« ឧបសម្ព័ន្ធ គ ៖ សម្រាប់អង្គការបឋមសិក្សា—សេចក្តីណែនាំសម្រាប់ម៉ោងច្រៀងចម្រៀង និងបទបង្ហាញរបស់កុមារនៅក្នុងម៉ោងប្រជុំសាក្រាម៉ង់ » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ ព្រះគម្ពីរមរមន ឆ្នាំ ២០២៤ ( ឆ្នាំ ២០២៣ )

« ឧបសម្ព័ន្ធ គ » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ ឆ្នាំ ២០២៤

ឧបសម្ព័ន្ធ គ

សម្រាប់អង្គការបឋមសិក្សា—សេចក្តីណែនាំសម្រាប់ម៉ោងច្រៀងចម្រៀង និងបទបង្ហាញរបស់កុមារនៅក្នុងម៉ោងប្រជុំសាក្រាម៉ង់

ចម្រៀងកុមារគឺជាឧបករណ៍ដ៏មានអានុភាព ដើម្បីជួយកុមារឲ្យរៀនអំពីផែនការនៃសុភមង្គលរបស់ព្រះវរបិតាសួគ៌ និងសេចក្ដីពិតជាមូលដ្ឋាននៃដំណឹងល្អរបស់ព្រះយេស៊ូវគ្រីស្ទ ។ នៅពេលកុមារច្រៀងអំពីគោលការណ៍នៃដំណឹងល្អ នោះព្រះវិញ្ញាណបរិសុទ្ធនឹងថ្លែងទីបន្ទាល់អំពីសេចក្ដីពិតដ៏ពេញលេញនៃគោលការណ៍ទាំងនោះ ។ ទំនុកច្រៀង និងតន្ត្រីនឹងដក់ជាប់ក្នុងគំនិត និងដួងចិត្តរបស់កុមារពេញមួយជីវិតរបស់ពួកគេ ។

សូមស្វែងរកជំនួយពីព្រះវិញ្ញាណ នៅពេលបងប្អូនរៀបចំបង្រៀនដំណឹងល្អតាមរយៈតន្ត្រី ។ សូមចែកចាយទីបន្ទាល់របស់បងប្អូនអំពីសេចក្ដីពិតដែលបងប្អូនកំពុងច្រៀង ។ សូមជួយកុមារឲ្យមើលឃើញពីរបៀបដែលតន្ត្រីទាក់ទងនឹងអ្វីដែលពួកគេកំពុងរៀន និងកំពុងដកពិសោធន៍នៅឯគេហដ្ឋាន និងក្នុងអង្គការបឋមសិក្សា ។

គោលការណ៍ណែនាំសម្រាប់ធ្វើបទបង្ហាញនៅក្នុងម៉ោងប្រជុំសាក្រាម៉ង់

ក្រោមការដឹកនាំរបស់ប៊ីស្សព ជាធម្មតាបទបង្ហាញរបស់កុមារនៅក្នុងម៉ោងប្រជុំសាក្រាម៉ង់ធ្វើឡើងអំឡុងពេលនៃត្រីមាសទីបួននៅក្នុងឆ្នាំនីមួយៗ ។ នៅក្នុងនាមជាគណៈប្រធានអង្គការបឋមសិក្សា និងជាអ្នកដឹកនាំតន្ត្រី សូមសហការគ្នាជាមួយនឹងទីប្រឹក្សានៅក្នុងគណៈប៊ីស្សព ដែលមើលការខុសត្រូវលើអង្គការបឋមសិក្សាដើម្បីរៀបផែនការធ្វើបទបង្ហាញនេះ ។

បទបង្ហាញនេះគួរអនុញ្ញាតឲ្យកុមារបង្ហាញអ្វីដែលពួកគេ និងក្រុមគ្រួសាររបស់ពួកគេបានរៀនចេញពីព្រះគម្ពីរមរមននៅឯផ្ទះ និងនៅក្នុងអង្គការបឋមសិក្សា រួមទាំងបទចម្រៀងអង្គការបឋមសិក្សា ដែលពួកគេបានច្រៀងនៅក្នុងឆ្នាំនេះផងដែរ ។ នៅពេលបងប្អូនរៀបផែនការធ្វើបទបង្ហាញនេះ សូមគិតពីវិធីជាច្រើនដែលវាអាចជួយក្រុមជំនុំឲ្យផ្តោតចិត្តទៅលើព្រះអង្គសង្រ្គោះ និងការបង្រៀនទាំងឡាយរបស់ទ្រង់ ។

អង្គភាពដែលមានកុមារតិច អាចពិចារណានូវវិធីនានា ដែលសមាជិកក្រុមគ្រួសារអាចចូលរួមជាមួយនឹងកូនៗរបស់ពួកគាត់ ។ សមាជិកម្នាក់នៅក្នុងគណៈប៊ីស្សពអាចបញ្ចប់ការប្រជុំនេះដោយការថ្លែងទីបន្ទាល់ខ្លីៗ ។

នៅពេលបងប្អូនរៀបចំបទបង្ហាញ សូមចងចាំគោលការណ៍ណែនាំដូចខាងក្រោម ៖

ការហាត់សមមិនគួរយកពេលមិនចាំបាច់ពីអង្គការបឋមសិក្សា ឬក្រុមគ្រួសារឡើយ ។
បទបង្ហាញជារូបភាព សម្លៀកបំពាក់ និងប្រព័ន្ធផ្សព្វផ្សាយផ្សេងៗគឺមិនសមរម្យចំពោះការប្រជុំសាក្រាម៉ង់នោះទេ ។

សូមមើល ក្បួនខ្នាតទូទៅ ៖ ការបម្រើនៅក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ១២.២.១.២ ។

សេចក្តីណែនាំសម្រាប់ម៉ោងច្រៀងចម្រៀង

៥ នាទី ( គណៈប្រធានអង្គការបឋមសិក្សា ) ៖ ការអធិស្ឋានបើក បទគម្ពីរ ឬមាត្រានៃសេចក្ដីជំនឿ និងការឡើងនិយាយរបស់កុមារម្នាក់

២០ នាទី ( អ្នកដឹកនាំតន្ត្រី ) ៖ ម៉ោងច្រៀងចម្រៀង

គណៈប្រធានអង្គការបឋមសិក្សា និងអ្នកដឹកនាំតន្ត្រីជ្រើសរើសចម្រៀងសម្រាប់ខែនីមួយៗដើម្បីពង្រឹងគោលការណ៍ដែលកុមារកំពុងរៀននៅក្នុងថ្នាក់ំ និងនៅឯគេហដ្ឋានរបស់ពួកគេ ។ បញ្ជីចម្រៀងមួយដែលពង្រឹងដល់គោលការណ៍ទាំងនេះមានដាក់បញ្ចូលនៅក្នុងសេចក្ដីណែនាំនេះ ។

នៅពេលបងប្អូនបង្រៀនបទចម្រៀងទៅដល់កុមារ សូមអញ្ជើញពួកគេឲ្យចែកចាយអ្វីដែលពួកគេបានរៀនរួចហើយអំពីដំណើររឿង និងគោលការណ៍ខាងគោលលទ្ធិដែលបទចម្រៀងនោះបង្រៀន ។ សូមអញ្ជើញឲ្យកុមារចែកចាយគំនិត និងអារម្មណ៍របស់ពួកគេអំពីសេចក្តីពិតដែលបានរកឃើញនៅក្នុងបទចម្រៀងទាំងនោះ ។

សៀវភៅចម្រៀងកុមារ គឺជាធនធានមូលដ្ឋានសម្រាប់តន្រ្តីនៅក្នុងអង្គការបឋមសិក្សា ។ ទំនុកតម្កើងមកពីសៀវភៅទំនុកតម្កើង និងចម្រៀងមកពីទស្សនាវដ្តី ប្រិយមិត្ត ក៏អាចប្រើប្រាស់បានផងដែរ ។ ការប្រើចម្រៀងផ្សេងទៀតនៅក្នុងអង្គការបឋមសិក្សាត្រូវតែមានការអនុម័តមកពីគណៈប៊ីស្សព ( សូមមើល ក្បួនខ្នាតទូទៅ ១២.៣.៤ ) ។

តន្ត្រីសម្រាប់ម៉ោងច្រៀងចម្រៀង

ខែ មករា

« រឿងនិទានក្នុងគម្ពីរមរមន » សៀវភៅចម្រៀងកុមារ ទំព័រ ៦២
« រក្សាបទបញ្ញត្តិ » សៀវភៅចម្រៀងកុមារ ទំព័រ៦៨–៦៩
« ដំបងដែក » ទំនុកតម្កើង ល.រ. ១៧២

ខែ កុម្ភៈ

« ភាពក្លាហានរបស់នីហ្វៃ » សៀវភៅចម្រៀងកុមារ ទំព័រ ៦៤–៦៥
« ខ្ញុំស្គាល់ក្តីស្នេហ៍ព្រះសង្រ្គោះ » សៀវភៅចម្រៀងកុមារ ទំព័រ ៤២–៤៣
« ជ្រើសផ្លូវត្រូវ » ទំនុតម្កើង ល.រ. ១៤៨

ខែ មីនា

« ខ្ញុំចូលចិត្តមើលព្រះវិហារបរិសុទ្ធ » សៀវភៅចម្រៀងកុមារ ទំព័រ ៩៩
« ពេលខ្ញុំបានជ្រមុជទឹក » សៀវភៅចម្រៀងកុមារ ទំព័រ ៥៣
« Easter Hosanna » Children’s Songbook ទំព័រ ៦៨–៦៩

ខែ មេសា

« ការអធិស្ឋានរបស់កុមារ » សៀវភៅចម្រៀងកុមារ ទំព័រ ៦–៧
« តើខ្ញុំបានធ្វើល្អឬទេ ? » ទំនុកតម្កើង ល.រ. ១៣៨

ខែ ឧសភា

« ចូរអ្នកស្រឡាញ់គ្នា » សៀវភៅចម្រៀងកុមារ ទំព័រ ៧៤
« ខ្ញុំនឹងធ្វើជាអ្នកក្លាហាន » សៀវភៅចម្រៀងកុមារ ទំព័រ ៨៥
« បិតាសូមជួយកូន » សៀវភៅចម្រៀងកុមារ ទំព័រ ៥២

ខែ មិថុនា

« ទីបន្ទាល់ » ទំនុកតម្កើង ល.រ. ៧៤
« យើងនឹងនាំការពិតទ្រង់ដល់លោកិយ » សៀវភៅចម្រៀងកុមារ ទំព័រ ៩២–៩៣
« ធ្វើតាមព្យាការី » សៀវភៅចម្រៀងកុមារ ទំព័រ ៥៨–៥៩

ខែ កក្កដា

« ខ្ញុំចង់ក្លាយជាអ្នកផ្សាយសាសនាពេលនេះ » សៀវភៅចម្រៀងកុមារ ទំព័រ ៩០
« ព្រះវរបិតាស្រឡាញ់ខ្ញុំ » សៀវភៅចម្រៀងកុមារ ទំព័រ ១៦–១៧
« ជំនឿ » សៀវភៅចម្រៀងកុមារ ទំព័រ ៥០–៥១

ខែ សីហា

« ពេលខ្ញុំស្វែងយល់គម្ពីរពិសិដ្ឋ » ទំនុកតម្កើង ល.រ. ១៥៩
« ផ្ទះជាស្ថានសួគ៌លើផែនដី » ទំនុកតម្កើង ល.រ. ១៨៥

ខែ កញ្ញា

« The Still Small Voice » Children’sSongbook ទំព័រ ១០៦–១០៧
« Samuel Tells of the Baby Jesus »Children’sSongbook ទំព័រ ៣៦
« ខ្ញុំព្យាយាមក្លាយដូចព្រះយេស៊ូវ » សៀវភៅចម្រៀងកុមារ ទំព័រ ៤០–៤១

ខែ តុលា

« ក្រុមគ្រួសារអាចនៅជាមួយគ្នាជានិរន្តរ » សៀវភៅចម្រៀងកុមារ ទំព័រ ៩៨
« សនាចក្រព្រះយេស៊ូវគ្រីស្ទ » សៀវភៅចម្រៀងកុមារ ទំព័រ ៤៨

ខែ វិច្ឆិកា

« ហ៊ាននឹងធ្វើត្រូវ » សៀវភៅចម្រៀងកុមារ ទំព័រ ៨០
« ខ្ញុំជឿលើព្រះគ្រីស្ទ » ទំនុកតម្កើង ល.រ. ៧៥

ខែ ធ្នូ

« ស្វែងរក គិត អធិស្ឋាន » សៀវភៅចម្រៀងកុមារ ទំព័រ ៦៦
« ផ្ទុំនៅក្នុងស្នូកទីឆ្ងាយ » សៀវភៅចម្រៀងកុមារ ទំព័រ ២៦–២៧
« ទ្រង់បញ្ជូនបុត្រាទ្រង់មក » សៀវភៅចម្រៀងកុមារ ទំព័រ ២០–២១

ការប្រើប្រាស់តន្រ្តីដើម្បីបង្រៀនគោលលិទ្ធិ

ម៉ោងចម្រៀងមានគោលបំណងដើម្បីជួយកុមារឲ្យរៀនអំពីសេចក្តីពិតនៃដំណឹងល្អ ។ គំនិតខាងក្រោមនេះអាចបំផុសគំនិតបងប្អូន នៅពេលបងប្អូនដាក់ផែនការពីរបៀបបង្រៀនគោលការណ៍ដំណឹងល្អដែលមាននៅក្នុងទំនុកតម្កើង និងចម្រៀងអង្គការបឋមសិក្សា ។

អានខគម្ពីរដែលទាក់ទងគ្នា ។ ចម្រៀងជាច្រើននៅក្នុង សៀវភៅចម្រៀងកុមារ និងសៀវភៅទំនុកតម្កើង មានសរសេរពីសេចក្តីយោងដែលមានទាក់ទងទៅនឹងបទគម្ពីរ ។ សូមជួយកុមារឲ្យអានវគ្គបទគម្ពីរមួយចំនួននេះ ហើយជជែកគ្នាពីរបៀបដែលបទគម្ពីរទាំងនេះទាក់ទងនឹងបទចម្រៀងនេះ ។ បងប្អូនក៏អាចសរសេរសេចក្តីយោងបទគម្ពីរពីរបីនៅលើក្តារខៀន ហើយអញ្ជើញកុមារឲ្យផ្គូផ្គងសេចក្តីយោងនីមួយៗទៅនឹងបទចម្រៀង ឬវគ្គណាមួយនៅក្នុងបទចម្រៀងបានផងដែរ ។

បំពេញចន្លោះ ។ សូមសរសេរវគ្គមួយនៃបទចម្រៀងនៅលើក្តារខៀនដោយលុបពាក្យគន្លឹះមួយចំនួនចេញ ។ បន្ទាប់មក សូមឲ្យកុមារច្រៀងចម្រៀងនេះ ដោយផ្ទៀងស្តាប់រកពាក្យដើម្បីបំពេញនៅក្នុងចន្លោះទាំងនោះ ។ នៅពេលពួកគេបំពេញនៅក្នុងចន្លោះនីមួយៗ សូមពិភាក្សាពីគោលការណ៍ដំណឹងល្អដែលបងប្អូនរៀនមកពីពាក្យដែលបាត់ទាំងនោះ ។

ថ្លែងទីបន្ទាល់ ។ សូមថ្លែងទីបន្ទាល់ខ្លីៗដល់កុមារអំពីសេចក្តីពិតនៃដំណឹងល្អ ដែលមាននៅក្នុងចម្រៀងអង្គការបឋមសិក្សា ។ សូមជួយកុមារឲ្យយល់ថា ការច្រៀងចម្រៀងគឺជាវិធីមួយដែលពួកគេអាចថ្លែងទីបន្ទាល់ និងទទួលនូវអារម្មណ៍នៃព្រះវិញ្ញាណ ។

ឈរជាសាក្សី ។ សូមអញ្ជើញឲ្យកុមារផ្លាស់ប្តូរវេនគ្នាក្រោកឈរ ហើយចែកចាយអ្វីដែលពួកគេរៀនចេញមកពីចម្រៀងដែលពួកគេកំពុងច្រៀង ឬអារម្មណ៍របស់ពួកគេអំពីសេចក្តីពិតដែលបានបង្រៀននៅក្នុងបទចម្រៀងនេះ ។ សូមសួរពួកគេថា តើពួកគេមានអារម្មណ៍យ៉ាងណា នៅពេលពួកគេច្រៀងចម្រៀងនេះ ហើយជួយពួកគេឲ្យស្គាល់ឥទ្ធិពលនៃព្រះវិញ្ញាណបរិសុទ្ធ ។

ប្រើប្រាស់រូបភាព ។ សូមឲ្យកុមារជួយបងប្អូនស្វែងរក ឬបង្កើតរូបភាពដែលត្រូវទៅនឹងពាក្យ ឬឃ្លាសំខាន់ៗនៅក្នុងបទចម្រៀងនេះ ។ សូមអញ្ជើញពួកគេឲ្យចែកចាយនូវរបៀបដែលរូបភាពទាំងនេះទាក់ទងទៅនឹងបទចម្រៀងនេះ ហើយថាតើបទចម្រៀងនេះបង្រៀនអ្វីខ្លះ ។ ឧទាហរណ៍ ប្រសិនបើបងប្អូនកំពុងបង្រៀនបទ « ដំបងដែក » ( ទំនុកតម្កើង ល.រ. ១៧២ ) នោះបងប្អូនអាចដាក់រូបភាពពេញបន្ទប់រៀន ឬនៅក្រោមកៅអីដែលពិពណ៌នាអំពីពាក្យសំខាន់ៗចេញមកពីបទចម្រៀងនោះ( ដូចជា ដំបងដែក បន្ទូលព្រះ នាំ ការល្បួង និង ស្ថានសួគ៌ ) ។ សូមឲ្យកុមារប្រមូលរូបភាពទាំងនេះ ហើយកាន់រូបភាពតាមលំដាប់លំដោយ នៅពេលបងប្អូនច្រៀងចម្រៀងនេះជាមួយគ្នា ។

ចែកចាយមេរៀនដោយប្រើវត្ថុ ។ បងប្អូនអាចប្រើវត្ថុដើម្បីបំផុសគំនិតឲ្យមានការពិភាក្សាអំពីបទចម្រៀងនេះបាន ។ ឧទាហរណ៍ បទចម្រៀង « ជំនឿ » ( សៀវភៅចម្រៀងកុមារ ទំព័រ ៥០–៥១ ) និយាយអំពីគ្រាប់ពូជតូចមួយ ។ បងប្អូនអាចបង្ហាញដល់កុមារនូវគ្រាប់ពូជមួយ ហើយនិយាយអំពីរបៀបដែលយើងបង្ហាញសេចក្តីជំនឿ នៅពេលយើងដាំគ្រាប់ពូជមួយ ។ ការធ្វើបែបនេះអាចនាំឲ្យមានការពិភាក្សាអំពីវិធីសាស្រ្តជាច្រើន ដែលយើងបង្ហាញសេចក្តីជំនឿលើព្រះយេស៊ូវគ្រីស្ទ ដូចដែលបានពិពណ៌នានៅក្នុងបទចម្រៀងនេះ ។

អញ្ជើញឲ្យចែកចាយបទពិសោធន៍ផ្ទាល់ខ្លួន ។ សូមជួយកុមារឲ្យភ្ជាប់គោលការណ៍ដែលបានបង្រៀននៅក្នុងបទចម្រៀងនេះ ទៅនឹងបទពិសោធន៍ដែលពួកគេបានមានជាមួយគោលការណ៍ទាំងនេះ ។ ឧទាហរណ៍ មុនពេលច្រៀងបទ « ខ្ញុំចូលចិត្តមើលព្រះវិហារបរិសុទ្ធ » ( សៀវភៅចម្រៀងកុមារ ទំព័រ ៩៩ ) នោះបងប្អូនអាចសូមឲ្យកុមារលើកដៃរបស់ពួកគេឡើង ប្រសិនបើពួកគេធ្លាប់បានឃើញព្រះវិហារបរិសុទ្ធ ។ នៅពេលពួកគេច្រៀង សូមអញ្ជើញពួកគេឲ្យគិតអំពីអារម្មណ៍ដែលពួកគេមាន នៅពេលពួកគេឃើញព្រះវិហារបរិសុទ្ធ ។

សួរសំណួរ ។ មានសំណួរជាច្រើនដែលបងប្អូនអាចសួរបាន នៅពេលបងប្អូនច្រៀងចម្រៀង ។ ឧទាហរណ៍ បងប្អូនអាចសួរកុមារថា តើពួកគេរៀនបានអ្វីខ្លះពីវគ្គនីមួយៗនៅក្នុងបទចម្រៀងនេះ ។ បងប្អូនក៏អាចសុំឲ្យពួកគេគិតអំពីសំណួរដែលចម្រៀងនោះឆ្លើយប្រាប់ផងដែរ ។ ការណ៍នេះអាចដឹកនាំទៅរកការពិភាក្សាមួយអំពីសេចក្ដីពិតដែលបានបង្រៀននៅក្នុងចម្រៀងនោះ ។

ប្រើកាយវិការដៃសាមញ្ញៗ ។ សូមអញ្ជើញឲ្យកុមារគិតពីកាយវិការដៃងាយៗដើម្បីជួយពួកគេឲ្យចងចាំពាក្យ និងសារលិខិតនៃបទចម្រៀងមួយ ។ ឧទាហរណ៍ នៅពេលបងប្អូនច្រៀងវគ្គទីពីរនៃបទ « ព្រះវរបិតាស្រឡាញ់ខ្ញុំ » ( សៀវភៅចម្រៀងកុមារ ទំព័រ ១៦–១៧ ) នោះបងប្អូនអាចអញ្ជើញកុមារឲ្យចង្អុលទៅភ្នែករបស់ពួកគេ ធ្វើដូចជាមេអំបៅ ហើយក្បង់ដៃរបស់ពួកគេដាក់ពីក្រោយត្រចៀករបស់ពួកគេ ។ សូមឲ្យពួកគេដាក់ដៃនៅលើដើមទ្រូងរបស់ពួកគេ កាលពួកគេច្រៀង « ខ្ញុំដឹងថាព្រះបិតាស្រឡាញ់ខ្ញុំ » ។