Maʻá e Kau Tokoní

ʻI he ʻaho ʻo e fakatahá:

• Text pe telefoni ki he kau mēmipa ʻo e kulupú kapau ʻokú ke maʻu ʻa e fakamatala fetuʻutaki kiate kinautolú. ʻEke pe ʻoku nau ō mai ki he fakatahá. Fakaafeʻi kinautolu ke nau vave mai ʻaki ha miniti ʻe 10 kimuʻa ke fakamoʻoni ʻi he pepa tali uí.

• Teuteuʻi ʻa e ngaahi nāunau ʻo e fakatahá:

  • ʻOmi ha tatau ʻo e tohi ngāue ko ʻení mo e kiʻi tohi Ko Hoku Fakavaʻé: Ngaahi Tefitoʻi Moʻoní, Taukeí mo e Tōʻonga Moʻuí maʻá e mēmipa takitaha ʻo e kulupú.

  • Teuteu ha founga ke huluʻi ai ʻa e ngaahi vitioó, kapau ʻe lava.

  • ʻIkai maʻu ʻa e ngaahi tohí pe vitioó? Te ke lava ʻo maʻu ia ʻi he ʻinitanetí ʻi he srs.lds.org.

  • ʻOmi ha tatau ʻo e Lisi ke Fili Mei Ai ʻi he Moʻui Fakafalala pē Kiate Kitá: (1) Lisi ke Fili Mei Ai ʻa e Ngaahi Ngāue ki he Moʻui Fakafalala Pē Kiate Kitá mo e (2) Lisi ke Fili Mei Ai ʻa e Ngaahi Akó mo e Ngaahi Polokalamá. ʻE lava ke ke maʻu ʻeni mei homou senitā fakasiteiki ki he moʻui fakafalala pē kiate kitá, mei ha mataotao ʻi he moʻui fakafalala pē kiate kitá, pe ʻinitanetí ʻi he srs.lds.org/pef.

table diagram

ʻI he miniti ʻe 30 kimuʻa ʻi he fakatahá:

• Fokotuʻu takatakai ʻa e ʻū seá ʻi ha tēpile koeʻuhí ke vāofi ʻa e tokotaha kotoa pē.

  • ʻOku ʻikai tuʻu ʻa e tokotaha tokoní ʻi he lolotonga ʻo e fakatahá pea ʻikai tangutu ʻi he ʻuluʻi tēpilé. ʻOku ʻikai totonu ke hoko ʻa e tokotaha tokoní ko e taha ia ke fai ki ai ʻa e tokangá ka ʻoku totonu ke ne tokoniʻi ʻa e kau mēmipa ʻo e kulupú ke nau fetokangaʻaki.

ʻI he miniti ʻe 10 kimuʻa ʻi he fakatahá:

• Talitali fiefia ʻa e kau mēmipa ʻo e kulupú ʻi heʻenau aʻu maí. Ako honau ngaahi hingoá

• ʻAve takai ha laʻipepa pea kole ki he kau mēmipa ʻo e kulupú ke nau hiki ai honau hingoa kakató, uōtí pe koló, mo e ʻaho fāʻeleʻí (ʻaho mo e māhiná, kae ʻikai ko e taʻú).

• Vahe ha tokotaha tauhi taimi ke ne fakapapauʻi ʻoku tauhi taimi ʻa e kulupú. Kole ki ai ke ne seti ʻa e uasí fakatatau mo e tuʻutuʻuni ʻi he tohí.

  • Hangē ko ʻení, te ke fakatokangaʻi ha fakahinohino ʻoku pehē “Taimí: Seti ʻa e uasí ke miniti ʻe 60 ʻa e konga ki he Akó.” ʻE seti ʻe he tokotaha tauhi taimí ʻa e taimi ko iá ʻi ha telefoni, uasi, pe ha meʻa tauhi-taimi pē ʻoku faingamālie pea te ne fakahā ki he kulupú ʻoku ʻosi ʻa e taimí. Pea fili pē ʻa e kulupú pe te nau kamataʻi ʻa e konga hono hokó pe hokohoko atu ʻenau fealēleaʻakí ʻi ha toe ngaahi miniti siʻi.

ʻI he ʻosi ʻa e fakatahá:

• Ka hili ʻa e fakataha fakakulupú, ʻalu ki he srs.lds.org/report ʻo muimui ʻi he ngaahi fakahinohinó ke lēsisita ʻa e kau mēmipa kotoa ʻo e kulupú.

• Ka hili ʻa e ʻuluaki fakatahá, faʻu ha lisi fetuʻutaki ke vahevahe mo e kulupú ʻi he fakataha ka hokó.

ʻI he taimi kamatá:

• Talaange: “ʻOku ou talitali lelei kimoutolu ki he kulupu moʻui fakafalala pē kiate kita ko ʻení.”

• Kole ki he kakaí ke tāmateʻi ʻenau telefoní mo e ngaahi meʻangāue kehé.

• Talaange ʻeni:

  • “Ko ha kulupu moʻui fakafalala pē kiate kita ʻeni ʻoku ui ko e Ako Koeʻuhí ko Ngāue lelei Ange.’ ʻOku mou ʻi hení kotoa ke ako lahi ange?

  • “Kapau ʻoku ʻikai te ke fie maʻu ha nō mei he Paʻanga Tokoni Fakaako Tuʻumaʻú, fakaʻofoʻofa! Kapau ʻokú ke fie maʻu ha nō PTFT, te ke mateuteu ke kamata ʻa e tohi kolé ʻi he hili ʻetau fakataha hono faá.

  • “Te tau fakataha tuʻo 12. Ko e fakataha kotoa pē ʻe meimei houa ʻe ua. Te tau toe fakamoleki foki mo ha houa ʻe taha ki he ua he ʻaho kotoa pē ke tauhi ʻetau ngaahi tukupā ko ia te ne tokoniʻi kitautolu ke tau hū ʻo ako pe ako ngāué. Te ke fie tauhi ʻa e tukupā ko ʻeni ki he taimí?”

• Fai ha fua lotu (mo e himi, kapau ʻe fie maʻu).

• Talaange ʻeni:

  • “Ko e taimi kotoa pē ʻoku tau fakataha ai, ʻoku tau kamata ʻaki ha tefito mei he kiʻi tohi ʻoku ui ko e Ko Hoku Fakavaʻé: Ngaahi Tefitoʻi Moʻoni, Taukeí mo e Tōʻonga Moʻuí. ʻOku tokoni ʻa e kiʻi tohi ko ʻení ke tau ako mo moʻui ʻaki ʻa e ngaahi tefitoʻi moʻoni, ngaahi pōtoʻi ngāue, mo e tōʻonga moʻui ʻoku fakatau ki he moʻui fakafalala fakalaumālie mo fakatuʻasino pē kiate kitá.”

• Seti ʻa e uasí ke miniti ʻe 20 ʻa e Ko Hoku Fakavaʻé.

• Lau ʻa e tohi talateu mei he kau Palesitenisī ʻUluakí ʻi he peesi 2 ʻo e Ko Hoku Fakavaʻé. Hili ia pea fakakakato ʻa e tefitoʻi moʻoni 1 ʻi he kiʻi tohí pea foki mai ki he tohi ngāue ko ʻení.

My Foundation cover