Tō’u niu : Fa’a’ohipa i te fa’aro’o ia Iesu Mesia—’Eiaha ’ia hau i te : 20 minuti

Feruri :

’A ui ia ’oe iho, « Nāhea tō’u fa’aro’o ia Iesu Mesia e tauturu ai iā’u ’ia arai i te mau taime fifi ? »

Māta’ita’i

« Fa’a’ohipa i te fa’aro’o ia Iesu Mesia » e roa’a i ni’a i te https://churchofjesuschrist.org/study/video/self-reliance-videos te [1 :43]. (’Aita e video ? Tai’o i tei pāpa’ihia nō te « fa’a’ohipa i te fa’aro’o ia Iesu Mesia. »)

Fa’a’ohipa i te fa’aro’o ia Iesu Mesia

Mai te mea ’aita ’outou e nehenehe e mata’ita’i i te video, ’a tai’o i tei pāpa’ihia.

Elder David A. Bednar :

Te ravera’a i te ’ohipa, o te fa’a’ohipara’a ïa i te fa’aro’o. Tē amo nei te mau tamari’i ’a ’Īserā’ela i te ’āfata o te fafaura’a. ’Ua haere mai rātou i te pape nō Ioridana. Te parau i parauhia, ’oia ho’i e haere rātou nā ni’a i te repo marō. ’Āfea te pape e vētea ai ? ’Ia rari ana’e tō rātou ’āvae. E haere rātou nā roto i te pape—’a fa’a’ohipa. E ’āpe’e mai te mana—e vētea te pape.

Pinepine tātou i te ti’aturi ē : « E tītau vau i teie hāro’aro’ara’a hope roa, ’ei reira vau e tāui ai te reira i roto i te mea tā’u e rave nei. » Tē parau atu nei au ia ’outou ē, ’ua nava’i tā tātou nō te ha’amata. Tē mau nei tātou i te ’avei’a ti’a. Te fa’aro’o, o te parau tumu ïa —te parau tumu—nō te ’ohipa ’e te mana. Te fa’aro’o mau, o te fa’atumura’a ïa i roto ’e i ni’a i te Fatu ia Iesu Mesia, ’e o te arata’i noara’a ïa ’ia ’ohipa.

(Hi’o « Seek Learning by Faith » [address to Church Educational System religious educators, 3 nō fepuare 2006], ChurchofJesusChrist.org/media-library.)

Tai’o :

Teie i muri nei te mau tuha’a ’īrava ’e te mau fa’ahitira’a parau a te feiā fa’atere o te ’Ēkālesia :

« ’E i te mau tau ato’a ’aore roa te ta’ata i rave i te mau semeio ē tae noa atu ’ua tupu tō rātou fa’aro’o ; nō reira, ’ua ti’aturi rātou nā mua roa i te Tamaiti a te Atua. » (Etera 12:18).

« Te fa’aro’o i te Atua, o te fa’aro’o ïa i roto i tāna mau ’ōpuara’a ’e i tāna tārena. E’ita tā tātou e nehenehe e fāri’i māite iāna ’ia pāto’i ana’e tātou i tāna tārena » (Neal A. Maxwell, That Ye May Believe [Salt Lake City: Bookcraft, 1992], 84).

« Te fa’aro’o ia Iesu Mesia, o te mea ïa e tūra’i nei ia tātou ’ia rave i te mau mea te ’ore e ti’a ia tātou ’ia rave ’āhiri e ’aita. Te fa’aro’o e tūra’i nei ia tātou ’ia ’ohipa, o te fa’aro’o ïa e fa’a-fāna’o mau nei ia tātou i tōna mana. E fa’arahi ato’a tātou i te mana o te Fa’aora i roto i tō tātou orara’a ’ia rave ana’e tātou i te mau fafaura’a mo’a ’e ’ia ha’apa’o ana’e tātou i te reira mau fafaura’a ma te pāpū. E tāhō’ē tā tātou mau fafaura’a ia tātou iāna ra ’e e fāri’i tātou i te mana atua » (Russell M. Nelson,« Fa’ahaere mai i te mana o Iesu Mesia i roto i tō tātou orara’a », Liahona, Mē 2017, 41).

« E tupu tō tātou ’oa’oa noa atu e mahana au ’ore, e hepetoma au ’ore ’aore rā e matahiti au ’ore !

« E au mau taea’e ’e e au mau tuahine here, te ’oa’oa e tupu mai i roto ia tātou, te tumu rahi e’ita nō te huru o tō tātou orara’a, nō te mau arata’ira’a ato’a rā o tō tātou mau orara’a.

« Mai te mea te fa’atumura’a o tō tātou orara’a tei ni’a i te fa’anahora’a nō te fa’aorara’a a te Atua … ’e ia Iesu Mesia ’e i tāna ’evanelia, e nehenehe tātou e fāri’i i te ’oa’oa, ta’a ’ē noa atu te mea e tupu ra—’aore rā ’aita—i roto i tō tātou orara’a. Nō ’ō mai iāna ’e nōna e tae mai ai te ’oa’oa. ’O ’oia te tumu o te ’oa’oa ato’a » (Russell M. Nelson, « Te ’oa’oa’ ’e te oraora pae vārua, » Liahona, Novema 2016, 82).

Tāu’aparau :

Nō te aha te fa’aro’o i riro ai nō te Atua ’ei mea faufa’a nō te ha’apūai ia tātou i te pae tāhuti, pae manava ’e i te pae vārua ?

’Ohipa e rave

Ta’ahira’a 1 : ’Ei pupu, ’a tai’o i te mau fa’ahitira’a parau i raro nei.

Ta’ahira’a 2 : ’A ’aparau e nāhea te ha’ara’a hou i ni’a i teie mau tohura’a a te mau peropheta e tauturu ai ia ’outou ’ia fa’arahi atu ā i tō ’outou fa’aro’o ia Iesu Mesia.

Te mau ’ohipa rū ’e te mau parau tohu

« Rahi noa atu ā tō tātou ’ite i ni’a i te tāvinira’a ’e te misiōni a te Fa’aora—rahi noa ato’a atu ā tō tātou māramaramara’a i tāna ha’api’ira’a tumu ’e i te mea tāna i rave nō tātou—rahi noa ato’a atu ā tā tātou ’ite ē, e nehenehe tāna e hōro’a mai i te mana e hina’arohia e tātou nō tō tātou orara’a » (Russell M. Nelson, « Te hutira’a i te mana ’o Iesu Mesia i roto i tō tātou orara’a », Liahona, ’Ēperēra 2017, 39).

« Tō ’outou fa’aro’o, e tupu ’oia i te rahi ’eiaha nā roto i te māhihi, nā roto rā i te ma’iti… Nō ’āfea ra tō ’outou tai’o-hōpe’a-ra’a i te Buka a Moromona mai te ’ōmuara’a e tae atu i te hope’a ? ’A tai’o fa’ahou i te reira. E fa’arahi te reira i tō ’outou fa’aro’o. » (Neil L. Andersen, « Faith Is Not by Chance, but by Choice [Te fa’aro’o ’eiaha nā roto i te māhihi, nā roto rā i te mā’itira’a], » Liahona, Novema 2015, 66–67).

E ʼīriti te mau ʼōroʼa tei fāriʼihia nā roto i te parau-tiʼa ma te haʼamanaʼo-tāmau-hia, i te mau ʼūputa nō te raʼi ʼe nā roto mai hoʼi i te reira e nehenehe ai te mana nō te atuaraʼa ’ia tae mai i roto i tō tātou oraraʼa… Te mahana Sābati ʼe te hiero moʼa, e piti ïa tautururaʼa ta’a ’ē a te raʼi tei haʼamauhia e te Atua nō te tauturu ia tātou ’ia vai i niʼa aʼe i te fāito ʼe te ’ino o te ao nei. » (David A. Bednar, « Tē maita’i rahi roa i parauhia mai ra, » Liahona, Novema 2017, 91–92).

Fafau ia ’oe :

E mā’iti au i te hō’ē mea e rave i teie hepetoma nō te ha’apūai i tō’u fa’aro’o ia Iesu Mesia.