“Fakafeʻiloaki ʻo e Sākalamēnití,” Palani Ako ki he Toetuʻú (2024)
Sāpate Toetuʻú, 31 Māʻasí
Fakafeʻiloaki ʻo e Sākalamēnití
“Pea kapau ʻoku mou manatu maʻu ai pē kiate au te mou maʻu hoku Laumālié ke ne ʻiate kimoutolu” (3 Nīfai 18:7).
Naʻe fakafeʻiloaki ʻe Sīsū ʻa e sākalamēnití ki he kakai ne fakataha mai ke fanongo kiate Iá. Naʻá Ne tāpuakiʻi ʻa e maá mo e uainé mo fakahinohinoʻi ʻEne kau ākongá ke ʻoatu ia ki he fuʻu kakai tokolahí. Naʻá Ne akoʻi leva, “Kapau te mou fai maʻu ai pē ʻa e ngaahi meʻá ni ʻoku mou monūʻia, he kuo mou langa ʻi heʻeku maká” (3 Nīfai 18:12). Neongo naʻe nounou pē ʻa e taimi ʻo Sīsū mo e kau Nīfaí, ka naʻá Ne tuku ha taimi ke toe tufaki ʻa e sākalamēnití ki he kakaí ʻi he ʻaho hono hokó, ʻa ia ʻokú ne fakahaaʻi ʻa e mahuʻinga ʻo e ouau ko ʻení.
Naʻe akoʻi ʻe ʻEletā Kēleti W. Kongo fekauʻaki mo e mahuʻinga hono manatua ʻo e Fakamoʻuí ʻo fakafou ʻi he ouau ʻo e sākalamēnití:
ʻOku tau fuakava ʻi heʻetau maʻu e sākalamēniti he uike takitaha, ke manatu maʻu ai pē kiate Ia. ʻOku tau maʻu ha ngaahi potufolofola ʻe meimei 400 tupu nai kau ki he foʻi lea ko e manatu, pea ko ha ngaahi founga ʻeni ʻe ono ʻe lava ke tau manatu maʻu ai pē kiate Ia.
ʻUluakí, ʻe lava ke tau manatu maʻu pē kiate Ia ʻi heʻetau loto falala ki Heʻene ngaahi fuakavá, talaʻofá mo e fakapapaú. …
Uá, ʻe lava ke tau manatu maʻu ai pē kiate Ia ʻi heʻetau fakahaaʻi ʻi he loto houngaʻia ʻa Hono toʻukupú ʻi heʻetau moʻuí. …
Tolú, te tau lava ʻo manatu maʻu ai pē kiate Ia ʻi heʻetau falala ki he fakapapau mai ʻa e ʻEikí, “Ko ia ia kuó ne fakatomala mei heʻene ngaahi angahalá, oku fakamolemoleʻi ia, pea ko au ko e ʻEikí, ʻoku ʻikai te u toe manatu ki ai” . …
Faá, ʻokú Ne fakaafeʻi kitautolu ke tau manatu ʻokú Ne talitali lelei maʻu pē kitautolu ki ʻapi. …
Nimá, te tau lava ʻo manatu maʻu pē kiate Ia ʻi he Sāpaté ʻi he sākalamēnití. …
Fakaʻosí, ko hono onó, ʻoku fakaafeʻi kitautolu ʻe hotau Fakamoʻuí ke tau manatu maʻu ai pē kiate Ia ʻo hangē ko ʻEne manatu maʻu pē kiate kitautolú. (“Manatu Maʻu Ai Pē Kiate Ia,” Liahona, Mē 2016, 108–10)
Lau pea Fakalaulauloto
Ko e fē ʻi he ngaahi fokotuʻu ʻa ʻEletā Kongó ʻokú ke ongoʻi ʻe ʻaonga taha kiate koe ke ke ʻuluaki ʻahiʻahiʻí?
Lekooti e Ngaahi Ongo ʻOkú ke Maʻú