« 6 : Tō’u niu : Tātara i te mau fifi », Te ’itera’a i te pūai i roto i te Fatu : Te ’āteura’a pae manava (2020)
« 6 : Tō’u niu : Tātara i te mau fifi », Te ’itera’a i te pūai i roto i te Fatu : Te ’āteura’a pae manava
Tō’u niu : Tātara i te mau fifi—’Eiaha ’ia hau i te roa : 20 minuti
Tāu’aparau :
E aha te fifi mau i roto i teie ’ā’amu ? E aha te tahi mau rāve’a nō teie nā ta’ata e piti ?
Tai’o :
I teie mau ’īrava pāpa’ira’a mo’a ’e te fa’ahitira’a parau a Elder Hales i muri nei :
« Inaha, ’aita ’oe i māramarama ; ’ua mana’o noa ’oe ē, e hōro’a noa vau i te reira ia ’oe, ma tō ’oe feruri ’ore, maori rā ’ia ani noa mai iā’u nei.
« ’Āre’a rā, inaha, tē parau atu nei au ia ’oe na, ’ia ’imi māite ’oe i te reira i roto i tō ’oe ferurira’a ’e i roto i tō ’oe ’ā’au e ti’a ai ; ’e i reira ’oe e ani mai ai iā’u nei ē ’ua ti’a ānei, ’e mai te mea ’ua ti’a ra, e fa’atupu ïa vau i te ahu i roto i tō ’oe ’ōuma ; ’ei reira ’oe e ’ite ai ’e ’ua ti’a iho ā.
« Mai te mea rā e ’ere i te mea ti’a, e ’ore roa ïa e noa’a ia ’oe te reira huru ahu i roto ia ’oe na, e ha’apōirihia rā tō ’oe mana’o, ’e nā te reira e ha’amo’e i te mea hape i roto i tō ’oe mana’o » (Te Ha’api’ira’a Tumu ’e te mau Fafaura’a 9:7–9).
« Tē tīa’i nei te Fatu ’ia tauturu tātou i te tātarara’a i tō tātou iho mau fifi… Tē mana’o nei tātou ē, tē ha’aferuri nei tātou i te mau ta’ata. Tē vai ra tō tātou ’aravihi nō te fa’ata’a i tō tātou mau hina’aro, nō te fa’anaho, nō te ha’amau i te mau fā, ’e nō te tātara i tō tātou mau fifi » (Robert D. Hales, « Every Good Gift (Te mau hōro’a maita’i ato’a) », New Era, ’Ātete 1983, 8, 9).
Tai’o :
I te mau ’īrava pāpa’ira’a mo’a i muri nei :
« ’E i teienei, mai te mea e mana rahi tō te Fatu mai te reira te huru, ’e ’ua rave ho’i ’oia i te mau semeio e rave rahi i rotopū i te tamari’i a te ta’ata nei, e aha ïa te mea ’aita e ti’a iāna ’ia ha’api’i mai iā’u, ’ia ti’a iā’u ’ia hāmani i te pahī ? » (1 Nephi 17:51).
« I teienei, ’aita vau, ’o Nephi, i tarai i te mau rā’au i tā te ta’ata nei huru ravera’a, ’e ’aita ho’i au i hāmani i te pahī mai tā te ta’ata nei huru hāmanira’a ; ’ua hāmani rā vau i te reira mai tā te Fatu i fa’a’ite mai iā’u ; nō reira, ’aita te reira i au i tā te ta’ata nei huru ravera’a.
’E ’ua haere pinepine atu vau, ’o Nephi, i ni’a i te mou’a, ’e ’ua pure pinepine au i te Fatu ; nō reira, ’ua fa’a’ite mai te Fatu iā’u i te mau mea rahi » (1 Nephi 18:2–3).
Tāu’aparau :
Nāhea i ti’a ai ia Nephi ’ia hāmani i te hō’ē pahī ?
Fafau ia ’oe :
E ha’a vau i ni’a i te mau ta’ahira’a tā tātou i ’āparau i roto i te ’ohipara’a nō te fa’atītī’aifaaro i tō’u mau fifi. (Ha’amana’o, ’eiaha e taora i te tauera. Tītauhia te taime nō te tātara i te mau fifi ’e nō te taui.)