“Hā ʻa Sīsū Kalaisi ʻi he Ongo ʻAmelika ʻi he Kuonga Muʻá,” Palani Ako ki he Toetuʻú (2024)
Mōnite, 25 Māʻasí
Hā ʻa Sīsū Kalaisi ʻi he Ongo ʻAmelika ʻi he Kuonga Muʻá
“Vakai, ko au ko Sīsū Kalaisi, ʻa ia naʻe fakamoʻoniʻi ʻe he kau palōfitá ʻe haʻu ki he māmaní” (3 Nīfai 11:10).
Naʻe fakafeʻiloaki ʻe he ʻOtua ko e Tamaí Hono ʻAlo ʻOfaʻanga ko Sīsū Kalaisí ki he kau Nīfaí, pea fakaafeʻi kinautolu ke nau fanongo kiate Ia. Naʻe hāʻele hifo leva ʻa e Fakamoʻui kuo toetuʻú ʻo fakahā kuó Ne fakakakato ʻa e Fakaleleí pea kuó Ne “fai ai ʻa e meʻa kotoa pē kuo finangalo [ki ai] ʻa e Tamaí” (3 Nīfai 11:11). Naʻe fakaafeʻi ʻe he Fakamoʻuí ʻa e kau Nīfaí ke nau ala ki he ngaahi mataʻi faʻo ʻi Hono toʻukupú mo Hono toʻukupu kelekelé pea ke nau ʻiloʻi ʻiate kinautolu pē ʻa ʻEne Toetuʻu nāunauʻiá. Hili ʻenau fakahoko tahatahá, naʻa nau kaila, “Hōsana!” pea hū kiate Ia.
ʻI he konifelenisi lahi ʻo ʻEpeleli 2023, naʻe fakaafeʻi ai kitautolu ʻe ʻEletā Keuli E. Sitīvenisoni ke tau fakakaukau ki he founga ʻe lava ke fakalahi ai ʻe he talanoa ki he ngāue ʻa e Fakamoʻui kuo toetuʻú ʻi he Tohi ʻa Molomoná, ʻa ʻetau fakafiefia ʻi he Toetuʻú:
Fakakaukau atu ki he kau Nīfai ʻi he temipalé naʻa nau ala ki he toʻukupu ʻo e ʻEiki kuo toe tuʻú! ʻOku mau ʻamanaki ke ʻai ʻa e ngaahi vahe ko ʻeni ʻi he 3 Nīfaí ke hoko ia ko ha konga lahi ʻo ʻemau tukufakaholo ki he Toetuʻú ʻo hangē pē ko ʻemau tukufakaholo ʻi he Kilisimasí ʻi he Luke 2 Ko hono moʻoní, ʻoku ʻomi ʻe he Tohi ʻa Molomoná ʻa e talanoa maʻongoʻonga taha ʻo e Toetuʻú kuo talanoaʻí. ʻOua muʻa naʻa fakaliʻeliʻaki ʻa e talanoa maʻongoʻonga taha ʻo e Toetuʻú.
ʻOku ou fakaafeʻi koe ke ke sio ki he Tohi Molomoná ʻi ha maama foʻou mo fakakaukau ki he fakamoʻoni mahuʻinga ʻokú ne ʻomi ki hono moʻoni ʻo e Kalaisi kuo toe tuʻú kae ʻumaʻā ʻa e mahu mo e loloto ʻo e tokāteline ʻo Kalaisí. (“Ko e Talanoa Maʻongoʻonga Taha ʻo e Toetuʻú Kuo Talanoaʻí,” Liahona, Mē 2023, 8)
Lau pea Fakalaulauloto
Te ke muimui fēfē nai ki he fakaafe ʻa ʻEletā Sitīvenisoni ke “akoʻi ʻa e akonaki mo hono fakamanatua ʻo e Toetuʻu ʻa Sīsū Kalaisí, ko e talanoa ʻo e Toetuʻú ke potupotutatau, kakato mo e tukufakaholo fakalotu fakaʻofoʻofa ʻo hono ʻaloʻi ʻo Sīsū Kalaisí, ko e talanoa ʻo e Kilisimasí?” (“Ko e Talanoa Maʻongoʻonga Taha ʻo e Toetuʻú Kuo Talanoaʻí,” Liahona, Mē 2023, 6).
Mamataʻi
