Tō’u niu : E ō tō tātou tino nō ’ō mai i te Atua ra—’Eiaha ’ia hau i te roa : 20 minuti

Feruri :

E aha te mau ha’amaita’ira’a tā ’outou i fāri’i nō tō ’outou tino ?

Māta’ita’i :

« God’s Greatest Creation », e roa’a i ni’a i te https://churchofjesuschrist.org/study/video/self-reliance-videos [2:51]. (’Aita e video ? ’A tai’o i te pāpie « Tā te Atua hāmanira’a rahi roa a’e. »)

Tā te Atua hāmanira’a rahi roa a’e

Mai te mea, ’aita e roa’a ia ’outou i te mata’ita’i i te video, ’a tai’o i te pāpie.

Peresideni Russell M. Nelson :

’O rātou ’o tē tuatāpapa i te fa’anahora’a o te tino o te ta’ata, ’oia ïa, « ’ua ’ite ïa i te Atua i te ha’ara’a i roto i tōna ra hanahana ’e tōna ra mana. » [Te Ha’api’ira’a Tumu ’e te mau Fafaura’a 88:47].

I roto i te mata, tē vai nei te hō’ē hi’o ha’apapū hōho’a. Nā te mau uaua uira ’e te mau uaua ’i’o e hi’opo’a i nā mata e piti nō te hōro’a i te hō’ē hōho’a toru pēha’a. E tū’atira’a tō te tari’a tāta’itahi i te hō’ē mauiha’a ta’ira’a iti nō te fa’aho’i i te ta’i o te mau vāve’a ’ei ta’ira’a e fa’aro’o pāpūhia.

E pāmu maere te māfatu e vai ra i roto ia ’outou. E maha tāpo’i rairai tē ’īriti ’e tē tāpiri hau atu i te 100.000 taime i te mahana. ’A feruri i te fa’anahora’a ārai o te tino. E ’ite ’oia i te māuiui. E hāmani ’oia i te mau tenoārai. E fa’a’āpī te tino iho i tōna mau tērura tahito ’e e fāito ato’a i te rahira’a o tōna iho mau rito ora.

Te ha’apāpū nei te mau ’ateriputi e rave rahi ’e te fa’ahiahia o tō ’outou tino i to ’outou « huru Atua » [Petero 2 1:4]. ’Ua tātara mai te ’āpōsetolo Paulo i te reira mai te « hiero nō te Atua » [Korinetia 1 3:16]. Nō te aha te reira ? Nō te mea e hiero tō ’outou tino nō tō ’outou vārua. Tei tā ’outou fa’a’ohipara’a i tō ’outou tino e ū ai tō ’outou vārua i te maita’i ’aore rā i te ’ino. O te Atua te Metua o tō tātou vārua. E tuha’a tātou nō tāna ’ōpuara’a hanahana. ’E i tōna hāmanira’a i tō tātou tino, ’ua hāmanihia tātou ’ia au i te hōho’a o te Atua.

E hōpe’ara’a mure ’ore tō te tupura’a o te vārua. ’Ia ’ite mau ana’e tātou i tō tātou nātura hanahana, ’ei reira tātou e ha’avī ai i tō tātou mau hia’ai. E rōtahi tātou i tō tātou mata i ni’a i te mau hi’ora’a, tō tātou tari’a i ni’a i te mau ta’ira’a, ’e tō tātou ferurira’a i ni’a i te mau mana’o tei riro ’ei ha’amaita’ira’a nō tō tātou hāmanira’a i te pae tino, ’ei hiero nō tō tātou Metua i te Ao ra. Nō teie mau ō nō te pae tino nei, māuruuru i te Atua !

Tāu’aparau :

Nāhea tō tātou tino tāhuti e fa’aineine ai ia tātou ’ia riro mai, mai tō tātou Metua i te Ao ra te huru ?

Tai’o :

Teie i raro nei te mau fa’ahitira’a parau a te feiā fa’atere o te ’Ēkalesia :

« Nō te mea ho’i e tumu rahi tō te tino tāhuti nei i roto i te fa’anahora’a ’oa’oa a te Metua ’e tō tātou tupura’a pae vārua, tē ’imi nei Lucifero i te pāto’i i tō tātou haerera’a i mua nā roto i te ’umera’a ia tātou ’ia fa’a’ohipa i tō tātou tino ma te ti’a ’ore. » (David A. Bednar, « ’Ia tīa’i ’outou ma te pure tu’utu’u ’ore », Liahona, Nov. 2019, 34).

« Tō ’outou pārurura’a mau i roto i teie orara’a, o te ’ore-roa-ra’a atu e tu’u i te ta’ahira’a ’āvae mātāmua ’oroma’i ’ore i te vāhi e’ita e ti’a ia ’outou ’ia haere ’e i te mea e’ita e ti’a ia ’outou ’ia rave… [Tātou te ta’ata nei, e mau hia’ai pae tino tō tātou pauroa tē riro ’ei mea faufa’a nō te fa’aora ia tātou.] E mea faufa’a roa teie mau hia’ai nō te fa’a’aerera’a o te ora. Nō reira, tē aha nei te ’enemi ? … Tē ’aro nei ’oia ia tātou nā roto i tō tātou mau hia’ai. E ’ume ’oia ia tātou ’ia ’amu i te mā’a e’ita e ti’a ’ia ’amu, ’ia inu i te mau mea e’ita e ti’a ’ia inu ’e ’ia here ’ia au i te ’ore e ti’a ia tātou ’ia here ! » (Russell M. Nelson, i roto « Advice from the Prophet of the Church to Millennials Living in a Hectic World », 18 nō Fepuare 2018, Newsroom, , newsroom.ChurchofJesusChrist.org).

Tāu’aparau :

Te hāmani-’ino-ra’a i tō tātou tino, nāhea te reira ’ia ha’ape’ape’a i tō tātou ’āteura’a pae manava ?

’OHIPA E RAVE (5 minuti)

Tai’o : ’Ua ha’api’i te ’Āposetolo Paulo, « ’Aita ’outou i ’ite, e e hiero tō ’outou tino nō te Vārua Maita’i i roto ia ’outou na, tei noa’a ia ’outou i te Atua ra, e ’ere ho’i ’outou i to ’oe iho ? ’Ua tauihia ho’i ’outou i te taui, e teie nei, e ha’amaita’i i te Atua, i tō ’outou tino, ’e i tō ’outou vārua, nō te Atua ïa » (Korinetia 1 6:19-20).

Ta’ahira’a 1 : E te hō’ē ’āpiti ’ohipa, ’a feruri i te mau hiero tā ’outou i ’ite ’aore rā i haere e māta’ita’i. ’A ha’amana’o i te mea tā ’outou i ’ite, i fāri’i, i hau’a ’e i tāpe’ape’a i te hiero ’e i te ’āua o te hiero.

Ta’ahira’a 2 : E tu’u ’āmui ’outou i tō ’outou mau mana’o nō te fa’aau i rotopū i teie mau ti’ahapa ’e te mau rāve’a e ti’a ia ’outou ’ia fa’a’ohipa nō te fa’ariro i tō tātou tino tāhuti ’ei hiero. ’A fa’a’ī i te tabula i raro nei.

Te fare hiero	Tō’u tino ’ei hiero
Te fare hiero Hi’ora’a E mea mā te mau fare hiero.	Tō’u tino ’ei hiero E nehenehe tō’u ’ahu ’e tō’u fa’anehenehera’a e riro ’ei mea mā ’e te nehenehe.
Te fare hiero	Tō’u tino ’ei hiero
Te fare hiero	Tō’u tino ’ei hiero
Te fare hiero	Tō’u tino ’ei hiero

Ta’ahira’a 3 : ’Ei pupu, ’a ’āparau i te tahi o tā ’outou mau pāhonora’a.

Tai’o :

Te mau ’īrava o te pāpa’ira’a mo’a :

« ’E e fa’aho’ihia te vārua i te tino, ’e te tino i te vārua ; ’oia ïa, e fa’aho’ihia te ’āvae ’e te rima ’e te mau ponaivi ato’a i tōna tino ; ’oia ïa, e ’ore ho’i te hō’ē ’i’o rouru o te upo’o e mo’e, e fa’aho’ihia rā te mau mea ato’a ra i tō rātou iho vāhi tano mau » (Alama 40:23).

« ’E e haere atu [Iesu Mesia] ma te fa’a’oroma’i i te mau māuiui ’e te mau ’ati, ’e te mau huru fa’ahemara’a ato’a ; ’e e nā reira ’oia ’ia tupu te parau ’o tei nā ’ō mai ē, e rave ’oia i ni’a iāna te mau māuiui ’e te mau ma’i o tōna mau ta’ata… « ’E e rave ’oia i tō rātou mau paruparu i ni’a iho iāna, ’ia fa’a’īhia tōna ra ’ā’au i te aroha, mai te au i te tino, ’e ’ia ’ite ’oia nā roto i te tino i te rāve’a nō te fa’aora i tōna mau ta’ata ’ia au i tō rātou mau paruparu » (Alama 7:11-12).

Tāu’aparau :

Nāhea Iesu Mesia ’ia ha’apūai ia tātou ’ia fa’a’oroma’i māite ’e ’aore rā ’ia upo’oti’a i ni’a i tō tātou mau tā’ōti’ara’a i te pae tino ?

Fafau ia ’oe :

E mā’iti au i te hō’ē rāve’a e utuutu maita’i ai au i tō’u tino mai te hō’ē hiero.