Sāpate Paame, 24 Māʻasí

Ko e Hāʻele Lāngilangiʻia ki Selusalemá

“Hosana ki he Foha ʻo Tēvitá: ʻOku monūʻia ia ʻoku haʻu ʻi he huafa ʻo [e ʻEikí]; Hosana ʻi ʻolunga” (Mātiu 21:9).

Naʻe hāʻele lāngilangiʻia ʻa Sīsū Kalaisi ki Selusalema lolotonga ʻoku taʻataʻalo ʻe Hono kau muimuí ʻa e ngaahi lauʻi pāmé mo fola honau ngaahi pulupulú ʻi Hono halá. Naʻa nau takatakai ʻia Sīsū ʻi he hiva mo e fakafetaʻi, mo kalanga “Hosana”—ko ha kupuʻi lea ʻoku ʻuhinga ke “fakahaofi kimautolu.” Naʻe ʻamanaki ha tokolahi ʻo e kau muimui ʻo Sīsuú te Ne fakahaofi kinautolu mei he lao ʻa Lomá, ka naʻe taʻengata ange ʻEne ngaahi taumuʻá. Naʻe ʻikai hāʻele mai ʻa Sīsū ki he māmaní ke fai ha fakahaofi fakapolitikale ka ke fakahaofi e faʻahinga kotoa ʻo e tangatá mei he angahalá mo e maté.

Te tau lava foki ʻo talitali lelei lahi ange ʻa Sīsū Kalaisi ki heʻetau moʻuí he uiké ni. Naʻe akoʻi ʻe ʻEletā Tieta F. ʻUkitofa ʻo pehē:

ʻOku feʻunga pē ke tau fakakaukau kia Sīsū Kalaisi, ko e tupuʻanga ʻo e māmá, moʻuí, mo e ʻofá ʻi he lolotonga ʻo e uiké mei he Sāpate Pāmé ki he pongipongi Toetuʻú. Mahalo naʻe lau Iau ʻe he kakai tokolahi ʻi Selusalemá ko ha tuʻi maʻongoʻonga Ia te Ne fakatauʻatāinaʻi kinautolu mei he ngaohikovia fakapolitikalé. Ka ko hono moʻoní naʻá Ne foaki ʻo lahi ange ai. Naʻá Ne foaki mai ʻEne ongoongoleleí, ko ha mataʻitofe ʻoku mahulu atu hono mahuʻingá, ko e kī maʻongoʻonga ʻo e ʻiló, ʻa ia ka mahino pea fakaʻaongaʻi, ʻokú ne fakaava ha moʻui ʻoku fiefia, nonga, mo fiemālie. (“Ko e Hala ʻo e Ākongá,” Liahona, Mē 2009, 75)

Lau pea Fakalaulauloto

• Mātiu 21:1–11

• Luke 19:29–44

Te ke fakaafeʻi fēfē nai ʻa Sīsū mo e fiefia mo e nonga ʻo ʻEne ongoongoleleí ki hoʻo moʻuí he uiké ni?

Mamataʻi

“Ko e Hāʻele Lāngilangiʻia ʻa e ʻEikí ki Selusalemá”