« 1 : Ha’api’i mai », Te ’itera’a i te pūai i roto i te Fatu : Te ’āteura’a pae manava (2020)
« 1 : Ha’api’i mai », Te ’itera’a i te pūai i roto i te Fatu : Te ’āteura’a pae manava
Ha’api’i—’Eiaha ’ia hau i te : 60 minuti
1. E aha te ’āteura’a pae manava ?
Tai’o :
Nō te riro mai mai te Fa’aora ra te huru, e fa’aruru te mau ta’ata ato’a i te mau ’ā’ara’a ’e te mau fifi i roto i tō rātou orara’a. Nō te manuia ’ia vī te mau tāmatara’a o te orara’a nei, tītauhia te fa’aro’o ia Iesu Mesia ’e te ’āteura’a pae manava. Te ’āteura’a pae manava, o te ’itera’a ïa i te :
-
Ha’amātau i te mau ’ā’ara’a manava ma te itoito ’e te fa’aro’o ia Iesu Mesia, tō tātou ha’apūra’a.
-
Tauturu ia ’oe iho ’e ia vetahi ’ē ma tō ’outou pūai ato’a.
-
’Imi i te tahi atu ā tauturu ’ia hina’aro-noa-hia atu.
Te fā o teie ha’api’ira’a o te ha’apūaira’a ïa ia ’outou i te pae vārua ’e ’ia ’ite ’outou i te tahi mau ’aravihi niu nō te fa’aruru i te mau ’ā’ara’a ’e i te mau ’otora’a o te orara’a. E ha’api’i ato’a mai ’outou nā roto i te mau ’ite o te tahi atu mau melo o te pupu ’e e fāna’o ato’a ho’i i tā rātou turura’a.
Feruri :
’A ui ia ’oe iho, nō te aha ’outou e hina’aro ai ’ia mapu maita’i ’outou pae manava ? Pāpa’i i tā ’outou pāhonora’a i raro nei.
2. Fāri’i i te mau ’ā’ara’a ’ei tuha’a nō te ’opuara’a a te Atua nō tātou
Tai’o :
I roto i tōna ti’ara’a Metua nō tō tātou vārua, e Atua ’oia tei hau i te maita’i roa ra, te mana hope, ’e te ’ite i te mau mea ato’a ra. ’Ua here ’oia ia tātou tāta’itahi, ’e tō tātou haerera’a i mua o tāna ïa ’ohipa ’e tōna hanahana. Tāna ’opuara’a nō tātou, ’oia ho’i ’ia tupu ’e ’ia taui ē tae roa atu i te taime e riro mai ai tātou mai iāna ra te huru. Tē fa’ati’a nei ’oia ia tāmatahia tātou, ’e ’ia pāhono noa atu tātou ma te fa’aro’o, e ha’apūai ’e e tauturu te Fatu ia tātou ’ia tupu i te rahi nō te riro atu ā mai iāna ra te huru. E tauturu te ’āteura’a pae manava ia tātou ’ia fa’a’oroma’i ’e ’ia haere i mua nā roto i teie mau ’ā’ara’a.
« ’Aore e mauiui tā tātou e mamae, ’aore e tāmatara’a tā tātou e fa’aruru i te mea faufa’a ’ore. E riro rā te reira mau mea ’ei ha’api’ira’a ’e ’ei fa’anoa’ara’a ia tātou te mau pūai mai te fa’a’oroma’i, te fa’aro’o, te itoito ’e te ha’eha’a. Te mau mea ato’a tā tātou e mamae ’e e fa’aruru, i te taime ihoa rā e fa’a’oroma’i māite ai tātou, e patu te reira i tō tātou nāturara’a, e tāmā i te vi’vi’i o tō tātou ’ā’au, e fa’arahi i tō tātou vārua, ’e e fa’ariro ia tātou ’ei mea marū a’e ’e te ’aroha i te ta’ata … ’e e mea nā roto i te ’oto ’e te mamae, te ’ohipa ’e te mau ’ati, e noa’a ai ia tātou te ha’api’ira’a tā tātou i haere mai e ti’i i’ō nei » (Elder Orson F. Whitney, fa’a’itehia i roto i tā Spencer W. Kimball, Faith Precedes the Miracle [1972], 98).
Māta’ita’i :
« ’Ua hāmani ’oia i te hō’ē aora’i », e roa’a i ni’a i te https://churchofjesuschrist.org/study/video/self-reliance-videos [1:19].
Tāu’aparau :
Nāhea te mau ’ā’ara’a i te tauturura’a ia ’outou ia tupu i te rahi i roto i tō ’outou orara’a ?
3. Fa’a’ohipa i tō ’outou ti’amāra’a nō te ’ohipa ma te pa’ari
Tai’o :
Noa atu e tupu te mau mea ’ī’ino nā pīha’i ia tātou, e nehenehe ā tātou e mā’iti e nāhea ’ia pāhono. Te fāri’ira’a i te hōpoi’a o tō tātou mau huru ē tae noa atu i te fa’arurura’a i te mau ’ā’ara’a, nā roto i te reira e tae mai ai te hau ’e te mana.
’Ei mau tamari’i nā tō tātou Metua i te Ao ra, ’ua ha’amaita’ihia tātou nā roto i te hōro‘a o te ti‘amāra’a mōrare, te ’aravihi nō te rave i te ’ohipa ’e nō te mā’iti nā roto i te ti‘amā. Ma te mau i te ti’amāra’a, e feiā muhu ’outou ’e o vau nei, ’e e mea ti’a roa ia tātou, nā mua roa, ’ia rave i te ’ohipa ’eiaha rā e tīa’i ’ia fa’aue-roa-hia. Te ti’aturira’a ē, e nehenehe tā te hō’ē ta’ata ’e ’aore rā tā te hō’ē mea e fa’atupu i te ’ino’ino, te riri, te māuiui ’e ’aore rā te au ’ore, e tā’ōti’a te reira i tō tātou ti’amāra’a ’e e fa’ariro ho’i ia tātou ’ei tao’a muhu ’ore noa. ’Ei mau ti’a, e mana tō ’outou ’e ’o vau nei nō te ’ohipa ’e nō te mā’iti e nāhea tātou ’ia pāhono atu » (David A. Bednar, « And Nothing Shall Offend Them [’E ’aore roa e mea e fa’ahuru ’ē ia rātou] », Liahona, Novema 2006, 90).
E au ē, e mea tano ’ore te mau ’ā’ara’a ’aore rā te mau tauira’a mana’o-’ore-hia. E riro tātou i te hema ’ia pāhono ma te faufa’a ’ore ’e mai te ta’ata e’ita i te keresetiāno :
-
Pari ia vetahi ’ē
-
’Imi i te mau ’apera’a
-
’Ōrure hau
-
Amuamu
-
’Imi hape
-
Ti’aturi ’ore
-
Fa’aru’e
-
Fa’ataime
-
Ririra’a
-
’Imira’a ’ia arohia mai ’ōna
-
Vaiiho i te mata’u ’ia upo’oti’a
-
Fa’ati’a ia’na iho
Nō te mapu mai pae manava, tītauhia ’ia ’ite tātou i teie mau peu i roto ia tātou iho ’e ’ia fa’a’ohipa tātou i tō tātou ti’amāra’a nō te mā’iti i te hō’ē peu tano maita’i a’e.
Tāu’aparau :
I ’āfea ra tō ’outou fa’a’ohipara’a i tō ’outou ti’amāra’a nō te ’ohipa nā roto i te pa’ari ? E mea nāhea te reira i te tauturura’a ia ’outou ?
Māta’ita’i :
« Te mau mou’a e pa’i’uma », e roa’a i ni’a i te https://churchofjesuschrist.org/study/video/self-reliance-videos [5:05].
Tāu’aparau :
Noa atu ā tō rātou mau ’ā’ara’a, e aha tā te mau ta’ata i roto i te video i rave nō te vaiiho i te Fatu ’ia tauturu ia rātou ?
Tai’o :
« Te fa’aro’o ia Iesu Mesia, o te ’itera’a ïa ē nā roto i tāna tusia tāra’ehara, e fa’atītī’āifaro ’oia i te mau hape ato’a, e fa’aho’i fa’ahou mai ’oia i te mau mea ato’a i mo’e, ’e e tātā’i ’oia i te mau mea ato’a i parari ē tae noa atu i te ’ā’au. E fa’a’āfaro ’oia i te mau mea ato’a, ma te ’ore e vaiiho i te hiti hō’ē noa a’e mea ha’iha’i roa » (Lynn G. Robbins, « Be 100 Percent Responsible » [Brigham Young University devotional, 22 nō ’ātete 2017], speeches.byu.edu).
Tāu’aparau :
Nāhea te fa’aro’o ia Iesu Mesia e nehenehe ai e tauturu ia tātou ’ia fa’a’oroma’i maita’i i te ’ā’ara’a ?
4. Te mau ha’amaita’ira’a nō te tauira’a
Tai’o :
« I terā ’e i terā taime ’ua fa’aro’o pā’āto’a na tātou i te hō’ē fa’ahitira’a nō te parau pa’ari i mātauhia : ‘’Aita atu e mea tāmau a’e maori rā te tauira’a.’ I te roara’a o tō tātou orara’a, e fa’aruru tātou i te tauira’a. Tē vai ra ’o te fāri’i-poupou-hia, ’are’a te tahi ra ’aita. Tē vai nei te mau tauira’a i roto i tō tātou orara’a tei tupu tā’ue noa mai, mai te fa’aru’era’a mai te hō’ē tei herehia e tātou, mai te hō’ē ma’i mana’o-’ore-hia, mai te mo’era’a te hō’ē tao’a i poiherehia e tātou. Tē tupu nei rā te rahira’a o te mau tauira’a ma te matuaō ’e te marū » (Thomas S. Monson, « Te ’itera’a i te ’oa’oa i roto i te tere », Liahona, Novema 2008, 84).
Tē ha’apāpū mai nei te Fatu ia tātou ē, ’ia fa’aha’eha’a tātou ia tātou iho i mua Iāna, e tauturu ’oia ia tātou ’ia taui ’ei mea maita’i a’e. « ’E ’ia haere mai te ta’ata iā’u nei, e fa’a’ite atu vau ia rātou i tō rātou paruparu. Tē hōro’a nei au i te paruparu i te ta’ata nei ’ia tupu tō rātou ha’eha’a ; ’e e nava’i ho’i tō’u maita’i nō te feiā ato’a i fa’aha’eha’a ia rātou iho i mua iā’u nei ’e ’ia vai ho’i tō rātou fa’aro’o iā’u nei, ’ei reira vau e fa’ariro ai i te mau mea paruparu ’ei mea pūai nō rātou. » (Etera 12:27).
5. Fa’a’ite i te māuruuru i te mau mahana ato’a
Tai’o :
I roto i teie mau rurura’a pupu, te hō’ē o tā ’oe mau parau fafau i te hepetoma tāta’itahi, o te pāpa’ira’a ïa hō’ē a’e mea ’o tā ’oe e māuruuru nei i te mahana tāta’itahi. Te fa’a’itera’a i te māuruuru, tōna aura’a e’ita ïa tē huna nei ’outou ’aore rā tē tāu’a ’ore nei i te mau ’otora’a ’aore rā i te mana’o ha’aparuparu. Te aura’a ra, tē fā’i nei ’outou i te mau ha’amaita’ira’a tā tō tātou Metua i te Ao ra i hō mai nō ’outou. ’Ei hi’ora’a, penei a’e i tō te hō’ē hāmani-maita’i-ra’a mai ia ’outou ’aore rā i tō ’outou aura’a i te hō’ē mea tā ’outou i ’ite, i hau’a, i fa’aro’o, i fāfā, ’aore rā i tāmata.
Māta’ita’i :
« Te ’ā’au māuruuru i roto i te mau hete ato’a », e roa’a i ni’a i te https://churchofjesuschrist.org/study/video/self-reliance-videos [1:06].
Tāu’aparau :
’Āfea ra tō te ’ā’au māuruuru tauturura’a ia ’outou ’aore rā ia vetahi ’ē ’ia fāri’i i te ’oa’oa ?