Ha’api’i—’Eiaha ’ia hau i te 60 minuti

1. E aha te urupu’upu’u ’e te ahoaho ?

Tai’o :

E mau tuha’a matarohia te urupu’upu’u ’e te ahoaho i roto i te orara’a. Tē fa’a’ite nei teie mau ta’o i te mau rāve’a e pāhono ai te roro ’e te tino i te mau tītaura’a ato’a, mai te hō’ē fifi i te vāhi ’ohipara’a, te hō’ē hi’opo’ara’a i te fare ha’api’ira’a, ’aore rā te hō’ē fa’aotira’a faufa’a rahi. E nehenehe te mau fāito tano o te urupu’upu’u ’e te ahoaho e tauturu ia ’oe ’ia rōtahi, ’ia tāpae i tā ’oe mau fā, ’e ’ia pāruru i tō ’oe tino. ’Ei hi’ora’a, mai te mea tē vai ra tō ’oe urupu’upu’u nō ni’a i tā ’oe ’ohipa, e mea pāpū ē, e tae mai ’oe i te ’ohipa ma te ineine ’e te rōtahi i ni’a i tā ’oe mau ’ohipa.

Nā te urupu’upu’u ’e te ahoaho e fa’aoraora ia ’oe, terā rā, mai te mea e pinepine roa ’aore rā e maoro roa te urupu’upu’u ’e te ahoaho, e nehenehe te reira e fa’atupu i te mau fifi rahi, ’e e fa’atupu mai i te ma’i i te pae ferurira’a. Mai te mea ē, e fa’aruru rahi roa ’oe i te urupu’upu’u ’e te ahoaho, e nehenehe ’oe e ma’i-pinepine-hia, e māuiui te upo’o, e riri, e fārerei i te mau tauira’a rahi i roto i te hia’ai mā’a, ’aore rā e’ita e roa’a ’ia rōtahi i te mana’o.

E riro paha ’oe i te ha’amata i te tāhiti i tā ’oe ’ohipa, ’aore rā e’ita paha ’oe e hina’aro e haere i te ’ohipa nō te mea tē taiā ra ’oe ’o te tupu te hō’ē ’ohipa ’ino, ’aore rā ’aita e nava’i tō ’oe ’aravihi. E mau tāpa’o te reira e fa’a’ite mai ra ē, tē fāri’i ra ’oe i te hepohepo ’aore rā i te mau fāito ’ino o te urupu’upu’u ’e te ahoaho.

E nehenehe te urupu’upu’u ’e te ahoaho e ha’afifi i tō ’outou ti’ara’a ’ia fāri’i i te Vārua ’aore rā ’ia fa’ahuru-’ē i tō ’outou hāro’aro’ara’a i te mau muhumuhu pae vārua. ’Ua parau te tuahine Reyna I. Aburto, « Terā rā, mai te mea e ’oto tāmau noa tātou ’e mai te mea e tāpe’a tō tātou māuiui ’ia ’ite i te here o tō tātou Metua i te ao ra ’e o tāna Tamaiti ’e o te Vārua Maita’i, tei roto paha ïa tātou i te hepohepo rahi, te mana’o pe’ape’a, ’aore rā te tahi atu huru hepohepo » (« I roto i te ata ’e te mahana, e pārahi te Fatu i pīha’i iho iā’u ! » Liahona, Novema 2019, 57).

Tē fa’atumu nei teie pene i ni’a i te ha’api’ira’a ’ia arai maita’i a’e i te mau fāito mātarohia o te urupu’upu’u ’e te ahoaho. E nehenehe ’outou e ha’api’i mai ’ia ’ite i te taime tei roto ’outou i te urupu’upu’u ’aore rā i te ahoaho rahi ’e ’ia ’imi i te tauturu tano.

Tāu’aparau :

Nāhea te urupu’upu’u ’e te ha’ape’ape’a i te tauturura’a ’aore rā i te ha’amauiuira’a ia ’outou ?

2. Te hāro’aro’ara’a i te fāito o te urupu’upu’u

Tai’o :

Mai te mau fāito i ni’a i te tāpura pairatira’a ’o te hō’ē pere’o’o ’o tē fa’aha’amana’o ia ’outou ’ia tere marū, ’ia ha’apūai, ’aore rā ’ia hi’o i te mātini, te mau tāpa’o o te urupu’upu’u e mau tāpa’o ïa nō te fa’aha’amana’o ia ’outou ’ia haere marū, ’ia fa’a’ī i tō ’outou « fa’ari’i mōrī » pae vārua, ’e ’ia ’imi i te mau rāve’a ’āpī. Mai te mea e ha’a ’outou nō te fa’atere maita’i i tō ’outou urupu’upu’u, e riro te reira i te tauturu ’ia fa’ata’a i te urupu’upu’u i roto e maha fāito ta’a’ē. (Hi’o i te tāpura i roto i te ’ātivite i muri nei.)

’OHIPA E RAVE (5 minuti)

Ta’ahira’a 1 : ’A tai’o ’outou iho i nā fāito e maha o te urupu’upu’u. E riro paha ’outou i te ’ite i te mau fāito rau o te urupu’upu’u i terā ’e terā taime. E mana’o paha ’outou ē, tei te fāito puātou ’outou i teie mahana ’e i te fāito matie ananahi. Te rirora’a ’ei ta’ata pūai a’e i te pae mānava, e tauturu te reira ia ’outou ’ia ’ite pinepine a’e i te hō’ē fāito matie o te urupu’upu’u. ’A tāpa’o i te fāito e fa’ata’a maita’i a’e i tō ’outou huru i teie taime.

Fāito o te urupu’upu’u

	Mai te mea tē ’ite ra ’outou…	E aha te rave
Matie	Mai te mea tē ’ite ra ’outou… Ti’aturi Tāpura ’ohipa Ineine nō te pāhono i te mau tāmatara’a E nehenehe e ’āfaro ’e ’o vetahi ’ē E nehenehe e fāri’i ’ōhie i te Vārua	E aha te rave Teie te fāito tā te ta’ata e hina’aro ’ia vai i roto, terā rā, e mea mātarohia ’ia tauiui noa. ’A tāmau ā. I roto i te fāito matie, tē arai ra ’outou i te urupu’upu’u o te mau mahana ato’a o te ’utuāfare, te ’ohipa, te ’apora’a, ’e te haerera’a i mua ma te maita’i.
Re’are’a	Mai te mea tē ’ite ra ’outou… Mana’o hau ’ore Māna’ona’o Pe’ape’a Pāruru ’ore Fifi nō te fa’ahoa ia vetahi ’ē Nevaneva i te fāri’ira’a i te Vārua	E aha te rave E mea mātarohia ’ia vai i te tahi taime i ni’a i te fāito re’are’a ’A fa’a’ite i te maita’i i ni’a ia ’outou iho ’ia fāri’i ana’e ’outou i te mau tāmatara’a o te orara’a. ’A ’āmui atu i roto i te mau ’ohipa ha’amāhara’a i te rohirohi, mai terā e hōro’ahia ra i roto i teie pene, nō te tauturu ’ia fa’arahi i tō ’outou ti’ara’a ’ia ārai i te urupu’upu’u.
Puātou	Mai te mea tē ’ite ra ’outou… Rohirohi (i te pae tino ’e i te pae manava) Teimaha ’Ua ma’ihia (’ei hi’ora’a, e māuiui ’ōpū) Riri ’ōhie noa Ha’aparuparu mai roto roa mai Te fifi ’ia fāri’i i te Vārua	E aha te rave ’Aita e ta’ata e ’oa’oa i roto i te urupu’upu’u fāito puātou, ’aita rā te reira i tītauhia ’ia vai tāmau noa. Fa’aō i roto i te mau ’ātivite tāmarūra’a i te tino ’e ’a ha’amana’o i te mau ’itera’a maita’i. Mai te mea ē, e fa’aea noa ’outou i ni’a i te fāito puātou hau atu i te tahi tau mahana ’aore rā ’ua teimaha roa ’outou, ’a ani i te tauturu.
’Ute’ute	Mai te mea tē ’ite ra ’outou… Te teimaha-tāmau-ra’a Fa’aātea-’ē-ra’a ia vetahi ’ē ’Aita e ti’aturira’a fa’ahou Fifi nō te ’amu i te mā’a ’aore rā nō te ta’oto mai tei mātarohia E’ita e nehenehe e tāmau noa Mai te huru ē, ’ua fa’aru’ehia ’outou e te Atua	E aha te rave Mai te mea tei ni’a ’outou i te reira fāito, ’a ani i te tauturu. Mai te mea e ti’a ia ’outou, ’a feruri ’ia fa’afa’aea ri’i ’aore rā ’ia rave i te hō’ē ’ohipa ’o tē tauturu ia ’outou i te pae mānava, ē tae roa atu i te taime e fārerei ai ’outou i te hō’ē ta’ata tōro’a nō te ea.

Ta’ahira’a 2 : ’A feruri na i te mau taime tei ni’a tō ’outou fāito urupu’upu’u i te fāito matie. E aha te mea i tauturu ia ’outou ’ia fāri’i i te reira huru ?

Ta’ahira’a 3 : ’Ei pupu, ’a tāu’aparau nō ni’a i tā ’outou mau pāhonora’a i roto i te ta’ahira’a 2.

Tai’o :

Te feiā e fifi tō rātou ’ia arai i te orara’a i te mau mahana ato’a, penei a’e e fifi tō rātou i te pae ea. E nehenehe te hō’ē fifi rū e tu’u tā’ue noa ia ’outou i roto i te hō’ē fāito urupu’upu’u puātou ’aore rā ’ute’ute. E ti’a i te ta’ata ’ia ’imi ’oi’oi i te tauturu a te feiā tōro’a mai te mea ē, e mana’o rātou e’ita tā rātou e nehenehe e fa’aruru ’aore rā mai te mea e fa’a’ohipa rātou i te mau rā’au ta’ero. Te feiā e mana’o ’ōnohi tō rātou, e haere rātou i te piha rū nō te fare ma’i fātata roa a’e, ’e e fārerei rātou i to rātou ’utuāfare, te hō’ē hoa, ’aore rā i tō rātou ’episekōpo ’aore rā i te tahi atu ti’a fa’atere o te ’Ēkālesia. Hi’o suicide.ChurchofJesusChrist.org nō te mau rēni tauturu ’e te mau rāve’a tauturu.

E nehenehe te mau ta’ata ato’a i Amerika Apato’erau e pi’i i te rēni āraira’a i te ’ōnohi 1-800-273-8255.

3. Fa’a’ohipa i te ’itera’a mau nō te fa’aiti i te urupu’upu’u

Tai’o :

E nehenehe te urupu’upu’u ’e te mau ferurira’a tano ’ore e ha’avī ’e e fa’ahuru-’ē i tō ’outou mau mana’o. E nehenehe tō ’outou ferurira’a e ’overe, ’aore rā e nehenehe ’outou e hi’opo’a ’e e fa’atumu i ni’a i te tahi mea ’eiaha rā i ni’a i te ’ohipa e tupu ra ’ati a’e ia ’outou.

Te ’ite-pāpū-ra’a ’o te hō’ē ïa ’aravihi ’o tē tauturu ia ’outou ’ia rahi atu te pa’ari i te pae manava. ’O te ha’apa’o-maita’i-ra’a ïa i te mea tā tō ’outou tino e parau nei ia ’outou i ’ō nei ’e i teienei. E nehenehe te reira e fa’aiti i te urupu’upu’u ’e i te ahoaho ’e e fa’arahi ho’i i tō ’outou mana’o maita’i ’e te ti’aturi. E tauturu ato’a te ’ite-pāpū-ra’a ia ’outou ’ia ha’apae i te fa’arahi i te ha’a ’aore rā i te ha’ape’ape’a roa i mua i te ’ohipa e tupu ra ’ati a’e ia ’outou.

Tāu’aparau :

E aha te mea e tauturu ia ’outou ’ia rōtahi, noa atu ē, tē urupu’upu’u ra ’outou ?

Feruri :

I ni’a i te hō’ē fāito mai te 1 ē tae atu i te 10, mai te aha te huru urupu’upu’u e tupu ra i roto iā’u i teie iho taime ?

’OHIPA E RAVE (5 minuti)

Fa’ata’ara’a a te ti’arautī : Mai te mau ’ohipara’a ato’a, ’eiaha e taui ’aore rā e ha’amaita’i atu i teie ’ātivite. ’A tai’o noa i te mau ta’ahira’a nō teie ’ohipara’a ma te reo hau ’e ma te marū e nehenehe te mau melo o te pupu e māramarama ia ’outou.

I roto i teie ’ohipa ta’a maita’i, e ha’api’ipi’i ’outou i te vai ha’uti-’ore-ra’a. E hi’ora’a noa teie ’ohipara’a. E tai’o te ti’arautī i te mau ta’ahira’a i raro nei ’a pe’e ai te mau melo o te piha ha’api’ira’a.

’A tahi : ’A pārahi i te hō’ē vāhi au maita’i i reira ’outou e fa’aea noa ai ma te ha’uti ’ore nō te tahi tau minuti. (Mai te mea e rave ’outou i te reira i te fare, e nehenehe ’outou e pārahi ’aore rā e tārava.) ’A tāpiri i tō ’outou mata.

’A piti : Ha’amata nā roto i te ravera’a e rave rahi hutira’a aho maoro, ’e te marū ma te huti hope roa i te aho nā roto i tō ’outou ihu ’e te fa’aru’e-hope-roa-ra’a nā roto i te vaha. ’A vaiiho i tō ’outou hutira’a aho ’ia ’imi i tōna iho tomara’a mātarohia. ’A hi’o maita’i i te huru o tō ’outou māhāhā ’ia ’oru ’e ’ia topa ’a huti ai ’outou i te aho ’e ’a fa’aru’e ai. Mai te mea ē, e orihaere tō ’outou ferurira’a i ni’a i te tahi atu mau mea, ’eiaha e ha’ape’ape’a, e tupu iho ā te reira. Mai te mea ē, e nevaneva ’outou, a hi’o noa i te mau huru mana’o, te mau ferurira’a ’e te mau ’itera’a e fa’anevaneva ia ’outou. ’A hi’opo’a i te reira ma te tāmata ’ore i te ha’avī ’aore rā i te ha’avā i te reira, ’e ’a fa’aho’i noa mai i tō ’outou ferurira’a i ni’a i tō ’outou hutira’a aho. E hōro’a mai tō ’outou hutira’a aho i te hō’ē tūtau i reira ho’i ’outou e ho’i fa’ahou ai nā ni’a iho noa.

’A toru : ’A ha’amātau ’ia ’outou ’ia vai noa i ni’a i tō ’outou hutira’a aho. Fa’ahou ā, mai te mea e orihaere tō ’outou ferurira’a, a hi’o maita’i i te mau mana’o, te mau ferurira’a, ’e te mau ’itera’a e fa’anevaneva ia ’outou ’e e vaiiho i te reira ’ia haere i mua ia ’outou mai te mau ānuanua i roto i te ra’i. ’A huti i te aho ma teie hi’ora’a ātea nō te hō’ē minuti.

’A maha : I te hope’a o teie ’ohipara’a, ’a vaiiho marū noa i tō ’outou arara’a ’ia tupu i te rahi, ’e ’a ha’apa’o maita’i i tō ’outou tino ’e i te piha e hā’ati ra ia ’outou. ’Ia ineine ana’e ’outou, ’a ’ara’ara i tō ’outou mata ’e ’a hi’o maita’i fa’ahou i te vāhi e hā’ati ra ia ’outou. ’A ha’amana’o ē, te hutira’a aho, ’o te hō’ē ïa mauha’a e nehenehe e tauturu ia ’outou ’ia tāmarū i te tino ’e ’ia vai mai i reira i te mau taime ato’a.

’A pae : ’Ia fāitohia mai te 1 ē tae atu i te 10, e aha te fāito o tō ’outou urupu’upu’u i teie taime.

Tāu’aparau :

’Ua tauturu ānei te ferurira’a ’ia fa’aiti mai i te fāito o tō ’outou urupu’upu’u ?

Mana’o :

E nehenehe ’outou iho e tū’ao’ao i te ferurira’a i te mau taime ato’a. ’A feruri ’ia ha’api’i rahi atu ā nō ni’a i te ’itera’a mau ’e te tahi atu mau rāve’a nā roto i te fa’a’ohipara’a i te mau rāve’a tauturu i te pae hope’a o teie pene.

4. Te fāri’ira’a i te mana Atua

Māta’ita’i :

« Fa’atoro atu iāna ma te fa’aro’o », e roa’a i ni’a i te https://churchofjesuschrist.org/study/video/self-reliance-videos [3:54].

Reach Up to Him in Faith

President Russell M. Nelson teaches that just as the woman who was healed by touching the robe of Jesus, we can receive strength and direction by reaching out to Him as well.

Tai’o :

’Ua ha’api’i te peresideni Dallin H. Oaks i te ti’ara’a o te Mesia nō te ha’apūai ia tātou i roto i te mau huru tupura’a ato’a tā tātou e fa’aruru nei : « Nō reira, ’ua ’ite ’oia i tā tātou tauto’ora’a, tō tātou ’ā’au māuiui, tō tātou mau fa’ahemara’a, ’e tō tātou mau māuiui, nō te mea, nā roto i tōna iho hina’aro, ’ua ora ’oia i te reira mau mea ato’a ’ei tuha’a faufa’a nō tāna tāra’ehara. ’E nā roto i te reira, ’ua horo’a tāna tāra’ehara i te mana i roto iāna nō te fa’aora ia tātou—nō te hōro’a mai i te pūai i roto ia tātou nō te amo i te tā’āto’ara’a o te reira…

« …’Ua hau atu tā te tāra’ehara o te Fa’aora e rave i te ha’apāpū-noa-ra’a ia tātou i te tāhuti ’ore, nā roto i te hō’ē ti’afa’ahoura’a nō te tā’āto’ara’a ’e te hōro’ara’a ia tātou nei i te rāve’a e tāmāhia ai tātou i te hara nā roto i te tātarahapa ’e te bāpetizora’a. E hōro’a ato’a mai tāna tāraehara ia tātou i te rāve’a nō te ti’aoro iāna, ’oia tei fāri’i i tō tātou mau paruparu ato’a nō te fa’aora ia tātou ’e nō te hōro’a mai ia tātou i te pūai nō te amo i te mau hōpoi’a o te tāhuti nei. ’Ua ’ite ’oia i tō tātou horuhoru, ’e tei reira ’oia nō tātou. Mai te ta’ata Sāmāria hāmani maita’i ra, ’ia ’ite ’oia ia tātou i te hiti purūmu, e rāpa’au ’oia i tō tātou pēpē ’e e aupuru ia tātou (hi’o Luka 10:34). Te mana fa’aora ’e te ha’apūai o Iesu Mesia ’e tāna tāra’ehara, nō tātou pā’āto’a ïa ’o tē ani » (« Ha’apūaihia e te tāra’ehara a Iesu Mesia », Liahona, Novema 2015, 62, 64).

Tāu’aparau :

Nāhea te ha’amana’ora’a i te Fa’aora i te mau taime ato’a e nehenehe ai e tauturu ia ’outou ’ia tupu ana’e te urupu’upu’u ’e te ahoaho ?

’OHIPA E RAVE (10 minuti)

’A tahi : ’A tai’o ’outou iho i te mau rāve’a i muri nei ’ia tupu ana’e te urupu’upu’u ’e te ahoaho. ’A ha’a’ati i te mau mana’o tā ’outou e hina’aro e tāmata.

1. ’A paraparau i te Atua. ’Ia ’ite ’outou ē, tē hāro’aro’a nei ’oia. ’A feruri na iāna tē pārahi ra i pīha’i iho ia ’outou, ma te fa’aro’o ’e te pūpū i te pāturura’a.

2. Feruri. ’A feruri i te mau taime a fāri’i ai ’outou i te ha’amaita’ira’a a te Fatu ’e te ’itera’a i tōna rima ’e tōna aroha i roto i tō ’outou orara’a. « ’A fa’atupua na, ’ia ’ite mai ē, ’о vau te Atua » (Salamo 46:10

3. ’A hi’o i tā ’outou mau tītaura’a. I te tahi taime, e tae mai tā tātou mau ha’ape’ape’ara’a ’e te urupu’upu’u rahi a’e i te taime ’aita te orara’a e tere ra mai tā tātou i ti’aturi ’aore rā mai tā tātou i fa’anaho. E nehenehe tā tātou e ha’api’i mai nā roto mai i tō tātou mau ’itera’a pe’ape’a. « E noa’a ia ’oe te ’ite na roto i teie mau mea ato’a, ’e e riro ho’i ïa ’ei maita’i nō ’oe nā… Nō reira, ’a tāmau noa na ’oe i tō ’oe haere’a » (Te Ha’api’ira’aTumu ’e te mau Fafaura’a 122:7, 9).

4. Fa’afa’aea ri’i. ’A rave e rave rahi mau hutira’a aho marū ’e te hohonu, ’a hutihuti i te rima ’e ’a tāmarū i te tino. ’Ia marū fa’ahou ana’e tō ’outou tino, e ti’a ïa ia ’outou ’ia feruri māramarama atu ā. ’A hāhaere, ’a ’amu i te tahi mā’a ’aore rā, ’a inu i te pape, ’aore rā, ’a pārahi noa ’e ’a feruri nō te tahi tau minuti.

5. ’Ia ’ite ’outou i te taime e tupu ai te urupu’upu’u i ni’a ia ’outou. I te tahi taime e’ita ’outou e ’ite ē, te tupu ra te urupu’upu’u. E fārerei paha ’outou i te fifi nō te ta’otora’a, te riri ’ōhie, te ’aravī, ’aore rā ’aita tō ’outou e pūai rahi. ’A hi’opo’a ia ’outou iho hō’ē a’e taime i te mahana nō te ’ite e aha tō ’outou huru.

6. Rōtahi i ni’a i te ’ā’au mehara. ’A hi’o e aha te mea e hā’ati ra ia ’outou. ’A rōtahi nō te tahi tau minuti i ni’a i te mau mea ti’a, te mau mea ’āfaro, ’e te mau mea maita’i nō ni’a ia ’outou iho ’e nō ni’a i te ao. ’A ha’amata i te pāpa’i i te hō’ē buka ’ā’amu ’ā’au mēhara, ’e ’a pāpa’i e pae a’e mau mea ta’a ’ē tā ’outou e māuruuru nō te mahana tāta’itahi.

7. ’Ia itoito. ’Ua hōro’ahia mai ia tātou te hō’ē tino ’e te hō’ē ao ’ia fāna’o. ’A hāmani i te hō’ē fa’anahora’a nō te fa’a’ohipa i tō ’outou tino nō te haere e fāna’o i teie mau hōro’a. E nehenehe ato’a te tahi nau minuti hāhaerera’a e tauturu i te fa’aitoito i tō ’outou huru ’e ’ia fa’aiti i te urupu’upu’u.

8. Fa’aiti i te fa’a’ohipa i te ihi anoa ha’a. Nā roto i te fa’a’ohipara’a i te mau rāve’a tūreiara’a tōtiare, te mau mātini roro uira ’e te mau ’āfata teata, i te ha’amatara’a iho ā rā ’e i te hope’a o te mahana, e nehenehe te reira e fa’arahi i te mau mana’o ahoaho ’e te urupu’upu’u. ’A tāmata i te ha’amata ’e i te fa’aoti i tō ’outou mahana ma te niuniu ’ore ’aore rā ma te mātini roro uira ’ore. ’A ora hō’ē mahana ’aore rā hō’ē hepetoma ma te rave ’ore i te ’ohipa tūreiara’a tōtiare ’aore rā te ’āfata teata ’e ’a hi’o e aha tō ’outou huru.

9. ’A hāmani maita’i ia ’oe iho. ’A paraparau ia ’oe iho mai te au i te mau parau maita’i ’e te tāmarū tā ’oe e fa’a’ohipa i ni’a i tei herehia. E ’ere nā te Atua te mau mana’o tauturu ’ore, te tīa’i ’ore, ’aore rā te fa’ahapara’a ’ino, ’e e fa’atupu te reira i te urupu’upu’u ’e te ahoaho rahi atu.

10. ʼA tauturu i te tahi atu ta’ata. ’A rōtahi fa’ahou i tō ’outou pūai nā roto i te tāvinira’a i te tahi atu ta’ata. Tā tātou fā hope’a ’o te herera’a ïa ia vetahi ’ē mai tā te Mesia i rave, noa atu ē, tē tāfifi ra tātou. ’Ua hōro’a mai te Mesia ia tātou i te hō’ē hi’ora’a nō teie here ’a fa’a’ore ai ’oia i te hara a te mau ta’ata tei hāmani ’ino iāna ’e ’a ha’apāpū ai ’ia ha’apa’ohia tōna metua vahine noa atu ē, tē māuiui ra ’oia i ni’a i te tātauro. Noa atu ē e mea fifi, e nehenehe tātou e fāri’i i te hi’ora’a ātea maita’i a’e i ni’a i tō tātou orara’a mai te mea e fa’aea tātou ’e e feruri tātou ia vetahi ’ē ’e ’ia ’imi i te mau rāve’a nō te tauturu.

11. ’A tāmata i te hō’ē ’ohipa ha’amāhara’a rohirohi. E ha’amāha te ta’ata tāta’itahi i te rohirohi nā roto i te mau rāve’a rau. Penei a’e e mea au nā ’outou ’ia pēni, ’ia fa’aro’o i te ’upa, ’ia tai’o i te buka, ’aore rā ’ia haere nā rāpae. ’Ia tupu ana’e te urupu’upu’u ’aore rā te ahoaho i roto ia ’outou, ’a rave i te taime nō te ha’amana’o e aha te mea e fa’a’oa’oa ia ’outou ’e e tāmarū ia ’outou. ’A rave i te taime nō te rave i te reira mau mea, noa atu ē, e feruri ’outou ē, e mea rahi roa tā ’outou ’ohipa.

12. ’A vai tū’ati noa i te mau hoa ’e te ’utuāfare. E nehenehe te vaira’a i pīha’i iho i te feiā tei here ’e tei pāturu ia ’outou e tauturu ’ia fa’aiti i te urupu’upu’u. ’Ua hāmanihia ’outou nō te tū’atira’a. ’Aita e ha’amā i te fa’a’itera’a i te mea tā ’oe e fa’aruru nei. ’A tauturu i tō ’outou mau hoa ’e te ’utuāfare ’ia māramarama i te mea e tupu nei i ni’a iho ia ’outou.

13. Hō’ē ta’ahira’a i te taime hō’ē. E nehenehe ’outou e ui ia ’outou iho ē, « E aha te ’ohipa faufa’a roa a’e tā’u e nehenehe e rave i teie iho taime ? » Mai teie paha te huru tā ’outou pāhonora’a « Tā’u noa ’ohipa e ti’a ’ia rave i teie iho taime ’o te tīa’ira’a ïa i tō’u pere’o’o uta ta’ata » ’aore rā « Tā’u noa ’ohipa e ti’a ’ia rave i teie iho taime ’o te tāmāra’a ïa i te ’āu’a ». ’A fa’aoti e aha te ti’a ’ia rave i teienei ’e e aha tē nehenehe e tīa’i. Ha’api’i ’eiaha e fa’ahapa ia ’outou iho nō te paraura’a ē, « ’aita » i te hō’ē mea e nehenehe e tīa’i.

14. Ha’api’ipi’i ’i te ’ite-pāpū-ra’a. ’A fa’a’ohipa i te mau tū’ao’aora’a nā mua atu i teie ’ohipa e rave ’e i te hope’a o teie pene nō te ha’api’ipi’i ia ’outou ’ia tae atu. ’A ’imi i te mau rāve’a nō te fa’aha’amana’o ia ’outou iho ’ia rahi atu te taera’a i te roara’a o te mahana.

’A piti : I roto i te tāpura i raro nei, e pāpa’i te ta’ata hō’ē i te tahi mau mana’o nō te fa’aiti i te urupu’upu’u ’e te ahoaho tā ’outou e hina’aro e tāmata. ’A hāmani i te hō’ē fa’anahora’a nō te taime ’e e nāhea ’outou i te fa’a’ohipa i te anoha’a.

Te rāve’a nō te fa’aiti i te urupu’upu’u ’e te ahoaho	’Ahea ’e nāhea
Te rāve’a nō te fa’aiti i te urupu’upu’u ’e te ahoaho Hi’ora’a Fa’afa’aea ri’i.	’Ahea ’e nāhea E tu’u vau i te hō’ē fa’aha’amana’ora’a i ni’a i tā’u niuniu nō te fa’afa’aea e pae minuti te maoro i te taime tāmā’ara’a ’e hou a ho’i ai i te fare i muri a’e i te ’ohipa.
Te rāve’a nō te fa’aiti i te urupu’upu’u ’e te ahoaho	’Ahea ’e nāhea
Te rāve’a nō te fa’aiti i te urupu’upu’u ’e te ahoaho	’Ahea ’e nāhea
Te rāve’a nō te fa’aiti i te urupu’upu’u ’e te ahoaho	’Ahea ’e nāhea

5. Te hina’aro e ha’amaita’i roa ’ino

Tai’o :

Te ha’amaita’i-roa-ra’a, ’o te ti’aturira’a ïa ē, ’ia ’ore noa atu tātou i te mea maita’i roa i roto i te mau mea ato’a, e feiā manuia ’ore ïa tātou ’e ’aita ïa tātou i nava’i te maita’i nō te Atua ’aore rā nō te tahi ta’ata ’ē atu. Terā rā, ’ua ’ite tātou ē, ’ua hōro’a mai te Fatu i te paruparu nō te tauturu ia tātou ’ia ha’eha’a noa ’e ’ia riro ’ei feiā ’apo i te ha’api’ira’a (hi’o Etera 12:27).

Nō ni’a i te maita’i-roa-ra’a, ’ua ha’api’i mai ’o Elder Jeffrey R. Holland :

« Tā tātou noa tīa’ira’a i te maita’i-roa-ra’a mau, tei roto ïa i te fāri’ira’a i te reira ’ei hōro’a nō te ra’i mai—e’ita e nehenehe e ho’o mai i te reira. Nō reira, ’aita te maita’i o te Mesia e pūpū noa mai i te fa’aorara’a i te ’oto, i te hara ’e i te pohe, i te fa’aorara’a ato’a rā i te fa’ahapa-tāmau-ra’a ia tātou iho…

« Te mau taea’e ’e te mau tuahine, ’ua hau atu tō tātou hia’aira’a i te orara’a mai tō te Mesia te huru i tā tātou e manuia pinepine nei i te ora. Mai te mea e fā’i mau tātou i te reira ma te tāmata i te ha’amaita’i, e ’ere ïa tātou i te ta’ata fa’ahua paieti ; e ta’ata tātou… Mai te peu e tāmau noa tātou, ’ei reira e oti ai ’e e hope ai tō tātou ha’amaita’ira’a i te hō’ē vāhi o te tau mure ’ore—terā ho’i te aura’a nō te maita’i-roa-ra’a » i roto i te Faufa’a ’Āpī (« ’Ia maita’i roa ho’i ’outou—i te pae hope’a », Liahona, Novema 2017, 41–42).

Tai’o :

Teie e maha parau tumu nō ni’a i te fa’arahira’a i tōna huru aroha iāna iho ’e te fa’aitira’a i tōna hina’aro rahi ’ia tūtava noa i te ha’amaita’i-roa-ra’a iāna iho :

1. Te ’itera’a e aha te ha’amaita’i-roa-ra’a iāna iho i roto i tō tātou mau mana’o, tō tātou ’ā’au ’e i tā tātou mau ’ohipa.

2. ’A titau i te reira mau mea i roto i te mana’o, te ’ā’au ’e te mau ’ohipa.

3. ’A fāri’i i tā tātou mau hape ’ei tuha’a nō te orara’a, ’e ’eiaha e taiā ’ia hape.

4. ’A fa’atupu i te aroha ia ’outou iho ; ’a fāri’i ’e ’a here ia ’outou iho, ē tae noa atu i tō ’outou mau hapehape.

Māta’ita’i :

« Perfectionism: Will I Ever Be Good Enough? » e roa’a i ni’a i te https://churchofjesuschrist.org/study/video/self-reliance-videos [3:54].

Perfectionism: Will I Ever Be Good Enough?

Do you sometimes feel like you’re not good enough for God or anyone else? Chances are you’ve had a bout with perfectionism. Whether you know it or not, God’s Grace reaches everyone—including perfectionists.

Tāu’aparau :

I roto i te video, nāhea Olivia i te tauira’a i tōna huru ’eta’eta i ni’a iāna iho ’ei huru aroha a’e iāna iho ’e e mea nāhea ’oia i te pāto’ira’a i tōna hina’aro ’ia tūtava noa i te mea maita’i roātu ?

Hi’opo’ara’a pupu (10 minuti)

E maha hepetoma i teie nei tō tātou putuputura’a ’ei pupu. ’A pāhono ’outou iho ma te pāpū i te mau uira’a tāta’itahi i muri nei nō ni’a i te mau mea tei tupu i ni’a ia ’outou ē tae mai i teie taime.

E aha tō’u mana’o nō ni’a i teie ’ohipa i tupu ?	E’ita roa atu	I te tahi mau taime	Pinepine	I te mau taime ato’a
E aha tō’u mana’o nō ni’a i teie ’ohipa i tupu ? 1. E fa’a’ite te melo tāta’itahi o te pupu nō ni’a i tāna mau parau fafau.	E’ita roa atu	I te tahi mau taime	Pinepine	I te mau taime ato’a
E aha tō’u mana’o nō ni’a i teie ’ohipa i tupu ? 2. E ha’amata tā tātou pupu ’e e fa’aoti i te hora ti’a.	E’ita roa atu	I te tahi mau taime	Pinepine	I te mau taime ato’a
E aha tō’u mana’o nō ni’a i teie ’ohipa i tupu ? 3. E ’ohipa ’āmui mai te mau ta’ata ato’a i roto i te pupu.	E’ita roa atu	I te tahi mau taime	Pinepine	I te mau taime ato’a
E aha tō’u mana’o nō ni’a i teie ’ohipa i tupu ? 4. E ’ite au i te Vārua i roto i tā tātou mau rurura’a pupu.	E’ita roa atu	I te tahi mau taime	Pinepine	I te mau taime ato’a
E aha tō’u mana’o nō ni’a i teie ’ohipa i tupu ? 5. ’Aita vau e fa’atere i te ’āparaura’a a te pupu.	E’ita roa atu	I te tahi mau taime	Pinepine	I te mau taime ato’a
E aha tō’u mana’o nō ni’a i teie ’ohipa i tupu ? 6. E ’ite au i te hō’ē tā’amura’a ’e te mau melo o tā’u pupu.	E’ita roa atu	I te tahi mau taime	Pinepine	I te mau taime ato’a
E aha tō’u mana’o nō ni’a i teie ’ohipa i tupu ? 7. Tē mana’o nei au ē tē tupu rahi noa ra tō’u ’āueue ’ore i te pae manava.	E’ita roa atu	I te tahi mau taime	Pinepine	I te mau taime ato’a
E aha tō’u mana’o nō ni’a i teie ’ohipa i tupu ? 8. ’Ua ’ite au ē ’ua fāri’ihia vau e te mau melo nō tā’u pupu.	E’ita roa atu	I te tahi mau taime	Pinepine	I te mau taime ato’a

Tāu’aparau :

E aha tē nehenehe ia tātou ’ia rave nō te ha’amaita’i i te ’ohipa tei tupu i ni’a i tā tātou pupu ?

Fa’ata’ara’a