“Ko e Toetuʻu ʻa Sīsū Kalaisí,” Palani Ako ki he Toetuʻú (2024)
Sāpate Toetuʻú, 31 Māʻasí
Ko e Toetuʻu ‘a Sīsū Kalaisí
“Koeʻuhí ʻoku ou moʻui, ʻe moʻui ʻa kimoutolu foki” (Sione 14:19).
Naʻe uhu hengihengi ʻa Mele Makitaline ko ha kaungāmeʻa mo e tokotaha muimui ʻo Sīsū Kalaisi, ki he fonualotó, ke tokangaʻi Hono sinó. Naʻá ne ofo ʻi heʻene ʻiloʻi ʻoku ʻikai ha taha ʻi he fonualotó. ʻI heʻene tangi kimui ange ʻi tuʻa ʻi he fonualotó, naʻe ui ia ʻe ha tangata—ʻa ia naʻá ne pehē ko e tangata tauhi ngoué. Ka naʻá Ne lea ʻaki hono hingoá, “Mele.” Pea naʻá ne mamata. Ko Sīsū Kalaisi ʻoku toe moʻui. Naʻe fuʻu fakaofo ke ne mapukepuke ʻa e ʻilo ko iá, naʻá ne lele leva ʻo tala ki he niʻihi kehé.
Ko ha fakamoʻoni ia ʻoku kei fakaofo pē he ʻahó ni. Te ke lava ʻo ʻilo, ʻo hangē ko Mele Makitaliné, ʻoku moʻui ʻa Sīsū Kalaisi. Koeʻuhí ko Ia, ʻe toe moʻui ʻa e tokotaha kotoa pē. Kapau te tau muimui ʻia Kalaisi, te tau lava ʻo maʻu ʻa e fiefia moʻoní ʻi he māmaní pea hanganaki atu ki he fiefia taʻengatá ʻi he moʻui ka hoko maí.
Naʻe akoʻi ʻe Palesiteni Tāleni H. ʻOakesi fekauʻaki mo e Toetuʻu ʻa Kalaisí ʻo pehē:
ʻOku ʻomi ʻe he toetuʻú ʻa e fakakaukau mo e ivi ke kātekina ʻa e ngaahi faingataʻa fakamatelie ʻoku fepaki mo kitautolu takitaha pea mo kinautolu ʻoku tau ʻofa aí. ʻOkú ne ʻomi ha founga foʻou ke vakai ʻaki ki he ngaahi tōnounou fakatuʻasino, fakaeʻatamai, pe fakaeloto ʻoku tau maʻu ʻi hotau fanauʻí pe maʻu ʻi he lolotonga ʻo e moʻui fakamatelié. ʻOkú ne ʻomi ha ivi ke tau kātekina ʻa e mamahí, ngaahi tōnounoú, mo e ngaahi loto-taʻefiemālié. Koeʻuhí kuo pau ke tau takitaha toetuʻu, ʻoku tau ʻilo leva ko e ngaahi tōnounou mo e ngaahi fakafepaki fakamatelié ni ʻoku fuonounou pē. (“Ko e Hā Kuo Fai ʻe Hotau Fakamoʻuí Maʻatautolú?,” Liahona, Mē 2021, 75)
Lau pea Fakalaulauloto
Ko e hā ha ngaahi ongo kuó ke aʻusia ʻi hoʻo fakakaukau ki he Toetuʻu ʻa Sīsū Kalaisí?
Mamataʻi
“Toetuʻu ʻa Sīsū”
“Koeʻuhí ko Ia: Ko ha Pōpoaki ʻi he Toetuʻú”
Hiva
“Kuo Toe Tuʻu ʻa e ʻEikí,” Ngaahi Himí, fika 109