“Ngaahi Akonaki fekauʻaki mo e Fakatomalá mo e Papitaisó,” Palani Ako ki he Toetuʻú (2024)
Tūsite, 26 Māʻasí
Ngaahi Akonaki fekauʻaki mo e Fakatomalá mo e Papitaisó
“ʻOku ou fakamoʻoniʻi kuo fekau ʻe he Tamaí ki he kakai fulipē, ʻi he potu kotoa pē, ke nau fakatomala pea tui kiate au. Pea ko ia ia ʻokú ne tui kiate au, mo papitaisó, ʻe fakamoʻui ia” (3 Nīfai 11:32–33).
Lolotonga e ʻaʻahi ʻa Sīsū Kalaisi ki he ongo ʻAmeliká, naʻá Ne akoʻi ʻa Nīfai mo e kau ākonga kehé fekauʻaki mo e papitaisó, ʻo folofola “ʻOku ou tuku kiate koe ʻa e mālohi ke ke papitaiso ʻa e kakaí ni ʻo ka hili ʻeku toe ʻalu hake ki langí” (3 Nīfai 11:21). Naʻe akoʻi ʻe Sīsū ʻoku totonu ke fakahoko ʻa e papitaisó ʻi he fakauku pea mo e mafai totonú. ʻI Heʻene akoʻi ʻEne tokāteliné ki he kau ākongá, naʻá Ne folofola foki ʻo fekauʻaki mo e mahuʻinga ʻo e fakatomalá: “Kuo pau ke mou fakatomala … pea hoko ʻo tatau mo ha kiʻi tamasiʻi siʻi, pe ʻe ʻikai te mou teitei maʻu ʻa e puleʻanga ʻo e ʻOtuá” (3 Nīfai 11:38).
ʻI he konifelenisi lahi ʻo ʻEpeleli 2019, naʻe akoʻi ai ʻe Palesiteni Lāsolo M. Nalesoni, ko e fakatomalá ʻa e founga ke liliu mo hoko ai ʻo lelei angé:
Ko e taimi ʻoku kole mai ai ʻa Sīsū kiate koe mo au ke ta “fakatomalá,” ko ʻEne fakaafe ia ke liliu ʻeta fakakaukaú, ʻeta ʻiló, hota laumālié—pea naʻa mo e anga ʻo ʻeta moʻuí. Ko ʻEne kole ia ke liliu e anga ʻo ʻeta ʻofá, fakakaukaú, ngāué, fakaʻaongaʻi hota taimí, tōʻonga ki hota [malí], akoʻi ʻeta fānaú, pea naʻa mo hono tokangaʻi hota sinó.
ʻOku hala ha meʻa ʻe toe fakatauʻatāina ange, fakaʻeiʻeiki ange, pe toe mahuʻinga ange ki heʻetau fakalakalaka fakafoʻituituí ka ko e tokanga fakaʻaho maʻu pē ki he fakatomalá. Ko e fakatomalá ʻoku ʻikai ko ha meʻa pē ʻoku hoko; ka ko ha ngāue. Ko e kī ia ki he fiefiá mo e nonga ʻo e ʻatamaí. Ko e taimi ʻoku fakatahaʻi ai mo e tuí, ʻoku malava leva ʻe he fakatomalá ʻo ʻai ke tau maʻu ʻa e mālohi ʻo e Fakalelei ʻa Sīsū Kalaisí. (“Te Tau Lava ʻo Fai Lelei Ange pea Toe Lelei Ange,” Liahona, Mē 2019, 67)
Lau pea Fakalaulauloto
Kuo akoʻi mai ʻe Palesiteni Nalesoni, ko e fakatomalá ʻa e “kī ki he fiefiá mo e nonga ʻa e fakakaukaú.” Kuo ʻomi fēfē nai ʻe he fakatomalá ʻa e ngaahi tāpuakí ni ki hoʻo moʻuí?
Mamataʻi
Hiva
“Ko Hoku Papitaisó,” Tohi Hiva ʻa e Fānaú, 54