“Ko e Ngāue ʻi he Maama Tataliʻanga ʻo e Ngaahi Laumālié,” Palani Ako ki he Toetuʻú (2024)
Tokonaki, 30 Māʻasí
Ko e Ngāue ʻi he Maama Tataliʻanga ʻo e Ngaahi Laumālié
“Pea naʻa nau ʻalu, ʻo ngaohi ke maau ʻa e fonualotó, ʻo pulusi ʻa e maká, pea fakanofo ʻa e leʻo” (Mātiu 27:66).
ʻOku faingataʻa ke fakakaukauloto ki he mamahi naʻe ongoʻi ʻe he kau muimui ʻo Sīsū Kalaisí ʻi he ʻaho hili ʻEne pekiá. ʻI he pō kimuʻá, naʻe ʻosi teuteuʻi hono sinó ʻi he ʻofa pea tuku ʻi he fonualoto ʻi ha ngoue. Kuo tuku ʻeni kinautolu ke nau feinga ke ʻiloʻi e founga ʻe lava ke hoko atu ai ʻa e moʻuí ʻo ʻikai te Ne kau aí. Ko e moʻoni kuo toʻo ʻe Heʻene pekiá ha meʻa meiate kinautolu, ka ko e meʻa ne mole meiate kinautolú naʻe ʻikai faʻa fakatataua ia ki he meʻa kotoa kuo foaki ʻe Heʻene moʻuí. Pe naʻe mahino ia kiate kinautolu pe ʻikai, naʻe fokotuʻu ʻe Sīsū Kalaisi ha hala foʻou ke laka atu ai ki muʻa ʻa kinautolu kotoa pē ʻe muimui kiate Iá, ʻo fakamaama kinautolu ʻaki ʻa e ʻamanaki lelei ʻa ia ʻoku ulo ngingila ange ʻi ha fakapoʻuli kuo tau aʻusia.
Naʻe fakaafeʻi kitautolu ʻe Palesiteni M. Lāsolo Pālati ke tau ako ʻa e mata meʻa-hā-mai fakaofo ʻa Palesiteni Siosefa F. Sāmita fekauʻaki mo e ngāue fakafaifekau ʻa e Fakamoʻuí ʻi he maama tataliʻanga ʻo e ngaahi laumālié ʻa ia naʻe hoko hili hono Tutuki ʻo e Fakamoʻuí:
ʻOku ou fakaafeʻi kimoutolu … ke mou lau fakaʻauliliki mo fakakaukauʻi lahi ʻa e fakahaá ni. ʻI hoʻomou fai iá, ʻofa ke tāpuakiʻi kimoutolu ʻe he ʻEikí ke mahino kakato ange mo mou fakahoungaʻi e ʻofa ʻa e ʻOtuá mo ʻEne palani ʻo e fakamoʻuí mo e fiefiá maʻa ʻEne fānaú.
ʻOku ou fakamoʻoni ko e meʻa-hā-mai naʻe maʻu ʻe Palesiteni Siosefa F. Sāmitá ʻoku moʻoni. ʻOku ou fakamoʻoni ʻe lava ʻe he taha kotoa ke lau ia pea mo ʻiloʻi ʻoku moʻoni. (“Ko e Vīsone ʻo e Huhuʻi ʻo e Kau Pekiá,” Liahona, Nōvema 2018, 173; vakai Tokāteline mo e Ngaahi Fuakava 138)
Lau pea Fakalaulauloto
ʻOku tāpuekina fēfē nai koe mo ho fāmilí ʻe ha ʻilo ki he maama tataliʻanga ʻo e ngaahi laumālié mo e moʻui hili ʻa e maté?
Hiva
“Naʻá Ne Fekau Hono ʻAló,” Tohi Hiva ʻa e Fānaú, 20–21