Ադամի և Եվայի անկումը

Ադամի և Եվայի օրինազանցության պատճառով մեղքը և մահը աշխարհ եկան

Թեև Ադամի և Եվայի մասին աստվածաշնչյան պատմությունը շատերին է ծանոթ, այն հաճախ սխալ է ընկալվում: Մեր օրերում վերականգնված սուրբգրային ճշմարտությունները օգնում են մեզ ավելի լավ հասկանալ Եդեմի պարտեզի պայմանները և մեր առաջին ծնողների կատարած ընտրությունը, որի արդյունքում նրանք դուրս են մղվել պարտեզից: Այդ փորձառությունը հայտնի է որպես Անկում և առաջացրել է հետևանքներ, որոնք ազդել են Աստծո բոլոր զավակների վրա:

Ադամի և Եվայի անկումն անակնկալ չէր Երկնային Հոր համար: Անկումը Աստծո ծրագրի անհրաժեշտ մասն է Իր զավակների փրկության և վեհացման համար: Անկումից հետո Ադամն ու Եվան մահկանացու դարձան և երեխաներ ունենալու կարողություն ձեռք բերեցին, բայց նրանք նաև ենթարկվեցին մեղքի և մահվան:

Անկման պատճառով բոլոր կենդանի էակները ենթակա են դժվարությունների, հիվանդությունների և մահվան: Այդ հակադրությունը մեզ համար նախատեսված Աստծո ծրագրի մի մասն է, և այն նպաստում է մեր ուսումնառությանը, աճին և ուրախություն զգալու կարողությանը: Անկման հետևանքներից մեզ փրկելու համար Երկնային Հայրը տվեց Փրկիչ՝ Հիսուս Քրիստոսին: Քրիստոսը զորություն ունի փրկագնելու աշխարհը և նրանում գտնվող բոլոր մարդկանց Անկման հետևանքներից:

Ի՞նչ է Ադամի ու Եվայի Անկումը:

Ադամի և Եվայի անկումը վերաբերում է Աստծո օրենքը խախտելու համար նրանց կատարած ընտրությանը, որը նրանց մահվան ենթարկեց և բաժանեց նրանց Նրա ներկայությունից: Անկումն աշխարհ բերեց ֆիզիկական և հոգևոր մահ: Դա Երկնային Հոր ծրագրի անհրաժեշտ մասն էր, քանի որ միայն Անկումից հետո Ադամն ու Եվան կարող էին երեխաներ ունենալ: Հետևաբար, Անկումը Աստծո համար հնարավոր դարձրեց «իրականացնել մարդու անմահությունն ու հավերժական կյանքը» (Մովսես 1.39):

Թեմայի ակնարկ. Ադամի և Եվայի անկումը

Ավետարանի ուսումնասիրությանն առնչվող ուղեցույցներ. Ազատ կամք, Հիսուս Քրիստոսի Քավությունը, Արարում, Մահկանացու կյանք, Փրկության ծրագիր

Բաժին 1

Ադամն ու Եվան գործադրեցին ազատ կամք

Նկար

Ադամն ու Եվան անհանգիստ տեսք ունեն

Ադամն ու Եվան Աստծո զավակներից առաջինն էին, որ եկան երկիր: Նրանք ապրում էին Եդեմի պարտեզում՝ անմեղության վիճակում, այսինքն՝ երեխաներ չունեին և չէին զգում ուրախություն, նաև չգիտեին, թե ինչ է թշվառությունը (տես 2 Նեփի 2.23): Հատկապես կարևոր էին պարտեզի երկու ծառերը՝ կենաց ծառը և բարու և չարի գիտության ծառը (տես Մովսես 3.9): Աստված պատվիրեց Ադամին և Եվային չուտել բարու և չարի գիտության ծառի պտուղը (տես Մովսես 3.17): Եթե նրանք հնազանդվեին այդ պատվիրանին, նրանք կարող էին մնալ պարտեզում: Եթե նրանք ճաշակեին պտղից, կդառնային մահկանացու։

Աստված նաև ընդգծեց, որ նրանք ունեին բարոյական ազատ կամք կամ ընտրելու զորություն (տես Մովսես 3.16–17): Սատանան եկավ, գայթակղեց Ադամին և Եվային՝ ուտելու պտուղը: Նա ասաց, որ նրանք չեն մահանա, այլ իմաստուն կդառնան Երկնային Հոր նման (տես Մովսես 4.10–11): Երբ Ադամն ու Եվան ընտրեցին ճաշակել պտուղը, նրանց աչքերը բացվեցին, և նրանք գիտելիք ձեռք բերեցին, բայց նրանք նաև զգացին հոգևոր մահ՝ ի վերջո վտարվելով Տիրոջ ներկայությունից (տես Վարդապետություն և Ուխտեր 29.40–41): Նրանք նաև մահկանացու դարձան՝ ենթակա ցավի, հիվանդության, մահվան և այս ընկած աշխարհի այլ փորձառությունների:

Մտորելու հարցեր

Կարդացեք 2 Նեփի 2.15–16 հատվածները։ Ի՞նչ եք սովորում ազատ կամքի մասին՝ ավելի շատ հասկանալով Անկման հանգամանքների վերաբերյալ: Ի՞նչ եք սովորում չարի դեմ բարին ընտրելու մեր կարիքի կարևորության մասին: Ուշադրություն դարձրեք այս հատվածներում Լեքիի կողմից «գայթակղված» բառի օգտագործմանը: Ինչպե՞ս են այսօր մեզ հրապուրում և բարին, և չարը: Ի՞նչ է սա ձեզ ուսուցանում այն մասին, որ մենք Փրկչի կարիք ունենք:

Սովորեք միասին

Նախագահ Դալլին Հ. Օուքսն ասել է․

«Հայր Լեքին ուսուցանել է, որ եթե Անկումը տեղի չունենար, Ադամն ու Եվան «մնացած կլինեին անմեղության վիճակում, չունենալով ուրախություն, քանզի չգիտեին թշվառություն» (2 Նեփի 2.23): Առանց մահկանացու կյանքում հակադրության փորձի, «բոլոր բաները պետք է որ բաղադրված լինեին մեկում», որի դեպքում չէր լինի ոչ երջանկություն, ոչ էլ թշվառության (հատված 11): …

«Ադամն ընկավ, որպեսզի մարդիկ լինեն. և մարդիկ կան, որպեսզի ունենան ուրախություն [հատված 25]»:

Ի՞նչ եք սովորում Նախագահ Օուքսի և Լեքիի ուսմունքներից Մորմոնի Գրքում՝ հակադրության անհրաժեշտության մասին:

Լրացուցիչ աղբյուրներ

Ծննդոց 2.16–17, Հեսու 24.15,Ալմա 30.8
Դալլին Հ. Օուքս, «Երջանկության մեծ ծրագիրը», Լիահոնա, նոյեմբեր 1993, 72–75
«Ադամի և Եվայի անկումը և ազատ կամքի պարգևը», Մորմոնի Գրքի ուսմունքները և վարդապետությունը. Ուսուցչի նյութ (2021), 32–38

Բաժին 2

Հիսուս Քրիստոսը հաղթահարեց անկման հետևանքները

Նկար

Ադամն ու Եվան գառան հետ

Ադամի և Եվայի անկումը նրանց և Աստծո միջև ստեղծեց բաժանում, որը հայտնի է որպես հոգևոր մահ: Քանի որ նրանց մարմինները մահկանացու դարձան, նրանք նույնպես ենթարկվեցին ֆիզիկական մահվան և դրվեցին հակադրության մեջ այս աշխարհում, որտեղ հնարավոր կլիներ մեղք գործել: Հոգևոր և ֆիզիկական մահը և վերջնական մեղքը կխանգարեին Ադամին և Եվային ու նրանց սերունդներին վերադառնալ Աստծո ներկայություն:

Իր զավակների հանդեպ անսահման սիրուց մղված՝ Երկնային Հայրը տվեց մի Փրկիչ, որը հնարավոր դարձրեց Ադամի և Եվայի, նաև բոլորիս համար՝ ապաշխարել մեղքից: Հիսուսը կվճարեր մեր մեղքերի գինը: Նա նաև կկրեր յուրաքանչյուր տղամարդու, կնոջ և երեխայի ցավերը, որոնք երբևէ կապրեն, ներառյալ մեր մեղքերի, վնասվածքների, հիվանդությունների և կորուստների ցավը: Նա կմահանար և հարություն կառներ, որպեսզի մենք կարողանայինք նորից ապրել: Հիսուս Քրիստոսի անզուգական պարգևի միջոցով Աստված մեզ հնարավորություն տվեց ապաշխարել մեղքերից, սովորել, առաջադիմել և ի վերջո վերադառնալ ապրելու Իր հետ:

Եդեմի պարտեզից հեռանալուց հետո Ադամն ու Եվան հնազանդվեցին Տիրոջ պատվիրաններին՝ իրենց հոտերի առաջնեկներին որպես զոհ մատուցելով Տիրոջը: Նրանք ավելի ուշ իմացան, որ այս զոհաբերության նպատակն էր օգնել իրենց հիշել, որ Հիսուս Քրիստոսը կտա Իր կյանքը՝ որպես զոհ բոլորիս համար: (Տես Մովսես 5․4-8։)

Մտորելու հարցեր

Կարդացեք Մովսես 5.11 հատվածը: Այս հատվածում Եվան ամփոփել է այն, ինչ սովորեց Անկման հետ կապված իրենց փորձառությունից: Թեև մենք հաճախ անկումը տեսնում ենք որպես ցավի և տառապանքի ներմուծում երկիր, նա հատկապես չի նշում այս բաները: Ձեր կարծիքով, Եվան ինչո՞ւ նախընտրեց այդպես խոսել Անկման մասին: Ի՞նչ կարող ենք սովորել Եվայից մեր կյանքի նպատակների մասին:

Նախագահ Ռասսել Մ. Նելսոնն ուսուցանել է․

«Քանի որ Հիսուս Քրիստոսը հաղթեց այս անկում ապրած աշխարհին, և քանի որ Նա քավություն գործեց յուրաքանչյուրիս համար, դուք ևս կարող եք հաղթել մեղքով հագեցած, եսակենտրոն և հաճախ հոգնեցնող այս աշխարհին:

Քանի որ Փրկիչը, Իր անսահման Քավության միջոցով, փրկագնեց մեզանից յուրաքանչյուրին թուլությունից, սխալներից և մեղքից, և քանի որ Նա զգաց ամեն ցավ, անհանգստություն և բեռ, որ երբևէ ունեցել եք, ապա երբ դուք իսկապես ապաշխարեք և փնտրեք Նրա օգնությունը, դուք կարող եք վեր բարձրանալ այս ներկա անկայուն աշխարհից»:

Մենք ինչպե՞ս կարող ենք հաղթել այս ընկած մահկանացու աշխարհին: Ե՞րբ եք զգացել Փրկչի օգնությունը՝ աշխարհին հաղթելու համար:

Սովորեք միասին

Խմբով կարդացեք Հովհաննես 3.16 հատվածը, այնուհետև հրավիրեք խմբի անդամներին կիսվել, թե իրենց կարծիքով, ինչ է նշանակում այս հատվածը: Այնուհետև կարդացեք Մովսես 5.9 հատվածը, որը նկարագրում է Հիսուս Քրիստոսի դերը՝ որպես մեր Քավիչ: Հրավիրեք խմբի անդամներին կիսվել, թե ինչ են նրանք սովորում այս հատվածներից Աստծո սիրո և Քրիստոսի զոհաբերության և Հարության պարգևի մասին, որը թույլ է տալիս մեզ հաղթահարել Անկման հետևանքները:
Խմբով կարդացեք Ալմա 7.11–13 հատվածները, նշելով յուրաքանչյուր բառը, որը նկարագրում է մի բան, որը մենք զգում ենք այս ընկած աշխարհում: Օրինակ՝ կարող եք նկատել «փորձություններ» և «հիվանդություններ» բառերը։ Կազմեք այս բառերի ցուցակը, որպեսզի խմբի անդամները տեսնեն: Այնուհետև նորից կարդացեք հատվածը՝ այս անգամ ուշադրություն դարձնելով այն բառերին, որոնք նկարագրում են այն ամենն ինչ Քրիստոսն արել է մեզ համար: Գրեք այս բառերը երկրորդ ցուցակում՝ առաջին ցուցակի կողքին: Ի՞նչ է ձեզ սովորեցնում այս վարժությունը Ադամի և Եվայի անկման և որպես մեր Փրկիչ Հիսուս Քրիստոսի դերի միջև փոխհարաբերությունների մասին:

Լրացուցիչ աղբյուրներ

Ալմա 12.28–34
Ջեֆրի Ռ. Հոլլանդ, «Որտեղ հանդիպում են արդարադատությունը, սերն ու ողորմածությունը», Լիահոնա, մայիս 2015, 104–6
Ռոբերտ Դ. Հեյլս, «Փրկության ծրագիր. Գիտելիքի սուրբ գանձ, որը կառաջնորդի մեզ», Ensign, հոկտեմբեր 2015, 24–31

Բաժին 3

Ադամի և Եվայի անկումը էական էր Աստծո ծրագրի համար

Նկար

Ադամն ու Եվան երեխաների հետ

Ադամի և Եվայի Անկման պատճառով մենք բոլորս հնարավորություն ունենք ստանալու ֆիզիկական մարմին և զգալու մահկանացու կյանքի ուրախությունն ու դժվարությունները: Մենք նաև հնարավորություններ ունենք ամեն օր կիրառելու մեր բարոյական ազատ կամքը: Քանի որ մենք բաժանված ենք Աստծուց՝ առանց մեր նախաերկրային կյանքի մասին հիշելու, մենք պետք է սովորենք և աճենք Հիսուս Քրիստոսի հանդեպ հավատքի և մեր սեփական փորձառությունների միջոցով:

Այս ամենը էական նշանակություն ունի մեր հավերժական երջանկության համար ունեցած Աստծո ծրագրում: Որպեսզի վերադառնանք Նրա մոտ և դառնանք այնպիսին, ինչպիսին Նա կա, մենք պետք է օգտագործենք մեր ազատ կամքը՝ ընտրելու բարին չարի փոխարեն: Երբ մենք անցնում ենք այս ուսուցման գործընթացով, մենք սխալներ ենք թույլ տալիս: Բայց Հիսուս Քրիստոսը և Նրա Քավությունը հնարավորություն են տալիս մեզ հաղթահարել մեր մեղքերը և ներվել ու մաքրվել՝ թույլ տալով մեզ մի օր վերադառնալ Աստծո ներկայություն և դառնալ Նրա նման:

Մտորելու հարցեր

Կարդացեք 2 Նեփի 2.11, 15 հատվածները, ուշադրություն դարձնելով Աստծո ծրագրում հակադրության դերին: Ի՞նչ եք սովորում այս հատվածներից հակադրության անհրաժեշտության մասին: Հակադրության նպատակի ըմբռնումն ինչպե՞ս է ազդում ձեր փորձությունների մասին ունեցած ձեր մտածելակերպի վրա:
Անկումն աշխարհ բերեց և տառապանք, և ուրախություն: Կարդացեք 1 Կորնթացիս 15.21–22 և 2 Նեփի 2.19–25 հատվածները՝ փնտրելով այն օրհնությունները, որոնք հասանելի դարձան բոլոր մարդկանց Անկումից հետո: Ի՞նչ եք սովորում այս սուրբ գրություններից կյանքի նպատակի մասին:

Սովորեք միասին

Ժամանակակից սուրբ գրություններից մենք գիտենք, թե Ադամն ու Եվան ինչպես էին վերաբերվում իրենց օրինազանցությանը: Խմբով կարդացեք Մովսես 5.10–11 հատվածները: Արդյունավետ կլինի ընտրել որևէ տղամարդու՝ կարդալ հատված 10, իսկ կինը՝ հատված 11, օգնելով խմբի անդամներին պատկերացնել, որ Ադամն ու Եվան են խոսում: Ձեր խմբի հետ կիսվեք այս հատվածների վերաբերյալ ձեր զգացմունքներով: Ինչպե՞ս կարող էր Հիսուս Քրիստոսի հանդեպ Ադամի և Եվայի հավատքն օգնել նրանց իրենց օրինազանցությունը տեսնել այնպես, ինչպես տեսնում էին:
Ի՞նչն է ձեզ ուրախություն պարգևում Հրավիրեք խմբի անդամներին կիսվել այս հարցի իրենց պատասխաններով: Ապա միասին կարդացեք 2 Նեփի 2.25 հատվածը: Ձեր կարծիքով, ինչո՞ւ Լեքին ուսուցանեց իր որդուն, որ «մարդիկ կան, որպեսզի նրանք ուրախություն ունենան»: Ի՞նչ կապ ունի Ադամի և Եվայի անկումը ուրախության հետ: Հրավիրեք խմբի անդամներին կիսվել իրենց գաղափարներով:

Լրացուցիչ աղբյուրներ

Ծննդոց 2–4, 2 Նեփի 2.15–26, 9.6–21, Մոսիա 3.11–16, Ալմա 12.21–35, 22.12–14, 42.2–15, Վարդապետություն և Ուխտեր 29.34–44, Մովսես 3–5, 5.9–13
Dallin H. Oaks, “The Great Plan of Happiness,” Ensign, Nov. 1993, 72, -75.
Ջեֆրի Ռ. Հոլլանդ, «Որտեղ հանդիպում են արդարադատությունը, սերն ու ողորմածությունը», Լիահոնա, մայիս 2015, 104–6
«Ավետարանի լրիվությունը. Ադամի և Եվայի անկումը», Ensign, հունիս 2006, 48–49

Այլ աղբյուրներ Ադամի և Եվայի անկման մասին