Ngaahi peesi fakalotofonuá
Naʻe Miniti ʻe 30 ʻa e Tāpuaki ʻa e ʻEikí
ʻI he mavahe ʻa Sasinitā Mauafu mei hono ʻōfisí kuo fuoloa ʻa e poʻulí hili haʻane fakahoko ha ngāue fakavavevave mo mahuʻinga, naʻá ne fakatovave ki ʻapi ke sio ki hono husepāniti ko Maeli Maika Mauafú, ʻa ia naʻe puke lahi. Naʻe toutou faleʻi ʻe he pule ʻa Sasinitā ʻi he taimi ko iá ke ne fakamuʻomuʻa ʻa e ngāue ʻa e ʻEikí, pea ʻe toki tāpuekina ia. Naʻe tui ʻa Sasinitā kapau te ne fai maʻu pē ʻa e ngāue ʻa e ʻEikí, pea ʻe sai pē ʻa hono husepānití. Ko ia, naʻe fuʻu fakaʻohovale ʻaupito ʻa e mālōlō ʻa Maeli hili pē ha haafe houa mei he aʻu [ʻa Sasinitā] ki ʻapí.
Naʻe faingataʻa ki hono lotó ke ne tali ʻa e meʻa naʻe hokó, pea naʻe fuʻu mamahi lahi ʻa Sasinitā ʻi he mālōlō ʻa Maelí, pea ko hono moʻoní, naʻá ne ongoʻi ʻoku lavakiʻi ia koeʻuhí he naʻe ʻikai ke tāpuakiʻi ia ʻe he ʻEikí, neongo ʻene ngāue mālohi ʻi ha ngaahi houa lahi ke fakahoko ʻa e ngāue liliu lea maʻá e Siasí ʻi he ʻaho naʻe fiemaʻu ke ʻosi ia ki aí. Ka ko eni kuo toʻo ʻe he ʻEikí ia hono husepānití.
Naʻá ne fuʻu loto-mamahi mo fuʻu ʻita ʻi he meʻa taʻe-ʻamanekina naʻe hokó, pea loto leva ʻa Sasinitā ke ʻoua naʻa toe foki ki he ngāué – he kuo fuʻu fakamamahi ia kiate ia. Hili ʻa e putu ʻo Maelí, naʻe toutou tā mai ʻa e kakaí kia Sasinitā ke ʻiloʻi ʻa e taimi ʻe foki ai ki he ngāué. Naʻe fiemaʻu fakavavevave ʻa e tokoni ʻa Sasinitaá ki hono lau fakapapauʻi ʻoku tonu ha tohi lēsoni ʻi he Ko e Ngaahi Akonaki ʻa Siosefa F. Sāmitá. Naʻe faifai pea talaange ʻe Sasinitā kiate kinautolu he ʻikai pē ke ne toe foki atu ki he ngāué. Neongo ia, ka koeʻuhí ko e fiemaʻu fakavavevave ke ʻosi ʻa e naunau fakalēsoni ko iá, naʻá ne loto ai ke toe foki, ka ke fakakakato ʻa e foʻi ngāue pē ko iá. Lolotonga hono fakatonutonu ʻe Sasinitā ʻa e tohi lēsoní, naʻá ne ako ai ki he meʻa fakamamahi naʻe foua ʻe he palōfitá. Naʻe puke lahi ʻaupito ʻa e uaifi ʻo Palesiteni Sāmita ko Suliná, pea neongo ʻa e loto ʻa Palesiteni Sāmita ke nofo ʻi hono veʻe mohengá ʻo tokangaʻi iá, ka naʻe vili pē ʻa Sulina ke ne ʻalu ʻo fai ʻa e ngāue ʻa e ʻEikí. Hili ha taimi nounou mei ai, lolotonga haʻane lea ʻi ha fakataha ʻa e siasí, naʻe hū mai ha taha ki he lokí ʻo mono ange ha kiʻi tohi kia Palesiteni Sāmita – naʻe fakahā ai kiate ia kuo mālōlō hono uaifí.
Naʻe tafe hifo ʻa e loʻimatá ʻi he kouʻahe ʻo Sasinitaá ʻi heʻene ʻiloʻi ta kuo teʻeki ai ke liʻaki ia ʻe he ʻEikí! Naʻá Ne foaki ange ha miniti ʻe 30 ke ne feohi ai mo Maeli kimuʻa peá ne mālōloó. Ko hono tāpuakí ia! Naʻe foaki ange haʻane miniti ʻe 30. Pea neongo ʻa e meʻa fakamamahi naʻá ne fouá, ka naʻe ongoʻi loto-mamahi ʻa Sasinitā maʻa Palesiteni Sāmita koeʻuhí he naʻe ʻikai ke ne maʻu ʻa e tāpuaki tatau ko ʻeni ʻo e feohi mo hono uaifí ʻi ha miniti ʻe 30.
ʻI he ʻaho ní, ʻoku lea ʻa Sasinitā ʻi he loto-fakatōkilalo fekauʻaki mo hono vā fetuʻutaki mo e Tamai Hēvaní. ʻOkú ne ongoʻi ʻokú Ne ʻi ai maʻu pē maʻana – peá ne vakai atu ki he ngaahi founga lahi naʻá Ne tokoniʻi ia mo fakaivia iá.
Naʻe foki mai ʻa e ʻofefine ʻo Sasinitā ko Palaniseé ki Haʻamoa he naʻe ako ia ʻi muli – pea naʻá ne hoko ko hono mālohinga. Naʻe fetuʻutaki maʻu pē ʻa e foha ʻo Sasinitā ko JR mo fakahā ʻene ʻofá mo e poupoú, pea fakahaaʻi ʻe hono mokopuna tangata lahí ha ʻofa lahi ʻaupito kiate ia.
ʻOku tukutaha ʻa e tokanga ʻa Sasinitaá ʻi he ongoongolelei ʻo Sīsū Kalaisi kuo fakafoki maí pea ʻoku hokohoko atu ʻene hoko ko ha ākonga ʻa Kalaisi. Ko ha faʻē mo ha kui fefine ia ʻoku ʻofeina lahi, pea ʻokú ne fiefia ʻi he ngāue maʻá e ʻEikí. ʻOkú ne kei ngāue taimi kakato pē ʻi he Potungāue Liliu Lea ʻa e Siasí, pea ko e Palesiteni ia ʻo e Kau Finemuí, ko ha faiako YSA, ko e faiako ʻInisititiuti ki he Teuteu Temipalé, pea mo e fai fakahinohino ki he Moʻui Fakafalala Pē Kiate Kitá. ʻOkú ne feinga longomoʻui ʻi hono ngaahi fatongia kotoa pē, ke ʻilo ha ngaahi founga ke tokoni ai ki he houʻeiki fafine ʻi hono uōtí mo fiefia ʻi hono akoʻi ʻo e Kau Finemuí ki he founga ke ngāué lolotonga hono fakatupulaki ʻenau ngaahi taukei fakatakimuʻá. ʻI Fēpuelí, naʻe tānaki ʻe he Kau Finemuí ha ʻū naunau haisini ke ʻave maʻá e kau uitou ʻi he uōtí ʻi he ʻAho Valenitainé, fakataha mo ha fanga kiʻi foʻi keke naʻe ngaohi mei ʻapi ʻe he kau ʻEtivaisá. Naʻe pehē ʻe ha uitou ʻe taha naʻá ne ongoʻi tāpuekina ʻi hono manatua iá. Naʻe hounga ki ha uitou naʻe toka fale, ʻa hono fakafiefiaʻi ia ʻe he Kau Finemuí peá ne fiefia ʻi heʻenau ʻaʻahi angé – ka ko e fakamamahí he naʻá ne mālōlō hili pē ha uike ʻe ua mei ai – ka kimuʻa peá ne mālōloó naʻá ne toe ongoʻi ʻa e ʻofa ʻa e ʻEikí, ʻo fakafou ʻi Heʻene kau sevānití.