Ngaahi Maʻuʻanga Tokoní
Ko hono fili ʻo ha Ako pe Polokalama Ako Ngāué
Fili ʻa e ngaahi kongá pea fakatātaaʻi ʻa e meʻa ko ʻení.
KUEMI: ʻOku ou tui ʻoku sai ange ʻeku fakakaukau ki ha ngaahi ngāue ke u ʻaliaki ki aí.
KONISUELO: Te nau tokoni atu ke ke aʻusia hoʻo taumuʻa ngāue ke ke moʻui fakafalala pē kiate koé?
KUEIMI: Ko u tui pē ki ai. Ka ʻoku teʻeki ke u maʻu ʻa e pōtoʻi ngāue ke ne fakafeʻungaʻi au ki aí.
MEKALA: Ko ia. ʻOku tatau pē mo au, foki.
LŌPETI: Kuo pau pē ke tau ako pe ako ngāue lahi ange.
KONISUELO: Ka ʻi he lahi ʻo e ngaahi ʻapiako ke fili aí, te tau ʻilo fēfē ʻa e ʻapi ako ke tau ō ki aí? ʻOku fele e ngaahi fakamolé. Pea ʻe founga fēfē haʻatau ʻilo ʻoku nau lelei?
KUEMI: ʻOku ʻi ai ʻa e masiʻi ʻi homau uōtí ʻoku ako ʻi he New Age. Ko ha ʻapiako fakatekinikale. Mahalo te u ʻalu pē ki ai.
MEKALA: Kuó u sio ʻi ha ngaahi pousitā lahi ʻoku pehē ai ko e ʻunivēsiti ʻo e siteití ʻa e lelei tahá. Ka he ʻikai ke u teitei lava au ʻo hū ki ai.
LŌPETI: Pea kuó u fanongo ʻoku ʻi ai ha faingamālie lelei ange ke maʻu ha ngāue lelei kapau te ke ako ngāue pe kalasi ako ai.
KONISUELO: Ka ʻe anga fēfē haʻatau ʻilo ki ai?
KUEIMI: Te tau lava ʻo talanoa mo ha niʻihi ʻi he ngaahi ʻapi akó? Pe ko ha niʻihi kuo nau ʻosi mei aí?
MEKALA: ʻE faingataʻa ia. ʻOku ou kiʻi manavasiʻi au.
LŌPETI: Ka ko e meʻa mahalo ia ʻoku fie maʻu ke tau faí. ʻOku fie maʻu ke tau talanoa mo kinautolu ke ʻiloʻi pe ʻoku ʻosi ʻenau fānau akó pea maʻu haʻanau ngāue lelei. Kae fēfē leva ʻa e ngaahi fakamolé mo e ngaahi sikolasipí—ʻa e ngaahi meʻa fakapaʻanga kotoa ko iá? ʻOku ou tui ʻoku fie maʻu ke tau talanoa mo kinautolu. Pea mo kinautolu foki naʻe ako aí.
KONISUELO: Ta ō taua, Mekala. Ta fakahoko fakataha ia.
MEKALA: Fakaʻofoʻofa!
KUEMI: Ko ha fili lahi ʻeni—ki heʻetau paʻangá mo hotau kahaʻú. Mahalo ʻoku totonu ke tau lotu ki ai, foki. Pe kole ha tāpuaki ke tataki kitautolu. Naʻá ku ako ʻi heʻeku ngāue fakafaifekaú ʻe lava ke tataki kitautolu ʻe he ʻEikí.
MEKALA: ʻOku ou tui foki mo au ki ai. Mahalo ko e tuí ko ha konga lahi ia ʻo e meʻá ni. Tuí mo e ʻamanaki leleí pea mo ʻetau ngāué. ʻOku kamata ke u ongoʻi ʻoku fie tāpuakiʻi kitautolu ʻe he Tamai Hēvaní ʻi he meʻá ni.
LŌPETI: Pea ʻoua naʻa ngalo ʻiate kitautolu ʻa e Lisi ke Fili Mei Ai e Ngaahi ʻApiakó mo e Ngaahi Polokalamá. ʻOku ʻi ai ha ngaahi fakakaukau lelei ai fekauʻaki mo e ngaahi polokalamá mo e ngaahi pōtoʻi ngāué ke tokoni ke tau feʻunga ai ke maʻu ʻa e ngāue ʻoku fie maʻú. Mahalo ko e feituʻu ia ke tau kamata aí—ʻo tatau ai pē pe ʻoku tau fie maʻu ʻa e nō PTFT pe ʻikai.
Foki ki he peesi 29