“Lotoʻā pē Taha mo e Tauhisipi pē Taha,” Palani Ako ki he Toetuʻú (2024)
Tuʻapulelulu, 28 Māʻasí
Lotoʻā pē Taha mo e Tauhisipi pē Taha
“ʻOku ai mo ʻeku fanga sipi kehe ʻoku ʻikai ʻi he lotoʻaá ni; te u ʻomi mo kinautolu foki, pea te nau fanongo ki hoku leʻó; pea ʻe ʻi ai ʻa e lotoʻā pē taha, mo e tauhi pē taha (3 Nīfai 15:21).
Naʻe folofola ʻa Sīsū Kalaisi ki he kau Nīfaí ko kinautolu ʻa e “fanga sipi” naʻe ʻuhinga ki ai ʻi Heʻene akoʻi ʻi Selusalemá, “ʻOku ai mo ʻeku fanga sipi kehe ʻoku ʻikai ʻi he lotoʻaá ni; te u ʻomi mo kinautolu foki” (3 Nīfai 15:21). Naʻe fakahā ʻe Sīsū ʻi he ʻofa ʻe ʻi ai ʻa e “lotoʻā pē taha, mo e tauhi pē taha” peá ne kikite fekauʻaki mo hono tānaki fakataha ʻo ʻIsileli ʻi he ngaahi ʻaho kimui ní.
Ko e founga ʻe taha ʻe lava ke tau tokoni ai ki hono tānaki ʻo ʻIsilelí ko hono vahevahe e pōpoaki ʻo e Tohi ʻa Molomoná, ʻo hangē ko hono fakaafeʻi kitautolu ʻe ʻEletā Lainolo A. Lasipení:
Siʻoku ngaahi kaungāmeʻa ʻofeina, ʻi heʻeku hoko ko ha ʻAposetolo ʻa e ʻEikí, ʻoku ou fakaafeʻi kimoutolu ke muimui ki hotau palōfita ʻofeina ko Palesiteni Nalesoní, ʻi hono lomākiʻi ʻaki e māmaní e Tohi ʻa Molomoná. ʻOku fuʻu lahi e fiemaʻú; pea ʻoku fiemaʻu ke tau ngāue leva he taimí ni. ʻOku ou palōmesi atu te ke kau ʻi he “ngāue maʻongoʻonga taha ʻi he māmaní,” ko hono tānaki ʻo ʻIsilelí, ʻi hono tataki fakalaumālie koe ke tokoniʻi ʻa kinautolu kuo “kei taʻofi mei he moʻoní koeʻuhí he ʻoku ʻikai pē te nau ʻilo ʻa e feituʻu ke ʻiloʻi ai iá.” ʻOku nau fiemaʻu hoʻo fakamoʻoni ki he founga kuo liliu ai ʻe he tohí ni hoʻo moʻuí mo tataki koe ke ke ofi ange ki he ʻOtuá, ʻEne melinó,pea mo ʻEne “ongoongo ʻo e fiefia lahi.”
ʻOku ou fakamoʻoni naʻe fokotuʻutuʻu fakalangi ke teuteuʻi e Tohi ʻa Molomoná ʻi ʻAmelika ʻi he kuonga muʻá ke ʻomi ke ne fakahaaʻi e folofola ʻa e ʻOtuá, ke ʻomi ai ha ngaahi laumālie kia Sīsū Kalaisi mo ʻEne ongoongolelei kuo fakafoki mai “ʻi he ʻaho ní.” (“ʻI He ʻAho Ní,” Liahona, Nōvema 2022, 27)
Lau pea Fakalaulauloto
Ko hai te ke lava ʻo vahevahe ki ai e ongoongolelei ʻo Sīsū Kalaisí ʻi he faʻahitaʻu Toetuʻu ko ʻení? ʻE lava ke fakahoko ʻeni ʻi ha kiʻi ngāue faingofua pē ʻo e angaʻofá, vahevahe ha pōpoaki langaki moʻui, pe fakaafeʻi ha taha ke mo lotu fakataha ʻi he Sāpate Toetuʻu ko ʻení.
Mamataʻi
Hiva
“ʻOku ʻOfa ʻa e Tauhí,” Ngaahi Himí, fika 128