Ngaahi Folofola Toputapú—ko e Fakavaʻe ʻo e Tuí
He ʻikai lava ke tau toʻo maʻamaʻa ʻa e mahuʻinga ʻo e folofola toputapú ʻi he fakauluí mo e kei faivelenga fakatouʻosi ʻi he ongoongoleleí.
Naʻá ku mamata kimuí ni mo hoku uaifi ko Melé ʻi ha falani ʻoku tā ai ha fakatātā ʻo ha tohi pea mo ha pōpoaki ʻi muʻa naʻe pehē: “ʻŪ Tohi: Ko e ʻUluaki Meʻangāue Toʻotoʻó.”
Naʻá ku fakakaukau ki he pōpoaki mālié ni mo e mahuʻinga kuo aʻusia ʻe he kalasi kehekehe ʻo e ngaahi meʻangāue toʻotoʻó. ʻI heʻeku fakakaukau lahi ki aí, naʻá ku fakatokangaʻi ko ha faʻahinga meʻangāue pē, pe naʻa mo ha meʻa ʻoku fakanaunau ʻaki ʻa e pōtoʻi tekinolosia fakakomipiutá, he ʻikai teitei mahuʻinga pe fuʻu ʻaonga tatau ia mo e tataki fakalaumālie ʻoku maʻu mei he fakahā fakalangí.
Tatau ai pē pe ʻoku toʻotoʻo pe fakaʻilekitulōnika, ko e Tohi Tapú mo e Tohi ʻa Molomoná: Ko ha Fakamoʻoni ʻe Taha ʻo Sīsū Kalaisí, ʻokú na ʻomai ʻa e tataki fakalaumālie mo e akonaki meia Sīsū Kalaisi, ko e Fakamoʻui ʻo e māmaní. ʻOku tau fakamahuʻingaʻi ʻa e ongo tohi ko iá ʻi hona fatongia lahi ʻi hono hiki ʻo e fakahinohino ʻa e ʻOtuá ki he kau palōfita mo e kakai ʻo e kuonga muʻá pea mo e fakahinohino ʻokú na ʻomi ki heʻetau moʻui fakafoʻituituí.
ʻOku ʻomi ʻe he ongo folofola toputapú ni, fakataha mo e ngaahi akonaki ʻa e kau palōfita moʻuí ha tataki fakatokāteline kiate kitautolu ʻi hotau māmaní ʻi he ʻahó ni. Ko e ongo folofolá ni ʻokú na mālohi lahi taha ʻi he taimi ʻokú na fai ai ha fakahinohino, fakatonutonu, fakafiemālie, mo e fakanonga ki he fakafoʻituituí mo e ngaahi fāmili ʻoku fekumi ki ha fakahinohino mei he ʻEikí.
ʻOku kei hoko pē ʻa e folofolá, fakataha mo e tataki fakalaumālie mei he Laumālie Māʻoniʻoní ko e tefitoʻi maʻuʻanga tokoni ʻokú ne tokoniʻi ʻa e ului ʻa kinautolu ʻoku loto-mafesifesi mo laumālie fakatomalá pea holi ke muimui kia Sīsū Kalaisí. ʻOku tokoni ʻa e folofolá ke tanumaki ha fakavaʻe te ne lava ʻo matuʻuaki ʻa e feinga taʻetūkua ʻa e filí ke holoki ʻa e tuí.
Kuo tāpuekina ʻe he kau ului foʻoú pea nau hoko ko e toto-moʻui ʻo e Siasí ʻi he kotoa hono hisitōliá. ʻOku ʻi ai ha sīpinga ʻe taha ʻoku mātuʻaki mahuʻinga kiate au. ʻI he taimi naʻá ku pīsope kei talavou aí, naʻe akoʻi ʻe ha ongo faifekau sisitā fakaofo ʻa e fāmili ʻo Viliami ʻEtuate Mosimaní. Ko e tamaí, ko ha loea lavameʻa, pea ko e faifaleʻi fakalao tefito ia ki ha kautaha lahi. Naʻe tokoni siʻono uaifi faivelenga ko Sēnetí ki he fāmilí ke nau feinga ke moʻui faka-Kalaisi ange.
Naʻe akoʻi foki mo hona foha mo e ʻofefine makehé, naʻá na fakatou taʻu uofulu tupu siʻi pē. Naʻe maʻu kotoa ʻe he toko faá ʻa e ngaahi lēsoní mo nau maʻu lotu. Naʻe ʻosi fakamamafaʻi ʻe he ongo sisitaá hono lau ʻo e Tohi ʻa Molomoná mo lotua ha fakamoʻoni ki he folofola toputapu ko iá. Ko e fakaofó, he naʻe lau kakato ʻe he fāmilí ʻa e Tohi ʻa Molomoná ʻi ha vahaʻataimi nounou pē.
Naʻe fakafeʻao kinautolu ki he houalotu sākalamēnití ʻe he ongo faifekau fakasiteikí, ko ha ongo palesiteni Fineʻofa kimuʻa ʻo e uōtí.
ʻI he ofi ke papitaiso ʻa e fāmilí, naʻa nau maʻu ha ʻū tohi fakaangaʻi lahi ʻo e Siasí. Ko e meʻa ʻeni ia kimuʻa ʻi he ʻinitanetí, ka naʻe fonu ha fuʻu puha pepa lahi ʻi he fakamatalá.
Naʻe fakaafeʻi au ʻe he ongo sisitaá, ko ha pīsope taʻu 34 naʻe toki uiuiʻi pē, ke tokoni ʻi he tali ʻo e ngaahi fehuʻi naʻe ʻohaké. ʻI heʻemau fakataha mai ʻi honau loto falé, naʻe tuku ʻi he lotomālie ʻo e lokí ʻa e fuʻu puha tohitufa fakaangaʻi ʻo e Siasí. Naʻá ku teuteu ʻi he lotu lahi ki he meʻá ni. Naʻe fanafana mai ʻa e Laumālié kiate au ʻi he lolotonga ʻo e fua lotú, “ʻOkú ne ʻosi ʻilo ʻe ia ʻoku moʻoni.” Naʻe mahuʻinga ʻeni. Naʻe ʻosi tui ʻa e ongo sisitaá kuo ʻosi maʻu ʻe he toenga ʻo e fāmilí ha fakamoʻoni. Ka naʻe ʻikai ke na fakapapauʻi ʻa e tamaí.
Naʻá ku talaange leva ʻi he taimi pē ko iá kuo ueʻi au ʻe he Laumālié kuó ne ʻosi maʻu ha fakamoʻoni. “ʻOku moʻoni nai ia?” Naʻá ne sio fakamamaʻu mo pehē mai kuo ʻosi fakamoʻoniʻi ange ʻe he Laumālié ʻa e moʻoni ʻo e Tohi ʻa Molomoná pea mo e Siasí kiate ia.
Naʻá ku fehuʻi ange leva pe ʻe toe fiemaʻu ke vakaiʻi ʻa e ʻū tohitufá, kapau kuo nau ʻosi maʻu ha fakamoʻoni fakalaumālie.
Naʻe tali ʻe he tamaí he ʻikai toe fiemaʻu ia. Naʻe poupou ʻa e toenga ʻo e fāmilí ki heʻene talí.
Naʻá ne pehē naʻe ʻi ai haʻane fehuʻi mahuʻinga: Ko e taha ʻo e ʻuhinga naʻa nau maʻu lahi pehē ai ʻa e ngaahi tohitufa fakafepakiʻi ʻo e Siasí he naʻa nau mēmipa ʻi ha tui fakalotu kehe. ʻIkai ngata aí, naʻá ne fai ha palōmesi lahi ke tokoni ke langa ha falelotu foʻou ki he tui fakalotu ko iá. Naʻá ne talamai kuo ʻosi akoʻi ia ʻe he ongo sisitaá ki he mahuʻinga ʻo e vahehongofulú, pea kuó ne tali lelei, ka naʻe fifili pe ʻe kei hala ke ne tauhi foki mo e palōmesi naʻá ne ʻosi fai kimuʻá. Naʻá ku fakapapauʻi ange ko e totongi ko ia ʻo ʻene palōmesí ʻe fakatou fakaʻeiʻeiki mo taau ia.
Ko e ongo Mosimaní mo hona fohá, ʻofefine ʻi he fonó, mo e ʻofefiné.
Naʻe papitaiso kātoa ʻa e fāmilí. Hili ha taʻu ʻe taha mei ai naʻe silaʻi kinautolu ko ha fāmili ʻi he Temipale ʻOkalani Kalefōniá. Ko ha tāpuaki ia kiate au ke u ʻi ai. Naʻe ʻosi ʻa e fohá mei he ʻapiako laó, lavaʻi mo e Sivi Lao ʻa Kalefōniá, pea ngāue fakafaifekau ʻosikiavelenga ʻi Siapani. Kuó u fakatokangaʻi ʻi he fakalau atu ʻa e ngaahi taʻú ʻa e kei faivelenga ʻa e ngaahi toʻu tangata ʻalu haké ki he ongoongoleleí. Ko ha tāpuaki ia kiate au ke fakahoko ʻa e sila ʻo e taha ʻo e makapuna fefiné.
ʻOku fakaofo tatau pē ʻa e ului ʻoku hoko ʻi hotau kuongá. Naʻá ku fakafofongaʻi ʻi Sune ʻo e taʻu kuo ʻosí mo e faiako ʻakapulu pule ko ʻEnitī Liiti ʻo e timi Kansas City Chiefs, fakataha mo ha niʻihi kehe hotau siasí mo ha ngaahi siasi kehe, ʻo lea ʻi ha fakataha ʻa e ngaahi tui fakalotu kehekehé ʻi he Siasi Livasaití ʻi Niu ʻIoke Siti. Naʻe fakamamafaʻi ʻe Liiti ʻa e maʻu ha faingamālie hono uá mo e tali ki he ngaahi fakaafé mo e ngaahi faingamālié, ʻa ia ko e ʻuhinga ia ʻo e ongoongolelei ʻo Sīsū Kalaisí. ʻI he pongipongi hono hokó, naʻá ma ō ai mo homa ongo uaifí, Temi Liiti mo Mele, ki he houalotu sākalamēniti ʻa e Uooti Menihēteni Uá. Ko ha houalotu fakalaumālie ia. Naʻe tokolahi ha kau ului foʻou ʻi he haʻofangá. Ko e toko nima ʻo e kau toki papitaisó, ko e kau tangata ʻe toko fā mo e talavou ʻe toko taha, naʻa nau kau ʻi he kau maʻu Lakanga Taulaʻeiki Faka-ʻĒlone naʻa nau tufa ʻa e sākalamēnití. ʻOku ou fiefia ke lipooti atu ʻoku pehē pē ʻa e kau mai ʻa e kau mēmipa foʻou tokolahi ʻi he kotoa ʻo e Siasí.
ʻOku tau houngaʻia ʻi he tokolahi pehē ʻo kinautolu ʻoku nau tali ʻa e ngaahi fakaafe toputapú, liliu ʻenau moʻuí, mo tali ʻa e faingamālie ke muimui kia Sīsū Kalaisí. ʻOku nau hū ki he hala ʻo e fuakavá ʻi he tui, fakatomala, papitaiso, mo e hilifakinimá hangē ko hono akoʻi ʻi he Tohi Tapú mo e Tohi ʻa Molomoná.
He ʻikai lava ke tau toʻo maʻamaʻa ʻa e mahuʻinga ʻo e folofola toputapú ʻi he fakauluí mo e kei faivelenga fakatouʻosi ʻi he ongoongoleleí. Naʻe ʻiloʻi ʻe he kau palōfita ʻoku fakamatalaʻi ʻi he Tohi ʻa Molomoná ʻa e misiona ʻo Sīsū Kalaisí pea akoʻi ʻEne ongoongoleleí. ʻOku tokoni ʻa e Tohi ʻa Molomoná ke tau ʻunu ʻo ofi ange ki he ʻOtuá ʻi heʻetau ako, mahino, mo fakaʻaongaʻi hono ngaahi akonakí. Naʻe akoʻi ʻe he Palōfita ko Siosefa Sāmitá “ʻE ofi ange ha tangata [pe ha fefine] ki he ʻOtuá ʻi haʻane tauhi ki [he ngaahi akonaki ʻo e tohí] ʻi ha toe tohi kehe”
Ke ʻiloʻi ko e Tohi ʻa Molomoná ko e folofola ia ʻa e ʻOtuá, ʻe fiemaʻu ke tau lau, fakalaulauloto, mo lotua ia pea toki ngāue fakatatau ki hono ngaahi akonakí. Naʻe palōmesi ʻa e palōfita ko Molonaí ʻe fakahā mai ʻe he ʻOtuá ʻa e moʻoni ʻo e tohí ʻo ka tau lotu ʻi he loto-fakamātoato, mo e loto-moʻoni, pea tui kia Kalaisi. Ko hono ako ʻo e Tohi ʻa Molomoná ʻoku mātuʻaki fiemaʻu ia ki he ului tuʻuloá.
ʻI heʻetau fakakaukau ki he fekauʻaki ʻa e Tohi Tapú mo e Tohi ʻa Molomoná mo hono fakafehoanaki mo e meʻangāue toʻotoʻó, ʻe ala ʻeke ai ha fehuʻi. ʻOkú ke pehē ko e hā hano ʻaonga mo e fetokoniʻaki ʻa e ongo tohí ni kapau kuo fakahā ʻe he ʻEikí te na hoko fakataha pea “hoko ia ʻo taha pē ʻi ho nimá”? Ko e meʻa ʻeni kuo fakahā ʻe he ʻEikí fekauʻaki mo e “vaʻakau ʻo Siutá,” ko e Tohi Tapú, mo e “vaʻakau ʻo Siosefá,” ko e Tohi ʻa Molomoná.
ʻOku ʻomai ʻe he Tohi ʻa Molomoná ha tokāteline mahuʻinga, ʻi ha ngaahi tafaʻaki mahuʻinga lahi, ʻoku nau fakakakato mo tānaki atu ki he Tohi Tapú. Ko e tokāteline ʻo e Fakalelei ʻa Sīsū Kalaisí ko ha sīpinga maʻongoʻonga ia.
ʻOku ʻomai ʻe he Tohi Tapú ha fakamatala totonu ʻo e ngāue fakamatelie ʻa Sīsū Kalaisí, kau ai ʻEne pekiá mo e Toetuʻú. ʻOku mahino ange ʻa e Tohi ʻa Molomoná fekauʻaki mo e Fakalelei ʻa Sīsū Kalaisí, ko ha meʻa naʻe fakamatalaʻi fakaʻauliliki ʻe he kau palōfitá kimuʻa ʻi Heʻene pekiá.
Ko e ʻuluʻi vahe ʻo e ʻAlamā vahe 42 ʻoku fakahaaʻi ai hono mahuʻinga fakatokāteline ʻo e Fakalelei ʻa Sīsū Kalaisí.
ʻOku pehē ʻi ai: “ʻOku hoko ʻa e moʻui fakamatelié ko ha taimi ʻahiʻahiʻanga ke lava ai ʻe he tangatá ʻo fakatomala mo tauhi ki he ʻOtuá—Naʻe fakatupu ʻe he Hingá ʻa e mate fakasino mo e mate fakalaumālie ʻa e faʻahinga kotoa ʻo e tangatá—ʻOku fakahoko ʻa e huhuʻí tuʻunga ʻi he fakatomalá—Ko e ʻOtuá pē ʻokú ne fai ʻa e fakalelei ki he ngaahi angahala ʻa e māmaní—Ko e ʻaloʻofá ʻoku maʻanautolu pē ʻoku fakatomalá—ʻOku moʻulaloa ʻa hono toengá ki he fakamaau totonu ʻa e ʻOtuá—ʻOku hoko mai ʻa e ʻaloʻofá tuʻunga ʻi he Fakaleleí—Ko e kau fakatomala moʻoní pē ʻe fakamoʻuí.”
Kuo pehē ʻe Palesiteni Lāsolo M. Nalesoni: “ʻOku ou palōmesi atu, ʻi hoʻo ako [ʻi he faʻa lotu] e Tohi ʻa Molomoná he ʻaho kotoa peé, ʻe toe lelei ange ai hoʻo fai tuʻutuʻuní—he ʻaho kotoa pē.” Naʻá ne toe palōmesi foki kapau “te ke fakaʻutumauku fakaʻaho he Tohi ʻa Molomoná, ʻe lava ke maluʻi koe mei he ngaahi kovi ʻo e kuongá.”
Hangē ko ʻeku lavé, naʻa ku mālieʻia ʻi he fakakaukau ki he meʻangāue toʻotoʻó—ko ha tohi. Ka neongo ia, ʻoku ou ʻilo hono mahuʻinga lahi ʻo e ʻinitanetí ʻi māmani ʻi he ʻaho ní. ʻE lava ʻe ha meʻangāue toʻotoʻo fakaonopooni ke ʻomai ʻa e fakamatala, kuó ne fakafonu ha fuʻu laipeli lahi ʻi he kuohilí. ʻOku tau houngaʻia ke moʻui ʻi ha taimi hangē ko ʻení. ʻOku tautautefito ʻeku houngaʻiá he ʻokú ne ʻai ke lava ke maʻu fakaʻilekitulōnika ʻa e ʻū tohi toputapú mo e naunau ʻa e Siasí. ʻOku hoko ʻa e ʻinitanetí ko ha meʻangāue ʻaonga moʻoni ki hono ako ʻo e ongoongoleleí. Ko e ʻaho ní, ʻoku vahevahe ʻe ha kakai tokolahi ʻa e folofolá mo honau ngaahi kaungāmeʻá ʻo fakaʻaongaʻi ʻa e tekinolosiá. Hangē ko ʻení, ko e polokalama Tohi ʻa Molomoná, ko ha founga lelei ia ke fakafeʻiloaki ai ʻa e ngaahi kaungāmeʻá ki he Tohi ʻa Molomoná pea ʻe faingofua ke vahevahe ia ʻi ha founga angamaheni mo fakanatula ʻi ha feituʻu pē ʻokú ke ʻi ai.
Neongo ʻoku ʻomi ʻe he ʻinitanetí ha ngaahi tāpuaki lahi, ka ko e pangó, he ʻoku hangē ko e ngaahi tohitufa fakaangaʻi ʻo e Siasí naʻá ku fakamatalaʻi atu kimuʻá, kuo toe fakaʻaongaʻi ia ke fakatupu ha veiveiua mo holoki ʻa e tui ki he ngaahi tefitoʻi moʻoni mahuʻinga ʻo e ongoongoleleí. Naʻe pehē ʻe Palesiteni Nalesoni, ʻe lava pē ke hoko ia ko ha konga ʻo e “ngaahi kovi ʻo e kuongá.”
Kuo hanga ʻe he filí mo kinautolu ʻoku tokoni kiate iá, ʻo fakatupu ʻi he ʻiloʻi-pau pe taʻe-ʻilo ʻi he ʻinitanetí ha meʻa tatau ʻo e puha kuo fonu ʻi he naunau fakaangaʻi ʻo e Siasí naʻá ku fakamatalaʻi kimuʻá, ʻo taumuʻa ke tohoakiʻi koe ke mamaʻo mei he moʻoni ʻa e ʻOtuá.
Ko e ngaahi meʻa kuo faʻu ke fakatupu veiveiua ʻi he fakalau ʻo e taʻú kuo meimei ke tatau ai pē. ʻOku mātuʻaki moʻoni ʻeni ʻi he taimi ʻokú ke fakahoa ai hotau kuongá mo e 1960 tupú, ʻi he taimi naʻá ku taʻu 20 tupu aí.
ʻOku akoʻi kitautolu ʻe he folofolá ke tau fakakaukau lelei mo fakapotopoto ʻi he meʻa kotoa. ʻE lava ke ngāue ʻaki ʻa e ʻinitanetí ʻi ha founga lelei pe founga fakatuʻutāmaki.
ʻOku fakatou fiemaʻu ʻa e kau mēmipa fuoloá mo kinautolu ʻoku nau toki ako foʻou ʻa e ongoongoleleí ke nau fakapapauʻi ʻa e meʻa ʻoku nau mamata aí. ʻOua ʻe fakakaukau ki he meʻa ʻoku taʻetāú, taʻe-faitotonú, pe taʻe-māʻoniʻoní. Ka ke fai ia, ʻe lava ke taki hifo koe ʻe he ngaahi founga ngāue ʻo e ʻinitanetí ʻi ha hala ʻokú ne fakaʻauha ʻa e tuí mo maumauʻi hoʻo fakalakalaka taʻengatá. ʻE fakamālohiʻi koe ke ke fai ha meʻa ʻi ha founga ʻoku lelei pe kovi. Kumi ki he angatonú pea fakaʻehiʻehi mei he tūkiaʻanga fakapoʻuli mo kovi ʻo e pae taʻe-mapuleʻi mo kumi ongoongo ʻi he ʻinitanetí. Fakafonu hoʻo moʻuí ʻaki ʻa e ngaahi fakakaukau lelei, mo māʻoniʻoní; moʻui fiefia; pea feohi fiefia kae fakaʻehiʻehi mei he taʻe-fakapotopotó. ʻOku ʻi ai ha kehekehe. ʻOku hoko ʻa e tefito ʻo e tui hono hongofulu mā tolú ko ha fakahinohino fakaofo. Kae mahuʻinga tahá, fakafemoʻuekinaʻi maʻu pē koe ʻi he Tohi ʻa Molomoná, he te ne ʻomi ʻa e Laumālié ki hoʻo moʻuí mo tokoni ke ke ʻilo ʻa e moʻoní mei he halá.
Ko ʻeku naʻinaʻi kiate kinautolu ʻoku fakahehema ʻi ha faʻahinga founga pē mei he hala ʻo e fuakavá ke ke foki ki he ngaahi folofola toputapú, fakahinohino fakaepalōfitá, tauhi ʻo e tuʻunga fakalotú ʻi he ʻapí, pea mo e ngaahi hiva ʻo e tuí. ʻOku mahuʻinga ʻa e laumālie kotoa ki he ʻEikí. ʻOku mau fiemaʻu koe! ʻOku fiemaʻu koe ʻe he ʻEikí, pea ʻokú ke fiemaʻu Ia! ʻE talitali lelei maʻu pē koe. ʻI hoku ngaahi taʻu lahi ʻo e ngāue ʻi he Siasí, kuó u mataʻikoloa ʻaki ʻa e kakai lelei kuo nau foki ki he hala ʻo e fuakavá ʻo tokoni mo tāpuekina ʻa e taha kotoa ʻoku nau ʻofa aí pe ha taha pē ʻoku nau fetuʻutaki mo iá.
Ko e ngaahi folofola toputapú mo e kau palōfita moʻuí ko ha founga mahuʻinga ia ʻoku fakaʻatā ai ʻe he Tamai Hēvaní ʻEne palani ʻo e fiefiá ki he kotoa ʻo ʻEne fānaú.
ʻOku fakahoko atu ʻeku fakamoʻoni pau ki he fakalangi ʻo Sīsū Kalaisí pea mo e moʻoni ʻo ʻEne Fakaleleí, ʻi he huafa ʻo Sīsū Kalaisí, ʻēmeni.