“Fakamāuʻí, Tutukí, mo e Telió,” Palani Ako ki he Toetuʻú (2024)
Falaite, 29 Māʻasí
Fakamāuʻí, Tutukí, mo e Telió
“He kapau te mou fakamolemole ʻa e angahala ʻa e kakaí, ʻe fakamolemolea ʻa kimoutolu ʻe hoʻomou Tamai ʻi he langí” (Mātiu 6:14).
Hili ha fakamaauʻi fakapalataha, naʻe tauteaʻi ʻa Sīsū Kalaisi ke pekia ʻi hono tutukí. Naʻe manukiʻi mo fakamamahiʻi Ia ʻe he kau sōtia Lomá pea tutuki Ia ki he kolosí. Ka naʻe ʻikai ke fakahalaiaʻi kinautolu ʻe Sīsū Kalaisi, ka naʻá Ne kole ki Heʻene Tamaí ke “fakamolemole ʻa kinautolu; he ʻoku ʻikai te nau ʻilo ʻa ia ʻoku nau faí” (Luke 23:34). Naʻa mo e taimi faingataʻa taha ʻa Sīsuú, naʻá Ne folofola kau ki he ʻofá mo e huhuʻí. ʻI he tautapa fakaʻosi ʻa Sīsuú, naʻá Ne fakataufolofola ai ki Heʻene Tamaí. Naʻá Ne pehē, “Ko hono ngatá ia” (Sione 19:30). Naʻe maʻu ha fakamoʻoni taʻeʻamanekina mei ha ʻeikitau Loma pea mo kinautolu naʻe ʻiate iá: “Ko e moʻoni ko e ʻAlo eni ʻo e ʻOtuá” (Mātiu 27:54). ʻOku fakaofo tatau pē hono ʻiloʻi ʻi he ʻaho ní mo hono ʻilo ʻi he kuonga ko iá.
ʻI he 2022, naʻe fokotuʻu mai ʻe Palesiteni Lāsolo M. Nalesoni ke tau fakangata ʻa e fepakipaki ʻi heʻetau moʻui fakatāutahá pea fakamolemoleʻi mo fekumi ki ha fakamolemole ke tokoni ke tau pukepuke ha ivi fakalaumālie ʻoku leleí:
ʻOku ou toe kole atu ke ke fakangata ʻa e ngaahi fepakipaki ʻi hoʻo moʻuí. Fakaʻaongaʻi ʻa e anga fakatōkilaló, loto-toʻá, mo e mālohi ʻoku fakatou fiemaʻu ke fakahoko ʻaki ʻa e fakamolemolé mo e feinga ke maʻu mai ha fakamolemolé. …
… ʻOku ou fakaafeʻi atu kimoutolu mei he taimí ni ʻo aʻu ki ai, ke mou feinga ke fakangata ha faingaataʻaʻia fakataautaha kuó ne fakamafasiaʻi koe. ʻE ʻi ai nai ha ngāue ʻe feʻunga ange mo e loto-houngaʻia kia Sīsū Kalaisi mo ʻEne Fakaleleí? Kapau ʻoku ngali taʻe-malava ʻa e fakamolemolé ʻi he taimí ni, tautapa ki he mālohi ʻi he taʻataʻa fakalelei ʻo Sīsū Kalaisí ke ne tokoniʻi koe. ʻI hoʻo fai iá, ʻoku ou palōmesi atu te ke maʻu ha nonga fakataautaha pea vave fakafokifā mo ho ivi fakalaumālié. (“Ko e Mālohi ʻo e Ivi Fakalaumālié,” Liahona, Mē 2022, 99–100)
Lau pea Fakalaulauloto
Te ke lava fēfē nai ʻo fakamolemoleʻi lahi ange koe mo e kakai kehe ʻi hoʻo moʻuí?
Hiva
“ʻOku Fakaofo,” Ngaahi Himí, fika 102