“Fakamoʻui ʻo e Kakaí,” Palani Ako ki he Toetuʻú (2024)
Falaite, 29 Māʻasí
Fakamoʻui ʻo e Kakaí
“ʻOku ʻi ai ha mou niʻihi ʻoku puke ʻiate kimoutolu? … ʻOmi ʻa kinautolu ki heni pea te u fakamoʻui ʻa kinautolu, he ʻoku ou ʻofa mamahi kiate kimoutolu; ʻoku fonu hoku lotó ʻi he ʻaloʻofa” (3 Nīfai 17:7).
Hili ha ʻaho ngāue lahi, ʻi he ʻamanaki ke mavahe ʻa Sīsū mei he kau Nīfaí, naʻá Ne ʻafioʻi “ʻoku nau tangi” mo ʻikai ke nau loto ke Ne ʻalu (3 Nīfai 17:5). Ko e talí, naʻe foaki ange ʻe he Fakamoʻuí Hono mālohi faifakamoʻuí. Naʻá Ne folofola ange, “ʻOku fonu hoku lotó ʻi he ʻofa mamahi kiate kimoutolu,” peá Ne kole ke ʻomi ʻa e kakai mahakí kiate Ia. “Pea naʻá ne fakamoʻui ʻa kinautolu kotoa pē ʻi he ʻomi ʻa kinautolu kiate Iá” (veesi 9).
ʻOku pehē foki hono foaki mai ʻe Sīsū Kalaisi ʻa e ʻofa mo e fakamoʻui kiate kitautolu takitaha he ʻaho ní. Kuo akoʻi mai ʻe Palesiteni Lāsolo M. Nalesoni ko Sīsū Kalaisi ʻa e tali ki heʻetau ngaahi fehuʻí mo e ngaahi palopalemá. ʻI he lea ʻa Palesiteni Nalesoni fekauʻaki mo e fakaafe ʻa e Fakamoʻuí ke “tafoki mai kiate au, … ke u fakamoʻui ʻa kimoutolú” naʻá ne pehē:
ʻOku fakahoko atu ʻe Sīsū Kalaisi ʻa e fakaafe tatau kiate kimoutolu ʻi he ʻahó ni. ʻOku ou kōlenga atu ke mou haʻu kiate Ia ke Ne lava ʻo fakamoʻui ʻa kimoutolu! Te Ne fakamoʻui ʻa kimoutolu mei he angahalá ʻi hoʻomou fakatomalá. Te Ne fakamoʻui ʻa kimoutolu mei he loto-mamahí mo e ilifiá. Te Ne fakamoʻui ʻa kimoutolu mei he ngaahi kafo ʻo e māmani ko ʻení.
Ko e hā pē haʻamou ngaahi fehuʻi pe palopalema, ʻoku maʻu maʻu pē ʻa e talí ʻi he moʻui mo e ngaahi akonaki ʻa Sīsū Kalaisí. Ako lahi ange fekauʻaki mo ʻEne Fakaleleí, ʻEne ʻofá, ʻEne ʻaloʻofá, ʻEne tokāteliné, mo ʻEne ongoongolelei ʻo e faifakamoʻuí mo e fakalakalaká kuo fakafoki maí. Tafoki kiate Ia! Muimui ʻiate Ia! (“Ko Sīsū Kalaisi Maʻu Pē ʻa e Talí,” Liahona, Mē 2023, 127–28)
Lau pea Fakalaulauloto
Ko e fē ha taimi kuó ke ongoʻi ai e mālohi faifakamoʻui ʻo e Fakamoʻuí? Ko e hā ha ngaahi founga ʻe niʻihi ʻokú ke fiemaʻu ki ai Hono mālohi faifakamoʻuí he taimí ni?
Mamataʻi
Hiva
“Haʻu kia Sīsū,” Ngaahi Himí, fika 53