Tō’u niu : Paraparau—’Eiaha ’ia hau atu i te 20 minuti

Feruri :

E aha te taime tō te Metua i te ao ra i pāhono mai i tā’u mau pure ?

Māta’ita’i :

« Creating Lift [Fa’atupu i te amora’a] », i ni’a ia https://churchofjesuschrist.org/study/video/self-reliance-videos. (’Aita e video ? ’A tai’o i te parau pāpa’i nō te video « Creating Lift [Fa’atupu i te amora’a] ».)

Fa’atupu i te amora’a

Mai te mea e’ita e nehenehe e māta’ita’i i te video, ’a tai’o i teie parau pāpa’i nō te video.

Peresideni Dieter F. Uchtdorf :

’Ia nehenehe te hō’ē manureva e fa’aru’e i te tahua fenua, tītauhia ’ia fa’atupu i te amora’a. I roto i te terera’a manureva, e tupu te amora’a i te taime ’a haere ai te mata’i nā ni’a i te pererau o te hō’ē manureva, ’e e tupu atu ra te hō’ē nē’ira’a i raro a’e i te pererau, e nē’ira’a pūa’i a’e i te nē’ira’a nā ni’a mai i te pererau. ’Ia rahi a’e te amora’a i te hutira’a o te ’umera’a i raro, e pe’e te manureva i roto i te reva a rere atu ai.

Mai te reira ato’a te fa’atupura’a i te amora’a i roto i tō tātou orara’a pae vārua. I te taime e rahi a’e te pūai e tūra’i ia tātou i ni’a i te ra’i, i te mau fa’ahemara’a ’e te hepohepo e huti ia tātou i raro, e nehenehe ïa tātou e pe’e i ni’a ’e e fa’atahataha ē tae noa atu i te bāsileia o te Vārua.

Noa atu ē e rave rahi parau tumu nō te ’evanelia ’o tē tauturu ia tātou ’ia fa’atupu i te amora’a, e rōtahi au i ni’a i te hō’ē parau tumu ta’a ’ē mau.

Te pure !

Te pure, ’o te hō’ē ïa parau tumu nō te ’evanelia e fa’atupu i te amora’a. E mana tō te pure nō te fa’ateitei ia tātou nā ni’a atu i tō tātou mau pe’ape’a tāhuti nei. E nehenehe te pure e amo ia tātou nā roto i te mau ata nō te hepohepo ’e te pōiri, ē tae atu ai i te hō’ē ’iriātai māramarama ’e te ātea.

Hō’ē o te mau ha’amaita’ira’a rahi, o te mau faufa’a ta’a ’ē rahi ’e o te mau fāna’ora’a rahi ’ei tamari’i nā tō tātou Metua i te ao ra, ’o te paraparaura’a ïa iāna nā roto i te pure. E nehenehe tātou e paraparau iāna i te mau ’ohipa, te mau tāmatara’a ’e te mau ha’amaita’ira’a o te orara’a. E nehenehe tātou e fa’aro’o ’e e fāri’i i te arata’ira’a tiretiera nō ’ō mai i te Vārua Maita’i i te mau taime ’e i te mau vāhi ato’a.

(Hi’o « Prayer and the Blue Horizon », Liahona, Tiunu 2009, 5–6.)

Tāu’aparau :

Nō te aha e mea faufa’a roa ’ia fa’aro’o i roto i te pure ?

Tai’o :

Te mau ’īrava pāpa’ira’a mo’a i muri nei ’e te fa’ahitira’a parau a te peresideni Nelson :

« E fa’a’ite au ia ’oe, i roto i tō ’oe ferurira’a ’e i roto i tō ’oe ’ā’au na, nā roto i te Vārua Maita’i, ’o tē tae i ni’a ia ’oe ’e ’o tē pārahi i roto i tō ’oe ’ā’au » (Te Ha’api’ira’a Tumu ’e te mau Fafaura’a 8:2).

« E ha’amaita’ihia tō ’outou vairua ’ia ha’api’i ’outou ’ia fa’aro’o maita’i, ’ei reira ’a fa’aro’o maita’i nō te ’apo mai i te ha’api’ira’a nō roto mai i te tamari’i, te mau metua, te mau ’āpiti, te ta’ata tupu ’e te feiā fa’atere o te ’Ēkālesia, e fa’arahi rātou pa’ato’a i tō ’outou ’aravihi nō te fa’aro’o i te parau a’o a tō te ra’i » (Russell M. Nelson, « Listen to Learn », Ensign, Mē 1991, 24).

Tāu’aparau :

Nāhea tātou e ha’api’i maita’i ai ’ia ’ite ē e mau pāhonora’a terā i tā tātou mau pure ?

’Ohipa e rave

’A tahi : ’Ei pupu, ’a tai’o i te mau ta’ahira’a i raro nei ’e ’a ’āparau poto noa i te reira.

’A piti : E ani i te hō’ē melo o te pupu, ’e ’aore rā e piti, ’ia parau i te tahi atu mau ta’ata nō ni’a i te hō’ē fifi ’e ’aore rā te hō’ē uira’a nā rātou. E pe’e te mau ta’ata ato’a i te mau ta’ahira’a i raro nei ma te tāmata i te fa’aro’o maita’i.

’A toru : ’Ia oti ana’e, ’a ani i te mau melo o te pupu tei paraparau mai i tō rātou mana’o nō ni’a i te huru te pupu i fa’aro’o ia rātou.

1

Rōtahi

• Ha’atumu i ni’a i te mau parau ’e te ’apa a te ta’ata.

• ’Eiaha e tāpū i tāna parau.

• ’Eiaha e tai’o ’e ’aore rā, e hāpono i te mau poro’i i ni’a i tā ’oe niuniu.

2

Aupori

• Hi’o i te ta’ata paraparau.

• Fa’a’ohipa i te mau parau na’ina’i mai te « ’ē » ’e ’aore rā « nā reira ».

• Ha’amāuruuru i te ta’ata paraparau.

3

Hi’opo’ara’a

• ’A parau ē : « Tē parau ra ïa ’oe ē… »

• I muri iho ’a fa’ahiti i te mea tā ’oe i fa’aro’o.

4

E ani

• Ui atu : « Terā iho ā tā ’oe e parau ra ? »

• Tīa’i i te pāhonora’a ’e a fa’aro’o maita’i.

Tai’o :

Te mau fa’ahitira’a i muri nei a te feiā fa’atere o te ’Ēkālesia :

« Tē fa’aro’o nei tō tātou Metua i te ao ra i te pure a tāna mau tamari’i i te mau fenua ato’a tē ani i te mā’a nō te ’amu, i te ’ahu nō te tāpo’i i tō rātou tino, ’e te hanahana e roa’a ia rātou mai te mea ē, e ora rātou ia rātou iho » (Henry B. Eyring, « Te mau rāve’a nō te rave i te maita’i », Liahona, Mē 2011, 22).

« E ani tātou i te tauturu i tō tātou Metua i te ao ra ’e e ’imi i te pūai i roto i te Tāra’ehara a tāna Tamaiti, ’o Iesu Mesia. I roto i te mau mea tāhuti ’e te mau mea o te vārua, mai te peu ē, e roa’a ia tātou te reira tauturu hanahana, e ti’a ïa ia tātou ’ia riro ’ei ta’ata ’imi ora mito nō tātou iho ’e nō vetahi ’ē » (Robert D. Hales, « Te rirora’a ’ei ta’ata ’imi ora tārani i te pae tino ’e te pae vārua », Liahona, Mē 2009, 7–8).

Fafau ia ’oe :

E pure au i tō’u pae, ’e te ’utuāfare, i te mau po’ipo’i ’e i te mau pō ato’a. E rave au i te taime, i muri mai i te pure tāta’itahi, nō te fa’aro’o i te arata’ira’a ma te tura.