko iá ʻa ʻene koloá kotoa ke maʻu mai ʻa e mataʻitofe mahuʻingá, ʻoku totonu ke tau fakafenāpasi ʻetau fakakaukaú mo e ngaahi holí ki he finangalo ʻo e ʻEikí pea fakahoko loto-fiemālie ʻa e meʻa kotoa pē te tau lava lolotonga ʻetau moʻui fakamatelié ke maʻu ʻa e ngaahi tāpuaki taʻengata ʻo e puleʻanga ʻo e ʻOtuá.
Ke taau mo e pale maʻongoʻongá ni, kuo pau ke fakahoko hotau lelei tahá, fakataha mo ha ngaahi meʻa kehe, ke liʻaki ʻa e ngaahi tulifua siokitá mo siʻaki ha faʻahinga meʻa pē ʻokú ne taʻofi kitautolu mei he līʻoa kakato ki he ʻEikí mo ʻEne ngaahi founga māʻolunga mo māʻoniʻoni angé. ʻOku lave ʻa e ʻAposetolo ko Paulá ki he faʻahinga tulifua māʻoniʻoni ko ʻení ko hono “maʻu ʻa e finangalo ʻo Kalaisí.” Hangē ko ia naʻe fakatātaaʻi ʻe Sīsū Kalaisí, ʻoku ʻuhinga ʻeni ke “fai maʻu ai pē ʻa e ngaahi meʻa ʻoku lelei [ki he ʻEikí]” ʻi heʻetau moʻuí, pe ko ia ʻoku taku ʻe ha niʻihi ʻi he ngaahi ʻahó ni, ko e “fai ʻa e meʻa ʻoku tuha mo e ʻEikí.”
ʻI he ongoongoleleí, ʻoku felāveʻi ia mo hono “fai maʻu ai pē ʻa e ngaahi meʻa ʻoku fakahōifua [ki he ʻEikí]” pea mo hono fakavaivai hotau lotó ki Hono finangaló. Naʻe akoʻi mahino ʻe he Fakamoʻuí ʻa e mahuʻinga ʻo e tefitoʻi moʻoni ko ʻení lolotonga ʻEne fakahinohinoʻi ʻEne kau ākongá:
“Naʻe ʻikai te u ʻalu hifo mei he langí ke fai hoku loto ʻoʻokú, ka ko e finangalo ʻo ia naʻá ne fekauʻi aú.
“Pea ko e finangalo ʻeni ʻo e Tamai naʻá ne fekauʻi aú, koeʻuhí ko ia kotoa pē kuó ne foaki kiate aú, ke ʻoua naʻa mole ha toko taha, kae fokotuʻu ia ʻi he ʻaho fakamuí.
“Pea ko e finangalo ʻeni ʻo Ia naʻá ne fekau aú, koeʻuhí ko ia fulipē ʻoku mamata ki he ʻAló, pea tui kiate iá, ke ne maʻu ʻa e moʻui taʻengatá; pea te u fokotuʻu ia ʻi he ʻaho fakamuí.”
Naʻe aʻusia ʻe he Fakamoʻuí ha tuʻunga haohaoa mo faka-ʻOtua ʻo e fakavaivai ki he Tamaí ʻaki ʻEne fakaʻatā ke folo hifo Hono finangaló ʻe he finangalo ʻo e Tamaí. Naʻá Ne folofola ʻo pehē, “Pea ko ia naʻá ne fekau aú ʻoku ʻiate au: ʻoku ʻikai siʻaki au ke toko taha pē ʻe he Tamaí; he ʻoku ou fai maʻu ai pē ʻa e ngaahi meʻa ʻoku lelei ai iá.” Naʻe folofola ʻa e Fakamoʻuí ʻi hono akoʻi ʻa e Palōfita ko Siosefa Sāmitá fekauʻaki mo e uhu mo fakamamahi ʻo e Fakaleleí, ʻo pehē:
“He vakai, ko au, ko e ʻOtuá, kuó u kātakiʻi ʻa e ngaahi meʻá ni maʻá e kakai kotoa pē, koeʻuhí ke ʻoua naʻa nau mamahi ʻo kapau te nau fakatomala; …
“ʻA ia ko e mamahi naʻe langaki ai ʻa ʻeku tetetete ʻaʻaku, ʻa ia ko e ʻOtuá, ko e tokotaha ʻoku mālohi tahá, koeʻuhí ko e mamahí, pea mo e tafe ʻa e totó ʻi he ava kotoa ʻo hoku kilí, mo e mamahiʻia ʻi he sinó mo e laumālié fakatouʻosi—peá u loto ke ʻoua naʻá ku inu ʻi he ipu mahí, peá u holomui ai—
“Ka neongo iá, kae tuku ʻa e lāngilangí ki he Tamaí, pea naʻá ku inu ai ʻo fakaʻosi ʻa ʻeku ngaahi teuteu ki he fānau ʻa e tangatá.”
Lolotonga ʻetau moʻui ʻi he māmaní, ʻoku tau faʻa fefaʻuhi mo e meʻa ʻoku tau pehē ʻoku tau ʻiló, tau pehē ko e lelei tahá, pea mo e meʻa ʻoku tau mahalo ʻe ngāue lelei maʻatautolú, kae ʻikai ke tau feinga ke mahino ʻa e meʻa ʻoku ʻafioʻi ʻe he Tamai Hēvaní, meʻa ʻoku lelei taʻengatá, pea mo e meʻa ʻoku feʻunga moʻoni maʻá e fānau ʻi Heʻene palaní. ʻE lava ke faingataʻa ʻaupito ʻa e fefaʻuhi lahi ko ʻení, tautautefito ki he vakai atu ki he ngaahi kikite ʻoku ʻi he folofolá ki hotau kuongá: “Pea ke ʻilo ʻa e meʻá ni foki, ʻe hoko ʻi he ngaahi ʻaho fakamuí … ʻe ʻofa ʻa e kau tangatá kiate kinautolu pē, … ko e kau ʻofa lahi hake ki he ngaahi mālie [fakamāmaní] ʻi heʻenau ʻofa ki he ʻOtuá.”
Ko ha fakaʻilonga ʻe taha ʻo hono fakahoko ʻo e kikité ni ko e ākenga ʻoku lolotonga ʻiloa ʻi he māmaní, pea kau ai ʻa e tokolahi, ʻa e siokita mo toutou pehē, “Tatau ai pē pe ko e hā, ka ʻoku ou moʻui pē ʻo fakatatau mo ʻeku moʻoni ʻaʻakú pe fai ʻa e meʻa ʻoku lelei kiate aú.” Hangē ko ia naʻe lea ʻaki ʻe he ʻAposetolo ko Paulá, ʻoku nau “kumi kotoa pē ʻa e ngaahi meʻa ʻanautolú, kae ʻikai ko e ngaahi meʻa ʻa Kalaisi Sīsuú.” ʻOku faʻa fakatonuhiaʻi ʻa e tōʻonga fakakaukau ko ʻení ko e “tuʻunga totonú” ia ʻe kinautolu ʻoku fakatōliʻa ʻenau ngaahi tulifua siokitá, fiemaʻu fakafoʻituituí, pe loto ke fakatonuhiaʻi ha faʻahinga tōʻonga pau ʻoku ʻikai faʻa fenāpasi mo e palani ʻofa ʻa e ʻOtuá pea mo Hono finangalo maʻanautolú. Kapau te tau tali ʻi hotau lotó mo e ʻatamaí ʻa e faʻahinga fakakaukau ko ʻení, te tau fokotuʻu leva ai ha ngaahi maka-tūkiaʻanga ki heʻetau maʻu ʻa e mataʻitofe mahuʻinga taha kuo teuteuʻi ʻe he ʻOtuá ʻi he ʻofa maʻa ʻEne fānaú—ʻa e moʻui taʻengatá.
Neongo ko e moʻoni ʻoku tau takitaha maʻu ha aʻusia fakafoʻituitui makehe ʻi heʻetau fononga fakaākonga ʻi he hala ʻo e fuakavá, ʻo fāifeinga ke tukutaha hotau lotó mo e fakakaukaú ʻia Kalaisi Sīsuú, ka ʻoku fiemaʻu ke tau fakaʻehiʻehi mo tokanga maʻu pē ke ʻoua naʻa ʻahiʻahiʻi kitautolu ke tau muimui ʻi he faʻahinga fakakaukau fakamāmani ko ʻení ʻi heʻetau moʻuí. Naʻe pehē ʻe ʻEletā Kuenitini L. Kuki “ko ʻete anga faka-Kalaisi moʻoní ʻoku mahuʻinga ange ia ʻi hoto tuʻunga totonú.”
Siʻoku ngaahi kaungāmeʻa ʻofeina, ʻi heʻetau fili ke hoko ʻa e ʻOtuá ko e ivi tākiekina mālohi taha ʻi heʻetau moʻuí kae ʻikai ko ʻetau ngaahi tulifua siokitá, te tau lava ai ʻo fakalakalaka ʻi hotau tuʻunga fakaākongá pea fakalahi hotau ivi malava ke fakafenāpasi hotau ʻatamaí mo e lotó pea mo e Fakamoʻuí. ʻI he tafaʻaki ʻe tahá, ʻi he ʻikai ke tau tuku ke tuʻuloa ʻa e founga ʻa e ʻOtuá ʻi heʻetau moʻuí, ʻoku ʻikai ke tau maʻu ai ʻEne tokoní, pea ka ʻikai ʻa e fakahinohino fakalaumālie ʻa e ʻEikí, te tau lava ʻo fakatonuhiaʻi ʻa e meimei meʻa kotoa pē ʻoku tau fai pe taʻe faí. Te tau lava foki ʻo kumi ʻuhinga maʻatautolu ʻaki ʻetau ngāue ʻi he founga pē ʻatautolú, ʻo pehē, “ʻOku ou fai pē ia ʻi he founga pē ʻaʻakú.”
Lolotonga hono fakahā ʻe he Fakamoʻuí ʻa ʻEne tokāteliné ʻi ha tūkunga ʻe taha, naʻe fakasītuʻaʻi ʻe ha niʻihi ʻEne ngaahi pōpoakí, tautautefito ki he kau Fālesi fie māʻoniʻoní, pea nau fakamaʻitoʻa ʻo pehē ko e fānau kinautolu ʻa ʻĒpalahame, ʻo fokotuʻu mai te nau maʻu ha ngaahi faingamālie makehe ʻi he ʻao ʻo e ʻOtuá koeʻuhi ko e hako ʻoku nau tupu aí. Naʻe fakatupu ʻe he tōʻonga fakakaukau ko iá ʻenau falala ki honau poto pē ʻonautolú ʻo taʻetui ki he meʻa naʻe akoʻi ʻe he Fakamoʻuí. Naʻe fakamoʻoniʻi mahino ʻe he fakafōtunga ʻa e kau Fālesí naʻe ʻikai fakaʻatā ʻe heʻenau tōʻonga fielahí ke nau tali ʻa e folofola ʻa e Fakamoʻuí mo e founga ʻa e ʻOtuá. Naʻe tali poto mo loto-toʻa ʻa Sīsū ki heni ʻo folofola kapau ko ha fānau fuakava moʻoni kinautolu ʻa ʻĒpalahame, te nau fai ʻa e ngaahi ngāue ʻa ʻĒpalahamé, tautautefito ki he lolotonga ʻafio pē ʻa e ʻOtua ʻo ʻĒpalahamé ʻi honau ʻaó mo akoʻi ange ʻa e moʻoní kiate kinautolu ʻi he taimi ko iá.
ʻE kāinga, ʻoku mou vakai, ko hono fakatonuhiaʻi ko ia ʻo e ngaahi fakakaukau ko ʻeni ʻo e “meʻa ʻoku lelei kiate aú” kae ʻikai fai ʻa e “meʻa ʻoku fakahōifua maʻu pē ki he ʻEikí” ʻoku ʻikai ko ha ākenga foʻou ia naʻe toki hoko pē ʻi hotau kuongá. Ko ha tōʻonga ia talu pē mei tuai pea ʻokú ne faʻa fakakuihi ʻa e kakai potó mei he moʻoní pea fakatupu puputuʻu mo fakaongosia ki ha tokolahi ʻo e fānau ʻa e ʻOtuá. Ko hono moʻoní, ko e tōʻonga fakakaukaú ni, ko ha kiʻi founga motuʻa ia ʻa e filí; ko ha halanga fakatauele ia ʻokú ne tataki fakaalaala ʻa e fānau ʻa e ʻOtuá mei he hala totonu mo angatonu ʻo e fuakavá. Neongo ʻoku tākiekina ʻetau fonongá ʻe he ngaahi tūkunga fakataautaha hangē ko hotau faʻungá, siokālafí mo e ngaahi pole fakatuʻasinó mo fakaeʻatamaí, ka ʻi he ngaahi meʻa ko ia ʻoku mahuʻinga moʻoní, ʻoku ʻi ai hotau ivi malava ʻa ia ʻoku tau tauʻatāina ai ke fili pe te tau fakakaukau nai ke muimui pe ʻikai ʻi he sīpinga kuo tofa ʻe he ʻEikí maʻa ʻetau moʻuí. Ko e moʻoni, “Naʻá Ne [tofa mo tataki ʻa e halá, pea fakahaaʻi ʻa e foungá].”
‘I heʻetau hoko ko e kau ākonga ʻa Kalaisí, ʻoku tau holi ai ke ʻaʻeva ʻi he hala naʻá Ne tofa maʻatautolu lolotonga ʻEne ngāue ʻi he māmaní. ʻOku ʻikai ke ngata pē ʻi heʻetau holi ke fai Hono finangaló mo e meʻa kotoa pē ʻe fakahōifua kiate Iá, ka te tau feinga foki ke faʻifaʻitaki kiate Ia. ʻI heʻetau fāifeinga ke tauhi totonu ki he fuakava kotoa pē kuo tau fakahokó mo moʻui ʻaki ʻa e “folofola kotoa pē ʻoku haʻu mei he ʻOtuá,” ʻe maluʻi kitautolu mei hono uesia kovi ʻe he ngaahi angahala mo e fehalaaki ʻa e māmaní—ʻa e ngaahi fehalaaki ʻo e fakakaukau fakapotó mo e tokāteline te ne ala taki kitautolu mei he ngaahi mataʻitofe mahuʻinga tahá.
Kuo langaki fakataautaha hake au ʻi he founga kuo hanga ai ʻe he fakavaivai fakalaumālie pehē ki he ʻOtuá ʻo tokoniʻi ʻa e moʻui ʻa e kau ākonga faivelenga ʻa Kalaisí, ʻi heʻenau fili ke fai ʻa e ngaahi meʻa ko ia ʻoku lelei mo fakahōifua ʻi he ʻao ʻo e ʻEikí. ʻOku ou ʻiloʻi ha talavou naʻe taʻepauʻia pe ʻe ʻalu ʻo ngāue fakafaifekau, ka naʻe ueʻi fakalaumālie ia ke ʻalu ʻo ngāue maʻá e ʻEikí ʻi he taimi naʻá ne fanongo ai ki ha vahevahe ʻe ha taki matuʻotuʻa ʻo e Siasí ʻa ʻene fakamoʻoni fakafoʻituituí mo e aʻusia toputapu ʻo ʻene ngāue fakafaifekaú.
ʻI heʻene lea pē ʻaʻaná, naʻe pehē ai ʻe he talavoú ni, ko ha taha ʻosi ngāue fakafaifekau he taimí ni: “ʻI heʻeku fanongo ki he fakamoʻoni ʻa ha ʻAposetolo ʻo e Fakamoʻui ko Sīsū Kalaisí, naʻá ku lava ai ʻo ongoʻi ʻa e ʻofa ʻa e ʻOtuá kiate aú, pea naʻá ku fakaʻamu ke vahevahe ʻa e ʻofa ko iá mo e niʻihi kehé. ʻI he momeniti ko iá, ne u ʻiloʻi ʻoku totonu ke u ngāue fakafaifekau neongo ʻeku ngaahi manavasiʻí, veiveiuá mo e hohaʻá. Naʻá ku ongoʻi loto-falala ʻaupito ki he ngaahi tāpuaki mo e talaʻofa ʻa e ʻOtuá maʻa ʻEne fānaú. ʻI he ʻaho ní, ko ha tokotaha foʻou au; ʻoku ʻi ai haʻaku fakamoʻoni ʻoku moʻoni ʻa e ongoongolelei ko ʻení pea kuo fakafoki mai ʻa e Siasi ʻo Sīsū Kalaisí ki māmani.” Naʻe fili ʻe he talavoú ni ʻa e founga ʻa e ʻEikí pea naʻá ne hoko ko ha sīpinga ʻo ha ākonga moʻoni ʻi he tafaʻaki kotoa pē.
Naʻe fili ʻe ha finemui faivelenga ke ʻoua naʻá ne maumauʻi hono ngaahi tuʻunga ʻulungāngá ʻi he taimi naʻe kole ange ai ke ne teuteu taʻetaau ke feʻunga mo e vaʻa fakapisinisi ʻo e kautaha ākenga vala naʻe ngāue aí. Koeʻuhí naʻe mahino kiate ia ko hono sinó ko ha meʻaʻofa toputapu ia mei heʻetau Tamai Hēvaní mo ha feituʻu ʻe lava ke nofoʻia ʻe he Laumālié, naʻe ueʻi ia ke ne moʻui ʻaki ha tuʻunga ʻulungaanga fakaʻeiʻeiki ange mei he tuʻunga ʻo e māmaní. Naʻe ʻikai ngata pē ʻi heʻene maʻu ʻa e loto-falala ʻanautolu naʻa nau mātā ʻene moʻui ʻaki ʻa e moʻoni ʻo e ongoongolelei ʻo Sīsū Kalaisí, ka naʻá ne kei maʻu foki ʻene ngāué, ʻa ia naʻe mei mole ʻi ha kiʻi vahaʻataimi. Naʻe hoko ʻene vilitaki ke fai ʻa e meʻa naʻe fakahōifua ʻi he ʻao ʻo e ʻOtuá, kae ʻikai ko e meʻa naʻe lelei ki he māmaní, ke ne maʻu ai ha loto-falala ki he fuakavá ʻi he lotolotonga ʻo e ngaahi fili faingataʻá.
ʻE kāinga, ʻoku tau fehangahangai maʻu pē mo ha ngaahi fili tatau ʻi heʻetau moʻui fakaʻahó. ʻOku fiemaʻu ha loto-toʻa mo ha loto-vilitaki ke tau kiʻi taitaimi hifo ʻo sivisiviʻi kitautolu ʻi he faitotonu mo e angavaivai pea fakatokangaʻi ʻa e ngaahi vaivai ʻo e kakanó te nau ala taʻofi kitautolu mei heʻetau fili loto-tauʻatāina ke fakavaivai ki he ʻOtuá, mo iku ai ʻo fili ke fakaʻaongaʻi ʻEne foungá kae ʻikai ko haʻatautolú. Ko e konga faingataʻa taha ʻo hotau tuʻunga fakaākongá ko ʻetau loto-fiemālie ke taʻofi mo tukuange ʻetau tōʻonga motuʻá kae fakavaivai hotau lotó mo e laumālié kotoa ki he ʻOtuá koeʻuhí ke hoko Hono finangaló ko hotau lotó.
ʻOku hoko ha taha ʻo e ngaahi momeniti nāunauʻia taha ʻo e moʻui fakamatelié ʻi he taimi ʻoku tau ʻiloʻi ai ʻa e fiefia ʻoku maʻu ʻi hono fakahoko maʻu pē ʻa e ngaahi meʻa ʻoku “lelei mo fakahōifua ki he ʻEikí” pea hoko ʻo taha mo tatau ia mo e “meʻa ʻoku lelei kiate kitautolú!” Ke fokotuʻu maʻu mo taʻe-toe-fehuʻia ʻa e finangalo ʻo e ʻEikí ke hoko ia ko hotau lotó, ʻe fiemaʻu ki ai ha tuʻunga fakaākonga ʻoku fakaʻeiʻeiki mo toʻa! ʻI he momeniti fakaʻofoʻofa ko iá, ʻoku fakatapui ai kitautolu maʻá e ʻEikí, pea ʻoku tukulolo kakato hotau lotó kiate Ia. ʻOku fakaʻofoʻofa, mālohi pea liliu-moʻui ʻa e faʻahinga fakavaivai fakalaumālie peheé.
ʻOku ou fakamoʻoni ko e muimui ko ia ki he finangalo ʻo e ʻEikí ʻi heʻetau moʻuí te tau lava ai ʻo maʻu ʻa e mataʻitofe mahuʻinga taha ʻi he māmaní—ʻa e puleʻanga ʻo e langí. ʻOku ou lotua ke tau lava ʻo mateuteu mo fakahā taimi totonu, ʻi he loto-falala ʻi he fuakava ki heʻetau Tamai Hēvaní mo e Fakamoʻui ko Sīsū Kalaisí “ko e meʻa ko ia ʻoku lelei ki he ʻAfioná, ʻoku lelei ia kiate au.” ʻOku ou fai ʻeni ʻi he huafa toputapu ʻo e Fakamoʻui ko Sīsū Kalaisí, ʻēmeni.